Pagpanghatag sa Panahon sa Pasko—Panahon sa Kalipay o Kasubo?
ANG mosunod nga sulat nga giadres kang Santa Claus maoy tipikal sa kadaghanang sulat sa mga kabataan ug gihatag ngadto sa mga ginikanan ug mga magtutudlo uban sa saad nga ipadala ang mga sulat ngadto sa North Pole:
“Minahal nga Santa Claus:
“Komosta ka? Ako maayo. Hinaot nga makabaton kag malipayong Pasko. Hinaot nga may daghang kang maanindot nga mga dulaan tungod kay daghang maanindot nga mga butang nga akong gusto. Una, gusto ko nga makabaton ug manghod nga lalaki. Miingon ang akong papa nga wala kamoy mga bata diha sa North Pole, busa dalhi na lang akog itoy. Gusto ko ug posil, masinggan, ug bisikleta ug teyp rekorder. Aw, lain pay ato, Santa, kini na ang kataposang sulat nga akong ipadala kanimo tungod kay dili na ako motuo ug Santa Claus sa sunod tuig. Apan nagtuo akog Santa Claus karong tuiga.”
Nakaila ka ba niining sulata? Daw pamilyar ba kining pamation? Dili ba daw sama kini sa sulat nga imong napadala dihang bata ka pa? Milyonmilyon niining mga sulata ang nadawat matag tuig diha sa mga buhatan sa koreyo sa daghang mga nasod gikan sa puno sa paglaom nga mga kabataan ug giadres ngadto nianang sugilabong nga tighatag ug mga gasa nga ilang gikahinangpan nga nailhang “Santa Claus.”
Pipila lang ang misulat sa pulong “palihog” ug diyutay ra ang misulat ug “salamat.” May pipila ka sulat nga makatandog sa kasingkasing, ang uban may tuno sa kahakog. Kon mas linghod ug panuigon ang bata, mas diyutay ang iyang pangayoon. Kon mas gulang-gulang ang bata, mas daghan ang gikinahanglang mga gasa aron siya matagbaw, busa nagapadako sa iyang mga ginapaabot alang sa mas daghan ug mas mahalong mga gasa sa pagkasunod tuig.
Dunay mga dulaan nga gidesinyo alang sa matag yugto sa kinabuhi sa bata. Dunay mga dulaan nga nagatudlo, nga nagatudlog mga katakos, nga nagatultol sa mga hunahuna sa kabangisan. Dunay mga dulaan nga modurar ug dugay sa sigeng gamit ug may dulaan nga daling maguba sa pipila ka adlaw nga paggamit. Dunay luwas nga mga dulaan ug mga dulaan nga peligroso kaayo nga gipaningkamotan sa mga opisyal nga kuhaon kini gikan sa tindahan. Dunay mga dulaan nga daw dinasig sa demonyo nga pagkadesinyo—mga bola nga may mangil-ad kaayong mga dagway nga makapaurom, apan kini ang labing himalitan sa miaging tuig, bisan pa sa pagtutol sa ginikanan. Kapin sa duha ka bulan sa wala pa ang okasyon, ang mga bata gipaandam na sa panahon sa Pasko. Sumala sa gituohan, ang kalipay sa paghatag ug pagdawat mabati sa palibot.
Ang Pagkahulog Ngadto sa Depresyon
Apan sa pagkaalaot, sa pila lamang ka adlaw mawala na ang kahinam. Nakuha na sa bata ang tanang kalipay ug kasadya gikan sa iyang mga gasa, diyutay man kini o daghan. Ang kamatuoran wala makaabot sa ilang mga ginalaoman. Misugod na ang pagkalaay. Ang mga dayandayan sa Pasko ug ang tanang mga gasa nga nadawat dili diay tambal sa tanan nga iyang gilaoman. Mikomento bahin niini, ang sikologo sa bata si Dr. Nancy Hayes miingon nga ang panahon sa Pasko “maoy yugto sa labing taas nga depresyon ug paghikog taliwala sa kabataan.” Siya miingon nga daghang mga batan-on bation ug depresyon kon dili makahatag ang Pasko sa “samag madyik nga solusyon sa mga problema.” Handurawa, usab, ang ilang kapukanan sa umaabot dihang mahibalo nga sugilambong lamang si Santa Claus, nga gihimo kutob sa maarangan sa ilang mga ginikanan aron lang sa pagpalambo sa kabakakan.
Busa gikan sa pagkamasuso nga ang mga bata gitudloan sa pagpangayo, sa pagsulat, ug sa pagpaabot ug mga gasa sa panahon sa Pasko—ug dili lamang iya kini sa mga bata. Ang paghigalaay sa mga hamtong ginasukod usahay sa bili sa mga gasa nga gibaylo. Usahay ang bugkos madaot hangtod sa punto nga mabungkag tungod kay ang usa ka tawo mihatag ug gasa nga dakog kantidad kay sa gasa nga iyang nadawat. Tingali walay laing panahon sa tuig nga nahimong walay kahulogan ang ekspresyong “Ang paghandom ang bililhon.”
Ang mga credit card miabot na sa limitasyon sa kantidad nga mautang. Ang tsekeng gisulat mopahinabo sa mga bangko nga mahutdan ug pundo. Ang mga kawatan nga modutdot uban sa mga pumapalit diha sa naghuot nga mga tindahan makanerbiyos. Ang talan-awon sa nagkamrasay, nagbirahayng mga pumapalit nga nag-awayay sa nahurot nga mga tinda nga gibaligyag barato makapasibog bisan sa mga maisog. Ang nagngotngot nga mga tiil, dugang pa sa kalibog kon unsay paliton, nakapahimo niining rituwal sa tingtingunaw nga makapikal nga kasinatian. Kini nakaapekto sa mga pumapalit sa panahon sa Pasko.
Miingon ang usa ka tindera: “Imong makita ang mga tawo nga nagdagandagan, namalit ug gasa alang kang tal pulano, ug sapoton sila. Ang mga tawo manghatag nga walay kalipay.” Nan, ikahibulong bang gitawag sa mga klero ang Pasko nga mao “ang panahon sa depresyon ug nerbiyos”?
Ang nakapasamot sa kaluya sa buut mao ang kamatuoran nga daghang mga gasa gipalit ug gihatag ingong obligasyon, sagad inubanan sa hakog nga mga motibo. Miingon ang usa ka propesor sa sociology: “Ang tighatag dili lamang mabalaka sa paghunahuna kon unsay gusto sa dumadawat, kondili nabalaka usab sa pagpakitag maayong larawan sa iyang kaugalingon.”
Unsa ang labing puliki nga adlaw sa tuig? Sa kasagaran sa pagkahuman sa Pasko. Ang mga tindahan nianang panahona puno kaayo sa mga tawong nakadawat sa gasa nga nag-uli sa ilang mga regalo, ang kadaghanan alang sa kantidad niini sa salapi. Apan, kon kuwarta pa ang gihatag diha kanila, masuko sila kay bulgar kini nga gasa. Busa, ang bug-os nga kaluya sa buut, ang nerbiyos, ang gikapoyng mga bukog, ang gisapot nga mga tawo, nga namunit sa literal sa gatosgatos ka pirasong tinda, ang pag-empaki, pagputos, ug ang paghigot sa mga laso, walay kapuslanan. Daghang mga regalong nadawat apan gamay lang kaayo ang apresasyon!
Alang sa kadaghanan, ang Pasko dili ‘panahon sa kalipay.’
Ang Pagpanghatag Dili Mamilig Panahon
Apan unsa ka dakong kalipay kon ang mga pamilya mag-usa ug tagamtamon ang pag-ubanay ug gugma sa usa ug usa! Ang pagdalag mga gasa, usab, maoy ekspresyon sa pagpakita sa kinasingkasing nga gugma. Gidasig ni Jesus ang mga Kristohanon sa “pagbansay sa paghatag.” Ug kinsa nga Kristohanon o dili-Kristohanon ang dili mokutlo kanunay sa mga pulong ni Jesus, “Adunay dakong kalipay ang paghatag kay sa pagdawat”? (Lucas 6:38; Buhat 20:35) Sa pagkatinuod, dili mamilig panahon ang pagpanghatag. Apan dunay laing rason kon nganong ang pagpanghatag sa panahon sa Pasko kuwestiyonable.
Ang tinuod nga problema sa panahon sa Pasko mao nga kini natukod diha sa kabakakan. Ang panahon ginapatuong naghawas sa adlawng-natawhan ni Jesus. Apan, sa unsang paagi mahitabo kini, dihang ang Bibliya wala man maghatag ug petsa sa iyang adlawng-natawhan? Sa pagkatinuod, ang Pasko giatol sa panahon sa “pagkatawo” sa adlaw—usa ka rituwal sa pagsimba sa adlaw.
Diha sa iyang librong The Story of Christmas, si Michael Harrison misulat: “Una sa tanan, angay masayran nga, bisan pa sa mga paningkamot sa dili-maisip nga mga eskolar, wala pa gayod sukad mapamatud-i kon unsang adlawa . . . natawo si Kristo.” Gipatin-aw sa Bibliya nga ang petsa lamang sa iyang kamatayon ug kining petsaha lamang ang gisugo ni Jesus sa iyang mga sumusunod, ang tinuod nga mga Kristohanon, nga saulogon. Busa, ikatingala ba, nga gipasiugda kining puntoha sa The New Schaff-Herzog Encyclopedia of Religious Knowledge: “Walay ebidensiya sa kasaysayan nga ang adlawng-natawhan sa atong Ginoo gisaulog sa panahon sa mga apostoles o tapos sa panahon sa mga apostoles”?
Karon, uban sa matin-aw nga hunahuna, palandonga ang pangutana: Uyonan ba ni Jesus ang kasaulogan nga nagaangkong nagapasidungog kaniya apan natuhop sa paganong mga rituwal ug mga kustombre? Iya bang tugotan kining masadyaong piyesta dihang mas daghang mga pagbuno ang nahimo kay sa bisan unsang panahon sa tuig ug dihang ang dili-Kristohanong paghuboghubog ug maulagong pagkinabuhi nga gidawat ingong paagi sa kinabuhi? Tugotan ba niya ang panahon nga ilado sa depresyon, nerbiyos, ug mga paghikog? Dayag kaayo ang tubag alang sa tinuod nga mga Kristohanon.
Inay maghiklin ug usa ka panahon sa tuig alang sa malipayong pagpanghatag sa uban, ang mahinatagong kalag makakaplag nga ang pagpanghatag nga mohatag kalipay sa tighatag ug kalipay sa dumadawat mahimo sa tanang panahon. Ang mga gasa sa atong panahon, atong kusog, atong simpatiya; mga gasa sa kalulot ug mahunahunaong mga pulong; ug, oo sa tinuod, materyal nga mga butang nga gikinahanglan—kining tanang pagpanghatag mohatag kalipay ug kasaya sa tighatag ug dumadawat.