Nawala sa Kapig 20 Anyos
“Kamo ang akong mga igsoon. Nagpaabot ako kaninyo!”
GIPAHAYAG sa mahinamon ni Jimmy kining mga pulonga sa diha nga ang akong asawa ug ako nakahimamat kaniya! Sa kapig 20 anyos, siya nahilain diha sa samag-prisohang mga kahimtang. Sa maong panahon, tungod sa pagduaw namo niadtong 1977, ang usa ka yugto sa kahupayan hapit nang mosugod.
Apan sa unsang paagi ug diin mahitabo sa atong panahon kanang mga kahimtanga sa edad media? Nahauna, mobalik kita sa sinugdan.
Alaot nga Kinabuhi Misanag Tungod sa Kamatuoran sa Bibliya
Si Jimmy Sutera natawo sa Hunyo 13, 1913, ug namatuto sa Brooklyn, New York. Vincent ang tinuod niyang ngalan, apan gitawag siyag Jimmy sa tanang panahon. Sukad sa pagkabata, ang spinal meningitis sa kapintas nakapabaldado kaniya. Samtang bata pa, gisugdan niya ang serye sa pagpaospital.
Usa ka adlaw sa pagpauli gikan sa simbahan, si Jimmy naglingkod sa iyang tugkaran, nga naghilak tungod sa kamingaw. Ang malulutong babaye nga ginganlag Rebecca natandog sa talan-awon ug misugod sa paglipay kaniya. Gisaysay niya nga ang Diyos nagmahal kaniya ug nga ang Diyos may ngalan, si Jehova. Si Jimmy nakasabot dayon sa tin-aw nga tagingting sa kamatuoran sa iyang bililhong mensahe. Ang babaye usa ka Saksi ni Jehova (nga nailhan niadtong mga Estudyante sa Bibliya).
Ang mga ginikanan ni Jimmy, iyang mga igsoong lalaki, ug iyang mga igsoong babaye tanan wala mouyon sa iyang bag-ong-nakaplagang pagtuo. Busa sekretong gipadayon ni Jimmy ang pagtuon sa Bibliya. Maghunahuna ang iyang mga ginikanan nga siya moadto sa simbahan, apan sa tinuod siya nagtambong diay sa mga tigom sa mga Estudyante sa Bibliya ug nakig-ambit uban kanila sa publikong ministeryo.
Sa 1932, gipahinungod ni Jimmy ang iyang kinabuhi sa Diyos ug gipasimbolohan kana pinaagi sa bawtismo sa tubig. Makaiikag, ang presidente niadto sa Watch Tower Society, si J. F. Rutherford, nagpahayag sa pakigpulong sa bawtismo.
Bisan pag lisod kaayo kang Jimmy ang paglakaw, siya nakig-ambit sa balay-balay nga pagsangyaw sa Gingharian nga naggamit sa mga tarheta sa pamatuod ug sa ponograpo. Ang pagpatokar sa giplakang mga wali diha sa hagdanan sa balay sa mga tawo maoy pangunang paagi sa pagsabwag sa mensahe nga gigamit sa mga Saksi ni Jehova sa katuigang 1930. Bisan pag dili sayon kang Jimmy ang pagbitbit sa bisan unsa, siya molakaw gihapon, nga magdala sa ponograpo sa usa ka kilid ug sa bag sa libro nga punog basahon sa Bibliya sa pikas nga kilid.
Nagpuyo sa Balay-Dalangpanan
Unya si Jimmy gitakboyag polio ug nakaagom sa serye sa mga estrok, nga misangpot nga dili na siya makagamit sa wala niyang kilid. Siya gitakboyan usab sa Parkinson’s disease ug makasulti nga lisod kaayo ug kinalitkalit. Ang iyang mga ginikanan, kay tigulang na niadto, mihukom sa pagpasulod kaniya sa usa ka balay-dalangpanan o nursing home duol sa Brooklyn, New York. Kadto maoy sa 1958.
Dalayegon, ang mga sakop sa iyang pamilya nagpakitag tinuod nga paghunahuna pinaagi sa pagduaw kaniya sa kadaghan sa kada semana, bisan pag ang pipila kanila supak kaayo sa iyang relihiyon. Ikasubo, ang administrasyon sa balay-dalangpanan masupakon kaayo. Sanglit dili man siya makagamit gani sa pisikal nga paagi sa telepono aron tawgon ang iyang mga igsoon sa espiritu, siya wala na makakontak sa katawhan ni Jehova. Siya didto, sa usa ka balay-dalangpanan nga pila ra ka milya gikan sa hedkuwarter sa mga Saksi ni Jehova apan dili makagawas nga samag piniriso ug nahibulag sa tanang espirituwal nga asosasyon!
Nagkaguba ang balay-dalangpanan, ug sa kataposan, sa tunga sa katuigang 1970, gikondenar sa gobyerno ang pasilidad. Ugaling, tungod sa kakulang sa mga balay-dalangpanan sa Siyudad sa New York, walay dapit nga nakaplagan aron balhinan sa mga pasyente. Ang mga ipos isog nga modalagan latas sa salog ug sa mga bungbong. May panahong si Jimmy gidagmalan sa pila ka trabahante. Siya nag-antos, nga nahilain niadtong maot nga dapit sa kapig 20 anyos. Apan ang iyang Soberanong Ginoo nga si Jehova dili halayo kaniya ug naghupot sa iyang pagtuo nga buhi ug lig-on—usa ka kamatuoran nga mapamatud-an sa akong asawa ug nako. Apan giunsa namo sa pagkaplag kaniya?
Kon Giunsa Namo Pagkakaplag Kang Jimmy
Sa sinugdan sa katuigang 1970 ang akong asawa, si Barbara, ug ako nahimong mga Saksi ni Jehova usab. Sa wala madugay, mibalhin kami gikan sa ilaya sa New York ngadto sa Queens, New York City. Samtang nagplano kami sa pagbalhin, ang akong amahan nakahinumdom nga ang iyang uyoan sa siyudad tingali usa ka Saksi ni Jehova. Ngani, siya nakahinumdom nga ang iyang uyoan si Jimmy tig-estorya niyag kahibulongang mga estorya bahin sa mga batang makigdula sa mga leyon sa Paraiso.
Didto na kami sa New York City sa halos usa ka tuig sa dihang nasayran namo gikan sa igsoong babaye ni Tiyo Jimmy, nga siya usa gayod sa mga Saksi ni Jehova, “usa kaninyo,” sumala pa niya. Gihatagan niya kami sa adres, ug sa usa ka oras kami didto na sa balay-dalangpanan. Gisaysay namo nga didto kami aron makigkita sa uyoan sa akong amahan ug ako usa ka ministro, usa sa mga Saksi ni Jehova.
“Dili ako mapihigon, apan dili kami mopasulod ug mga Saksi ni Jehova dinhi,” mao ang tubag nga tin-awng mapihigon. “Pasudlon namo ang Katolikong pari, Protestanteng ministro, ug Episcopal nga pari dinhi, apan dili kami magpasulod sa mga Saksi ni Jehova.”
Nga naningkamot nga magkalmado, gihatagan ko siyag duha ka kapilian: (1) Siya makapasulod kanamo dihadiha ug malinawon o (2) siya manubag sa kapolisan. Gihimo niya ang dali, malinawong pagpili.
Wala ako mahinumdom nga nakakita sukad kang Jimmy, sanglit ako mga upat ka tuig pa lamang sa misulod siya sa balay-dalangpanan. Misulod kami sa iyang kuwarto ug gisultihan siya sa among mga ngalan. Nga naghirag sa iyang katre, siya mipatugbaw, “Igsoon ko!”
“Dili, sa akong hunahuna wala ka makaila kon kinsa kami,” matud ko, nga nagsubli sa among mga ngalan.
“Ikaw akong igsoong lalaki,” siya miingon pag-usab, “ug akong igsoong babaye. Nagpaabot ako kaninyo!” Siya nagpasabot, siyempre, nga kami iyang igsoong lalaki ug igsoong babaye sa espiritu.
Nasayran namo nga ang iyang igsoong babaye, nga supak kaayo sa among relihiyon, nagtug-an kaniya bahin kanamo. “Si Al ug Barbara miapil sa inyong relihiyon,” siya miingon. Busa sa daghang katuigan siya nagpaabot kanamo nga moduaw kaniya, aron sa pag-ambit sa pagtuo nga among gikahiusahan.
Pagtuo nga Buhi ug Lig-on
Samtang nag-estoryahay kami, nadayag sa mausbawon nga kining kabhang lang sa usa ka tawo nasudlan sa usa ka higante nga kasingkasing nga punog espiritu ug pagtuo. Samtang gisusi namo ang iyang memorya, gikutlo niya ang daghang bahin sa Kasulatan, gihisgotan kanamo ang lalom nga tagna sa Bibliya, ug miawit pa ganig usa ka awit nga nakomposo niya nga nagpahayag sa iyang kinasingkasing nga pagpabili kang Jehova. Ang nawong ni Tiyo Jimmy misayag; ang tibuok niyang pagkatawo midan-ag sa kalipay ug kadasig nga iyaha lang sa usang dayag gilig-on sa Diyos. Kadto samag milagro alang kanamo. Kadto nahisama, aw, nahisamag usa ka pagkabanhaw.
Sa wala madugay, ang panahon alang sa 1977 distritong kombensiyon nagsingabot. Gisusi namo kon ikakuyog ba namo si Jimmy. Dili buot sa administrador nga itugot kana. Sa laing pagduaw, gipangutana namo ang usa ka nars kon madala ba namo si Tiyo Jimmy sa usa ka pasiyo diha sa wheelchair palibot sa bloke. Bisan pag dili nila batasan ang pagdala niya sa gawas, gihunahuna niya nga kadto maayong ideya. Busa mipadayon kami. Ugaling, nakalakaw ra kamig mubong distansiya sa dihang giagpas kami sa administrador, nga nagsinggit ug nagsulti kanamo nga dili gayod siya dad-on pag-usab sa gawas.
Sukad sa una namong pagduaw, gibinlan namo si Jimmy ug mga basahon. Sa among pagbalik, kadto wala na. “Hain ang imong mga basahon?” nangutana kami.
“Akong gipahimutang,” matud niya.
“Hain ang imong Bibliya?”
“Akong gipahimutang.”
Ang songbook, Yearbook, tanan nga gibilin namo niya iyang ibilin sa mga interesado. Nabatonan niya ang mainit nga tinguha sa pagdayeg sa ngalan ni Jehova. Nasayod usab siya nga ang administrasyon maglaglag sa tanang basahon nga hikaplagan nila.
Kas-a, sa paghisgot sa mga hitabo sa kalibotan ug sa tagna, ako miingon: “Tiyo Jimmy, dili ba kahibulongan? Sa dili madugay moabot na ang kataposan niining sistemaha nga gihisgotan ni Jesus. Ikaw sa dili madugay pagahimayaon na ingong hari ug saserdote sa mga langit, ug mahanaw na ang tanan nimong pag-antos.”
Nga walay pag-ukon-ukon, siya mapasiugdahong mitubag: “Dili kana ang hinungdanong butang.” Ug uban ang linaing pasiugda, siya mipasiugda: “Ang ngalan ni Jehova mabayaw!” Kami natandog nga nakahilak tungod sa iyang diyosnong panglantaw. Labihan ang giantos niya sa tibuok kinabuhi, apan ang kinadak-an niyang tinguha mao ang pagkakitang mabalaan ang ngalan ni Jehova inay maangkon ang kaugalingong kahupayan.
Usa ka Kahinangpang Kausaban
Sa 1978 ang mga empliyado sa balay-dalangpanan sa New York City mingwelga, nga napugos ang pagbalhin sa mga pasyente ngadto sa mga ospital. Ang gobyerno wala na motugot nga ablihan pag-usab ang daang balay-dalangpanan. Busa si Jimmy karon anaa sa labi pang maayong balay-dalangpanan sa usa ka bahin sa siyudad duol sa dagat. Ang tanang nars nagamahal kaniya ug nagaatiman kaniya. Komosta man ang iyang espirituwal nga mga panginahanglan?
Ang mga sakop sa lokal nga kongregasyon sa mga Saksi ni Jehova karon nagadala kang Tiyo Jimmy ngadto sa mga tigom ug sa mga asembliya. Siya nagatagtag ug kapin sa gatos ka magasin sa usa ka bulan, kadaghanan diha sa balay-dalangpanan. Bisan pa niana, ginadala usab siya sa mga Saksi sa ganghaan-sa-ganghaan nga ministeryo diha sa iyang wheelchair. Sa kadaghan siya gidala sa iyang mga igsoong lalaki ug babaye sa espiritu sa pagduaw kang Barbara ug kanako sa Watchtower Farms sa ilaya sa New York, diin kami nagapuyo sa miaging napulo ka tuig.
Si Tiyo Jimmy nagaingong ang kongregasyon “kahibulongan, ako gihigugma sa tanan.” Matuod kana. Sila tinuod nahigugma ug nagaatiman kaniya. Ang nagadumalang magtatan-aw, si Joseph Bowers, nagaingon: “Wala ako sukad makadungog nga ang mga igsoon nagmulo bahin sa pag-atiman kaniya.” Unya, uban ang dakong pagbati sa iyang tingog, siya midugang: “Natugob ang akong kinabuhi tungod sa pagkaila kaniya.”
Bisan tuod pinaagi sa pila ka sukdanan si Jimmy menos ug edukasyon, tin-aw nga nasentro niya ang kinalabwang isyu—ang pagbayaw kang Jehova ingong Supremong Soberano sa Uniberso. Kini ang kinaunahan sa iyang kaisipan. Kay malipayon nga siya buhi, siya masadyaong nagaalagad kang Jehova, sa bug-os nakaamgo nga pinaagi sa matinumanon niyang dalan siya nagapamatuod nga bakakon si Satanas ug nagapakig-ambit sa butang nasayran niya nga labing hinungdanong buluhaton sa tanan, ang ministeryo sa Gingharian.—Sumala sa giasoy ni Albert Caccarile.