“Ang Kinalabwang Makina”

“Ang makina nga mapaandar sa nagkalainlaing matang sa sugnod, mobuga lamag magamit ug balik nga mga materyal, modawat ug halapad nga sukod sa ipasulod nga impormasyon, mohimog katingalahang mga kalaki sa pagproseso sa impormasyon, ug mopatunghag nagkalainlaing matang sa mga pag-obra hayan mao ang kinalabwang makina,” misulat ang Compressed Air Magazine. Mipunting sa pahayag ni George Piotroswski sa University of Florida, kini mipadayon: “Kining makinaha mao ang lawas tawo.”

Ang sugyot nga gihatag ni Piotroswski mao nga “ipadapat sa mga enhinyero ang biyolohikal nga mga prinsipyo ug mga kasangkapan nga makita sa tawhanong lawas sa pagdesinyo sa ilang mga plano.” Ang mga leksiyon sa desinyo sa weight-bearing makat-onan gikan sa tawhanong lawas, diin “gitukod sa maayong pagkadesinyong mga talikalang hinimo sa mosukol-sa-kakapoy daghag parteng materyal.” Ang tanang parte​—bukog, maskulo, ugat, ug kartilago​—tanan nagbinuligay sa paglig-on sa tibuok lawas.

Ang mga tigdesinyo sa buletas makakat-on sa mga tawhanong mga lutahan, nga sa normal nakitang walay pagkaguba, apan makasugakod ug kabug-at nga tulo ngadto sa napulo ka pilo kay sa timbang sa lawas. Diyutayng enerhiya lamang ang mapildi sa pagbag-id, diin diha sa ubang mga lutahan mas kubos kay sa makita kon mogamit ug Teflon. Ang “haw-ang” nga tubo sa tawhanong bukog maoy katingalahang pananglitan usab sa weight-bearing nga desinyo. Ang mga tumoy sa mas taas nga mga bukog sa lawas ginama sa bukog nga esponghaon ug maunat-unat busa makasukol sa mga epekto sa pagkasamad. Ug ang pagkainat nga sa normal mahitabo kon ibaligtos ang duha ka lahi nga parte mabawi sa lawas pinaagi sa anam-anam nga kausaban sa mga bukog ug sa kaugatan kon sila itakdo.