Mga Batan-on Nangutana . . .

Unsay Ikasulti Bahin sa mga Karera sa Pagkamodel ug Bangga sa Kaanyag?

“SA PAG-ADTO namo sa New York sa usang tuig,” nahinumdom ang 12-anyos nga si Amy, “ang usa ka lalaking nagdumalag otel miingon sa akong inahan, ‘Angay nga pasudlon nimo ang imong anak babaye sa eskuylahan sa pagkamodel. . . . Siya matahom.’”

Ang ubay-ubayng madanihong batan-on may susamang kasinatian. Ang 15-anyos nga si Racine giteleponohan sa usa ka lalaki nga misulay sa pagpainteres niya ug sa iyang manghod nga babaye diha sa karera sa pagkamodel. Usa ka batan-ong babaye nga taga-South Africa gihangyong mosalmot sa usa ka bangga sa kaanyag. Ug ang dakog-sapi nga mga tanyag dili limitado sa mga batan-ong babaye. Ang batan-ong si Jonathan gitanyagag trabaho ingong lalaking model.

Oo, sa tibuok kalibotan, ang batan-ong mga lalaki ug mga babaye ug mga bata sa tanang edad gipanguha alang sa mga karera sa pagkamodel, mga bangga sa kaanyag, ug sa susama. Sa Tinipong Bansa lamang, gitahong ginatos ka libong bangga sa kaanyag ang ginahimo kada tuig. Ang mga mananaog magadawat ug linibong dolyares nga kuwarta, mga premyo, ug mga eskolarsip. Alang sa pipila, ang pagkadaog sa usa ka bangga sa kaanyag misangpot sa dakog-saping mga karera sa kalingawan ug sa pagkamodel.

Usa ka batan-ong babaye miingon: “Sa tibuok kong kinabuhi buot kong mahimong model sa sinina​—nga magmodel sa mga biste alang sa lokal nga mga magasin ug mga fashion show. Ang bayad lainlain gikan sa $25 ngadto $100 sa matag oras.” Hinuon, gikataho, ang pila ka hawod nga model may kinitaang abot sa $2,500 kada adlaw! Nan, dili katingad-ang ang pila ka Kristohanong batan-on natental sa pagpahimulos sa ilang maayong hitsura. Unsa kahay imong sanong kon tanyagan ka sa maong ikapasigarbong higayon?

Ang Kaanyag Mahimong Mapuslanon

Giingon bahin sa Hudiyang ulay nga si Ester nga siya “matahom sa lawas ug maanyag sa panagway.” (Ester 2:7) Ngani, makaingon ka gani nga siya dili-kinabubut-ong misalmot sa usa ka matang sa bangga sa kaanyag. Ang mga kahimtang? Ang Persianong rayna si Vasti gipapahawa sa katungdanan tungod sa dili pagpasakop. Aron hikaplagan ang angay nga kapuli, gipatigom ni Haring Assuero ang labing maanyag nga mga ulay gikan sa tibuok nga dominyo. Latas sa 12-bulang yugto, gihikay niyang ang mga batan-ong babaye ibutang sa espesyal nga diyeta ug magadawat sa regular nga mga masahe pinaagi sa lana sa balsamo ug mira. Unya ang matag dalaga sa baylo gitulotimbang. Ug sa pag-abot sa turno ni Ester, siya ang napiling bag-ong rayna!​—Ester 1:12–2:17.

Nan, nganong si Ester misalmot man? Siya ba magarbohong nangitag pagdayeg? Dili, si Ester nagtuman sa mando ni Jehova, nga subsob niyang gipangita pinaagi sa iyang diyosnong ig-agaw ug magbalantay, si Mardocheo. (Ester 4:5-17) Ang usa ka tawong daotan nga ginganlag si Aman nagplano sa paglaglag sa katawhan sa Diyos, ang nasod sa Israel. Ang ‘bangga sa kaanyag’ nagtugot kang Jehova sa pagmaneobra aron si Ester mahibutang sa usa ka iladong katungdanan diin siya makapakyas sa maong daotang plano. Busa ang maayong panagway ni Ester nahimong usa ka panalangin alang sa tanang katawhan sa Diyos!

Komosta man karong adlawa? Kon unsay hitsura sa usa tinong dili mao ang labing hinungdanong butang sa kinabuhi.a Bisan pa niana, kon ubanan sa pagkamakasaranganon ug pagpaubos, ang madanihong panagway mahimong mapuslanong butang. Apan, nagkahulogan ba kini nga ang pagmodel o pagsalmot sa mga bangga sa kaanyag maoy maalamong paagi sa paggamit sa maong mapuslanong butang? O may mga butang ba nga pagatagdon gawas pa sa panghaylo sa kabantog, pagdayeg, o bahandi?

Luyo sa Kasilaw

Ang pagmodel sa sinina may kaugalingong pandani. Ang nindot nga sinina, mahalong alahas, dakong suweldo, mga kalaoman sa biyahe ug paggawas sa telebisyon​—kining tanan makapahaylo. Dugang pa, ang pagbansay sa pagmodel nakatabang sa daghang batan-ong babaye ug mga lalaki sa paglakaw nga nindot ug pagsulting may pagsalig ug barog. Apan luyo sa kamadanihon, kasilaw, ug kaidlak tingali nagapahipi ang tinuod nga mga kapeligrohan alang sa usa ka Kristohanon.

Dili ingon nga sa kaugalingon ang pagmodel maoy daotan. Ang pila ka pagmodel nagaalagad sa usa ka matarong nga katuyoan: aron ang usa ka produkto tan-awong madanihon. Kana ang usa ka hinungdan nganong ang maanindot nga mga kamot gigamit sa pagpasundayag sa kyutiks diha sa mga panid sa magasin ug sa mga komersiyal sa TV. Sa susamang paagi, ang mga lalaki ug mga babayeng edukado gigamit sa pagpasundayag sa mga biste. Kon pananglit makasaranganon ang maong biste, tingali walay pagsupak nga ang usa ka Kristohanon bayran aron imodel kana.

Bisan pa niana, adunay daghang suliran nga kinaiyanhon sa pagmodel nga dili kanunay sayon nga malikayan. Unsay imong reaksiyon, pananglitan, kon pasul-obon kag dili-ligdong o dili-angay sa mga Kristohanon? O kon mogamit ang usa ka letratista sa malansisong pagpiit aron ikaw magpaletrato sa makapatental, makabibihag nga paagi? Dugang pa, ang usa dili kanunay makatino unsaon sa paggamit ang mga letrato. Pananglitan, ang mga letrato basin mopatim-aw diha sa usa ka kahimtangan nga nagapasiugdag mga pangilin sa bakak nga relihiyon o may imoral nga mga kahulogan.

Unya anaa ang epekto sa maong karera diha sa personalidad sa usa, nga magpausbaw sa pagkaugmad sa negatibong mga kinaiya. Ang padayong pasiugda diha sa gawasnong panagway inay sa “tinagong pagkatawo sa kasingkasing” nakahimo sa pila ka model sa sinina nga labihan ka magarbohon. (1 Pedro 3:4) Gawas pa, ang pagtrabaho uban sa mahalong biste, alahas, ug susama makapaturok sa materyalistikanhong hunahuna.​—1 Timoteo 6:10.

Ang propesyon sa pagmodel sa sinina ilado usab sa pagladlad sa usa ngadto sa mga indibiduwal, lalaki ug babaye, nga mopugos sa seksuwal nga mga pabor ilis sa pag-uswag sa karera. Sumala sa giingon sa usa ka kanhing model sa sinina: “Sa prangka, kinahanglang mopahiuyon ka [sa seksuwal nga paagi] aron mouswag.” Ang pipila dugang nag-angkon nga ang homoseksuwalidad kaylap taliwala sa mga lalaking model. Bisan tuod kini tingali dili kanunay matuod, basin kini labaw nga suliran sa pagmodel kay sa diha sa ubang propesyon.

Mga Bangga sa Kaanyag

Ang kadaghanan sa nahaunang kasayoran ikaingon usab bahin sa mga bangga sa kaanyag. Hinuon, dugang pa anaa usab ang pagpiit sa kusog nga pakig-indig. Kini nakatukmod sa pila ka mag-iindig sa puntong tinuyong sabotaheon ang isigka mag-iindig. Sumala sa usa ka taho, “ang pila ka mag-iindig gusto kaayong modaog nga sila magpahid sa lipstik sa mga batingsiyot sa mga karibal o ‘ditinuyong’ magmantsa sa ilang mga trahe pinaagi sa Coke.”

Gawas pa, ang mga esponsor sa bangga sa kaanyag nagadahom sa bug-os nga pagkomitir gikan sa ilang mga dalaga ingong ilang mga hawas sa pamaligya ug relasyong publiko. Kasagaran nga nagkinahanglan kinig pagtambong sa sosyal nga panagkatigom hangtod sa kaadlawon. Usa ka dalaga giingnan: “Darling, dili ka gayod kapoyon. Hinumdomi kana. Ikaw mao ang unang moabot sa usa ka parti ug ikaw mao ang kinaulahiang molakaw.” Sa labing menos, kini makaladlad sa usa ka Kristohanong batan-on sa dili-maayong pakig-uban ug mahimong mosangpot sa pagkalangkit sa usa sa usa ka dili-magtutuo.​—2 Corinto 6:14.

Sa kataposan, anaa ang kamatuoran nga ang mga bangga sa kaanyag wala magtagad sa prinsipyo sa Bibliya sa Roma 1:25, nga nagasaway niadtong ‘nagasimba ug nagahatag ug balaang pag-alagad ngadto sa kalalangan inay sa Usang naglalang.’ (Itandi ang Buhat 12:21-23.) Pinasukad lamang niana, ang Kristohanong batan-on mas maayo nga mobalibad sa pagsalmot sa usa ka bangga sa kaanyag bisag pag kini ginagmay ra diha sa eskuylahan.

Tinuod nga Kaanyag

Ang mga batan-ong gihisgotan nga unauna nagtimbangtimbang sa maong mga kamatuoran sa paghimo sa ilang kaugalingong mga desisyon. Bisag pag ang pagpanarbaho ingong model dili tingali daotan sa kaugalingon, si Amy ug Racine mihukom nga dili mohimo niana. Si Jonathan samang wala modawat sa trabaho ingong lalaking model ug karon nagaalagad sa hedkuwarter sa mga Saksi ni Jehova sa kalibotan, nga nagasubay sa karera sa bug-os-panahong ministeryo. Apan ang laing madanihong dalaga misalmot ug nakadaog sa duha ka bangga sa kaanyag. Karong adlawa, siya wala na magatambong sa Kristohanong mga tigom. Pagkatinuod ang panultihon: “Kanang madanihon ug maanyag dili kanunay nga maayo; apan kanang maayo sa kanunay maanyag.”

Kita gipahinumdoman na usab kang Ester. Tungod sa iyang lawasnong kaanyag, siya naapil sa gipilian sa hari ug asawa. Bisan pa niana, ang iyang kaligdong, pagkamapasakopon, pagkamasinundanon, ug kadili-dalo ang naghimo niyang tinuod nga maanyag. (Ester 2:13, 15-17) Siya naghatag panig-ingnan sa mga pulong ni Pedro: “Ayaw himoa nga ang imong pagdayandayan mao ang panggawas nga salapid sa buhok ug pagsul-ob sa bulawang mga pahiyas o pagsul-ob sa panggawas nga mga biste, kondili himoa nga kini mao ang natagong pagkatawo sa kasingkasing diha sa dili-madunotong biste sa mahilomon ug malumong espiritu, nga dakog bili sa mga panan-aw sa Diyos.” (1 Pedro 3:3, 4) Sa kadugayan, ang pag-ugmad niining Kristohanong mga hiyas labaw nga mapuslanon kay sa dili-magdugayng mga ganti sa lawasnong kaanyag.

[Footnote]

[Mga hulagway sa panid 23]

Ang Kristohanong mga hiyas labaw nga mapuslanon kay sa dili-magdugayng mga ganti sa lawasnong kaanyag