Pag-atiman sa Tiil sa mga Bata

“NAGPASANAY kita ug nasod sa mga bakol,” nabalaka ang chiropodist si Adrian Grier sa lungsod sa Luton, Inglaterra. Diha sa iyang klinik sa ospital, nakakita siyag mga bata nga sayis anyos pa nga daot ug pormang mga tiil. Ang hinungdan: huot nga mga sapatos. Sa usa lamang ka tuig, gikan sa kapin sa 3,000 ka bata nga gisusi ni Grier, 600 kanila may deperensiya sa tiil tungod sa huot nga sapatos. “Kon linghod pang magsul-ob ang mga bata ug uso nga mga sapatos, mas daling madaot ang porma sa ilang mga tiil ug mosamot kini,” miingon si Grier sa Herald sa Luton. Apan ang huot nga sapatos dili lamang mao ang hinungdan sa daot nga pormang mga tiil. Madaot ang porma sa tiil sa mga masuso kon pasul-obon sila sa mga ginikanan ug seninang pangkatulog nga isul-ob sa tibuok lawas, ug ang mga medyas nga huot makadaot usab, miingon si Grier.

Kon alisto sa mga kapeligrohan ug sa paghimog makataronganong paagi sa pagpalit ug maayog pormang mga sapatos dako ang mahimo aron masumpo ang pagdaot sa porma, pagpasok sa mga kuko diha sa panit sa tiil, sa pagtubo sa bunions o bugon, ug arthritis usab sa ulahi nga kinabuhi. Misugyot si Grier nga ang mga sapatos alang sa mga bata kinahanglang 3/4 pulgada (2 cm) nga mas dako kay sa tiil sa bata (aron may lugar pa nga katuboan) ug makabatog lingin nga kumagko.

Kon bahin sa senina, ug sa sapatos, kining napamatud-an na sa panahon nga tambag nga gihatag alang sa Kristohanong kababayen-an mapuslanon sa tanan: ‘Magmaugdang ug magmakasaranganon sa inyong pamiste.’—1 Timoteo 2:9, Today’s English Version.