Pagpatik sa Pulong sa Dakong Paagi
100 KA TUIG
“ANG mga Saksi ni Jehova Nagaimprenta sa ‘Pulong’ sa Dakong Paagi.” Kana mao ang pagbatbat sa Amerikanhong magasing pamatigayon nga In-Plant Reproductions sa mga kalihokan sa pag-imprenta ug pagmantala sa Watch Tower Bible and Tract Society. Kana nagpadayon: “Nga nagagamit ug mga boluntaryo, kining pabrikaha nagapatik sa minilyon diha sa 190 ka pinulongan.”
“Sila nangabot niining pabrikaha gikan sa tibuok Tinipong Bansa ug kalibotan,” misaysay ang magsusulat. “Sila gibansay gikan sa pagkawalay alamag mahitungod sa kinaulahiang kasangkapan sa pag-imprenta pinaagi sa eksperyensiyadong mga propesyonal, ug kon magpabilin sila sa taastaas nga panahon, mabatonan nila . . . ang edukasyon. . . . Sila wala magbuhat niana tungod sa salapi.”—Italiko amoa.
“Sila wala magbuhat niana tungod sa salapi”? Kana tingali makapatingala sa pila ka tawo nga nagtuo nga walay magbudlay sama sa mga Saksi ni Jehova nga dili suholan sa pagbuhat niana.
Sukad sa legal nga pagka-inkorporar niini 100 anyos kanhi, sa Disyembre 13, 1884, ilalom sa mga balaod sa Pennsylvania, ang Watch Tower Bible and Tract Society bug-os debotado ngadto sa “pagsabwag sa mga kamatuoran sa Bibliya diha sa nagkalainlaing pinulongan pinaagi sa pagpatik sa mga tract, pulyeto, peryodiko ug ubang relihiyosong kasulatan,” sumala sa gipahayag sa orihinal nga karta niana. Dugang pa, ang Sosyedad giinkorporar nahiuyon sa Nonprofit Corporation Law sa Commonwealth of Pennsylvania. Busa, sumala sa balaod, kini dili mahimong panapi nga kalihokan.
Walay indibiduwal ang makasapi sa personal pinaagi niining Sosyedara sanglit ang Artikulo V sa karta sa Sosyedad nagaingon: “Kini [ang Sosyedad] wala maghunahuna sa ganansiyang salapi o tubo, sa dili-tinuyo o sa laing paagi, alang sa mga membro, direktor o opisyal niini.” Ang tanang nagatrabaho sa hedkuwarter sa New York sa Sosyedad nagadawat sa parehong paninugdang mga tagana nga pagkaon, puyanan ug gamayng binulang alawans—bisan kon sila mao ang 14 ka membro sa Nagamandong Lawas o mga boluntaryo nga nagatrabaho sa imprentahan, sa pagpanglimpiyo o sa mga uma sa Sosyedad. Walay klero nga sinuweldohan.
Ang tanan sa kapin ug 3,000 ka boluntaryo nagatuman sa katuyoan nga alang niana nagalungtad ang Watch Tower Bible and Tract Society—“ang pagsangyaw sa ebanghelyo sa gingharian sa Diyos ilalom kang Kristo Jesus ngadto sa tanang kanasoran ingong pamatuod sa ngalan, pulong ug pagkalabaw sa Diyos nga Makagagahom sa Tanan si JEHOVA; ang pag-imprenta ug pagpanagtag sa mga Bibliya ug pagsabwag sa mga kamatuoran sa Bibliya diha sa nagkalainlaing pinulongan . . . sa pagpauswag sa mga lalaki, mga babaye ug mga bata sa mental ug moral pinaagi sa Kristohanong misyonaryong buluhaton ug maluluyon ug malulutong pagtudlo sa katawhan mahitungod sa Bibliya.”—Kinutlo gikan sa karta sa Sosyedad.
Ila Bang Nahimo Kana?
Sa 100 ka tuig nga milabay sukad sa Disyembre 13, 1884, natuman bang epektibo niining Sosyedad sa Bibliya ang iyang katuyoan sumala sa karta nga mao ang pagsangyaw sa ebanghelyo sa Gingharian sa Diyos ngadto sa tanang kanasoran? Ang kamatuoran mismong imong gikuptan kining magasina, bisan kon diin ka nagapuyo sa kalibotan o kon unsa ang imong pinulongan, nagahatag sa yanong “Oo” nianang pangutanaha. Balik sa 1879 mga 6,000 ka kopya sa The Watch Tower gipatik nga binulan diha lamang sa Iningles. Karon sa matag isyu kapin ug 10 milyones nga kopya sa The Watchtower ang ginapatik diha sa 102 ka pinulongan. ug duolag 9 milyong kopya sa Awake! diha sa 54 ka pinulongan.
Apan ang mao bang Sosyedad tinuod nga usa ka “Sosyedad sa Bibliya”? Sukad 1896 kini nagpatik sa pila ka nagkalainlaing bersiyon sa Bibliya, apil ang King James ug American Standard nga mga bersiyon. Bisan pa niana, ang talagsaong nahimo sa natad sa pagpatik ug Bibliya mao ang New World Translation of the Holy Scriptures, nga unang giluwatan nga bahin lamang sa 1950 ug ingong kompletong tomo sa 1961. Kini karon gihubad na, sa tibuok o sa bahin, ngadto sa napulo ka ubang pinulongan. Ang katibuk-ang gidaghanon nga 40 milyong kopya ang napatik sa miaging 23 ka tuig.
Ang Labing Talagsaong Kalihokan sa Ika-20ng Siglo
Ang mga Saksi ni Jehova karon nagasangyaw diha sa 205 ka kayutaan ug diha sa mga 190 ka pinulongan. Adunay kapin ug 670,000 ka Saksi sa Tinipong Bansa ug kapin sa 100,000 ang matag usa sa Federal Republic of Germany, Italya, Mexico, Nigeria ug Brazil. Ang Watch Tower Bible and Tract Society dunay mga sangang-buhatan ug mga imprentahan nga nakatag sa tibuok kalibotan. Sa walay pagduhaduha kining 100-ka-tuig-ang-edad nga Sosyedad sa Bibliya mas lig-on ug mas aktibo kay sukad masukad! Tungod niini, ang kadungganan moadto gayod kang Jehova nga Diyos.—Zacarias 4:6.
Apan nganong angay maikag ka sa mga Saksi ni Jehova ug sa ilang pagtubo? Tungod gayod kay sila mao ang bugtong Kristohanong pundok nga sa pagkamatuod ‘nagasangyaw sa maayong balita sa Gingharian sa Diyos sa tibuok yuta una moabot ang kataposan.’ (Mateo 24:14) Sanglit, sumala sa tagna sa Bibliya, ang Diyos mobalda pag-usab sa kahikayan sa tawo ug maglaglag sa hiwi nga sistema sa mga butang karon, kini nagkahulogang ang mga Saksi ni Jehova sa pagkamatuod mao ang labing talagsaong kalihokan sa ika-20ng siglo alang sa kaluwasan sa tawo. Kana ang hinungdang kami nagtuo nga angay nimong susihon ang ilang mga pagtulon-an ug mga praktis uban ang liberal nga hunahuna.—Lucas 21:34-36; 2 Pedro 3:8-13; Ezekiel 33:6-9; Isaias 43:9, 10.
Apan tingali mangutana ka, Sa unsang paagi kining 100 ka tuig nga kahimoan nalampos? Sa unsang paagi naposible nga ang mga Saksi ni Jehova mahimong tibuok-kalibotang kalihokan sulod sa milabay nga siglo?