Gikan sa Among mga Magbabasa
Ang Kal-ang sa Kultura
Daghang salamat sa artikulong “Mahulipan ba ang Kal-ang sa Kultura?” (Agosto 22, 1988) Tulo ug tunga ka mga tuig ang milabay ako mibalhin gikan sa Kasadpang nasod ngadto sa Halayong Silangan, tungod kay ang akong bana gusto nga mobalik sa iyang yutang natawhan. Sa akong nasinatian ako makaingon nga ang matag pulong sa maong artikulo maoy tinuod. Ako nahibulong sa ekselenteng paghisgot sa mga problema nga motungha tali sa nagkalainlaing mga kultura. Ang tambag nga gihatag maoy praktikal ug epektibo. Ang maong artikulo mitudlo kanako sa dili pagtandi sa akong unang paagi sa pagkinabuhi.
A. D., Indonesia
Pribasiya
Ako 17 anyos ang panuigon ug usa ka regular nga magbabasa sa seryeng “Mga Batan-on Nangutana . . . ,” nga hangtod karon akong nakaplagan nga naghatag kanakog maayong impormasyon. Apan ang artikulong nag-ulohang “Unsaon Nako Pagbaton ug Dugang Pribasiya?” (Oktubre 8, 1988) naghatag kanakog dakong kapalaw. Inyong gisugyot nga kon ang akong mga ginikanan mohimo ug wala dahomang pagduaw sa akong lawak o molantaw sa akong talaadlawan ilang gibuhat kini tungod sa ilang gugma kanako. Ako dili makadawat niana. Mosalig lang unta ang akong mga ginikanan kanako ug dili ‘buhaton ang tanan’ ug mousisa kanako. Kon ilang lantawon ang akong talaadlawan, dili ko sila pasayloon. Dili nako mosalig ug motug-an sa mga butang diha kanila. Sa akong talaadlawan gisulat ko ang akong personal nga mga problema ug mga pagbati. Kon unsay angay nga mahibaloan sa akong mga ginikanan kini akong itug-an ug sila matagbaw.
S. F., Federal Republic of Germany
Ang artikulo wala mag-uyon o magrekomendar sa batasan (diin ang mga batan-on diyutay na lamag gahom sa ilang kaugalingon) apan kini mitabang lamang sa mga batan-on nga mosabot kon nganong gibuhat kini sa pipila ka mga ginikanan—kini dili kay pagkamausisahon lamang.—ED.
Ako 12 anyos. Sa wala pa ipagawas kining artikuloha mahitungod sa pribasiya, ang akong inahan nakakaplag ug pipila sa akong mga sulat nga gisulat, ug iyang gibasa kini. Sa maong panahon ako wala makasabot kon ngano, apan ang artikulo mitabang kanako!
A. B., Tinipong Bansa
Akong nakita nga ang artikulo matulon-anon, nga adunay daghang maayong tambag. Apan miabot ang pasidaan dihang nabasa ko ang usa ka panig-ingnan sa usa ka batang babaye kinsang inahan misinghag nga biyaang bukas ang pultahan sa iyang lawak kon siya adunay bisitang lalaki sa sulod. Unsay katungod sa usa ka batan-ong lalaki diha sa lawak sa usa ka batan-ong babaye, nga sa kasagaran maoy tulganan? Wala! Ang akong inahan tinong dili gayod motugot niini. Ang sala, ang lawak sa pamilya, o ang kusina, nga anaa ang uban duol niini, maoy maalamong dapit nga abiabihon ang mga tin-edyer o kaha magtuon. Tingalig masaypan kini sa mga tin-edyer samtang ilang gibasa ang bahin sa maong artikulo!
J. J., Tinipong Bansa
Ang kabalaka ug mga sugyot ni J. J. makatarunganon. Ang serye sa “Mga Batan-on Nangutana . . . ” gisulat alang sa tanan. Ang artikulo nagpakita lamang kon giunsa paglantaw ang maong butang bisan sa katawhan nga dili bug-os nagkinabuhi sa mga suntoan sa Bibliya. Para kanila, ang pagbiya sa pultahan nga bukas maoy usa ka panalipod.—ED.
Gusto lang nakong pasalamatan kamo sa artikulong “Nganong Ako Walay Igong Pribasiya?” (Hulyo 8, 1988) Ako 13 anyos. Dili pa dugay ako nangutana sa pangutana mahitungod sa pribasiya. Ako ug ang akong mga ginikanan wala magkasinabot mahitungod sa pagbaton ug TV sa akong lawak ingon sa gibuhat ni Keith ug sa iyang mga ginikanan. Bisan tuod nga ako walay TV, akong nasabtan kon nganong ang akong mga ginikanan adunay kabalaka kon unsay akong ginalantaw.
S. H., Tinipong Bansa