Kooperasyon—Alang Kana sa mga Langgam
Himamata ang putig-atubang nga bee-eater o mokaon ug putyukan, usa ka langgam nga nagasikop sa mga insekto, apil mga putyukan, samtang nagalupad. Kining buloknong gamayng linalang nailhan usab tungod sa dihakog nga mga kinaiya niini. Inay nga magasalag sa usa ka kahoy, kini mokutkot sa bungtod sa balas ug magagamag salagan nga lawak sa tumoy sa taas nga tunil, diin ang baye mangitlog. Sa diha nga mapiso na kini, ang ubang bee-eater motabang, nga moayuda sa mga ginikanan sa pagtaganag pagkaon alang sa mga piso. Kining masinugtanong mga magtatabang kasagaran maoy mga anak gikan sa nangaging pangitlog, apan sila nagaapil usab sa mga langgam nga dili paryente. Kon nihit ang pagkaon, sama sa panahon sa hulaw, ang gidaghanon sa katabang nga mga bee-eater napanid-an nga modaghan.
“Bisan sa panahong dili tingsanay,” miingon si Sinclair ug si Mendelsohn diha sa librong Everyone’s Guide to South African Birds, “ang maong espisye kasagarang magkahugoy sa ginagmayng mga grupo, ug sa magabii, ang daghan kanila mamatog nga magpanon sa kakahoyan”—nga usa pa ka pamatuod nga ‘ang mga langgam nga samag balhibo magtapok.’
[Tinubdan sa Letrato sa panid 31]
World copyright photograph by Peter Johnson