Paglaom Alang sa mga Patay, Kahupayan Alang sa Nagbangotan

SI Jess Romero, nga gikutlo sa among unang artikulo, sa kadugayan naminyo pag-usab. Bahin kang Agustín ug Valentina Caraballoso, ang pagkamatay ni Jonathan makaguol gihapon, apan sila kalmado na. Si Ramón ug María Serrano nga taga-Espanya makahilak gihapon 24 anyos tapos sa pagkamatay ni Paquito. Apan niining tanang kaso, unsay nakapalahutay kanila? Sila nagatubag: “Ang paglaom sa pagkabanhaw!”

Apan unsa sa eksakto ang atong gipasabot sa “pagkabanhaw”? Kinsa ang mabanhaw? Kanus-a? Ug sa unsang paagi kita makatino?

Paglaom Alang sa mga Patay—Sumala sa Gitudlo ni Jesus

Panahon sa iyang ministeryo sa yuta, si Jesus nagbanhaw ug ubay-ubayng tawo. (Marcos 5:35-42) Kadto nagsilbing timailhan sa dakong pagkabanhaw nga mahitabo dihang ang yuta sa makausa pa mailalom sa bug-os sa pagmando sa Diyos, sama sa ginapangayo sa milyonmilyon sa dihang sila magaampo: “Umanhi ang imong gingharian. Matuman ang imong kabubut-on, maingon nga natuman sa langit, dinhi usab sa yuta.”—Mateo 6:9, 10.

Usa ka panig-ingnan sa gahom sa Diyos niining bahina maoy dihang gibanhaw ni Jesus ang iyang higalang si Lasaro. Sa samang panahon, ang asoy nagatin-aw sa kahimtang sa mga patay. Si Jesus miingon ngadto sa iyang mga tinun-an: “Si Lasaro nga atong higala mipahulay, apan ako moadto didto sa pagpukaw kaniya gikan sa pagkatulog.” Kay wala makasabot sa kahulogan, ang mga tinun-an miingon: “Ginoo, kon siya mipahulay lamang, siya mamaayo.” Ilang gihunahuna nga siya nag-ingon nga si Lasaro natulog lamang dihang sa pagkamatuod, siya namatay. Busa, si Jesus wala magtugot sa pagduhaduha: “Si Lasaro namatay.”

Matikdi, palihog, nga si Jesus wala maghisgot sa bisan unsang dili-mamatay nga kalag nga moadto sa laing kahimtang o dominyo. Siya wala maimpluwensiyahi sa Gregong pilosopiya kondili sa tin-awng pagtulon-an sa Bibliya diha sa Hebreohanong Kasulatan. Si Lasaro natulog sa kamatayon ug sa pag-abot ni Jesus upat na ka adlawng didto sa handumanang lubnganan. Busa, unsa ba ang iyang paglaom?

Sa nakigsulti si Jesus ngadto sa igsoong babaye ni Lasaro si Marta, siya iyang gisultihan: “Ang imong igsoon mobangon.” Unsay iyang tubag? Miingon ba siya nga ang iyang kalag tua na sa langit o sa laing dapit? Ang iyang tubag mao: “Ako nahibalo nga siya mobangon sa pagkabanhaw sa kataposang adlaw.” Siya nagtuo usab sa Biblikanhong pagtulon-an sa usa ka pagkabanhaw ngadto sa kinabuhi sa yuta. Gihatagan siya ni Jesus ug labawng hinungdan sa pagtuo sa pag-ingon: “Ako mao ang pagkabanhaw ug ang kinabuhi. Siya nga motuo kanako, bisan pag siya mamatay, mabuhi.” Unya, sa pagpamatuod sa iyang punto, siya miadto sa lubnganan ni Lasaro ug misinggit sa makusog: “Lasaro, gumula ka!” Unsa bay nahitabo?

Ang makasaysayanhong asoy nagaingon: “Ang tawo nga patay na migula nga ang iyang mga tiil ug mga kamot pinutos, ug ang iyang lawas giliminan sa panapton. Si Jesus miingon kanila: ‘Badbari siya ug buhii siya.’”—Juan 11:1-44.

Anaa ang paglaom nga nakatabang sa daghang nagbangotang tawo nga giinterbiyo sa Pagmata! Kanang samang paglaom nagalig-on kanila sa pagpanglantaw sa umaabot nga duol na dihang ang yuta mahimong gipasig-uling paraiso ug matuman ang makapadasig-paglaom nga mga pulong ni Jesus: “Ayaw kamo kahibulong niini, tungod kay ang takna nagasingabot diin ang tanang atua sa handumanang mga lubnganan makabati sa iyang tingog ug manggula, kadtong nagbuhat ug maayong mga butang ngadto sa pagkabanhaw sa kinabuhi, kadtong nagbuhat sa daotang mga butang ngadto sa pagkabanhaw sa paghukom.”—Juan 5:28, 29.

“Ang Akong Paboritong Teksto Mao . . . ”

Ang Pagmata! nag-interbiyo sa mga ginikanan ug mga anak mahitungod sa pagkamatay sa usa ka anak.a Sa balikbalik, sa pagsaysay giunsa nila pagsagubang sa ilang kaguol, sila nag-ingon: “Isulti ko kanimo ang akong paboritong teksto.” Kon ikaw nagabangotan, tingali kining mga tekstoha makatabang usab kanimo.

Ang katorse-anyos nga si Yunhee, nga taga-Seoul, Republika sa Korea, namatay sa leukemia niadtong 1985. Ang iyang amahan, si Chun Kwang-kook, misaysay ngadto sa Pagmata! giunsa niya paglipay si Yunhee sa kataposan niyang mga semana sa kinabuhi: “Siya akong gisuginlan bahin kang Lasaro. Si Jesus miingon nga si Lasaro natulog, ug sama kaniya, sa motawag si Jesus, ‘Yunhee! Pagmata!’ siya mobangon usab gikan sa pagkatulog.”

Si Janet Hercock, nga taga-Inglaterra, nag-edad ug 13 sa dihang siya namatay sa kanser niadtong 1966. Iyang gibiyaan ang iyang mga ginikanan ug duha ka igsoong lalaki, si David ug Timothy. Si David misulti sa Pagmata! kon unsang tekstoha ang labing nakatabang kaniya: “Kadto ang Buhat 17:31, nga nagaingon: ‘Tungod kay [ang Diyos] nagtudlo sa usa ka adlaw nga sumala sa iyang katuyoan iyang pagahukman ang gipuy-ang yuta diha sa pagkamatarong pinaagi sa usa ka tawo nga iyang gitudlo, ug siya nagtagana sa usa ka pasalig alang sa tanang tawo sa pagkaagi nga iyang gibanhaw siya gikan sa mga patay.’ Sa paglubong, gipasiugda sa mamumulong nga ang pagkabanhaw ni Jesus mao ang atong pasalig sa umaabot nga pagkabanhaw. Kana nahimong dakong tinubdan sa kalig-on alang kanako.”

Niadtong Disyembre 1975 ang batan-ong George, nga 14 anyos pa lang, mikuha sa riple sa iyang amahan ug nagpusil sa iyang kaugalingon. Sa unsang paagi naantos sa amahan ni George, si Russell, ang maong pagkamatay sa iyang anak lalaki pinaagi sa paghikog?b

“Ang pila ka kasulatan nahimong angkla alang kanako. Pananglitan, ang mga pulong sa Proverbio 3:5: ‘Sumalig ka kang Jehova uban sa bug-os mong kasingkasing ug ayaw pagsalig sa imong kaugalingong pagsabot.’ Sa usa ka sukod ako nagsalig sa akong kaugalingong pagsabot sa paningkamot nga ipahiuyon ang akong kaugalingon sa nahitabo.”

Ang pamilyang Morgan, nga taga-Inglaterra, didto sa Sweden dihang ang ilang anak lalaking si Darrall kalit nagsakit. Gihimo ang usa ka emerhensiyang operasyon sa Stockholm. Sa kataposan siya gibalik sakay sa ayroplano sa Inglaterra, diin siya namatay sa wala madugay una sa iyang ika-24ng kasumaran. Ang iyang inahang si Nell nag-ingon: “Usa ka kasulatan nga molutaw sa akong kaisipan mao ang Mateo 22:32, diin si Jesus nagkutlo sa Diyos nga nag-ingon: ‘Ako ang Diyos ni Abraham ug ang Diyos ni Isaac ug ang Diyos ni Jacob.’ Dayon siya mipadayon: ‘Siya Diyos, dili sa mga patay, kondili sa mga buhi.’ Ako nahibalo nga kanang mga pulonga nagkahulogang si Darrall anaa sa handumanan sa Diyos ug mobalik sa pagkabanhaw.”

Paglaom Alang sa mga Patay—Matuman sa Dili na Madugay

Ang tagna sa Bibliya nagapaila nga kita duol na sa panahon dihang ang Diyos molihok sa pagpasig-uli sa pakigdait ug kinabuhing walay kataposan sa masinugtanong katawhan. Ang Diyos nagsaad: “Akong ilisan ang ilang pagbalata sa pagkalipay, ug ako silang lipayon ug papagmayaon gikan sa ilang kaguol.” “‘Pugngi ang inyong tingog gikan sa paghilak, ug ang inyong mga mata gikan sa mga luha, kay adunay usa ka ganti alang sa inyong kalihokan,’ mao ang ginaingon ni Jehova, ‘ug sila mobalik gayod gikan sa yuta sa kaaway [kamatayon].’”—Jeremias 31:13-17.

Nianang panahona anam-anam ipasig-uli ni Jehova sa kinabuhi pinaagi sa pagkabanhaw kadtong nangamatay sa tibuok kasaysayan sa tawo. Ilalom sa langitnong kagamhanan sa bag-ong sistema sa Diyos, sila makabaton sa higayon sa pagpilig kinabuhing walay kataposan pinaagi sa pagsugot sa mga sugo sa Diyos alang sa kinabuhi nianang panahona. Busa, kon kita modangop sa Bibliya, atong makaplagan nga adunay paglaom alang sa mga patay ug kahupayan alang sa mga buhi.—Buhat 24:15; Pinadayag 20:12-14; 21:1-4.

[Mga footnote]

[Kahon sa panid 14]

Si Diane Krych, kinsa misugid sa pagkamatay sa iyang anak si David sa among ikaduhang artikulo, miagi sa hilabihang kaguol ug mga reaksiyon sa pagkadili-makadawat. Kadto gipamatud-an sa mga sulat niya kang David, ug iyang gitagoan, sa 13 anyos. Siya mihunong sa pagsulat sa dihang iyang giatubang ang kamatuoran sa pagkamatay sa iyang amahan mismo, kinsa iyang gigalam. (Ang Pagmata! wala magsugyot sa pagsulat ingong usa ka matang sa kahupayan. Bisan pa niana, among gikutlo ang unang sulat sa pag-ilustrar sa unsang paagi ang paglaom sa pagkabanhaw mao ang iyang angkla ug naglig-on kaniya sukad niadto.)

Minahal nga David,

Ikaw natulog sa 46 ka adlaw na karon. Daw mga tuig na ang milabay sukad ikaw akong nakita ug gikugos. Apan ang mga adlaw sa imong pagkatulog limitado. Maayo untag ako nahibalo sa gidaghanon tungod kay kana akong timan-an sa matag adlaw. Alang kanamo, kini hataas, mapait, mamingawong pagpaabot, apan alang kanimo kini mahisama lamag pila ka minutos. Ako nagmapasalamaton niana. Kami nagalantaw sa adlaw dihang ikaw pukawon ni Jehova gikan sa imong pagkatulog sa bag-ong kahikayan. Ato unyang himoon ang kinadak-ang parti nga sukad imong nakita. Kini labing menos molungtad ug tulo ka adlaw. Ang tanan natong kaila pagadapiton. Kini unya maoy imong parti. Nagalaom lamang ako nga dili kami magpaabot ug dugay kaayo. Dili ako makahulat sa pagkugos kanimo, David. Kaming tanan gimingaw kaayo nimo. Ang balay mingaw kon wala ka. Dili na sama ang kahimtang hangtod ikaw mahibalik sa balay uban kanamo.

Busa, mahal kong anak, maningkamot kami sa pagpailob ug maghulat kang Jehova alang sa imong pagbalik, ug kasamtangan, sulatan ka namog gagmayng mga sulat aron ikaw mahibalo kon unsay nagakahitabo samtang ikaw natulog.

Kanimo nagmahal,

Mama

[Mga Letrato sa panid 15]

Ang Bibliya nagasaad nga ang mga patay, sama kang Maria ug David, pagabanhawon