Allan Kardec—Nanguna sa Espiritismo

Sumala sa koresponsal sa “Pagmata!” sa Brazil

“USA ako ka Kardecista.” Matag karon ug unya makadungog ang mga Saksi ni Jehova sa Brazil niining mga pulonga samtang nagapamalaybalay sila. Daghan ang mosulti sa mga Saksi sa mahigalaong paagi: “Nakabasa ako sa ebanghelyo sumala sa espiritismo. Nakaila ka—kang Allan Kardec!” Halos sa tanang panahon moresulta ang masadya ug bibong diskusyon.

Apan kinsa si Allan Kardec? Diha sa kadaghanang Ingles ug pinulongang mga ensiklopedia walay natala ubos sa ngalang Allan Kardec, apan alang sa dili-maihap nga ginatos ka libo siya mao ang nanguna ug tighubad sa espiritismo sa modernong paagi niini. Gidawat ang iyang mga sinulat ingong mga ekspresyon sa labaw-sa-kinaiyahang mga gahom—ilabina sa Brazil, diin ang iyang mga libro kaylap nga pagkaapod-apod.

Ang Grande Enciclopédia Delta Larousse ug ang Enciclopédia Mirador Internacional, duha ka iladong mga ensiklopedia sa pinulongang Portuges, mipadayag nga alyas ang Allan Kardec sa Pranses nga magsusulat nga si Hippolyte Léon Denizard Rivail, nga nabuhi gikan sa 1804 ngadto sa 1869. Natawo sa Lyons, sa panuigong diyes gipadala siya sa tunghaan sa Switzerland diin siya nahimong estudyante sa repormador sa edukasyon nga si Pestalozzi. Sa tuig 1824 didto siya sa Paris, diin dinhi iyang gipahinungod ang iyang kaugalingon sa pagpanudlo ug, sa ulahi, nahimong membro sa Royal Academy of Natural Science sa Pransiya.

Sa tuig 1854, si Rivail gipailaila sa usa ka popular nga palabay sa panahon nga kalingawan sa tunga-tunga sa ika-19ng siglo: mga pagsulay sa pagpakigsulti sa walay lawas nga mga espiritu. Sa pagkasunod tuig, nakasaksi siya ug katingalahang pagliyok sa mga lamesa ug espiritistikong mga sinulat. Nakombinsir siya nga naglungtad ang usa ka gingharian sa espiritu nga gipuy-an sa dili-mamatayng mga kalag sa mga tawong patay ug sa posibilidad sa pagpakigsulti kanila. Wala mag-usik ug panahon ang dili-makitang mga gahom sa espiritu sa paggamit kaniya ingong ilang instrumento.

Gipahibalo siya sa iyang “kailang espiritu” nga sa kanhing kinabuhi, sa panahon sa Druids, nagpuyo siya sa Gaul ug nga ang iyang ngalan niadto mao si Allan Kardec. Dugang pa, mipahibalo ang mga espiritu pinaagi sa mga espiritista nga “ang panahon nga gitakda sa pagpakita sa Diyos sa kalibotan miabot na ug nga ingong mga ministro sa Diyos ug mga ahente sa iyang kabubut-on, maoy ilang responsabilidad ang pagtudlo ug pagpahibalo sa mga tawo, nga nakabukas ug bag-ong yugto sa pagkatawo pag-usab sa Katawhan.”

Naikag kaayo niini, gihikay ni Rivail ang nagkalainlaing espiritistikong mga sinulat nga gidiktar kaniya sa iyang mga higalang espiritu. Misugod siya sa regular nga pagtambong sa mga sesyon sa mga espiritista sa pagpakigsulti sa patay, nga nangandam kanunay ug mga pangutana nga gitubag pinaagi sa mga espiritista sa “tukma, lalom ug makataronganong paagi.” Kining materyala, nga “gibasa” sa “Espiritu sa kamatuoran” nga naglihok pinaagi sa usa ka espiritista, gipatik sa 1857 diha sa iyang unang librong O Livro dos Espíritos (Ang Libro sa mga Espiritu), ubos sa ngalang Allan Kardec.

Sukad sa sinugdan, gipatin-aw ni Rivail “nga ang mga Espiritu, nga sa yano mao ang mga kalag sa mga tawo, walay labawng kahibalo ug labawng kaalam; nga ang ilang kinaadman nagadepende sa kauswagan nga ilang nabatonan ug nga ang ilang opinyon maoy personal nga opinyon lamang.” Sa tanan niyang espiritistikong mga sinulat, naghisgot siya ug hataas ug ubos nga mga espiritu, buotan ug daotang mga espiritu, maluyang mga espiritu, mabangis ug rebelyosong mga espiritu, naglaaglaag nga mga espiritu, bastos nga mga espiritu, ug butbuton nga mga espiritu. Sila mipaila sa ilang kaugalingon sa mga espiritista nga may iladong mga ngalan sama kang Socrates, Julius Caesar, Augustine, Charlemagne, George Washington, Mozart, ug Napoleon. Diha sa iyang librong What Spiritism Is, giadmiter usab ni Rivail nga ang ubang mga espiritu “mga bakakon, tikasan, salingkapaw, daotan ug mapanimaslon,” ug mahilas ug sinultihan.

Nan, nganong naghago pa man ang mga tawo sa pagtuon niini? Si Rivail mitubag: “Sa pagpamatuod, sa materyal nga paagi, nga adunay kalibotan sa espiritu.” Apan dili na kinahanglan. Libolibo ka tuig sa wala pa si Rivail, ang mga magtutuo sa Bibliya nahibalo na nga naglungtad ang gingharian sa espiritu.

Ang Diyos nga gisimba sa mga Kristohanon mao ang Supremong Espiritu. Si Jesus miingon: “Ang Diyos Espiritu, ug ang mga magsisimba kaniya kinahanglan magsimba diha sa espiritu ug sa kamatuoran.” (Juan 4:24) Ang mga Kristohanon nga nag-alagad niining maong Diyos kinasingkasing nga nakaeksperyensiya sa iyang impluwensiya diha sa ilang mga kinabuhi ug wala magduhaduha nga siya naglungtad. Nahibalo usab ang mga Kristohanon sa ubang mga espiritu—si Jesu-Kristo ug ang iyang balaang mga manulonda, mga manulonda nga nagabuhat sa kabubut-on sa Diyos.

Sumala sa mga magpapatik sa Portuges nga edisyon sa libro ni Rivail, “ang bahin nga gidula sa The Book of Spirits mao kanang pagtabang sa ubang mga relihiyon sa paglig-on sa pagtuo sa pagkadili-mamatay sa kalag.”

Apan imposibleng husto kining pangangkona. Ang Bibliya nag-ingon nga ang kalag sa tawo mamatay. “Ang buhi nahibalo nga sila mamatay; apan ang mga minatay dili mahibalo sa bisan unsa.” (Ecclesiastes 9:5) Nasudlan usab ang Bibliya ug istriktong pasidaan: “Ang kalag nga makasala—kini mamatay.”—Ezekiel 18:4.

Nan, kinsa, ang mga espiritu nga nakontak ni Rivail? Usa lamang ang posibleng tubag: Kining mga espirituha sakop sa laing bahin sa gingharian sa espiritu—ang mga demonyo. Mao kini ang pagbatbat ni Judas sa mga demonyo: “Ang mga manulonda wala magpabilin diha sa ilang nahimutangan hinunoa nanagpamiya sa ilang angay nga poluy-anan.” (Judas 6) Oo, sila maoy mga manulonda nga mialsa batok sa Diyos.

Busa, diha sa Balaod sa Diyos nga gihatag sa Israel, istrikto niyang gidid-an ang mga Israelitas sa pakigkontak sa mga espiritista sama niadtong gihimo ni Rivail. (Levitico 19:31) Ang kamatuoran nga matahom usahay ang ilang mga pinulongan, nga nagpahayag ug halandong mga ideya, dili makausab sa kamatuoran. Si apostol Pablo mipasidaan: “Si Satanas nagatakuban sa iyang kaugalingon ingon nga manulonda sa kahayag.”—2 Corinto 11:14.

[Blurb sa panid 20]

Ang ubang mga espiritu mga “bakakon, tikasan, salingkapaw, daotan ug mapanimaslon,” ug mahilas ug sinultihan

[Letrato sa panid 19]

Si Allan Kardec, gigamit sa dili-makitang espiritung mga gahom