Akong Pakigbisog sa Pagbiya sa Mabangis nga Kinabuhi
SULOD sa walo ka tuig ako membro sa iladong motorsiklong klab. Ang kadaghanan niining mga pundoka dili magkasinabot sa ubang motorsiklong mga klab, ug dunay kanunayng panag-indig. Usa ka gabii daghan kanamo ang didto sa sentro sa New Orleans nga nangita sa usa ka kaindig nga klab gikan sa gawas sa lungsod. Kami maikagon sa “pagpingki sa pila ka ulo” aron mahusay ang pila namo ka kabingkilan.
Ang laing pundok wala hikit-i, mao nga kami nagbulag ug nag-iyahayg panglakaw. Ugaling, ang pipila nagpabilin sa usa ka bar, diin nahitabo ang sumbagay batok sa duha ka polis nga wala mag-uniporme. Ang mga polis misugod sa pagtiro ug nasamdan ang usa sa akong mga higala. Ako naglingkod sa hilom karaang bar sa silinganan dihang akong nadunggan ang nahitabo. Ako wala masayod kon buhi o patay ang akong higala, mao nga ako miadto sa ospital sa pagsusi. Sa akong pag-abot, usa ka lalaki mitudlo kanako, nga misinggit, “Siya usa kanila! Dakpa ninyo siya!” Bisan pag ako wala makaapil sa away, sa akong hunahuna tungod sa taas nga buhok ug bungot, kaming tanan parehong tan-awon alang kanila. Sa gihapon, ako ilang gidakop, ug ako misangko sa prisohan sa ubay-ubayng semana. Apan sa unsang paagi ako nagsugod sa maong mabangis nga pagkinabuhi? Pasubaya ako sa akong pagkabata.
Gugma sa Unang Pagkita
Ang kadaghanang ginikanan mahiubos kon ang ilang mga anak malangkit niining matanga sa kinabuhi, ug kini matuod gayod sa akong inahan ug amahan. Sila maluluton apan malig-on kanako ug nagtuo sa disiplina.
Ang akong suliran nagsugod sa kataposang tuig sa hayskul dihang misugod ako sa pagsukol sa awtoridad sa akong mga ginikanan ug nagsugod usab sa kusog nga pag-inom. Usa ka adlaw, samtang nagbarog sa atubang nga hagdan sa among hayskul, may nakita akong butang nga nagbilin ug lalom nga impresyon kanako alang sa umaabot nga katuigan. Ang dorado sa chrome, buloknon ug pintal, “Harley Chopper” nga motorsiklo miagi, nga daw milupad sa akong atubangan. Ang nagsakay daw samag wala gayoy problema. Ako nahigugma sa mga motorsiklo dihadiha mismo!
Sa hinapos niadtong tuiga human sa akong paggraduwar sa hayskul, gigamit nako ang akong hinagoang salapi gikan sa akong pagkabata pa ug gipalit ug dakong 750 cc Ingles nga motorsiklo. Niadtong ting-inita ako mibiyahe latas sa mga estado sa Tungang-kasadpan, nga misangko sa Iowa, diin ako misulod sa kolehiyo.
Ang Motorsiklong “Pamilya”
Nagsugod na niadto ang Gubat sa Vietnam, ug alang sa daghan kanamong batan-on, kadto lisod nga panahon sa among kinabuhi. Gidumtan ko ang ideya nga moadto sa gubat ug mopatay. Bisan pa niana, kon dili ako magpabilin sa kolehiyo, didto ako mosangko—nga pinugos. Ako mihukom sa pagpahayag sa protesta, kauban sa daghan pang batan-ong nawad-ag kasibot. Ako miduyog sa usa ka kontra-gubat nga pundok, apan disorganisado kaayo ang ilang mga miting. Tapos sa mubong panahon, akong naamgohang ang maong pundok dili makausab sa sistema ug makapatunghag mas maayong mga kahimtang. Unya ako naghunahuna sa pagduyog sa laing pundok apan nakadiskobreng sila nalangkit sa ubang mga buhat nga mabangison. Alang kanako kadto dili matarong—ang paggamit sa kabangis sa pagprotesta sa kabangis.
Sa panahon nako sa kolehiyo, ako nakaamgo usab sa relihiyosong kasalingkapaw. ingong Katoliko, ako gitudloang kadtong nagbuhat ug daotang mga butang sakiton sa walay kataposan sa impiyernong-kalayo dihang sila mamatay. Alang kanako daw diyutay kaayong tawo ang balaan kaayo sa ilang mga kinabuhi nga sila mosangpot nga makaadto sa langit. Ako wala makasabot sa dihang akong nahibaloang ang iglesya sa katibuk-an nag-uyon sa pag-adto sa gubat aron makig-away ug mopatayg mga tawo. Ako, kay nawad-ag kasibot, mihunong sa pag-atender sa mga serbisyo sa simbahan ug nag-isip sa akong kaugalingon nga dili na bahin sa Iglesya Katolika. Sa pagpangitag dugang pagsabot, ako mikuhag usa ka kurso sa pilosopiya sa relihiyon. Misangpot nga ang akong instruktor ateyista ug nagtudlo kanamo nga maingon nga walay Santa Klaus, busa wala ing Diyos!
Ang mga butang lamang nga nagpabiling mapinadayonon sa maong panahon mao ang akong kusog nga pag-inom ug pagsakay sa akong motorsiklo. Kay nawad-ag kadasig sa kolehiyo ug sa kinabuhi sa linangkob, ako mibalhin ngadto sa New Orleans, sa Habagatan kaayo. Didto akong nahibalag ang usa ka pundok sa uban pang nagtinguha sa mga butang sama sa akong gitinguha. Daghan kanila naglagot usab sa katilingban. Sila nagtudlo kanakog daghang butang nalangkit sa paggamag motorsiklo; ako ilang gipangitaag trabaho ug nag-atiman kanako sa dihang ako nagsakit. Ang maong pagkamahunahunaon nakadani kanako kanila ingong usa ka pundok.
Ang among “pamilya” midako nga nag-apil sa mga pundok gikan sa mga siyudad sa tibuok Tinipong Bansa. Sa ting-init kami tigsakay sa among mga motorsiklo sa tibuok Tungang-kasadpan, abot pa sa amihanan sa Minnesota ug Wyoming, abot sa kasadpan sa California, ug bisan ngadto sa Mexico. Among gibisita ang daghang parke sa estado ug napahimuslan ang katahom ug kamalinawon sa kabanikanhan.
Ang among pagkinabuhi nag-apil sa paggugol ug daghang panahon nga magainom sa mga bar. Ang pipila sa mga kaubanan gusto ug bahogbahog nga away, apan ako dili. Ako nahimong maayong motan-awg mga kahimtang nga motultol sa mga away ug sa maayong paagi mosulay sa paglikay kanila. Hinuon, sa ubang panahon himoon sa mga tawo ang mga butang dili nako maantos, ug ako moapil sa pagtudlo kanilag leksiyon. Usa ka panahon ako nagtindog sa gawas sa usa ka bar sa dihang miagi ang usa ka motorsiklo. Ako naglantaw sa pagsusi kon kinsa kadto, dihang ang nagsakay mipunting sa pusil kanako ug mitiro! Kon sa unsang paagi nga ako wala niya maigo, ako wala masayod.
Ang mga Epekto sa Homisidio
Naamgohan kong walay tinuod nga kalipay ang maong matinguhaon-sa-kalingawang paagi sa kinabuhi. Sa wala madugay ako naminyo, apan ang maong kaminyoon wala molampos; kadto milungtad lamag tulo ka bulan. Sa ulahi, ang akong motorsiklo gikawat. Unya sa usa ka gabii, tapos makainom ug daghan kaayo, nakiglalis ako sa akong labing suod nga higala. Kadto nakapaguol kaayo nako. Ako, kay buot magtapos sa tanan, nagtomar sa usa ka hakop nga pildora. Unya ako mihigda aron mamatay sa paambakan sa Subang Mississippi. Ugaling, ako nahigmata sa ospital. Sa duha pa ka okasyon, ako misangko usab sa ospital tungod sa akong suliran sa pag-inom.
Unya miabot ang usa ka buntag nga dili gayod nako hikalimtan. Sa alas singko akong nadawat ang tawag sa telepono nga nagsulti kanakong usa sa akong labing suod nga mga higala gipusil ug namatay. Siya migawas nga nakig-inom kauban sa duha pa ka membro sa klab, ug sila misulay sa pagpahunong sa usa ka lalaki sa pagdagmal sa usa ka babaye. Misangpot nga siya iya diayng asawa. Iyang gipusil ug gipatay ang akong higala. Kaming tanan na-shock, ug gigugol ko ang sunod adlaw uban sa iyang igsoong lalaki, nga naghikay sa paglubong.
Samtang nag-inusara sa punerarya sa gabii, akong gihikap ang nawong sa akong higala. Siya bugnaw, nanggahi, ug walay kinabuhi. Diin man siya mopaingon? Mao ba lamang diay kini—ang kataposan sa tanang butang? Tinong may labaw pa kay niini—kinabuhi sa pila ra ka tuig, dayon ang kamatayon maoy magtapos sa tanan. Ako nakaamgo nga wala ako makasabot sa kinabuhi, ug sukad niadto ako naningkamot sa pagsusi. Ako misugod sa paglingawlingaw sa espiritismo, ug makadaghan mipatim-awng kami nakakontak sa akong higala. Apan kadto dili tin-aw ug wala gihapon magtubag sa akong mga pangutana.
Unsa ang Katuyoan sa Kinabuhi?
Usa ka gabii ako nakainom ug daghan kaayo ug gikuyapan samtang nagsakay sa akong motorsiklo. Sa aksidenteng misangpot, seryosong nasamad ang akong buolbuol. Dili ako makalakat ug kinahanglang magpuyo sa balay sa duha ka semana. Sa maong panahon, ang usa ka lalaki ug iyang batang lalaki nanuktok sa akong pultahan. Buot nilang makigsulti bahin sa Bibliya. Ako silang gipadayon. Giingnan nila ako nga sila mga Saksi ni Jehova. Kay wala man ako makadungog nianang ngalana sa nangagi, gisukna ko sila kon sila ba usa ka bag-ong relihiyosong pundok. Malulutong gipakita kanako sa tawo gikan sa Bibliya nga ang ngalan sa Diyos maoy Jehova ug sila nakigsulti sa mga tawo mahitungod kaniya. Kadto bag-o alang kanako. Ang Diyos may ngalan, si Jehova. Ang akong relihiyosong pagbansay samtang batan-on wala magtudlo kanako niana. Ako nahibulong kon unsa pa ang wala itudlo kanako.
Sunod ako gipakitaan nga ang Bibliya nagahisgot sa kataposan sa kalibotan, o sistema sa mga butang, nga maoy atong gipuy-an. Ang “kataposan sa kalibotan”! Nganong ako wala man sultihi niini sa nangagi? Kadto mihatag ug dalan alang sa ubay-ubay pang panaghisgot nga panahon niana ako daghag pangutana. Gibinlan nila ako sa librong Mao ba Lamang Kini ang Kinabuhi? Gihurot nako pagbasa kana, kay sa kataposan akong nasayran kon bahin sa unsa ang kinabuhi.
Akong nasayrang dili katuyoan sa Diyos nga kita mabuhi sa hamubong panahon ug unya mamatay. Akong nasayran ang umaabot nga pagkawala sa kamatayon ug ang kalaomang kinabuhing walay kataposan ibabaw sa paraisong yuta. Bahin sa minahal kong higala, akong nahibaloang siya dili kay may panimuot o nagaantos sa bisan diing dapit; hinunoa, siya nahikatulog, nga nagapaabot ug pagkabanhaw gikan sa mga patay. Pagkatalagsaon kanang paglaoma! Makita ko pa diay siya pag-usab!—Pinadayag 21:4, 5; Ecclesiastes 9:5; Juan 5:28, 29.
Usa ka Lisod nga Desisyon
Ang among mga panaghisgot sa Bibliya nahunong dihang ako mibiya alang sa labing dakong biyahe sa motorsiklong klab nga giplano alang niadtong ting-inita. Giingnan ko ang akong Saksing higala, si Daniel, nga ako siyang tawgon inigbalik nako. Gihatag niya kanako ang librong Ang Kamatuoran nga Motultol sa Kinabuhing Dayon. Sulod sa sunod upat ka semana sa pagbiyahe, sa matag panahong kami mohunong sa pagpahulay ako mobasag usa ka bahin sa libro. Sa akong pagkauli, gitawag ko si Daniel. Among gihimo ang kahikayan sa pagtuon sa Bibliya nga magkauban, ug tapos sa unang pagtuon, ako iyang gidapit nga moatender sa usa ka tigom sa Kingdom Hall sa sunod Dominggo sa hapon.
Karon, ang among klab sa motorsiklo may giplano nga pagsakay niadtong Dominggoha, ug gidahom nga ako ang manguna. Miabot ang Dominggo sa buntag ug kami nanlakaw. Mihapit kami sa usa ka bar, ug ang tanan misugod sa pag-inom. Sa mga ala una ako wala sa buot nga migawas, mipaandar sa akong motorsiklo, ug mibalik sa siyudad. Sa 3:00 s.h. ako didto sa Kingdom Hall, uban ang T-shirt, maong nga pantalon, botas, bungot, ug ang akong buhok gipungos. Mainiton akong giabiabi sa mga Saksi, nga wala maghisgot bahin sa akong panagway. Gidasig nila ako sa pagbalik. Ako mibalik, ug ako nagtambong na sa mga tigom sukad niadto.
Hinuon, ang unang bulan lisod kay ako nagtambong pa sa senemanang mga miting sa motorsiklo nga klab. Sa wala madugay akong nasabtan nga kon ako mopadayon sa klab, ako maglisod sa pagpadapat ug pagsunod sa mga prinsipyo sa Bibliya. Busa ako mihukom sa pagbiya sa klab. Lisod ang pagbiya sa akong mga kaubanan. Latas sa katuigan, kami nagkauban sa pagsinati sa daghang butang, ug kadto suod nakapahiusa kanamo. Sa laing bahin, makahupay ang pagbiya niadtong mabangis nga kalibotan ug pagsulod sa malinawong tibuok-kalibotang organisasyon ni Jehova. Gibaligya ko pa ang pusil nga diha kanunay sa kiliran sa akong higdaan.
Ayaw Ibutang ang Imong Tudlo sa Kalayo
Unom ka bulan tapos sa akong pagsugod sa akong pagtuon, ako nabawtismohan. Sa maong mubong panahon, sa tabang ni Jehova, ako nakabuntog sa akong bisyo sa pag-inom, ug naarang-arang ang akong kagawian sa linangkob. Karon ako nagakalipay sa pagduaw sa mga tawo sa ilang mga balay sama nga giduaw ako ni Daniel sa sinugdan. Gikan sa Bibliya, akong gisulayan ang pagpakita sa akong mga silingan nga si Jehova nga Diyos dunay kagamhanan nga nagadili sa kabangisan, nga nagamando uban sa hustisya, ug motagana sa tanang matarong nga butang nga dili ikatagana sa tawhanong mga gobyerno, ug nga sa dili madugay wala nay mabangisong mga tawo nga mahibilin sa yuta. Kini nakadani ilabina kanako tungod sa nangagi kong mga kasinatian sa kabangisan, mao nga kini gipasiugda ko kutob sa akong mahimo.—Pinadayag 11:18.
Gipanalanginan ako ni Jehova nga Diyos sa debotadong Kristohanong asawa ug duha ka matahom nga anak. Kaming upat nagabuhat nga magkauban sa ganghaan ngadto sa ganghaan ug nagatambong sa mga tigom ug mga kombensiyon. Ako nakapribilehiyo sa pag-alagad nga ministeryal nga alagad sa Kristohanong kongregasyon. Sa pagkamatuod, akong gibiyaan ang kabangisan ug nakaplagan ang tinuod nga kalinaw. Pagkadakong kalainan! Tapos sa paghibalik sa New Orleans, akong nasayran ang pagkamatay sa duha nako ka kanhing higala. Sukad ako ania sa Louisiana, tulo pa ang gipusil ug namatay. Kon dili pa tungod kang Jehova, hain na kaha ako karon?
Sa mga batan-on, buot kong isulti nga bisan pag ang kalibotan daw anindot ug makapaukyab, ayaw ninyo ibutang ang inyong tudlo sa kalayo. Ako didto sa kalibotan ug nakatilaw nianang tanan. Ikaw walay masayloan nga bisan unsa. Ug kadtong nagatinguha kaninyo nga makabatog relasyon uban kang Jehova apan nagahunahunang dili ninyo mahimo ang gikinahanglang kausaban, palihog matikdi ang makapadasig nga mga pulong ni Jesus: “Sa Diyos ang tanang butang mahimo.” (Mateo 19:26)—Sumala sa giasoy ni David L. Wirges.
[Letrato ni David L. Wirges ug iyang pamilya sa panid 18]
[Letrato sa panid 20]
Sa mas mabangison kong mga adlaw nga tigsakayg motorsiklo