Daklit nga Pagkakitag Langit?

“KADTO ang labing matahom nga gutlo sa tibuok kalibotan sa migawas ako niining lawasa! . . . Ang tanan kong nakita labihang nindota! Wala akoy mahunahunaan nga bisan unsa sa kalibotan o sa gawas sa kalibotan nga ikatandi niana. Bisan ang labing matahom nga mga gutlo sa kinabuhi dili ikatandi sa akong nasinati.”—Usa ka 54-anyos nga pasyenteng naoperahan sa kasingkasing.

“Ang akong mahinumdoman samtang didto ako sa lawak sa operasyon mao nga mopatim-aw nga ako naglutawlutaw duol sa kisame. . . . Kadto daw kataw-anan kay ako didto sa itaas ug kining lawasa diha sa ubos. . . . Nakita ko nga sila nag-opera sa akong likod. . . . Dayon nahinumdoman ko nga miingon si Dr. D, ‘Anaa ang disko. Anaa ra.’ Niadtong puntoha, ako mipaubos aron maduol sa paglantaw kon unsay mahitabo.”—Usa ka 42-anyos nga babaye sa Missouri nga nagbatbat sa iyang kaugalingong operasyon sumala sa iyang “pagkakita” niana.

“Panahon sa maong panan-awon nga akong nabatonan, wala ko makita ang akong kaugalingon apan nagtindog ako sa usa ka habog nga butang kay sa ubos nako diha ang labing matahom, lunhaw nga kabalilihan. . . . Kadto nahisama sa masanagon ug hayag nga adlaw. . . . Ang bug-os nga laraw niana nahisamag hapsay nga kasagbotan sa maayong-pagkaatimang dulaanan sa golf.”—“Nakita” sa usa ka 55-anyos nga obrero sa galingan sa panapton panahon sa cardiac arrest o paghunong sa pagpitik sa kasingkasing.

Unsay gikahiusahan niining tulo ka kasinatian? Kana mao ang ginganlan karong duol-sa-kamatayong mga kasinatian (NDE) sa katawhang hapit nang mamatay. Ginatos sa maong mga kaso ang gipanghimatud-an sa mga doktor ug mga siyentipiko. Daghan sa maong duol-sa-kamatayong mga pasyente nakabaton sa gitawag migawas-sa-lawas nga mga kasinatian. Sila naghisgot mahitungod sa pagkakitag sulaw nga kahayag o pagkadidto sa usa ka dapit nga matahom sa labihan, ug sa pila ka kaso sa pagkakita kang Jesus o sa Diyos.

Sa iyang librong Recollections of Death, si Dr. Michael Sabom miingon: “Daghan niining mga tawhana, nga mga biktima sa paghunong sa pagpitik sa kasingkasing ug sa ubang nameligro-ang-kinabuhing mga suliran, naghinumdom sa serye sa ekstraordinaryong mga hitabo nga ‘nahitabo’ samtang sila nawad-an sa panimuot ug duol sa kamatayon. Giisip sa pipila kining kasinatian nga pribilehiyong nakalantaw sa daklit sa laing kalibotan nga may kinabuhi.”

Tingali nahibulong ka kon kining mga kasinatiana pamatuod ba sa kinabuhi luyo sa kamatayon, sumala sa gituohan sa pipila niining mga pasyenteha. Tinong kining duol-sa-kamatayong mga kasinatian nagapatunghag mga pangutana nga nagkinahanglag tubag. Pananglitan, Tinuod bang kining mga tawhana nakabaton sa “daklit nga pagtan-aw sa laing kalibotan nga may kinabuhi” nga mosunod sa kamatayon? Sila nakabatbat ba sa mga talan-awon sa ilang mga operasyon kay sila naglungtad ingong dili-makita nga kalag o espiritu? Ikaw duna bay dili-mamatay nga kalag nga magpadayong buhi tapos sa imong kamatayon? Aduna bay laing may-hunahuna nga pagkinabuhi tapos sa kamatayon? Ang sunod nga mga artikulo magsusi sa ebidensiya nga maylabot niining mga pangutanaha.