Down’s Syndrome—Usa ka Bag-ong Paagi

Ang cosmetic surgery o pagbag-o sa panagway pinaagi sa operasyon maoy usa ka bag-ong paagi sa pagtabang niadtong nagaantos sa Down’s syndrome, bisan tuod ang maong operasyon mahal kaayo. Ang usa ka bata sa Britanya ug ang pila ka bata sa Tinipong Bansa nakabaton sa maong mga operasyon. Apan ang pangunang mga operasyon sa 60 ka bata gihimo sa Israel pinaagi sa usa ka tem sa mga siruhano nga gipangulohan ni Propesor Ruben Feuerstein.

Unsa ang nalangkit? Ang sobrang pilo sa panit kuhaon aron matul-id ang pikot nga mata. Ang silicone implants magamit sa paggamag bag-ong tulaytulay sa ilong. Ang mga bukog sa aping ikapataas ug mausab ang porma sa dumpol nga sulang. Ang mga dalunggan ikapaduol sa ulo. Ug ang dakong dila, nga kasagaran sa daghang may Down’s syndrome, maputlan.

“Kining mga bataa,” mipadayon si Feuerstein, “subsob ibutang sa edukasyonal nga basurahan ug ang pipila pasagdang mamatay diha sa ospital inigkahimugso nila. Tungod sa ilang linain kaayong panagway gituohan nga sila labi pang walay alamag kay sa kadaghanan mao ang kahimtang.”

Sa pagpunting sa dayag makapatagbawng mga epekto sa kaso sa usa ka batang babaye sa Britanya, ang Sunday Times sa London mipatik sa taho niini ilalom sa ulohang “Ang kalipay maoy usa ka bag-ong nawong.“ Hinuon, ang pagbag-o sa panagway pinaagi sa operasyon sa maong mga kaso may mga kritiko. Ug ang Pagmata! dili moduso o mosugyot sa tinong mga matang sa terapiya, kay nahibalo nga kini maoy mga butang sa kaugalingong paghukom.