Nakatabang Sila sa mga Bata nga Makabasa

ANG pagbasa mao ang usa sa labing importanteng katakos nga makat-onan sa tawo, nga nagabukas ug daghang matang sa kahibalo. Apan milyonmilyong kabataan, nga migugol sa kadaghanan nilang panahon sa pagtan-awg telebisyon, napakyas sa pagkahimong hanas niining abilidara. Busa nasayloan nila ang pagkakat-on sa daghang hinungdanong butang, lakip sa kahibalo sa mga katuyoan sa Diyos nga makuha gikan sa pagbasa sa Bibliya ug sa literatura sa Bibliya. Apan sa unsang paagi matudloan ang bata sa pagbasa?

Ang usa ka Kristohanong ginikanan sa Manitoba, Canada, miasoy sa mga resulta nga nakab-ot sa paggamit sa librong Akong Basahon sa mga Estorya sa Bibliya nga nalangkit sa album sa upat ka teyp sa cassette niining libroha. Ang ginikanan miasoy:​

“Kuwatro anyos si Peter. Ang iyang mga magulang nga lalaki ug babaye nangeskuyla na, ug siya na lamang ang nabilin sa balay. Inigpanglakaw na sa mga bata sa pag-eskuyla, moadto si Peter sa sala ug butangan ang tape recorder ug mga teyp sa My Book of Bible Stories. Sa sinugdan molingkod ako tapad kaniya, ug samtang ginabasa ang Bible Stories diha sa teyp akong sundon ang mga pulong diha sa panid uban sa akong tudlo. Nakuha dayon kini ni Peter. Sa wala magdugay siya na lang usa. Nagpadayon kini hangtod nga misugod siya sa kindergarten.

“Usa ka adlaw, sa kuwatro anyos pa si Peter, gidala sa magtutudlo ang klase sa pagpanglakaw, ug gitudlo ni Peter ang daghag pulong nga karatula sa magtutudlo. Ang magtutudlo miingon, ‘Makabasa ka ba kon unsay gisulti niana?’ Busa gibasa ni Peter ang tanang pulong ngadto kaniya. Nakurat kaayo ang magtutudlo. Sa iyang gidala pagbalik ang klase sa eskuylahan, mikuha siyag libro sa librarya ug gipalingkod si Peter tapad niya. Iyang gibasahan siya ug daghang mga estorya, ug natingala gayod ang magtutudlo.

“Wala magdugay mikaylap ang balita ngadto sa ubang mga magtutudlo ug sa kataposan sa prinsipal sa eskuylahan. Gidala niya si Peter sa iyang opisina ug gisugo siya sa pagbasa ngadto kaniya. Dihay laing magtutudlo nianang gutloa. Ilang gipangutana siya kon sa unsang paagi nga nakakat-on siya sa pagbasag maayo. Siya mitubag nga gitabangan siya sa iyang pamilya, apan ang mga teyp sa Bible Stories ang labing nakatabang kaniya.

“Sa ulahi, nahibalo ang ubang mga bata sa eskuylahan bahin sa abilidad ni Peter sa pagbasa ug manulod ngani sa iyang klase aron sa paghangyo kaniya sa pagbasa ngadto kanila, aron sa pagtino kon tinuod ba ang ilang nadungog. Sa kataposan midesisyon ang prinsipal sa pagpabasa kang Peter atubangan sa tibuok lawas sa mga estudyante diha sa awditoryom.

“Ang prinsipal nakadayeg kaayo nga iyang giteleponohan ako. Siya miingon nga kon tawgan niya sa telepono ang mga ginikanan kini sa kasagaran sa pagsumbong sa daotang butang nga nahimo sa bata, apan karong higayona kini maoy sa pagsulti kon unsa ka maayong mobasa ni Peter ug magarbohon kaayo sila kaniya. Siya miingon nga motaas ug mopaubos ang tingog ni Peter sama nga nagpakigsulti ug sa walay pagpanuko. Mipadayon siya sa pagsulti kanamo nga iyang gipangutana si Peter kon sa unsang paagi nakakat-on siya sa pagbasa ug ang dakong gipasidunggan ni Peter mao ang mga teyp sa Bible Stories. Nangutana siya kon makabasa ba si Peter sa tibuok libro sa mga Estorya sa Bibliya, ug mitubag ako: ‘Oo, makabasa siya.’

“Dayon iyang gihangyo ako nga hulaman ang among mga teyp aron masuta kon unsang lebel sa grado kini sila. Sa miagi ang usa ka semana mitelepono siya ug miingon nga nakadayeg kaayo siya sa mga teyp ug sa maayong materyal nga mabasa diha kanila. Mihangyo siya koleksiyon sa mga teyp alang sa iyang kaugalingon tungod kay ipakita niya kini ngadto sa iyang mga pag-umangkon.”

May nakaila ka bang batang makabasa, o miuswag ang katakos sa pagbasa, pinaagi sa pagpamati sa mga asoy sa Bibliya samtang nagsunod, pulong por pulong, sa publikasyon nga gikan niini gikuha ang pagbasa? “Nalipay kaayo kami sa tabang nga nahimo sa mga teyp kanamo,” misulat ang magtiayon nga gikan sa Manitoba, Canada, “ug morekomendar nga makagamit kanila ang ubang mga ginikanan.”a

[Mga footnote]