Reperensiya Para sa Workbook sa Tigom nga Kinabuhi ug Ministeryo
MAYO 3-9
BAHANDI GIKAN SA PULONG SA DIYOS | NUMEROS 27-29
“Sundoga ang Pagkadili-mapihigon ni Jehova”
Bug-os Pabilhi ang mga Hiyas ni Jehova
Ang lima ka managsoon miduol kang Moises ug nangutana: “Nganong kuhaon man ang ngalan sa among amahan gikan sa taliwala sa iyang banay tungod kay siya walay anak nga lalaki?” Sila mihangyo: “Oh hatagi kami ug panulondon sa taliwala sa mga igsoong lalaki sa among amahan.” Si Moises ba miingon, ‘Dili puwede kay wala na sa balaod’? Wala. Hinuon, “gidala ni Moises ang ilang kaso sa atubangan ni Jehova.” (Num. 27:2-5) Unsay tubag ni Jehova? Siya miingon kang Moises: “Matarong ang gisulti sa mga anak nga babaye ni Zelopehad. Ihatag mo gayod kanila ang panulondon sa taliwala sa mga igsoong lalaki sa ilang amahan, ug ipasunod kanila ang panulondon sa ilang amahan.” Gawas niana, gihimo pang balaod ni Jehova ang maong eksepsiyon. Iyang giingnan si Moises: “Kon ang usa ka tawo nga walay anak nga lalaki mamatay, nan ipasunod ninyo ang iyang panulondon ngadto sa iyang anak nga babaye.” (Num. 27:6-8; Jos. 17:1-6) Sukad niadto, ang tanang Israelinhong babaye nga susamag situwasyon makadawat nag panulondon.
Bug-os Pabilhi ang mga Hiyas ni Jehova
Pagkamaluloton ug pagkadili-mapihigon kadto nga desisyon! Gitratar ni Jehova nga may dignidad ang maong mga babaye, nga anaa sa makaluluoyng kahimtang, sama sa iyang pagtratar sa ubang Israelinhon nga mas maayog kahimtang. (Sal. 68:5) Usa lang kini sa daghang asoy sa Bibliya nga nagpakita niini nga kamatuoran: Si Jehova dili mapihigon sa tanan niyang alagad.—1 Sam. 16:1-13; Buh. 10:30-35, 44-48.
Bug-os Pabilhi ang mga Hiyas ni Jehova
Sa unsang paagi nato masundog ang pagkadili-mapihigon ni Jehova? Hinumdomi nga may duha ka aspekto ang maong hiyas. Makatratar lang kita sa uban nga walay pagpihigpihig kon kita dili mapihigon. Lagmit kita maghunahuna nga kita dili mapihigon. Apan mouyon ka tingali nga dili kanunayng sayon ang pagsusi sa atong kaugalingon. Busa unsay angay natong himoon aron masayran kon nailhan ba kitang dili mapihigon? Dihang gustong masayran ni Jesus kon unsay ginasulti sa mga tawo bahin kaniya, gipangutana niya ang iyang kasaligang mga higala: “Sumala sa sulti sa mga tawo kinsa ba ang Anak sa tawo?” (Mat. 16:13, 14) Nganong dili sundogon si Jesus? Pangutan-a ang imong higala nga nahibalo kang matinud-anong mosulti kanimo kon ikaw ba mapihigon o dili. Kon siya moingon nga usahay duna kay pagpihigpihig labot sa rasa, edukasyon, o materyal nga kahimtang sa usa, unsay angay nimong himoon? Sinserong iampo kang Jehova ang imong pagbati, nga hangyoon siyang tabangan kang usbon ang imong tinamdan aron mas masundog nimo ang iyang pagkadili-mapihigon.—Mat. 7:7; Col. 3:10, 11.
Espirituwal nga mga Bahandi
Halad
Mga halad-nga-ilimnon. Ang mga halad-nga-ilimnon gitanyag duyog sa kadaghanang ubang mga halad, ilabina sa dihang ang mga Israelinhon nagpuyo na sa Yutang Saad. (Num 15:2, 5, 8-10) Kini naglakip sa bino (“makahubog nga ilimnon”) ug gibubo diha sa halaran. (Num 28:7, 14; itandi ang Ex 30:9; Num 15:10.) Si apostol Pablo misulat ngadto sa mga Kristohanon sa Filipos: “Kon ako gibubo nga samag halad-nga-ilimnon ibabaw sa halad-nga-inihaw ug [sa] publikong pag-alagad nga niana ang pagtuo nagtultol kaninyo, ako nalipay.” Dinhi siya migamit sa halad-nga-ilimnon sa mahulagwayong paagi, nga nagpahayag nga siya andam sa paggahin sa iyang kaugalingon alang sa pag-alagad sa mga isigka-Kristohanon. (Flp 2:17) Sa hapit na siyang mamatay, siya misulat kang Timoteo: “Ako gibubo na sama sa usa ka halad-nga-ilimnon, ug ang takdang panahon sa akong kagawasan taliabot na.”—2Ti 4:6.
MAYO 10-16
BAHANDI GIKAN SA PULONG SA DIYOS | NUMEROS 30-31
“Tumana ang Imong mga Panaad”
Panaad
Kinabubut-on, Apan Kinahanglang Tumanon sa Dihang Nakapanaad. Ang mga panaad maoy bug-os nga kinabubut-on. Apan, sa dihang ang usa ka tawo nakapanaad, kinahanglang tumanon kini sumala sa balaod sa Diyos. Tungod niana ang usa ka panaad gihisgotan ingong ‘gibugkos sa iyang kalag,’ nga nagpasabot nga ang iyang kinabuhi nahimong pasalig sa pagtuman sa iyang pulong. (Num 30:2; tan-awa usab ang Rom 1:31, 32.) Sanglit nameligro ang kinabuhi, masabtan kon nganong ang Kasulatan nag-aghat sa usa ka tawo nga mag-amping pag-ayo una pa mohimog usa ka panaad, nga maampingong magtimbangtimbang sa mga obligasyon nga nalangkit. Ang Balaod nag-ingon: “Kon manaad ka ug saad kang Jehova . . . [ang] Diyos sa walay pakyas maningil kanimo niini, ug sa pagkatinuod kini mahimong sala kanimo. Apan kon dili ka manaad, dili kini mahimong sala kanimo.”—Deu 23:21, 22.
Panaad
Usa ka solemneng saad ngadto sa Diyos sa paghimo sa usa ka buluhaton, sa paghalad o paghatag ug gasa, sa pagsulod sa usa ka pag-alagad o kahimtang, o sa paglikay sa pipila ka butang nga sa kaugalingon niini dili lapas sa balaod. Ang usa ka panaad maoy usa ka kinabubut-ong pahayag nga gihimo sa usa ka tawo sumala sa iyang kaugalingong kabubut-on. Ingong solemneng saad, ang usa ka panaad sama kaseryoso sa usa ka panumpa, ug usahay kining duha ka ekspresyon duyog nga gigamit diha sa Bibliya. (Num 30:2; Mat 5:33) Ang “panaad” mas nagtumong sa pagpahayag sa katuyoan, samtang ang “panumpa” nagtumong sa pagpangamuyo ngadto sa hataas nga awtoridad aron pamatud-an ang pagkatinuod o kalig-on sa pahayag. Ang mga panumpa sagad nga inubanan ug pagpamatuod sa usa ka pakigsaad.—Gen 26:28; 31:44, 53.
Pangunang mga Punto Gikan sa Basahon sa Numeros
30:6-8—Mahimo bang ipanulo sa Kristohanong bana ang mga panaad sa iyang asawa? Kon bahin sa mga panaad, si Jehova nakiglabot sa iyang mga magsisimba sa tinagsatagsa. Pananglitan, ang pagpahinungod ngadto kang Jehova maoy usa ka personal nga panaad. (Galacia 6:5) Ang bana walay awtoridad sa pagnulo o pagkanselar sa ingon niini nga panaad. Apan, ang asawa kinahanglang dili manaad supak sa Pulong sa Diyos o sa iyang mga obligasyon ngadto sa iyang bana.
Espirituwal nga mga Bahandi
Jepte
Ang mga tawo mahimong ideboto alang sa bug-os nga pag-alagad kang Jehova didto sa sangtuwaryo. Usa kini ka katungod nga mahimong himoon sa mga ginikanan. Si Samuel maoy usa sa maong mga tawo, nga gisaad alang sa pag-alagad sa tabernakulo pinaagi sa usa ka panumpa sa iyang inahan nga si Ana sa wala pa siya matawo. Kini nga panumpa giuyonan sa iyang bana nga si Elkana. Sa dihang nalutas na si Samuel, gitanyag siya ni Ana didto sa sangtuwaryo. Uban kaniya, nagdala si Ana ug halad nga hayop. (1Sa 1:11, 22-28; 2:11) Si Samson maoy laing bata nga linaing gideboto alang sa pag-alagad sa Diyos ingong usa ka Nazareo.—Huk 13:2-5, 11-14; itandi ang awtoridad sa amahan ibabaw sa anak nga babaye ingon sa gilatid sa Num 30:3-5, 16.
MAYO 17-23
BAHANDI GIKAN SA PULONG SA DIYOS | NUMEROS 32-33
“Aboga ang Tanang Nagpuyo sa Yuta”
Nahibalo Ka Ba?
Unsa ang “hatag-as nga mga dapit” nga sagad hisgotan sa Hebreohanong Kasulatan?
Sa dihang ang mga Israelitas hapit nang mosulod sa Yutang Saad, gisugo sila ni Jehova nga tumpagon ang mga dapit sa pagsimba sa mga Canaanhon nga atua didto. Siya miingon: “Dugmokon [ninyo] ang tanan nilang bato nga mga larawan, ug ang tanan nilang mga larawan sa inumol nga metal inyong dugmokon, ug ang tanan nilang sagradong hatag-as nga mga dapit inyong laglagon.” (Numeros 33:52) Ang maong mga dapit sa bakak nga pagsimba lagmit maoy mga hawan ibabaw sa bungtod o mga entablado ilalom sa kahoy o diha sa mga siyudad. (1 Hari 14:23; 2 Hari 17:29; Ezequiel 6:3) Kini lagmit dunay mga altar, sagradong mga haligi o poste, imahen, tungtonganan sa insenso, ug uban pang gamit alang sa pagsimba.
Pagkat-on Gikan sa Kasaypanan sa mga Israelinhon
Karong adlawa, kita nagaatubang ug daghang pagsulay nga susama sa nasinatian sa mga Israelinhon. Niining modernong katilingban, daghang butang ug mga indibiduwal ang giidolo sa mga tawo. Kini naglakip sa salapi, mga artista, magdudula, politikanhong mga organisasyon, mga lider sa relihiyon, ug bisan mga membro sa pamilya. Bisan hain niini posible nga mahimong pangunang butang sa atong kinabuhi. Kon makigsuod kita sa mga tawong wala mahigugma kang Jehova, madaot gayod ang atong espirituwalidad.
Ang gidili nga pagpakigsekso mao ang pangunang bahin sa pagsimba kang Baal nga nakadani ug nakalit-ag sa daghang Israelinhon. Nabiktima usab sa mao ra gihapong mga lit-ag ang pipila sa katawhan sa Diyos karon. Pananglitan, ang usa lang ka pagtulpok sa mouse sa kompiyuter diha sa kaugalingong panimalay mahimong igo na aron madaot ang hinlong tanlag sa usa ka maukit-ukitong tawo. Makapasubo gayod kon ang usa ka Kristohanon malit-agan sa pornograpiya diha sa Internet!
Canaan
Sa pagkamaalamon ‘wala kuhai ni Josue ug usa ka pulong ang tanan nga gisugo ni Jehova kang Moises’ labot sa paglaglag sa mga Canaanhon. (Jos 11:15) Apan ang nasod sa Israel napakyas sa pagsunod sa iyang maayong pagpanguna ug sa bug-os nga pagwagtang sa tinubdan sa kahugawan sa yuta. Ang nagpadayong presensiya sa mga Canaanhon sa ilang taliwala nakatakod sa Israel mao nga sa paglabay sa panahon kini sa walay duhaduha nakaamot sa mas daghang kamatayon (gawas pa sa krimen, imoralidad, ug idolatriya) kay sa mosangpot unta kon ang gimandong paglaglag sa tanang Canaanhon hugot pa nga gituman. (Num 33:55, 56; Huk 2:1-3, 11-23; Sal 106:34-43) Si Jehova nagpasidaan sa mga Israelinhon nga ang iyang hustisya ug ang iyang mga paghukom dili mapihigon ug kon ang mga Israelinhon makigrelasyon sa mga Canaanhon, makigminyo kanila, makigtapo sa pagtuo, ug mosagop sa ilang relihiyosong mga kostumbre ug mahugawng mga buhat kini magkahulogan sa tinong pagpahamtang sa samang mando sa kalaglagan diha sa ilang kaugalingon ug mosangpot usab sa ‘pagsuka kanila gikan sa yuta.’—Ex 23:32, 33; 34:12-17; Lev 18:26-30; Deu 7:2-5, 25, 26.
Espirituwal nga mga Bahandi
Utlanan
Human matino ang geograpikanhong dapit sa matag tribo pinaagi sa pagripa, kinahanglang tinoon usab ang gidak-on sa teritoryo niini pinasukad sa ikaduhang butang: ang gidak-on segun sa gidaghanon niini. “Inyong bahinbahinon ang yuta alang kaninyo nga panag-iyahon pinaagig ripa sumala sa inyong mga banay. Ngadto sa daghag-molupyo dugangan ninyo ang iyang panulondon, ug ngadto sa diyutay kunhoran ninyo ang iyang panulondon. Kon asa matunong ang ripa alang kaniya, kana maiyaha.” (Num 33:54) Dili na mahimong bag-ohon ang resulta sa pagripa bahin sa pangunang geograpikanhong dapit, apan mahimong dugangan o kunhoran ang gidak-on sa panulondon. Busa, sa dihang ang teritoryo sa Juda nakaplagang dako ra kaayo, ang gidak-on sa yuta niini gikunhoran pinaagi sa pagpahat sa pipila ka bahin niini ngadto sa tribo ni Simeon.—Jos 19:9.
MAYO 24-30
BAHANDI GIKAN SA PULONG SA DIYOS | NUMEROS 34-36
“Dangop Kang Jehova”
Midangop Ka ba Kang Jehova?
Pero, giunsa man paghusay sa Israel ang kaso niadtong aksidenteng nakapatay? Bisag aksidente lang, sad-an gihapon siya sa pag-ulag inosenteng dugo. (Gen. 9:5) Pero, mapakitaan siyag kaluoy ug makaikyas sa tigpanimalos pinaagi sa pagdangop sa usa sa unom ka dalangpanang siyudad. Didto, mahatagan siyag proteksiyon. Kinahanglan siyang magpabilin sa maong siyudad hangtod mamatay ang hataas nga saserdote.—Num. 35:15, 28.
Midangop Ka ba Kang Jehova?
Dihang makahimog aksidenteng pagpatay, ang nakapatay kinahanglan unang ‘mopahayag sa iyang mga pulong [o, kaso] sa igdulungog sa mga ansiyano’ diha sa ganghaan sa siyudad nga napili niyang dangpan. Ug kinahanglan siyang atimanon. (Jos. 20:4) Pipila ka panahon sa ulahi, ipaatubang siya sa mga ansiyano sa siyudad diin nahitabo ang pagpatay, ug hukman nila ang kaso. (Basaha ang Numeros 35:24, 25.) Kon ilang madesisyonan nga aksidente ang nahitabo, pabalikon nila siya sa siyudad nga dalangpanan.
Midangop Ka ba Kang Jehova?
Kon ang midangop naa na sa siyudad nga dalangpanan, siya luwas na. Bahin niining mga siyudara, si Jehova miingon: “Kini magsilbi kaninyo nga dalangpanan.” (Jos. 20:2, 3) Si Jehova wala magsugo nga husayon pag-usab ang nakapatay tungod sa mao rang kaso. Dili sab tugotang mosulod sa siyudad ang tigpanimalos aron patyon ang nakapatay. Busa, ang midangop dili na mahadlok nga panimaslan. Samtang naa sa siyudad, siya luwas ilalom sa proteksiyon ni Jehova. Dili kini prisohan. Sa siyudad, siya makatrabaho, makatabang sa uban, ug makaalagad kang Jehova nga malinawon. Oo, posible pa ang malipayon ug malamposong kinabuhi!
Espirituwal nga mga Bahandi
Usa ka Katumbas nga Lukat Alang sa Tanan
Dili si Adan ni si Eva, hinunoa, ang makabatog kaayohan gikan sa lukat. Ang Kasugoan ni Moises naundan niini nga prinsipyo: “Dili kamo magadawat ug lukat alang sa kinabuhi sa usa ka mamumuno nga takos sa kamatayon.” (Numeros 35:31) Si Adan wala hilimbongi, busa ang iyang sala kinabubut-on, tinuyo. (1 Timoteo 2:14) Kini nahisamag pagpatay sa iyang mga kaliwat, kay sila karon nakapanunod sa iyang pagkadili-hingpit, sa ingon nailalom sa silot sa kamatayon. Tin-aw, nga si Adan takos sa kamatayon, kay ingong usa ka hingpit nga tawo, siya sa kinabubut-on mipili sa paglapas sa sugo sa Diyos. Kini batok sa matarong nga mga prinsipyo ni Jehova alang kaniya nga ipadapat ang lukat kang Adan. Ang pagbayad sa sala ni Adan, hinunoa, wala magkuha sa silot sa kamatayon diha sa mga kaliwat ni Adan! (Roma 5:16) Diha sa legal nga diwa, ang malaglagong gahom sa sala giputol mismo diha sa tinubdan niini. Ang naglukat ‘namatay alang sa tanan,’ nagpas-an sa mga sangpotanan sa sala alang sa tanang mga anak ni Adan.—Hebreohanon 2:9; 2 Corinto 5:21; 1 Pedro 2:24.
MAYO 31–HUNYO 6
BAHANDI GIKAN SA PULONG SA DIYOS | DEUTERONOMIO 1-2
“Ang Paghukom Iya sa Diyos”
Si Jehova—Mahigugmaon sa Pagkamatarong ug Hustisya
Ang tinudlong mga ansiano sa kongregasyon obligado sa paghukom sa mga kaso sa seryosong kasal-anan. (1 Corinto 5:12, 13) Sa paghimo niini, hinumdoman nila nga ang hustisya sa Diyos nagtinguha sa pagpaabot ug kaluoy kon mahimo. Kon walay basehanan alang niana—sama sa kahimtang sa dili mahinulsolong makasasala—ang kaluoy dili ikapaabot. Apan dili ipalagpot sa mga ansiano ang maong makasasala sa kongregasyon tungod lamang sa pagkamapanimaslon. Sila naglaom nga ang lihok sa pagpalagpot mismo magpaamgo kaniya. (Itandi ang Ezekiel 18:23.) Ubos sa pagpanguna ni Kristo, ang mga ansiano mag-alagad sa mga interes sa hustisya, ug kini naglakip sa pagkahimong sama sa “usa ka tagoanang dapit batok sa bagyo.” (Isaias 32:1, 2) Busa sila kinahanglang magpakitag pagkadi-mapihigon ug pagkamakataronganon.—Deuteronomio 1:16, 17.
Maunongong Magpasakop sa Tinudlo-sa-Diyos nga Awtoridad
Apan, labaw pa ang gikinahanglan sa pagkahimong maghuhukom kay sa pagkahibalo lamang sa Balaod. Tungod kay dili-hingpit, ang mga ansiyano kinahanglang magmaigmat sa pagpukgo sa ilang kaugalingong malinapason nga mga hilig—sama sa kahakog, pagpihig, ug kadalo—nga basin magtuis sa ilang paghukom. Giingnan sila ni Moises: “Dili kamo magpihigpihig sa paghukom. Patalinghogi ninyo ang gagmay sama sa dagko. Dili kamo mahadlok tungod sa usa ka tawo, kay ang paghukom iya sa Diyos.” Oo, ang mga maghuhukom sa Israel naghukom alang sa Diyos. Pagkadungganon ug pagkatalagsaon nga pribilehiyo kadto!—Deuteronomio 1:16, 17.
Espirituwal nga mga Bahandi
Kasaligan ang mga Pahinumdom ni Jehova
Dihang gisugdan sa mga Israelinhon ang ilang 40 ka tuig nga panaw sa “makalilisang nga kamingawan,” si Jehova wala maghatag kanilag espesipikong mga detalye kon sa unsang paagi siya maggiya, manalipod, ug mag-atiman kanila. Apan kanunay niyang gipakita nga sila makasalig kaniya ug sa iyang mga instruksiyon. Pinaagig haligi nga panganod sa maadlaw ug haligi nga kalayo sa magabii, si Jehova nagpahinumdom sa mga Israelinhon nga siya nagpaluyo kanila sa ilang lisod nga panaw. (Deut. 1:19; Ex. 40:36-38) Siya usab nagtagana sa ilang pangunang panginahanglan. “Ang ilang mga besti wala madunot, ug ang ilang mga tiil wala manghubag.” Oo, “walay nakulang kanila.”—Neh. 9:19-21.
HUNYO 7-13
BAHANDI GIKAN SA PULONG SA DIYOS | DEUTERONOMIO 3-4
“Ang Balaod ni Jehova Maalamon ug Matarong”
Pagsabot
Ang kakugi sa pagtuon ug ang pagpadapat sa Pulong ug mga sugo sa Diyos makatabang sa usa ka tawo sa pagbaton ug mas hait nga salabotan kay sa iyang mga magtutudlo ug sa pagbaton ug mas dakong pagsabot kay sa tigulang nga mga tawo. (Sal 119:99, 100, 130; itandi ang Luc 2:46, 47.) Kini tungod kay ang kaalam ug pagsabot gipasukad diha sa putling mga regulasyon ug hudisyal nga mga sugo sa Diyos; busa ang matinumanong pagsunod niini sa Israel magpahinabo sa palibot nga kanasoran sa paglantaw kanila ingong “usa ka maalamon ug masinaboton nga katawhan.” (Deu 4:5-8; Sal 111:7, 8, 10; itandi ang 1Ha 2:3.) Ang tawong masinaboton miila nga dili angayng lapason ang Pulong sa Diyos, nagtinguha nga ipahiuyon ang iyang kinabuhi pinasukad niini, ug mangaliya sa tabang sa Diyos bahin niini. (Sal 119:169) Iyang ipatidlom ang mensahe sa Diyos (Mat 13:19-23), isulat kini diha sa papan sa iyang kasingkasing (Pr 3:3-6; 7:1-4), ug ugmaron ang pagdumot sa “tanang bakak nga alagianan” (Sal 119:104). Sa dinhi pa sa yuta, gipakita sa Anak sa Diyos kining matanga sa pagsabot, ug wala gani magtinguha nga moikyas sa kamatayon diha sa estaka tungod kay kinahanglang siya mamatay nianang paagiha aron matuman ang Kasulatan.—Mat 26:51-54.
Sa Dihang Dagaya ang Pagkamahinatagon
Kay nahingangha sa iyang nadungog ug nakita, ang rayna mapainubsanong miingon: “Malipayon kining imong mga alagad nga nagabarog sa imong atubangan kanunay, nga nagapamati sa imong kaalam!” (1 Hari 10:4-8) Wala niya ipahayag nga malipayon ang mga alagad ni Solomon tungod kay sila gilibotan sa kadagaya—bisan pag mao kana ang ilang kahimtang. Hinunoa, bulahan ang mga alagad ni Solomon tungod kay sila kanunayng makapaminaw sa hinatag-sa-Diyos nga kaalam ni Solomon. Pagkamaayong panig-ingnan ang rayna sa Sheba alang sa katawhan ni Jehova karon, nga nagpahimulos sa kaalam sa Maglalalang mismo ug nianang sa iyang Anak, si Jesu-Kristo!
Takos tagdon usab ang sunod nga komento sa rayna kang Solomon: “Hinaot pagadayegon si Jehova nga imong Diyos.” (1 Hari 10:9) Dayag, iyang nakita ang pagpaluyo ni Jehova sa kaalam ug kauswagan ni Solomon. Nahiuyon kini sa gisaad ni Jehova kanhi sa Israel. ‘Ang pagtuman sa akong kabalaoran,’ siya miingon, “maoy inyong kaalam ug pagsabot atubangan sa mga mata sa mga katawhan nga makadungog niining tanang tulumanon, ug sila moingon, ‘Kining dako nga nasod sa walay duhaduha usa ka maalamon ug masinaboton nga katawhan.’”—Deuteronomio 4:5-7.
Ikaw ba “Dato Ngadto sa Diyos”?
Sa dihang si Jehova magpanalangin sa iyang katawhan, iya gayong ihatag kanila ang kinamaayohan. (Santiago 1:17) Pananglitan, sa dihang gihatagan ni Jehova ang mga Israelinhon ug dapit nga kapuy-an, kadto maoy “usa ka yuta nga nagaagay sa gatas ug dugos.” Ingon usab niana ang paghubit sa yuta sa Ehipto. Apan lahi ang yuta nga gihatag ni Jehova sa mga Israelinhon tungod kay, sumala pa sa giingon ni Moises, kadto “usa ka yuta nga ginaatiman ni Jehova nga imong Diyos.” Sa ato pa, sila magmauswagon tungod kay si Jehova mag-atiman kanila. Kon ang mga Israelinhon magpabiling matinumanon kang Jehova, siya dagayang magapanalangin kanila ug ilang matagamtam ang kinabuhi nga mas maayo pa kay nianang sa mga nasod sa ilang palibot. Tinuod gayod nga ang panalangin ni Jehova mao ang “makapadato.”—Numeros 16:13; Deuteronomio 4:5-8; 11:8-15.
Espirituwal nga mga Bahandi
Pangunang mga Punto Gikan sa Basahon sa Deuteronomio
4:15-20, 23, 24—Ang pagdili ba sa paghimog kinulit nga mga larawan nagkahulogan nga sayop ang paghimog mga larawan aron iadorno? Dili. Ang pagdili dinhi maoy batok sa paghimog mga larawan alang sa pagsimba—batok ‘sa pagyukbo ngadto sa mga idolo ug pag-alagad kanila.’ Ang Kasulatan wala magdili sa pagkulit ug mga larawan o pagdibuho ug mga butang aron iadorno.—1 Hari 7:18, 25.
HUNYO 14-20
BAHANDI GIKAN SA PULONG SA DIYOS | DEUTERONOMIO 5-6
“Bansaya ang Inyong Anak sa Paghigugma Kang Jehova”
Mga Ginikanan, Itagana ang mga Panginahanglan sa Inyong Pamilya
Bahin niini, ang teksto nga subsob kaayong kutloon mao ang Deuteronomio 6:5-7. Palihog buksi ang inyong Bibliya ug basaha kanang mga bersikuloha. Matikdi nga una sa tanan ang mga ginikanan gisugo sa pag-ugmad sa ilang kaugalingong espirituwalidad, nga mag-ugmad ug gugma alang kang Jehova ug motuman sa iyang mga pulong. Oo, kinahanglang mahimo kang seryosong estudyante sa Pulong sa Diyos, nga magbasa kanunay sa Bibliya ug mamalandong niana aron maugmad nimo ang tinuod nga pagsabot ug gugma alang sa mga dalan, prinsipyo, ug mga balaod ni Jehova. Ingong resulta, ang imong kasingkasing mapuno sa makaiikag nga mga kamatuoran sa Bibliya nga magtukmod kanimo sa pagbati ug kalipay, pagtahod, ug gugma kang Jehova. Daghan kag maayong mga butang nga ikapaambit sa imong mga anak.—Lucas 6:45.
Sa Unsang Paagi Matabangan Ko ang Akong mga Anak nga Mahimong Tinuod nga Edukado?
Ang imong mga pangandoy, mga gusto, mga prinsipyo, ug mga interes madayag dili lang sa imong gisulti kondili sa imong ginabuhat usab. (Roma 2:21, 22) Sukad sa pagkamasuso, ang mga bata makakat-on pinaagi sa pagbantay pag-ayo sa ilang mga ginikanan. Ang mga bata makasabot kon unsay hinungdanon sa ilang mga ginikanan, ug kining mga butanga ang kasagarang mahimong hinungdanon alang sa mga bata. Kon imo gayong gihigugma si Jehova, masabtan kana sa imong mga anak. Pananglitan, ilang makita nga ang pagbasa ug pagtuon sa Bibliya hinungdanon kanimo. Ilang maamgohan nga imong giuna ang intereses sa Gingharian sa imong kinabuhi. (Mateo 6:33) Ang imong regular nga pagtambong sa Kristohanong mga tigom ug pagpakigbahin sa pagsangyaw sa Gingharian magpakita kanila nga ang sagradong pag-alagad kang Jehova maoy labing hinungdanon kanimo.—Mateo 28:19, 20; Hebreohanon 10:24, 25.
Mga Ginikanan, Itagana ang mga Panginahanglan sa Inyong Pamilya
Ingon sa gipakita sa Deuteronomio 6:7, adunay daghang kahigayonan diin kamong mga ginikanan makahisgot ug espirituwal nga mga butang uban sa inyong mga anak. Kamo man magkauban sa pagbiyahe, sa pagbuhatbuhat diha sa panimalay, o sa paglingawlingaw, makakaplag kamo ug mga kahigayonan sa pagtagana sa espirituwal nga mga panginahanglan sa inyong mga anak. Siyempre, dili kinahanglang magsige kamog “diskurso” ngadto sa inyong mga anak bahin sa mga kamatuoran sa Bibliya. Hinunoa, paningkamoti nga himoon ang kabildohay sa pamilya nga makapalig-on ug langkit-sa-espirituwal nga mga butang. Pananglitan, ang magasing Pagmata! adunay mga artikulo bahin sa nagkadaiyang mga ulohan. Ang maong mga artikulo puwedeng himoong basehanan sa mga kabildohay mahitungod sa mga mananap nga gilalang ni Jehova, lainlaing mga dapit sa kalibotan nga adunay kinaiyanhong katahom, ug sa kahibulongang kadaiyahan sa mga kultura ug paagi sa pagkinabuhi sa mga tawo. Ang maong mga kabildohay hayan magtukmod sa mga bata sa pagbasa pa ug dugang sa literatura nga gitagana sa matinumanon ug maalamong ulipon nga matang.—Mateo 24:45-47.
Espirituwal nga mga Bahandi
Gugma ug Hustisya sa Karaang Israel
Leksiyon: Dili lang panggawas nga panagway ang makita ni Jehova. Iya pong makita kon unsay naa sa atong kasingkasing. (1 Sam. 16:7) Walay hunahuna, pagbati, ug buhat nga matago gikan kaniya. Siya nagpokus sa atong maayong mga hiyas ug nagdasig nato sa pagpauswag niana. Pero gusto niya nga atong ilhon ug kontrolahon ang daotang panghunahuna sa dili pa ni moresultag sayop nga buhat.—2 Cron. 16:9; Mat. 5:27-30.
HUNYO 21-27
BAHANDI GIKAN SA PULONG SA DIYOS | DEUTERONOMIO 7-8
“Ayaw Pakigminyo Nila”
Nganong Gibaoran sa Diyos ang Iyang mga Magsisimba nga Maminyo Lamag Isigkamagtutuo?
Una, nahibalo si Jehova nga buot ni Satanas nga impluwensiyahan ang Iyang katawhan sa katibuk-an, aron sila mosimbag bakak nga mga diyos. Busa ang Diyos nagpasidaan: ‘[Ang mga dili-magtutuo] magpatalikod sa imong anak sa pagsunod kanako, ug sila tinong moalagad ug laing mga diyos.’ Peligroso kaayo kini. Kon ang nasod sa Israel moalagad sa laing mga diyos, sila mawad-ag pabor ug proteksiyon sa Diyos, ug dali ra silang mapildi sa mga kaaway. Kon mao, unsaon man sa maong nasod pagpatungha sa sinaad nga Mesiyas? Dayag nga duna gyoy katarongan si Satanas sa paghaylo sa mga Israelitas sa pagminyog mga dili-magtutuo.
Magminyo “Lamang Diha sa Ginoo”—Realistiko pa Ba?
Apan gipasulat gihapon ni Jehova sa iyang Pulong ang sugo nga magminyo lamang diha sa Ginoo. Ngano? Kay siya nahibalo kon unsay maayo alang sa iyang katawhan. Dili lang kay buot niya nga mapanalipdan ang iyang mga alagad batok sa kasakit nga resulta sa paghimog dili maalamong desisyon kondili buot sab niya nga sila magmalipayon. Sa adlaw ni Nehemias, dihang daghang Hudiyo ang naminyog mga langyaw nga wala magsimba kang Jehova, gihisgotan ni Nehemias ang dili maayong panig-ingnan ni Solomon. Bisag si Solomon ‘gihigugma sa iyang Diyos, ang langyawng mga asawa nagpahinabo kaniya nga makasala.’ (Neh. 13:23-26) Busa alang sa kaayohan sa iyang mga alagad, kita gisugo sa Diyos sa pagpakigminyo lamang sa matuod nga mga magsisimba. (Sal. 19:7-10; Isa. 48:17, 18) Ang matuod nga mga Kristohanon mapasalamaton sa mahigugmaong pag-atiman sa Diyos ug misalig sa iyang pagtultol. Pinaagi sa pagpasakop kaniya ingong Magmamando, ilang giila siya ingong Soberano sa Uniberso.—Prov. 1:5.
Likayi ang Daotang Panagkauban Niining Kataposang mga Adlaw
Ang mga Kristohanon nga gustong magminyo angay gayong mag-amping sa ilang pagpilig pakig-ubanan. Ang Pulong sa Diyos tin-awng nagtambag: “Ayaw pagpayugo nga dili timbang sa mga dili-magtutuo. Kay aduna bay panag-ubanay ang pagkamatarong ug ang kalapasan? O aduna bay pakig-ambitay ang kahayag uban sa kangitngit?” (2 Cor. 6:14) Ang Bibliya nagtambag sa mga alagad sa Diyos kinsa nangitag kapikas nga magminyo ‘diha lamang sa Ginoo,’ sa ato pa, makigminyo lamang sa dedikado, bawtismadong magsisimba ni Jehova kinsa nagkinabuhi sumala sa mga pagtulon-an sa Kasulatan. (1 Cor. 7:39) Kon ang usa maminyog isigkamagtutuo, siya makabatog kapikas nga dedikado kang Jehova ug motabang kaniya sa paghupot sa iyang integridad.
Espirituwal nga mga Bahandi
Si Jehova Nagtagana sa Atong Adlaw-Adlaw nga mga Panginahanglan
Ang atong pag-ampo alang sa tinapay niining adlawa angay usab nga magpahinumdom kanato sa atong panginahanglan sa adlaw-adlaw nga espirituwal nga pagkaon. Bisan tuod gigutom siya pag-ayo human sa dugayng pagpuasa, gipakigbisogan ni Jesus ang tentasyon ni Satanas nga ipahimong tinapay ang mga bato, nga nag-ingon: “Kini nahisulat, ‘Ang tawo mabuhi, dili sa tinapay lamang, kondili sa matag pulong nga magagula sa baba ni Jehova.’” (Mateo 4:4) Dinhi gikutlo ni Jesus ang manalagnang si Moises, kinsa miingon sa mga Israelinhon: “Gipaubos ka [ni Jehova] ug gipasagdan ka nga gutomon ug gipakaon ka sa mana, nga wala mo hiilhi ni sa imong mga amahan; aron ipaila kanimo nga dili sa tinapay lamang mabuhi ang tawo kondili sa matag pulong gikan sa baba ni Jehova nga ang tawo mabuhi.” (Deuteronomio 8:3) Ang paagi nga si Jehova nagtagana ug mana naghatag sa mga Israelinhon dili lamang sa pisikal nga pagkaon kondili usab sa espirituwal nga mga leksiyon. Ang usa ka leksiyon mao, sila gisugo nga “ang tagsatagsa mamunit sa gidaghanon nga igo kaniya sa matag adlaw.” Kon sila manguhag sobra sa maong adlaw, ang salin mabaho ug udlon. (Exodo 16:4, 20) Apan, wala kini mahitabo sa ikaunom nga adlaw sa dihang sila kinahanglang mamunit ug doble sa inadlaw nga gidaghanon aron matagan-an ang ilang mga panginahanglan alang sa Igpapahulay. (Exodo 16:5, 23, 24) Busa ang mana nagpatisok diha sa ilang hunahuna nga sila kinahanglang motuman ug ang ilang kinabuhi nagdepende dili sa tinapay lamang kondili sa“matag pulong gikan sa baba ni Jehova.”
HUNYO 28–HULYO 4
BAHANDI GIKAN SA PULONG SA DIYOS | DEUTERONOMIO 9-10
“Unsay Gipangayo ni Jehova nga Inyong Diyos Kaninyo?”
Unsay Gipangayo ni Jehova Kanato?
Unsay magpalihok kanato nga kinabubut-ong mosunod sa Diyos? Si Moises naghisgot sa usa niana, nga mao: “Ang pagkahadlok kang Jehova nga imong Diyos.” (Bersikulo 12) Dili kini daotang matang sa kahadlok, kondili kahadlok kini nga makalapas sa mga balaod sa Diyos. Kon kita adunay kahadlok sa Diyos, likayan gayod nato ang mga butang nga makapasuko kaniya.
Apan unsay atong pangunang motibo sa pagsunod sa Diyos? Si Moises nag-ingon: ‘Higugmaa si Jehova ug alagara siya sa bug-os mong kasingkasing ug sa bug-os mong kalag.’ (Bersikulo 12) Ang paghigugma sa Diyos naglangkit ug labaw pa sa pagbati. Ang usa ka reperensiya nag-ingon: “Ang Hebreohanong mga berbo alang sa pagbati usahay nagtumong usab sa mga buhat nga resulta niana.” Busa, kon gihigugma gayod nato ang Diyos, kita mobuhat sa mga butang nga makapahimuot kaniya.—Proverbio 27:11.
Unsay Gipangayo ni Jehova Kanato?
Ang atong kinabubut-ong pagsunod magdalag mga panalangin. Si Moises misulat: ‘Tumana ang kasugoan nga akong gisugo kanimo niining adlawa, alang sa imong kaayohan.’ (Bersikulo 13) Oo, ang matag sugo ni Jehova—ang tanan nga iyang gipangayo kanato—maoy alang sa atong kaayohan. Makaseguro kita niana tungod kay ang Bibliya nag-ingon: “Ang Diyos gugma.” (1 Juan 4:8) Ang mga sugo nga iyang gihatag maoy alang sa atong dumalayong kaayohan. (Isaias 48:17) Pinaagi sa pagbuhat sa tanang gisugo ni Jehova kanato, atong malikayan ang daghang problema karon, ug sa umaabot atong maangkon ang dumalayong mga panalangin ubos sa pagmando sa Gingharian.
Mahimo ba Gayod nga Ikaw ‘Makigsuod sa Diyos’?
Si Abraham sa kakaraanan maoy usa ka tawong nakapahimulos sa maong panagsuod. Si Jehova nagpaila sa maong patriarka ingong “akong higala.” (Isaias 41:8) Oo, si Jehova nag-isip kang Abraham ingong personal nga higala. Gitugotan si Abraham nianang suod nga relasyon kay siya “nagbutang ug pagtuo kang Jehova.” (Santiago 2:23) Karong adlawa, usab, si Jehova mangitag kahigayonan nga ‘masuod’ niadtong nag-alagad kaniya tungod sa gugma. (Deuteronomio 10:15) Ang iyang Pulong nag-awhag: “Duol sa Diyos, ug siya moduol kaninyo.” (Santiago 4:8) Niining mga pulonga atong makaplagan ang usa ka pagdapit ug usa ka saad.
Espirituwal nga mga Bahandi
it-1 129
Anakim
Usa ka rasa sa katawhan nga dagko kaayo nga nagpuyo sa bukirong mga rehiyon sa Canaan ingon man usab sa pipila ka dapit sa kabaybayonan, ilabina sa H niini. Sa usa ka panahon tulo ka prominenteng tawo sa mga Anakim, nga mao, si Ahiman, Sesai, ug Talmai, ang mipuyo sa Hebron. (Num 13:22) Niining dapita unang nakita sa 12 ka Hebreohanong mga espiya ang mga Anakim, ug human niadto ang 10 sa mga espiya mihatag ug makahahadlok nga taho bahin sa maong kasinatian, nga nag-ingong kining mga tawhana maoy mga kaliwat sa mga Nepilim sa wala pa ang Lunop ug kon itandi kanila, ang mga Hebreohanon maoy sama sa “mga apan-apan.” (Num 13:28-33; Deu 1:28) Ang ilang gidak-on naghimo kanilang basehanan sa paghubit bisan sa samag higanteng mga tawo nga Emim ug Repaim. Ang ilang kusog lagmit nakapatungha sa panultihon nga nag-ingon: “Kinsay lig-ong makabarog atubangan sa mga anak ni Anak?”—Deu 2:10, 11, 20, 21; 9:1-3.