Mga Polis nga Eskort Para Kang Joseph

Kon Saksi ni Jehova ka, maimadyin ba nimo nga eskortan kag mga polis samtang nagsangyaw sa balay ug balay? Mao nay eksperyensiya ni Joseph sa Micronesia niadtong 2017. Siya ug ang tulo pa ka Saksi nakigbahin sa usa ka espesyal nga kampanya sa pagsangyaw sa mga tawo sa lagyong mga isla.

Halos udto na dihang nakaabot ang upat ka Saksi sa usa ka gamayng isla nga mga 600 ang populasyon. Gisugat sila sa mayor sa maong isla diha sa baybayon. Gisaysay ni Joseph ang sunod nga nahitabo: “Ang mayor miingon nga puwede ming dad-on sa sakyanan sa polis inig-adto namo sa mga balay. Nasorpresa mi sa maong tanyag, pero matinahoron ming mibalibad. Gusto namong duawon ang mga tawo sumala sa naandang paagi sa pagpamalaybalay.”

Dayon ang mga magmamantala misugod ug baktas, nga determinadong daghan ang maestorya kutob sa mahimo. “Ang mga tawo maabiabihon ug interesado sa among mensahe,” miingon ang mga Saksi. “Ingong resulta, mas nagdugay mi sa matag balay kay sa among gidahom.”

Pagkahapon, kaduha gilabyan sa sakyanan sa polis si Joseph ug sa ikatulong higayon gihunongan na siya. Gipangutana sa mga polis si Joseph kon puwede ba nilang ihatod siya sa mga balay nga iya pang adtoon. “Mibalibad ko,” miingon si Joseph. “Pero nianang higayona namugos na sila, nga nag-ingon, ‘Halos wala ka nay panahon, maong ihatod na lang ka namo sa nahibiling mga balay.’ Dili puwedeng mobalibad na sab ko kay daghan pa kog adtoonong mga balay. Samtang magpaingon mi sa matag balay, sultihan ko nila sa ngalan sa tagbalay ug moingon sila nga kon walay mogawas inigpanuktok nako, ilang patingogon ang busina aron mahibalo ang tagbalay.

“Tungod sa maong tabang, naadtoan namo ang tanang balay nianang adlawa. Daghan mig napahimutang nga literatura ug nakigsabot mi sa mga interesado nga amo silang balikan.”

Giingnan sa mga polis si Joseph nga “nalingaw kaayo sila sa pagsangyaw ug maayong balita.” Dihang namiya na ang mga Saksi pagsalop sa adlaw, ang mga polis nga diha sa baybayon mapahiyomong mibabay nga naggunit ug mga literatura nga binase sa Bibliya.