Gikan sa Among mga Magbabasa

Mga Batasan sa Pagtuon

Nahimuot ako sa “Mga Batan-on Nangutana . . . ” nga artikulo mahitungod sa mga batasan sa pagtuon. (Enero 8, 1985 sa Cebuano) Akong gipalandong ang akong kaugalingong mga batasan sa pagtuon. Ako mag-otso grado na karong tuiga ug gikinahanglan ko ang maong ekstrang tambag. Akong gipabasa ang artikulo sa ubang bata sa eskuylahan, basin kini makadasig usab kanila. Maayo ang akong gibati sa paghunahunang adunay uban nga tinuod nagatagad kanamo.

J. B., Kansas

Marmots

Sa pagbasa sa artikulong “The Marmot​—Nature’s Whistle Blower” (Septiyembre 8, 1984 sa Ingles), akong nabatonan ang impresyong ang mga marmot dili hikit-an sa Norte Amerika, ang mga woodchuck lamang. Sanglit ang akong bana ug ako bag-o pang nakaadto sa Rocky Mountains diin nakit-an namo ang mga marmot diha sa batoong mga pangpang, naghunahuna ako nga buot ninyong masayrang ang Norte Amerika duna usab kanila. Naghunahuna usab ako nga buot ninyong masayrang kini lahi sa woodchuck.

S. S., Minnesota

Oo, ang mga marmot tinuod nagapuyo sa mga pangpang sa amihanang Rocky Mountains ug sa ubang kasadpanhong kabukiran. Sumala sa “Encyclopedia Americana” (1977 nga edisyon), ang Amerika dunay duha ka espisye sa marmot, ang siffleur, o whistler, nga marmot nga nagapuyo sa mga tuktok sa Rocky Mountains ug ang sinating sidlakanhong woodchuck. Gipakita lang sa among artikulo ang pipila ka dapit diin hikaplagan ang mga marmot.—ED.

Ang Iglesya Katolika ug ang Gubat

Ako gingil-aran sa artikulong “Nagsugod Ako nga Langgam sa Gubat Apan Nahimong Salampati” (Disyembre 22, 1984 sa Cebuano). Nahibulong ako kon naamgohan ba ni Gg. Hurst unsa ka ngil-ad ang iyang artikulo! Akong namatikdan ang mga pulong sa Romano Katolikong pari sa 1945 ngadto sa magsusulat maoy kinutlo. Kadto mga pulong sa usa ka pari, ug sa akong hunahuna daghang tawo sulod sa bisan unsang relihiyon kadaghanan may lainlaing sukdanan kon unsay dalawaton o dili bahin sa gubat ug pakigdait. Nagtuo ako nga ang maong pahayag mabatokon kaayo sa pari ug sa tanang tawo nga sama kaniyag pagtuo. Kami, isip mga Romano Katoliko, naningkamot sa paghigugma ug pagsabot sa tanang tawo ug pagtahod sa ilang lainlaing mga pagtuo sa relihiyon, apan ako magaingon gayod nga dili ko gusto kining direktang ‘pakiggubat’ batok sa among hinigugma kaayong pagtuo.

E. H., Inglaterra

Ang asoy tinong dili atake sa Iglesya Katolika. Gisugid ni Gg. Hurst ang sulirang iyang nabatonan ingong sinserong Romano Katoliko nga naghunahuna sa paghulog ug mga bomba diha sa Alemang mga siyudad nga gipuy-an ilabina sa kauban niyang mga Romano Katoliko. Iyang giasoy sa husto ang iyang pagpakigkabildo sa iyang Katolikong tsaplin. Dili lamang nga ang Katoliko nagapatay sa Katoliko ug Protestante nagapatay sa Protestante nga minilyon sa Gubat sa Kalibotan I ug II, nga may bug-os nga bendisyon sa klero sa matag kiliran, kondili karong adlawa sa daghang bahin sa Sentral ug Habagatang Amerika, ang Katolikong mga pari ug mga membro sa iglesya makaplagang nagapakig-away sa usag usa diha sa daghang mga gubat gerilya. Ang matag sinserong Katoliko angay matinud-anong mangutana sa iyang kaugalingon kon kining mga buhata sa nagatuman nga mga Katoliko nahiuyon ba sa mga pulong ni Jesus nga makita diha sa Juan 13:35: “Pinaagi niini ang tanan mahibalo nga kamo akong mga tinun-an, kon kamo adunay gugma sa inyong taliwala.”—ED.