“Ang Dumalayong Pagkabirhin ni Maria”—Ang Epekto Niini

MATINGALA, makuratan pa tingali ang pila ka magbabasa nga makakita sa ulohang “dumalayong pagkabirhin ni Maria” nga gihisgotan ilalom sa malangkobong temang “Ang Iglesya Katolika—Hunahuna Niini sa Sekso.” Dili among tuyo ang pagpasakit sa mga Katoliko o pagpakaulaw kang Maria. Ngani, kami may labing dakong pagtahod kaniya ingong usa sa matinumanong mga tinun-an ni Kristo.

Dugang pa, bug-os kaming mouyon nga si Maria usa ka birhin sa iyang gipanganak si Jesus. (Mateo 1:18-23) Ang pangutana mao, Si Maria nagpabilin bang birhin sa tibuok niyang kinabuhi sa yuta?

Daghang Katoliko Nagaduhaduha

Ang Katolikong mga reperensiya nagapadayag nga ang Katolikong mga eskolar may mga pagduhaduha nga si Maria nagpabiling birhin sa tibuok niyang kinabuhi. Ang Bibliya makadaghang nagahisgot sa “mga igsoong lalaki” ug “mga igsoong babaye” ni Jesus. (Mateo 12:46, 47; 13:55, 56; Marcos 6:3; Lucas 8:19, 20; Juan 2:12; 7:3, 5) Apan, ang pila ka Katoliko nagaangkong kining mga pulonga nagkahulogang “mga paryente,” sama sa mga ig-agaw. Tinuod ba?

Ang The New Catholic Encyclopedia nagaingon: “Ang Gregong mga pulong . . . nga gigamit sa pagpasabot sa relasyon tali ni Jesus ug sa maong mga paryente nagbaton sa kahulogan sa tinuod nga igsoong lalaki ug babaye diha sa nagsultig-Gregong kalibotan sa panahon sa Ebanghelista ug natural nga sabton sa iyang Gregong magbabasa nianang diwaa.” Gawas pa, ang The New American Bible, usa ka hubad nga Katoliko, nagaangkon diha sa potnot sa Marcos 6:1-6, diin gihisgotan ang mga igsoong lalaki ug babaye ni Jesus: “Ang suliran sa kahulogan dinhi dili unta motungha kondili pa tungod sa pagtuo sa iglesya sa dumalayong pagkabirhin ni Maria.”

Ang Bibliya tin-awng nagapadayag nga si Maria may laing mga anak gawas kang Jesus; ang pagtulon-an sa Iglesya Katolika nga siya walay laing anak mao ang nakamugna sa panaglantugi. Ang Katolikong magsusulat si J. Gilles, kinsa bug-os nagsusi sa tanang Kasulatanhong ebidensiya bahin sa ulohan, mihinapos: “Sa lakbit ug sa sinukod nga pinulongan, tungod sa pag-unong sa Iglesya [Katolika], sa akong pagtuo ako makasuma sa akong imbestigasyon sumala sa mosunod. . . . Ang UPAT KA KANONIKAL NGA EBANGHELYO nagahatag sa nagkahiusang ebidensiya . . . nga si Jesus may tinuod nga mga igsoong lalaki ug babaye sa iyang pamilya. . . . Sa atubangan niining nagkauyong lig-ong pamatuod ang naandang baroganan [sa Iglesya Katolika] mopatim-awng huyang ug luya.”

Busa kon ang Bibliya wala mohatag ug pamatuod sa “dumalayong pagkabirhin ni Maria,” diin gikan kining pagtuoha?

Sinugdanan sa Pagtuo

“Sa ubay-ubayng karaang relihiyon,” matud sa Heswitang pari si Ignace de la Potterie, “ang pagkabirhin dunay sagradong bili. Ang pila ka diyosa (Anath, Artemis, Athena) gitawag mga birhin.” Apan, unsay labot niana kang Maria? Ang Katolikong pari si Andrew Greely misaysay: “Ang simbolo ni Maria laktud naglangkit sa Kristiyanidad ngadto sa karaang mga relihiyon sa inahang mga diyosa.”

Ang propesor sa kasaysayan sa iglesya si Ernst W. Benz mikomento mahitungod niining kalangkitan sa karaang paganong mga relihiyon. “Ang pagsimba sa inahan sa Diyos,” siya misulat diha sa The New Encyclopædia Britannica, “mikusog dihang ang Kristohanong Iglesya nahimong iglesya sa imperyo ilalom kang Constantino ug ang paganong mga katawhan mihugop ngadto sa iglesya. . . . Ang pagkabalaanon ug relihiyosong kaamgohan [sa katawhan] nahulma sulod sa daghang milenyo pinaagi sa kulto sa ‘dakong inahang’ diyosa ug ‘balaang birhin,’ usa ka kaugmaran nga naggikan pa gayod sa daang bantog nga mga relihiyon sa Babilonya ug Asirya . . . Bisan pa sa dili maayong mga pamanabana sa tradisyon sa mga Ebanghelyo, ang kultohanong pagsimba sa balaang birhin ug inahan nakakaplag sulod sa Kristohanong Iglesya ug bag-ong posibleng kapahayagan diha sa pagsimba kang Maria.”

Apan unsay midasig sa Iglesya Romana sa pagpahiuyon ug pagdawat sa “dakong inahan” nga diyosa ug “balaang birhin” nga kulto? Sa usa ka butang, ang “paganong mga panon” nga mihugop sa iglesya gusto niadto; sila mibati sa karelaks diha sa usa ka iglesya nga nagsimba sa usa ka ‘dakong inahan nga birhin.’ “Sa Ehipto,” si Propesor Benz miingon, “Si Maria, sa sayo nga bahin, gisimba na ilalom sa titulong magdadala sa Diyos (Theotokos).” Busa ang “balaang birhin” nga kulto gisagop sa pagpahimuot sa “paganong mga panon” nga mihugop sa iglesya.

Gihatag ang pagdasig sa pagsimba kang Maria panahon sa unang ekumenikal nga Konsilyo sa Nicaea sa 325 K.P. Sa unsang paagi? Aw, ang doktrinang Trinidad didto gihimong opisyal Katolikong pagtulon-an, kay ang Kredong Nicene nagpahayag nga si Jesus maoy Diyos. Kadto gituohang naghimo kang Maria nga “magdadala sa Diyos,” o “inahan sa Diyos.” Ug sumala sa giingon ni Propesor Benz: “Ang Konsilyo sa Efeso (431) nagtuboy sa maong ngalan ngadto sa pagkahimong doktrina.” Ang sunod nga lakang mao ang paghimo kang Maria nga “dumalayong birhin.” Kini nahitabo dihang ang titulong “dumalayong Birhin” gihatag kang Maria sa ikaduhang Konsilyo sa Constantinople sa 553 K.P.

Sangpotanan sa mga Pagtulon-an

Si Propesor J. J. Pelikan sa Yale misulat: “Ang pagtubo sa pagkamithianon sa sakripisyong pagkinabuhi sa iglesya nakabulig sa pagpaluyo sa maong pagtuo kang Maria ingong sulundan sa tibuok-kinabuhing birhin.” Ang maong “pagkamithianon sa sakripisyong pagkinabuhi” dayag usab sa pagkaugmad sa pagmonghe ug pagkadili-minyo sa kasiglohan human sa Nicaea. Ginatos ka libong Katolikong pari, monghe, ug madre nanlimbasog—nga ang uban milampos, ang daghan napakyas—sa pagkinabuhing putli tungod kay gitudlo sa ilang iglesya nga ang sekso ug pagkabalaan dili magkabagay.

Makahuloganon, ang inilang awtoridad sa iglesya, si “San” Augustine, “nagpaila nga ang unang sala mao ang seksuwal nga kaibog.” Tinuod, ang kadaghanang modernong-adlawng teologo dili na motuo sa maong pagbadbad. Apan dili ba ang doktrina sa dumalayong pagkabirhin ni Maria ug ang balaod sa pinugos nga pagkadili-minyo sa mga pari nagamugna sa impresyon nga ang sekso hugaw? Ug dili ba ang gisubli nga polisa sa Batikano bahin sa diborsiyo ug pagpugong sa pagpanganak mipasamot sa suliran alang sa minilyong Katoliko?

Labaw pang hinungdanon, unsa ang hunahuna sa Bibliya bahin sa sekso?

[Blurb sa panid 8]

“Ang UPAT KA KANONIKAL NGA EBANGHELYO nagahatag sa nahiusang ebidensiya . . . nga si Jesus may tinuod nga mga igsoong lalaki ug babaye.”—Katolikong magsusulat

[Letrato sa panid 8]

‘Ang simbolo ni Maria naglangkit sa Kristiyanidad sa karaang mga relihiyon nga may mga inahang diyosa’