Gikan sa Among mga Magbabasa
Panagbulag Ako nalibog kon ipadayon ba ang usa ka depektosong panagtrato sa dihang akong nabasahan ang inyong artikulo. (“Angay Bang Kami Magbulag?” Hulyo 22, 1988) Kadto usa ka tambag nga gihatag sa tukmang panahon. Gibati ko nga ang usa ka palas-anon nakuha gikan kanako. Karon ako nasayod kon unsay pangitaon ug kon unsay buhaton panahon sa panagtrato. Ako wala sukad makakaplag ug organisasyon nga nagahunahuna sa mga batan-on sama kaninyo. Ipadayon ninyo kana.
E. E., Ghana
Maria Karong bag-o ang Pagmata! may usa ka artikulo bahin kang Maria (Nobyembre 8, 1988) ug nagtamay sa bili nga among gibutang kaniya. Kami nagatimbaya kang Maria sama ni Gabriel. Kami nagatawag kaniyang ‘bulahan’ ug ‘Inahan’ sama diha sa Kasulatan. Kami malipayon ug buot namong magpabiling ingon niana.
M. P. M., Brazil
Hisabtan, ang ulohang Maria duol kaayo sa kasingkasing sa mga Katoliko, ug kami mouyon nga si Maria giuyonan gayod sa Diyos. Bisan pa niana, gipakita sa among artikulo nga walay Biblikanhong suportar ang daghang tradisyon nga naugmad maylabot kaniya, sama sa Imaculada Concepcion, Pagpasaka Niya sa Langit, o iyang papel ingong babayeng tigpataliwala. (Levitico 12:6-8; Lucas 2:22-24; 1 Corinto 15:50; 1 Timoteo 2:5) Busa, ang isyu nga giatubang sa mga Kristohanon dili maoy kon kaha sila nagasimba sa paagi nga gusto nila kondili kon kaha sila ‘nagasimba sa kamatuoran.’ (Juan 4:23)—ED.
Pagkadili-masayop sa Papa Nakurat ako sa inyong isyu sa Pebrero 8, 1989. (“Ang mga Papa ba Dili Masayop?”) Dulot akong nagtuo nga ang tanang matuod nga nahigugma sa Diyos angay magpabili sa butang ilang gikahiusahan ug magbuhat nga tingob sa panaghiusa. Apan kini daotang pag-atake, dili maayog pasikaranan, dili maayong pagkadumala, ug dili maayong pagkatuki. Unsa man ang inyong punto?
E. S., Tinipong Bansa
Sa kinadak-ang bahin, kami yanong nagtaho kon unsa mismo ang ginasulti sa mga Katoliko bahin sa doktrina sa pagkadili-masayop. Sa pagkamatuod, ang mga artikulo gibase halos sa bug-os sa Katolikong mga tinubdan, nga daghan kanila nagdala sa imprimatur sa Katolikong Simbahan. Kami naningkamot sa dugang sa pagtabang sa among mga magbabasa sa pagsusi sa maong doktrina sa kahayag sa Kasulatan. Ang maong dili-madapigong pagsusi sa relihiyosong mga tinuohan, bisan pag tingali masakit, dakog bili sa sinserong mga nangitag kamatuoran.—ED.
Bagyong Gilbert Nakabaton akog linaing impresyon sa inyong artikulo (Marso 22, 1989) nga ang mga suplay sa panghinabang gipadala alang lamang sa mga Saksi sa maong dapit sa Mexico. Unsa man ang mga silingan nga dili mga Saksi? May timaan usab sa ‘pagpagawal’ sa dihang ang artikulo miingon nga ‘ang mga silingan nakadayeg kaayo’ sa inyong mga buhat sa panghinabang.
C. T., Tinipong Bansa
Ang mga Saksi ni Jehova dili gayod magpasagad sa kahimtang sa uban inigkahitabo sa mga katalagman. Ang nangaging mga artikulo nagpadayag unsa ka andam ang mga Saksi ni Jehova nga motabang sa ilang mga silingan sa maong mga panahon. Tan-awa, pananglitan, ang artikulong nag-ulohang “The Levee Has Broken!” (Oktubre 8, 1986 sa Ingles) Sa ingon kami naningkamot sa “pagbuhat kon unsay maayo sa tanan, apan ilabina na ngadto sa mga kaubanan nato sa pagtuo.” (Galacia 6:10) Bisan tuod ang among motibo dili pagpadayeg sa uban, ang maong maayong binuhatan motukmod sa mga maniniid sa paghatag ug mga pulong sa pagdayeg. (1 Pedro 2:12)—ED.
Baldado Nakaangay ako pag-ayo sa inyong artikulong “Baldado Apan Malamposon.” (Oktubre 22, 1988) Tungod kay ako may cerebral palsy, ang mga tawo usahay mopugos sa pagtratar kanako nga daw ako dili makahimo sa bisan unsa. Sila nagaingon: ‘Dili ka makahimo niini. Sige, tabangan ko ikaw!’ sumala sa gipunting sa inyong artikulo. Hinuon, akong makaplagan nga kon ako mosulay, ako makahimo!
C. S., Tinipong Bansa