Si Johnny ba Nagkinahanglan ug Kompiyuter Karon?

Unsang papel ang gidula sa kompiyuter sa edukasyon sa atong mga anak?

Unsa ka hanas kini nga magtutudlo?

ANG inahan ni Johnny naglingkod nga malinawong namati sa iyang magtutudlo. GisulHS1,tihan siya sa magtutudlo nga dili maayo ang lakat ni Johnny sa tunghaan.

“Buweno,” nangutana ang inahan, “unsay imong ikasugyot?”

“Nakahunahuna ka bag kompiyuter sa balay?” mitubag ang magtutudlo.

Ang mga anunsiyo nga naglarawan sa usa ka talan-awon nga sama sa usa nga gibatbat sa ibabaw dakog nahimo sa daghang nabalakang mga inahan sa pagtuo nga aron maseguro ang hustong edukasyon—ug umaabot nga mga kalaoman sa trabaho—sa ilang mga anak, kinahanglang ilang tinoon nga makat-onan sa ilang mga anak ang tanang butang nga ilang mahimo bahin sa mga kompiyuter. Dugang pa, ang mga kompiyuter nanagpanungha sa mga lawak-tunghaan sa kusog nga nagsakang gidaghanon.

Sa pagkamatuod ang kompiyuter dunay potensiyal sa pagtudlo ug sa pag-ugmad sa mamugnaon ug pagsulbad-ug-problemang mga katakos sa mga paagi nga wala palandonga niadto nga posible.

Pananglitan, ang usa ka programa sa kompiyuter nagtugot sa estudyante sa pagdisiktar dili lamang sa baki kondili sa pagtibuok niana pagbalik. Kon hustong paagi nahimo sa estudyante ang “operasyon,” premyohan siya sa pagkakita sa baki nga mabuhi ug moambak diha sa iskren. Gisundog sa ubang mga programa ang lihok sa mga planeta, sa paglarawan sa geograpiya sa yuta, o makahimo sa estudyante sa pagpalupad ug ayroplano, sa pagmaneho ug sakyanan, o sa paghimog kemikal nga mga eksperimento.

Ang laing paagi diin ang kompiyuter gigamit katibuk-ang gitawag inabagan-sa-kompiyuter nga pagtuon. Ang kompiyuter mangutana. Kon ang estudyante makatubag sa husto, mopadayon kini sa sunod nga pangutana. Kon dili, hatagan ang mga estudyante ug mga ilhanan. Kini naghatag sa estudyante ug inusarang eksperyensiya sa pagkat-on ug nagtugot kaniya sa pagpadayon sa iyang kaugalingong paso. Gawas pa, ang kompiyuter dunay dili-maupos nga “pailob” ug dili “masuko” sa estudyante kon sayop ang tubag nga ihatag, nga maoy reaksiyon sa magtutudlo. Kini maayo usab sa pagkakat-on.

Ang kadaghanang mga tunghaan karong adlawa dunay mga klase sa pagbaton ug kahibalo bahin sa kompiyuter. Kining mga klaseha nagtudlo sa mga estudyante kon unsaon sa pag-operit ug sa pagprograma sa makina. Alang niadtong kinsa interesado sa karera sa natad sa kompiyuter, kini importante kaayo. Ang mga tigtanyag niining matanga sa karikulum puwersadong mibati nga ang tanang mga estudyante kinahanglan dunay igong kahibalo sa mga kompiyuter. Ang mga kalaoman sa trabaho, tinuod o hinanduraw, nakahatag niining matanga sa mga klase ug dakong kaikag.

Ang pagsulat ug pagdukiduki maoy ubang mapuslanong mga aplikasyon sa mga kompiyuter sa tunghaan. Ang mga magtutudlo sa mga klase sa pagsulat sagad makakaplag sa mga estudyante nga nagagamit ug mga kompiyuter ingong word processors nga mas maikagon sa pagsulat pag-usab ug sa pag-edit sa ilang kaugalingong materyal—usa ka importanteng bahin sa maayong pagsulat—tungod kay ilang makita kanunay sa ilang atubangan ang nahuman na, mahinlo nga produkto.

Ang kompiyuter nagabukas usab ug dakong tuboran sa impormasyon alang sa estudyante. Ginamit ang hustong kasangkapan, ang mga estudyante sa usa ka tunghaan makakomunikar sa mga estudyante sa ubang mga tunghaan alang sa linain nga mga proyekto. Sila makagamit usab sa dagkong sentral nga mga librariya ug sa mga bangko sa impormasyon, makagamit sa nunot sa panahong impormasyon sa nagkalainlaing mga ulohan nga dili maarangan sa ilang kaugalingong tunghaan sa pagmentinar.

Sa matin-aw, kon gamiton sa hustong paagi, ang kompiyuter maoy usa ka tabang sa pagtudlo. Ang eksperyensiya sa paggamit ug ang direktang mga situwasyon posible kon dunay igong mga kompiyuter nga bililhon alang sa batan-ong mga estudyante. Ang mga edad-edaran makagamit ug labaw sa gibase-sa-tun-anang mga libro nga karikulum ug makapahimulos gikan sa bag-ong mga paagi sa pagtuon nga gipaposible sa kompiyuter.

Kining tanan katingalahang pamation. Apan sa tinuod nga situwasyon unsa may lakat niining tanan? Ang kompiyuter ba nakaabot sa mga ginalaoman?

Nakaabot ba sa mga Ginalaoman?

Ang paghimo sa mga kompiyuter diha sa edukasyon nga malamposon walay kalainan gikan sa paghimo sa bisan unsang karikulum sa tunghaan nga malamposon. Ang gikinahanglan mao ang hustong matang sa mga programa nga igatudlo sa kuwalipikadong mga magtutudlo. Naabot ba kini nga sukdanan?

Ang ubang mga tunghaan, sa ilang pagdalidali sa pagpalit ug teknolohiya sa kompiyuter mipadayon ug mipalit ug mga kompiyuter nga wala ayoha pagpalandong kon unsaon sila sa paggamit ug kon unsa ang mga panginahanglan sa mga estudyante. Ang resulta mao nga daghang tunghaan nadukot sa malisod nga buluhaton sa pagpangitag mapuslanong kagamitan sa ilang mga kompiyuter.

Kining kalihokana gipabanaag kon sa unsang paagi gigamit ang mga kompiyuter sa tunghaan karon. Samtang dunay maayong mga programa ug maalamong paagi sa pagtudlo, nakita sa surbi nga kining mga programaha naglangkob lamang ug kinaubsang total sa gipanggamit sa mga tunghaan. Ang kadaghanan sa mga programa nga gigamit sa mga lawak-tunghaan maoy alang sa pagpraktis ug pagbansay o sa pagtudlo mahitungod sa kompiyuter.

Ang pagpraktis ug pagbansay, sa pagkamatuod, dunay ilang dapit sa tunghaan. Apan lisod lalison ang katarongan sa pangutana nga gibangon sa usa ka magtutudlo ug sa instruktor sa kompiyuter: “Nganong mogasto man ug $2,000, o $1,200, o bisan $600 alang sa usa ka elektronikong libro kon ang yano karaang $2.95 nga libro nga dunay daghang papel nga magamit sa pagbansay ug praktis sama ra man ug katuyoan niana?” Dugang pa, ang ubang mga edukador mibati nga ang maong aplikasyon nagpildi sa bug-os katuyoan sa paggamit sa mga kompiyuter sa mga lawak-tunghaan tungod kay gihimo nila ang pagtuon nga magapangita na lang ug husto ug sayop nga mga tubag inay pukawon ang kaisipan ug ang kamamugnaon.

Mahitungod sa panginahanglan sa pagbaton ug kahibalo sa kompiyuter, daghan ang mibati niini nga usa ka inalistong gimik sa tighimog mga kompiyuter ug sa nalangkit nga mga industriya. Tungod sa mga anunsiyo sama sa usa nga gikutlo sa sinugdan, ug tingali tungod sa ilang kahadlok niining bag-ong makina, daghang ginikanan mibati nga ang ilang mga anak dili molampos kon sila walay kahibalo sa obra sa kompiyuter. Sa pagkamatuod, diyutay lamang sa bag-o umaabot nga mga trabaho ang nagkinahanglag may-kahibalo sa kompiyuter, sa ato pa, kahibalo sa pagprograma, mga pinulongan sa kompiyuter, ug uban pa. Hinunoa, ang mga kompiyuter gamiton ingong mga kasangkapan, sama sa komung paggamit sa mga kalkulitor o elektrik nga makinilya karon. Siyempre usa ka bentaha nga makahibalo sa paggamit niining mga makinaha, apan walay nabalaka bahin sa pagkawalay-kahibalo kon sa unsang paagi sila nagaobra gawas kon ang usa interesado sa usa ka propesyon niining natara. Ang kaylap nga hunahuna mao nga ang pagbaton ug kahibalo sa kompiyuter kinahanglang itudlo apan ingong kapilian lamang.

Sanglit ang mga kompiyuter mga bag-ohan pa man sa mga lawak-tunghaan, kini daw dili masabtan sa mga magtutudlo nga walay teknikal nga kahibalo sama sa ginahimo niini diha sa mga estudyante. Busa, ang pagsukol sa pagbag-o, nakita sa mga opisyales sa tunghaan, maoy dakong babag sa pagpataas sa sukod sa pagtudlo ug kompiyuter.

“Daghang magtutudlo nalisdan sa mga kompiyuter,” miingon ang prinsipal sa tunghaan. “Sila nahibalo nga ang mga kompiyuter ania na ug angay unta nga maikag sila. Apan ang pagbansay sa kawanihan mao gihapon ang labing dakong problema.” Ang pag-edukar pag-usab sa mga magtutudlo nagkinahanglag panahon ug kuwarta. Apan, ang mga awtoridad sa tunghaan malaomon nga samtang makabaton ang mga magtutudlo ug dugang eksperyensiya ug dugang mga magtutudlo nga makaantigo ug kompiyuter moanib sa ilang pundok, ang dugang pagkaepektibo nga kagamitan makaplagan niining kasangkapana.

Kon Unsay Angay Buhaton sa mga Ginikanan

Busa si Johnny ba nagkinahanglan ug kompiyuter karon? Ang tubag nagadepende kanimo, nga ginikanan. Kon nabalaka ka nga ang imong anak dili-molampos kon siya dili makabaton ug kompiyuter, nan tingali ang nauna makatabang nimo sa pagtan-aw sa larawan sa mas balanse nga paagi.

Ang mga edukador sa katibuk-an nagkauyon nga ang mga kabataang nagtungha kinahanglan dunay igong kahibalo sa mga kompiyuter. Alang niini, daghang publikong mga tunghaan karong adlawa dunay pila ka matang sa programa sa pagtudlo sa mga estudyante mahitungod sa mga kompiyuter, gipailaila sila sa pangunang mga elemento sa makina—ang kompiyuter, keyboard, disk drive, printer, ug uban pa—ug ang pasiunang paghimo sa programa. Ang tunghaan ang kasagarang mohatag sa gikinahanglang gamit diha sa mga klase sa kompiyuter, ug ang mga estudyante hatagan ug eksperyensiya sa paggamit. Kadtong interesado sa natad sa kompiyuter makapili ug linain nga mga klase sa ulahing mga tuig sama sa paagi sa pagpili sa mga estudyante ug art, accounting, sekretaryal, o ubang mga kurso.

Sa pagkamatuod, dunay ubang mga tunghaan diin ang mga kompiyuter mas sangkad nga gigamit ug ang mga programang mabag-o gigamit sa pagtudlo sa nagkalainlaing mga subjects. Apan tungod kay ang maong karikulum bag-o pa man, walay usa ang makatino kon kini mas maayo kay sa naandang mga paagi sa edukasyon.

Tingali ang mga pulong sa usa ka hayskol nga anaa sa ikatulong ang-ang diha sa artikulo sa New York Times magamit sa pagsumariyo sa situwasyon. Siya misulat: “Ang mga kompiyuter dunay dapit sa edukasyon ingong mga kasangkapan, apan sila dili usa ka porma sa sosyal nga kasegurohan batok sa kawalay-kaarang ug hanap nga panghunahuna.” Nagpasiugda sa kahinungdanon sa pagtudlo sa mga estudyante kon unsaon sa paghunahuna, siya mitapos: “Walay teknolohikal nga panglaktod nianang tumonga.”

[Kahon sa panid 26]

“Ang bata mas daghan pag makat-onan gikan sa usa ka oras nga magugol uban sa usa ka interesadong ginikanan kay sa usa ka oras nga magugol atubangan sa usa ka nagatingog nga kahon.”—Tudling sa Personal Computers, The New York Times