Ang Hunahuna sa Bibliya Bahin sa Sekso
ALANG sa daghang sinserong Katoliko, ang ideya mismo nga si Maria nakigsekso sa iyang banang si Jose dili katuohan ug makapakurat. Kini tungod kay ang tibuok tinamdan sa ilang iglesya bahin sa sekso naghatag sa kasarangang Katoliko sa impresyon nga ang usa ka tawo dili balaanon kon siya makigsekso, bisan pag sulod sa kaminyoon. Apan dili ba magkaangay ang kaminyoon ug pagkabalaan? Unsay ginapadayag sa Bibliya?
Sa karaang Israel, gipangayo sa Diyos nga ang mga saserdote magbalaan, ug bisan pa niana ang pagminyo matarong alang kanila. (Levitico 21:6, 7, 13) Sa Kristohanong kongregasyon, si Pedro—si kinsa giisip sa Iglesya Katolika ingong unang papa—maoy usa ka lalaking minyo, sama sa kadaghanan sa mga apostol. (Mateo 8:14; 1 Corinto 9:5) Sulod sa Kristohanong kongregasyon, ang usa ka “magtatan-aw” (“obispo,” diha sa Katolikong Douay Version) mamahimong “bana sa usa ka asawa.” (1 Timoteo 3:2) Ug ang “mga ansiano” (“mga pari,” diha sa Douay) mahimong minyo. (Tito 1:5-8) Sa pagkamatuod, ang tanang matinumanong unang-siglong Kristohanon maoy “mga pinili sa Diyos, balaan ug hinigugma,” ug daghan kanila maoy minyo. (Colosas 3:12, 18-21) Dili mapuslanon ang pag-angkon nga kadto maoy mga kaminyoon nga walay pakigsekso, kay kana maoy laktud nga pagsupak sa apostolikanhong tambag nga gihatag sa 1 Corinto 7:2-5.
Busa, sumala sa Bibliya, ang kaminyoon ug pagkabalaan dili ingong dili magkaangay. Mohisgot ba ang Diyos nga siya ‘bana’ sa Israel, ug mohisgot ba ang Bibliya nga si Kristo mao ang “bana” sa Kristohanong kongregasyon, kon may kahugawan pa ang relasyon sa kaminyoon?—Isaias 54:5; 62:4, 5; Efeso 5:23-32; Pinadayag 19:7; 21:2, 9.
Busa, dili kinahanglang kita may kasakit bahin sa pagtuo sa yanong pamatuod sa Bibliya nga, tapos sa pagkatawo ni Jesus gikan sa ulay, si Jose nagkinabuhi sa normal nga minyong kinabuhi ipon ni Maria, nga mihatag kaniyag mga laing anak lalaki ug babaye. Sila maoy unodnong mga igsoon ni Jesus sa inahan, kay ang matag usa kanila gipanganak man ni Maria. (Mateo 1:24, 25; Marcos 3:31) Kini dili gayod mopugong kanato sa paghigugma ug pagtahod kang Maria ingong usa ka babayeng balaan, sama ra nga ang pagpanganak ni Sara kang Isaac wala magpugong kang Pedro sa paghisgot kaniya taliwala sa “mga babayeng balaan” sa kakaraanan.—1 Pedro 3:5-7; Hebreohanon 11:11, 12.
Diborsiyo ug Pugong sa Pagsamkon
Ang Iglesya Katolika husto sa dili pagdasig sa diborsiyo ug sa pagtunglo sa aborsiyon. Apan gipaluyohan ba kini sa Bibliya sa dihang kini nagadumili sa diborsiyo tungod sa bisan unsa pang hinungdan ug nagtuo nga “ang matag buhat sa minyo kinahanglang magpabiling bukas sa pagpasa sa kinabuhi”?—Humanae Vitae.
Sa sinugdan, gitukod ni Jehova nga Diyos ang kaminyoon ingong permanenteng bugkos tali sa usa ka lalaki ug usa ka babaye. (Genesis 2:22-24) Gipasig-uli ni Jesus kini nga sukdanan sulod sa Kristohanong kongregasyon, nga miingon, “Ang gihiusa sa Diyos ayaw pag-ipabulag sa tawo.” Bisan pa niana, siya midugang, “Si bisan kinsa nga nagadiborsiyo sa iyang asawa, gawas tungod sa pakighilawas, ug maminyo sa lain nagapanapaw.”—Mateo 19:4-6, 9; 5:32.
Busa, ang Bibliya nagaingong ang seksuwal nga pagluib maoy usa ka balido nga pasikaranan sa diborsiyo, ngani, mao ang bugtong balido nga pasikaranan. Ang Iglesya Katolika wala makahimog maayo sa kaugalingon, o alang sa minilyong sakop niini, pinaagi sa pagkalabi pang estrikto niining butanga kay sa Kasulatan. Sa pagkomento mahitungod sa mga resulta niining polisaha latas sa kasaysayan, ang The New Encyclopædia Britannica nagaingon: “Ang estriktong monogamiya dili ingon nga wala malangkit sa kasagaran ug kaylap gitugot nga pagpanapaw, nga giisip sa Iglesya Romana Katolika nga labaw pang ikatugot kay sa diborsiyo.”
Mahitungod sa pagpugong sa pagpanganak, ang inilang Katolikong teologo, si Augustine (354-430 K.P.), nag-isip sa pakigsekso, bisan sulod sa kaminyoon, nga sala kon may buhaton sa pagpugong sa pagsamkon. Kini kapin kun kulang mao gihapon ang hunahuna sa Iglesya Katolika, sumala sa gipahayag ni Papa Paulo VI diha sa iyang 1968 nga ensiklikal Humanae Vitae ug gilig-on ni Papa Juan Paulo II. Kini usa ka polisa nga nagpahinabog dakong kaguol taliwala sa sinserong mga Katoliko. Apan ang Bibliya wala magdili sa pagpugong sa pagsamkon; kini wala maghisgot niana.
Sa laing bahin, ang Bibliya dili mouyon sa aborsiyon, sumala sa gipadayag sa talaan sa Exodo 20:13 ug 21:22, 23. Kini mag-apil sa mga paagi sa pagpugong sa pagpanganak nga moobra tapos mahitabo ang pagsamkon, sanglit kini katumbas sa pagpatay sa usa ka indibiduwal kansang pagtubo nagsugod na. Gawas niini, ang Bibliya nagatugyan sa ulohan bahin sa pagplano sa pamilya ngadto sa konsensiya sa matag Kristohanong magtiayon. Sa pagpadayon sa pagpatuman sa baroganan niini bahin sa pagpugong sa pagpanganak, ang Roma “milapaw sa nahisulat” diha sa Pulong sa Diyos.—1 Corinto 4:6, The New American Bible, usa ka Katolikong hubad.
Ang Bibliya ug Pagkadili-minyo
Bisan pa, sumala sa atong nasabot nga sayosayo, ang pinugos nga pagkadili-minyo dili usa ka kinahanglanon sa Bibliya, ang Bibliya nagahisgot sa kinabubut-ong dili pagminyo. Misaysay si Jesus: “Ang pila ka lalaki walay katakos sa seksuwal nga buhat sukad sa pagkatawo; ang uban gituyong gihimong ingon; ug ang adunay uban nga misalikway sa sekso tungod sa gingharian sa Diyos. Ipadawat kini niadtong makadawat niini.” (Mateo 19:12, NAB) Busa si Jesus wala mag-ingon nga ang pagkadili-minyo maoy pinugos; ngani, sumala sa amo nang napahayag nga sayosayo, ang pipila sa iyang mga apostol maoy mga lalaking minyo.—Marcos 1:29, 30; 1 Corinto 9:5.
Si apostol Pablo naghisgot usab sa kinabubut-ong dili pagminyo alang sa Kristohanong mga lalaki ug Kristohanong mga babaye, ug misaysay: “Ako walay tinguha nga ipahamtang kaninyo ang mga pagpiot, apan buot kong ipasiugda kon unsay maayo, kon unsay motabang kaninyo sa paghalad sa inyong kaugalingon sa bug-os ngadto sa Ginoo.” (1 Corinto 7:8, 35, 38, 40, NAB) Tin-aw nga, gikan sa hunahuna sa Bibliya ang pagkadili-minyo maoy usa ka gasa nga ang pila ka Kristohanon, sa duruha ka sekso, makaugmad aron sa paghalad sa ilang kaugalingon nga labi pang bug-os ug may kagawasan ngadto sa pag-alagad. Dili kinahanglan ang usa ka panaad, ni may pagpugos.—1 Corinto 7:28, 36.
Sa kaatbang, ang pinugos nga pagkadili-minyo maoy usa ka ilhanan sa pagbulag sa pagtuo, sama sa atong mabasa sa 1 Timoteo 4:1-3: “Ang Espiritu tin-aw nga nagaingon nga sa ulahing mga panahon ang pipila mopahilayo sa pagtuo ug magapatalinghog sa malimbongong mga espiritu ug mga butang gitudlo sa mga demonyo pinaagi sa katuohan nga mga bakakon—mga tawong may mga tanlag nga kinubalan nga nagadili sa pagminyo.”—NAB.
Magpabilin sa Hunahuna sa Bibliya
Ang pagtuki sa Katolikong mga reperensiya nagapadayag nga ang Katolikong doktrina ug polisa sa mga butang maylabot sa sekso nakagamot ug lalom sa paganong misteryosong mga relihiyon. Ang resulta mao nga gitamay ang kaminyoon, gimugna ang pagbati sa sala diha sa mga butang maylabot sa sekso, ug gilisodlisod ang daghang sinserong mga Katoliko.
Sa laing bahin, ginapadayag sa Bibliya nga ang kaminyoon maoy madungganon ug ang pakigsekso sulod sa kahikayan sa kaminyoon dili mopugong sa usa ka Kristohanong lalaki o Kristohanong babaye nga mahimong balaan sa panan-aw sa Diyos. Kini nagapadayag usab nga ang kinabubut-ong pagkadili-minyo mahimong magantihon sa espirituwal kon ang panahon ug kusog sa usa gamiton sa pag-alagad sa Diyos.
Gilaomang kining daklit nga pagsubli sa mga butang maylabot sa sekso makatabang sa nagahunahuna nga mga Katoliko ug tanan nga uban nga nasamok, ug nag-antos pa, tungod sa estriktong mga pagtulon-an nga nagahinumdom sa Babilonyanhong mga misteryo sa karaang panahon. Sumala sa ginapamatuod sa daghan kaayong awtoridad, kini sila dili Biblikanhong mga pagtulon-an. Kon ang doktrina sa bisan unsang relihiyon wala mahiuyon sa Kasulatan, ang mahadlokon-sa-Diyos nga mga tawo dili kinahanglang mabalaka nga mahasupak niana. Ang maong tanang katawhan gidasig sa pagsusi sa doktrina sa iglesya sa kahayag sa Pulong sa Diyos, nga maghinumdom sa pasalig ni Jesus: “Kon kamo magkinabuhi sumala sa akong gitudlo, kamo maoy akong matuod nga mga tinun-an; unya inyong mahibaloan ang kamatuoran, ug ang kamatuoran magapahigawas kaninyo.”—Juan 8:31, 32, NAB.
[Letrato sa panid 11]
Dili kinahanglang ang usa dili minyo aron sa pagwali sa Pulong sa Diyos. Si apostol Pedro minyo