Kinsa ang Akong Silingan?
‘NANGUTANA ka nako, “Kinsa ang akong silingan?” Aw, siyempre, kadtong nagpuyo sa tapad nga balay! Ug kadtong nagpuyo sa among kalye, ug nagpuyo sa kasilinganan. Sila mao ang akong silingan.’
Dili sumala sa pipila nga nagkinabuhi sa panahon ni Kristo Jesus. Bisan niadto may kalainan sa opinyon. Mapatin-aw kini kon atong tagdon ang pagsultihay ni Jesus ug sa tawo nga batid sa Hudiyohanong Kasugoan, nga natala sa Lucas 10:25-37.
“Magtutudlo, unsay akong buhaton aron makapanunod ako sa kinabuhing walay kataposan?” nangutana ang abogado.
“Unsa may nahisulat sa Kasugoan? Unsa may imong nabasa?” nangutana si Jesus.
“‘Higugmaa si Jehova nga imong Diyos sa bug-os mong kasingkasing ug sa bug-os mong kalag ug sa bug-os mong kusog ug sa bug-os mong hunahuna,’ ug, ‘ang imong silingan sama sa imong kaugalingon,’” mitubag ang abogado.
“Husto ang imong tubag,” miingon si Jesus. “Padayon sa pagbuhat niini ug mabuhi ka.”
Apan wala matagbaw ang abogado nga natapos na ang ilang pagsultihay. Busa siya nangutana: “Kinsa man gayod ang akong silingan?”
Sukwahi sa ila mismong Moisesnong Kasugoan, ang mga eskribang Hudiyo miingon bahin sa ilang binabang tradisyon: “Higugmaa ang imong silingan ug dumti ang imong kaaway.” Gipanudlo sa mga eskriba ug mga Pariseo nga ang mga Hudiyo lamang nga nagsunod sa binabang kasugoan mao ang ilang mga silingan. Ang mga Hudiyo nga dili motuman niini, ug ang tanang mga Hentil, dili isipong mga silingan kondili mga kaaway. Kining erehes nga mga Hudiyo ug mga Hentil dili gayod tabangan bisan pag nameligro ang ilang kinabuhi. Uban niini sa hunahuna, ug sa pagpakamatarong sa iyang kaugalingon sa dili paghigugma sa tanang tawo, ang abogado nangutana: “Kinsa man gayod ang akong silingan?”
Sa pagtubag sa pangutana, mihatag si Jesus ug ilustrasyon sa Maayong Samarianhon (gilantawng mga dumoluong ang mga Samarianhon ug gidumtan sa mga Hudiyo).
“May usa ka tawo,” miingon si Jesus, “nga milugsong sa Jerusalem paingon sa Jericho ug nahulog sa mga kamot sa mga tulisan, ug siya ilang gihuboan ug gibun-og, ug milakaw, ug ilang gibiyaan siya nga himalatyon.” Nakit-an sa saserdote ang tawo ug milihay sa pag-agi sa pikas nga dalan. Nakit-an siya sa usa ka Levita, ug mao usay gibuhat. “Apan usa ka Samarianhon nga nagbaktas sa dalan miabot didto kaniya ug, sa pagkakita kaniya, siya giabot ug kaluoy.” Iyang gitambalan ang iyang mga samad, gidala sa balay abutanan, gibayran ang pag-atiman kaniya, ug gisultihan ang nagbantay sa balay abutanan nga moagi siyag balik sa iyang pagpauli ug bayran ra niya ang dugang gasto.
“Kinsa sa tulo kanila,” pangutana pa ni Jesus sa abogado, “ang nagpakita nga silingan sa tawo nga nahulog sa kamot sa mga tulisan?” Ang abogado mitubag: “Kadtong naluoy kaniya.” Busa gisultihan siya ni Jesus: “Lakaw ug buhata usab kana.”
Magsisimba ni Jehova kining maong saserdote. Maingon man ang Levita. Apan silang duha milikay ug miagi sa pikas dalan. Silang duha dili maayong silingan sa tawo nga nanginahanglan. Ang Samarianhon, nga biniaybiay, ug sinalikway sa saserdote ug sa Levita ug sa ilang relihiyon, mao ang mitabang. Giabot siyag kaluoy sa kahimtang sa tawo, ug mitabang kaniya. Iyang gihimo ang iyang kaugalingon nga silingan sa tawo. Mipakita siya nga maayong silingan.
Kinsa Karon ang Nagpamatuod nga Imong Silingan?
Karon sa atong hunahuna ang atong mga silingan mao kadtong nagpuyo nga duol kanato. Ang Gregong pulong ple·siʹon, nga gihubad nga “silingan,” sa literal nagkahulogang “duol.” Apan, ang Bibliya, sa Hebreohanon ug Gregong Kasulatan, naglantaw sa silingan sa mas sangkad nga diwa.
Ang giisip sa mga eskriba ug mga Pariseo sa panahon ni Jesus nga “silingan” mao lamang kadtong nagatuman sa binabang mga tradisyon. Busa, gilimitihan nila ang ilang gugma sa silingan sa ila lamang isigkarelihiyon. Apan, ang paghigugma kang Jehova ug kang Jesus miabot sa tanan. (Mateo 5:43-48) Busa ingon usab niana ang gugma sa tinuod nga mga Kristohanon karon. Aron mahimong mga Kristohanon dili lamang sa ngalan, kinahanglang mahimo silang silingan sa tanang tawo ug sa pagpakitag gugma sa silingan sa tanan.
Sa gihimo sa Samarianhon ang iyang kaugalingon nga silingan sa biktima, napukaw ba niini ang gugma sa biktima alang sa Samarianhon? Kita wala suginli, apan segurado gayod. Maingon man, sa miabot si Jesus sa yuta ug namatay alang sa katawhan, siya, sa pagkatinuod, nagpakita nga usa siya ka silingan kanila. Kini ba nakapukaw sa mga tawo sa paghigugma ug sa pagduol kaniya? Ang gugma ba ni Jehova alang sa kalibotan sa katawhan, nga gipakita pinaagi sa pagpadala sa iyang Anak sa yuta ingong lukat, nakatukmod sa mga tawo sa pagduol sa Diyos? Alang sa kadaghanan tinuod kini ug nagapadayon hangtod karon. “Kita nahigugma, tungod kay siya ang unang nahigugma kanato.”—1 Juan 4:19; Juan 3:16; Santiago 4:8.
Sa unsang paagi gipakita kining gugmaha? Dili pinaagi sa pag-ingon “Ginoo, Ginoo,” kondili sa pagtuman sa kabubut-on sa Diyos, pinaagi sa pagsangyaw sa uban bahin sa Gingharian ni Jehova. (Mateo 7:21; 1 Juan 5:3; Isaias 43:10-12; Buhat 1:8) Mao lamang kini ang tinuod ug dumalayong tabang alang sa nag-antos nga katawhan karon. Kadto, kinsa, sama sa maayong silingang Samarianhon, giabot ug kaluoy sa makasubo ug peligrosong kahimtang sa katawhan, ug nga nagdala kanila sa makahupay nga maayong balita sa Gingharian ni Jehova— mao ang maayong mga silingan sa tanang katawhan. Walay eksipsiyon—lalaki o babaye, batan-on o tigulang, dato ug kabus, bisan unsang nasyonalidad, rasa, relihiyon, kolor sa panit—ang tanan giisip nga mga silingan nga nagkinahanglag tabang pinaagi sa maayong balita sa Gingharian.
Tungod sa gugma sa silingan, ang mga Saksi ni Jehova sa dugay nang katuigan nagasunod sa sugo sa Efeso 4:25: “Ang tinuod kinahanglang maoy isulti ninyo nga matag usa ngadto sa iyang silingan.” Minilyon ang misanong ug nagawali niini nga kamatuoran. Kini maoy kamatuoran bahin sa Gingharian ni Jehova ilalom sa iyang Prinsipe sa Pakigdait, si Kristo Jesus. Kini maoy kamatuoran nga mopatunghag pakigdait taliwala sa mga silingan. Labaw sa tanan, kini maoy kamatuoran nga mopatunghag “pakigdait nga labaw sa tanang pagpanabot.”—Filipos 4:7.