Akong Pakigbugno Hangtod sa Kataposan
Minilyong katawhan ang usahay makadiskobreng ilang ginaatubang ang mga suliran, sama sa tagdugay nga mga suliran sa panglawas nga walay kalaoman sa madaling kasulbaran, nga nagkinahanglan sa tininuod nga bugno hangtod sa kataposan. Ako nagalaom nga ang akong eksperyensiya makadasig niadtong may ingong mga suliran nga dili mawad-an sa paglaom kondili magpadayon sa pagpakigbugno.—Sumala sa giasoy ni Monika Siebert
AKO nagtubo ingong usa sa mga Saksi ni Jehova sa amihanang Alemanya. Gawas sa kamatuorang ako gimatuto nga walay amahan—siya namatay sa dihang ako bata pa kaayo—may pagkanormal ang akong pagkabata. Ako mitubo nga nahimong walay-kabalaka, masadyaong pulahog-buhok uban ang daghang talumtom ug sa mibagay ang pagkamasadyaon nga kinaiya. Sa igong panahon akong gikuha ang bug-os-panahong ministeryo ingong payunir nga magsasangyaw.
Usa ka Miyerkoles sa bulan sa Mayo, 16 ka tuig nga miagi, si Walter, ang siyete-anyos nga anak lalaki sa usa sa mga Saksi, ug ako nagsubay sa daplin sa Subang Rhine, nga nagpadulong sa usa ka gamayng balangay diin giplano namong sangyawan, dihang ang batang si Walter nangasaba: “Monika, nganong kanunay kang matumba? Pagbantay, kay basi mahulog ka.” Ako mikatawa: “Ayaw kabalaka, maayo ra ako.” Pero dili diay ako maayo ra, sumala sa akong nasayran sa wala madugay.
Sa ubay-ubayng semana sa ulahi ang akong mga mata misugod sa pagtiawtiaw kanako. Ang tanan nahimong hanap ug misugod ako pagkakitag doble. Apan ako rang gihanaw ang akong mga kahadlok pinaagi sa pulong nga miingon: “Hinobra ra ang akong pagbasa. Akong gihago ang akong mga mata. Tingali akong gikinahanglan ang antiyohos.”
Busa ako miadto sa usa ka optometrist ug nangutana mahitungod sa pagsul-ob ug antiyohos. Apan sa akong katingala, siya miingon: “Dili, ang antiyohos dili motabang. Umadto ka sa neurologo alang sa tsek-ap.” Akong giisip nga kadto katingad-anan pero gihukom nga sundon ang iyang sugyot. Ugaling, sanglit si Hannelore, ang akong kauban, ug ako may mga amigang bisita niadtong mga panahona, akong gioktaba kadto sa kadiyut.
Giatake sa Sakit
Pila ka gabii sa kaulahian, dihang kami nagpauli uban sa among mga higala gikan sa usa sa among Kristohanong mga tigom, ang akong ulo misakit nga maorag ako nakoryentehan. Ang pagbati maoy samag gibarinahan ang akong ulo. Ang mga uyog sa nagdagan nga kotse halos dili maagwanta. Sa among pag-abot sa balay, mitelepono kami sa doktor ug ako gidala sa ospital. Dili ko daling mahikalimtan ang petsa: Hulyo 5, 1968.
Sa sinugdan mipatim-awng walay nahibalo kon unsa ang akong sakit. Apan labing menos ang tambal epektibo sa paghupay sa kasakit. Gibanabana nga tingali ako dunay tumor sa utok. Sa pagtino, gikinahanglan ang labaw pang mabug-osong mga pagsusi, mao nga ako gibalhin ngadto sa University Clinic sa Bonn, ang kaulohan sa Alemanya, sa Subang Rhine.
Sa maong panahon sa kalisod ako napalig-on pag-ayo sa pagkasinati sa gugma sa tibuok-kalibotang pagkamanagsoon, usa ka pagkamanagsoon nga niana ako nakapribilehiyo nga nabahin. Ang lokal nga mga Saksi, kinsa wala gayod nako mahibalag sa nangagi, miduaw kanako, nga daghan nagdalag mga gasa. Walay sakit—bisan unsa ka grabe—ang makahikaw kanako nianang mahigugmaong bugkos!
Tapos sa mga adlaw sa makaguol nga pagkadili-piho, ako gibalik sa lokal nga klinika ug gisultihan, nga malumo kutob sa mahimo, sa tinuod nga suliran. Ako may sakit nga wala ko sukad igdungog: multiple sclerosis. Sa sinugdan wala ko hisabti ang bug-os nga mga kahulogan. Dayon ang makalilisang nga kamatuoran: Kini usa ka sakit nga makapabakol nga alang niana, sa pagkakaron, walay nakaplagang tambal.
Depresyon kun Aksiyon—Hain?
Akong nasayrang ang multiple sclerosis maoy sakit sa utok, sa taludtod ug sa sistema nerbiyos. Ang myelin o samag-tambok nga substansiyang nagalibot sa mga nerbiyos, madaot, sa ingon magababag sa biyahe sa mga impulso sa nerbiyos gikan sa utok ngadto sa kaunoran nga ila untang palihokon. Ang dili-bug-os nga paralisis uban ang pagkawala sa pagbati sa mga bukton ug tiil mao ang resulta. Kini lisod sagubangon nga sakit, nga magaapektar sa matag biktima sa laing paagi. Kini dili usab matagna, nga kadaghanan magalimbong sa pasyente sa paghunahuna nga siya naayo na, nga unya moatake na usab sa wala-dahoma nga gutlo. Mao kining pagkadili-piho ug pagkadili-matagna ang modaot sa imong mga emosyon.
Siempre ako naguol kaayo. Ang akong mga plano sa umaabot sa maong panahon nalukoban sa pagkadili-piho. Kinahanglan ang panahon aron sa pagpasibo. Apan ako determinadong dili maluoy sa kaugalingon, ni akong tugtan nga ang uban maluoy kanako. Mahimong dawaton ko ang makapabakol nga mga epekto sa akong sakit o makigbugno. Gipalabi ko ang pagpakigbugno.
Akong nabatonan ang daghan kaayong butang nga kapasalamatan. Ako buhi. Ang akong hunahuna aktibo. Ug ako makagamit pa sa akong mga kamot. Nganong dili gamiton kana sa pagpanulat, nga sugiran ang katawhan mahitungod sa kahibulongang paglaom sa Gingharian sa Diyos? Ako gitugotan sa pagpadayon sa bug-os-panahong ministeryo, bisan tuod ang akong mga paagi sa pagbuhat niana sa maong panahon may pagkalahi na. Bisan pa niana, kadto mihatag kanako sa angkla, usa ka hinungdan sa pagpadayon sa pagpakigbugno.
Gitudloan ako sa akong inahan nianang paagiha—ang pagpadayon. Siya nahimong usa sa mga Saksi ni Jehova samtang ako bata pa, busa sukad sa pagkabata ako makugihong gibansay sa mga dalan ni Jehova. Sa panahong ako siyete na, ako regular nag-uban kaniya sa buluhaton sa pagsangyaw sa ganghaan sa ganghaan. Kadto maayong pagbansay ug nakahatag kanakog dakong kalipay. Ang iyang talagsaong kakugi alang sa interes sa Gingharian sa Diyos mimugna diha kanako, bisan niadtong linghod nga panuigon, sa tinguha sa pag-alagad kang Jehova uban sa bug-os kong kusog. Sa edad 18, tapos sa pagkompleto sa pag-eskuyla ug pagkakat-on sa usa ka okupasyon, akong gikuha ang bokasyong bug-os-panahong ministeryo.
Kon mawad-an pa ako niining talagsaong pribilehiyo sa pag-alagad sa dihang ako nagsakit, mahimong bation ko unta nga maorag gibira ang alpombra gikan sa ilalom sa akong mga tiil. Bisan tuod ang akong kusog nagpadayon sa pag-us-os, apan ang nabatonan ko pa akong magamit sa pagsimba kang Jehova, sa ingon magaalagad kaniya uban sa bug-os kong kusog. Kadtong hunahunaa naglipay sa hilabihan kanako.
Ang akong pagpanulat dili ingon nga walay bunga. Pananglitan, diha ang 16-anyos nga si Claudia si kinsa, tungod sa pagsupak sa ginikanan, dili makatuon sa Bibliya sa balay. Busa kami nagtuon pinaagi sa sulat. Maayo ang iyang pag-uswag, nahimong usa sa mga Saksi ni Jehova ug karon nagaalagad usab sa bug-os-panahong ministeryo.
Kasamtangan, ang mga doktor nagbuhat sa ilang labing maarangan sa pagtabang kanako. Ang mga kaligo, mga masahe, nagkalainlaing matang sa pagtambal, bisan ang mga pagtambal sa koryente gisulayan. Apan walay mihatag ug dakong kauswagan.
Bag-ong Tambal—Mga Panghadlok nga Taktika
Determinado ang mga doktor sa pagpahinay sa makapainutil nga mga epekto sa akong sakit. Usa ka adlaw, nga ang daghang doktor nag-alirong sa akong higdaanan, ang pangulong doktor miingon: “Nakahukom kami sa paghatag kanimog daghang abuno sa dugo. Ang pila ka tawo natabangan niining paagiha.”
Kadtong sugyota miabot nga wala gayod dahoma nga ako nakasinggit lamang ug “DILI!” Unya akong gipatin-aw ang akong relihiyosong mga hinungdan sa pagdumili. (Buhat 15:28, 29) Gidawat sa pangulong doktor ang akong desisyon, pero wala modawat ang luyoluyong medikal direktor. Labing menos kaduha sa usa ka adlaw siya nanlimbasog sa pagpabag-o kanako, nga miergo nga ang akong pagdumili magpasabot sa pagpamubo sa akong kinabuhi. Apan ako dili matarog.
Usa sa mga nars migamit sa mas malalangong paagi. Ako didto sa usa ka kuwarto alang sa usa, apan ang akong katre giduso ngadto sa bentana aron hatagag lugar ang laing tawo. Giangkon nga ang akong kuwarto mao ang bugtong kuwarto nga may koneksiyon alang sa oksiheno. (Sa ulahi akong nasayrang kadto dili tinuod.) Ang himalatyong mga pasyente gibutang sa kuwarto ug gihatagag oksiheno samtang ako napugos sa paglantaw sa ilang pagpinal! Dihang namatay ang duha kanila, ang nars nagklaro sa pagpunting unsay mahitabo kanako kon magpadayon ako sa pagsalikway sa ilang paagi sa pagtambal. Kadto nagpadayon sa daghang adlaw hangtod ang usa ka malulutong babaye nga nagtrabaho sa ospital nangilabot.
Sulod sa samang panahon ang tigulangong doktor sekretong mihatag kanakog usa ka medikal nga basahon ug usa ka librong may mga artikulo mahitungod sa pag-abuno sa dugo nga tambal nga kusganong gisugyot sa mga doktor. Apan ang mga artikulo wala magbatbat niana ingong usa ka tambal; ilang gisaysay nga kadto sa yano maoy alang sa katuyoan sa panukiduki. Tungod sa pagkahibalo niadto ako nahimong mas determinado sa pagpabiling lig-on.
Sa kataposan, ang butang wala ipadayon, ug sa kalit ako nahimong ulohan sa estorya. Ang mga hungihong milanog agi sa mga koridor mahitungod sa “lig-ong pagtuo nianang dalaga sa kuwarto 327.” Pagkadako sa akong pasalamat nga ang pag-ampo ug pagtuon sa Bibliya naghimo nga lig-on kaayo sa akong relasyon kang Jehova mao nga nakaarang ako sa pagpasundayag sa akong gugma alang kaniya dili lamang “sa pulong” pinaagi sa akong mga sulat kondili “sa binuhatan” usab.—1 Juan 3:18.
Determinado sa Paglakaw Pag-usab
Ako nanlimbasog sa pagtindog—nga balikbalik—apan sa balikbalik ang akong mga batiis malup-og. Sa balay ako mokamangkamang nga gamiton ang akong mga kamot ug mga tuhod, ug siempre, manlimbasog sa paglakaw, apan sa kanunay dili molampos. Dayon usa ka adlaw ako nakatindog! Halos dili ako makahulat sa sunod nga pagbisita sa akong doktor. Sa iyang pag-abot mihinay ako pagbakod sa katre, mitindog sa akong mga tiil—ug gilayon natumba sa salog nga makaluluoy. Ang akong determinasyon kusog, pero ang akong sakit mas kusgan. May kapuslanan ba ang pagpadayon sa pagpakigbugno?
Misulod ako sa laing klinika diin ang pag-ehersisyo mao ang gipasiugda. Kusgan pa ang akong mga bukton, mao nga ako gibansay sa pagtukod sa akong kaugalingon sa bungbong ug dayon inanay nga motindog. Sa kaulahian ako gimandoan sa pagsubay sa paglakaw sa puthawng babag, nga nagtukod sa akong kaugalingon pinaagi sa mga bukton. Mipatim-aw nga kadto sayon kaayo, pero sa sinugdan ako nakatikang lamang sa duha o tulo ka tikang, dayon upat, dayon, lima nga hinayhinay apan segurado.
Ako nagpabiling malaomon, bisan pag ang akong mga doktor miingon nga bisan pag ako nagtuon sa paglakaw pag-usab, ako dili gayod makalakaw nga wala ang akong silya sa bakol. Sa akong kalipay, sila nasayop. Ako migula sa klinika sa Hunyo sa 1970 ug wala na mogamit sa silya sa bakol sukad! Hinuon, sanglit ang matag kaso maoy lahi, dili tanan mahimong sama ka bulahan kanako.
Unsa man ang Umaabot?
Napulog-unom ka tuig ang milabay sukad niadtong unang mga pagkatumbatumba nga paglakaw ubay sa Rhine. Karon, sa 1984, ako nagalakaw gihapon nga walay tukod. Ug bisan tuod ang akong mga higala nagaingong akong nahuptan padayon ang akong masadyaong kinaiya ug ako masadyaon sama kaniadto, kini sa bahin maoy akong paningkamot nga ipahilayo ang pagkaluoy. Ang labing suod kong mga higala nasayod nga may mga panahong ang mga luha motulo nga tagdugay ug kusog. Ang akong sakit wala gihapoy kaayohon ug mahimong magpabiling ingon hangtod bag-ohon sa bag-ong sistema sa mga butang sa Diyos ang tanang butang.
Apan dili mangiob ang tanan. Adunay mga kahiubos, tinuod, pero kana matimbangan sa daghang makapalipayng mga kasinatian. Nakaila ko ang daghang matinumanon ug mahigugmaong mga igsoon kansang pagdasig labing bililhon. Ako nakatuon sa pagdaginot sa akong kusog, nga nag-usab sa akong paagi sa kinabuhi aron mohaom sa bag-ong situwasyon. Ako nakatuon nga magmapailobon ug magkalipay sa labing gamay nga ilhanan sa pag-uswag. Ang personal kong relasyon kang Jehova napalig-on sa akong pagkasabot unsa ka walay-mahimo ang tawo sa iyang pagpakigbugno sa sakit. Si Jehova lamang ang makapahinabo sa bug-os nga pagkaayo. Siya misaad sa pagbuhat niana.—Tan-awa ang Isaias 33:24; Pinadayag 21:4.
Ang bug-os-panahong ministeryo nagapadayon sa paglig-on kanako, maingon man ang mga pulong sa Isaias 41:10, 13: “‘Ayaw kahadlok, kay ako magauban kanimo. Ayaw iliraw ang pagtan-aw, kay ako mao ang imong Diyos. Lig-onon ko ikaw. Buligan ko gayod ikaw. Ako mokupot nga hugot kanimo sa akong tuo nga kamot sa pagkamatarong.’ Kay ako, si Jehova nga imong Diyos, magahawid sa imong tuo nga kamot, ang Usa nga magaingon kanimo, ‘Ayaw kahadlok. Ako mobulig kanimo.’”
Ang matag Kristohanon kinahanglang “makigbugno sa maayong bugno sa pagtuo,” ang matag usa sa kahimtang sa kinabuhi nga iyaha lamang. (1 Timoteo 6:12) Apan ang bugno dili sama. Ug may adlaw nga ang atong bugno nabugno hangtod sa kataposan! Kadaghanan ako maghunahuna kon unsa kahay kahulogan niana alang kanako sa personal dihang ako magabasa sa saad sa Diyos sa Isaias 35:5, 6: “Unya ang mga mata sa mga buta mabuka, ug ang mga igdulungog sa bungol makadungog. Unya ang bakol molukso sama sa lagsaw, ug ang dila sa amang mosinggit sa makusog.”—The New English Bible; italiko amoa.
Paneguroa ang usa ka butang. Kon ako panalanginan ni Jehova sa kinabuhing walay kataposan sa iyang bag-ong sistema sa pagkamatarong, kinahanglan ang dako abtik nga lagsaw aron ako lupigon sa paglukso!
[Kahon sa panid 22]
Mga Pulong nga Makapalipay sa Kasingkasing
ANG iyang amahan nangutana sa otso-anyos nga Debora: “Nagaampo ka ba kang Jehova?” Ang iyang tubag: “Oo, makadaghan.” “Kanus-a?” “Dihang ako nagainusara.” “Nganong sa maong panahon?” “Aron walay magatugaw kanako!”
Usa ka inahan nangutana sa sayes-anyos nga si Laurent: “Buot ba nimong dili nako palongon ang suga sa imong kuwarto karong gabhiona?” (Si Laurent mahadlok sa ngitngit ug gisultihan nga iampo kana kang Jehova.) “Dili, dili na ako mahadlok tungod kay si Jehova nagauban kanako.”
Usa ka sayes-anyos nga batang babaye miingon diha sa pag-ampo: “Salamat kanimo, Jehova, tungod sa paglaom sa pagkabanhaw. Maayo kaayo kini nga ideya!” Sa laing pag-ampo, siya miingon: “Daghan kag pagabuhaton dinhi sa among nasod dihang kami anaa na sa Paraiso, Jehova, tungod kay sige gayod ang ulan dinhi.”
Ang tres-anyos nga si Udo miampo: “Palihog, Jehova nga Diyos, himoa nga ang akong amahan mobasa sa Bibliya aron siya dili mamatay sa Armageddon!” Ang pultahan sa lawak-higdaan sa batang lalaki nabuksan, ug nadunggan sa iyang amahan ang pag-ampo. Kadto nakaguba sa iyang kataposang pagsupak sa kamatuoran, ug karong adlawa siya matinumanong alagad ni Jehova.
[Blurb sa panid 19]
“Mahimo nga ako modawat sa makapabakoI nga mga epekto sa akong sakit o makigbugno. Gipalabi ko nga makigbugno.”
[Blurb sa panid 20]
“Nahibalo ang labing suod kong mga higala nga may mga panahong ang mga luha motulo nga dugay ug kusog”
[Blurb sa panid 21]
‘Ang akong relasyon kang Jehova napalig-on sa pagkasabot unsa ka kawalay-mahimo ang tawo. Si Jehova lamang ang makapahinabog bug-os nga pagkaayo’