Mga Batan-on Nangutana . . .

Andam na ba Akong Magpabawtismo?

Dear Watchtower Society:

Ang akong ngalan maoy Sharon ug ako 13 anyos. Nahibulong ako kon ako andam na ba alang sa bawtismo. Sa akong hunahuna andam na ako, apan wala ako makaseguro. Naseguro ko nga kini anaa usab sa mga hunahuna sa ubang batan-ong Kristohanon. Mahimo bang mosulat kamog usa ka artikulo sa pagtabang nga matul-id ako?

SI Sharon husto. Ang bawtismo gihunahuna sa daghang batan-on nga mahinadlokon sa Diyos. Taliwala sa mga Saksi ni Jehova, naila sa mga batan-on nga kinahanglang sila mohimo sa ilang kaugalingong desisyon aron sa pag-alagad sa Diyos, nga ang ilang mga ginikanan dili makahimo sa desisyon alang kanila. Giila usab nila nga gisugo ni Jesu-Kristo ang iyang mga sumusunod sa pagpasimbolo sa ilang dedikasyon ngadto sa Diyos pinaagi sa bawtismo sa tubig.​—Mateo 28:19, 20.

Ang paghimog publikong deklarasyon ingong usa ka dedikadong alagad sa Diyos maoy usa ka dakong responsabilidad. Tinong dili mo buot magdalidali sa paghimo niini aron lang pahimut-an ang imong mga higala o mga ginikanan. Dugang pa, walay mausa ang angay mopugos kanimo sa pagpabawtismo. (Salmo 110:3) Hinunoa, si Jesus nagtambag sa tanan sa “pagbanabana sa galastohan” sa pagkahimong iyang tinun-an. (Lucas 14:28) Kini wala magpasabot nga angay nimong tulotimbangon kon kaha buot mong mahimong tinun-an ni Kristo o dili. Tin-aw kini mao ang matarong butang pagabuhaton. Hinuon, angay kang bug-os masayod kon unsay nalangkit sa pagkahimong usa ka Saksi ni Jehova.a Sunod, angay nimong tinoon kon kaha ikaw tinuod bang andam nga mopas-an sa maong tulubagon.​—Itandi ang Proverbio 20:25.

‘Ako ba Husto na sa Edad?’

Inigkaedaran na sa mga tin-edyer, kasagaran nga sila mobati nga sila may katungod sa pagpahimulos sa pila ka pribilehiyo ug mga responsabilidad. Sila daling mopugos sa pagdrayb sa kotse sa pamilya, sa paghangyo nga magbatog tapos-eskuyla nga mga trabaho, sa pagkagustong makabaton sa ilang kaugalingong kuwarta nga magastogasto. Apan kon bahin sa bawtismo, daghang batan-on ang mamalibad nga sila bata pa kaayo o dili pa andam alang nianang tulubagona. Usa ka batan-ong ginganlag si Andre miingon: “Daghang batan-on ang maghulat hangtod sila 17 o 18 anyos na aron magpabawtismo, nga may pagkagulang na.” Ngano? “Kay dugay na una niana sila edaran na nga mohimog ubang desisyon sa ilang kaugalingon.”

Oo, ang kamatuoran mismo nga ikaw usa ka tin-edyer dili pasangil sa ‘pagtangkiang sa duha ka magkalaing hunahuna,’ ni kini angayan nga katarongan sa paglikay sa pagbarog ingong usa ka Kristohanon. (1 Hari 18:21) “Hinumdomi, karon, ang imong Dakong Maglalalang sa mga adlaw sa imong pagkabatan-on,” mao ang tambag sa Bibliya. (Ecclesiastes 12:1) Ang propetang si Samuel nagsugod sa pag-alagad kang Jehova sa linghod kaayong panuigon. (1 Samuel 3:1-18; 12:2) Ang salmistang si David susamang nakaingon: “Ikaw mao ang akong paglaom, O Soberanong Ginoong Jehova, ang akong pagsalig sukad sa akong pagkabatan-on.”​—Salmo 71:5.

Sa susama, linibong Kristohanong batan-on karong adlawa​—apil ang pila nga dili pa tin-edyer​—nagpamatuod nga sila kasaligan nga igo sa paghimo sa pahinungod sa pag-alagad sa Diyos. Itugot nato, ang pila ka tin-edyer kulang sa kaugdang ug iresponsable kaayo ug dili-hamtong sa emosyon sa paghimo sa layog-abot nga desisyon sama sa bawtismo. (Proverbio 22:15) Apan tinuod ba gayod kini sa imong kahimtang? (Ang imong mga ginikanan pihong daghag ikasulti bahin niini.) Ang Diyos dili modahom nga ang usa ka tin-edyer magbaton sa kahamtong sa 40-anyos. Siya nasayod pag-ayo nga ikaw mahimong makaagom sa “mga pangibog nga iya sa mga batan-on.” (2 Timoteo 2:22) Apan kon ikaw edaran nga igo nga mahimong may igoigong kaugdang ug responsable, nan lagmit kaayo ikaw edaran sa paghunahuna sa paghimog pahinungod. Bisan pa niana, adunay ubang mga pangutana nga angay nimong isukna sa kaugalingon.

‘Nakabaton na ba Akog Igong Kahibalo?’

Ang librong The Adolescent, nga sinulat ni F. Philip Rice, miingon nga “ang mabaw, inosentehong ideya bahin sa relihiyon kasagarang dili makabarog ubos sa pag-atake ug pagsulay.” Bisan pa niana, si Gn. Rice miingon: “Adunay pipila ka timailhan nga ang mga batan-on karong adlawa wala intawon mahibalo. Ang pagtuon bahin sa kahibalo sa Bibliya sa Protestante ug Hudiyong mga estudyanteng sopomor sa unibersidad nagpadayag sa dakong kawalay-alamag sa Daan ug Bag-ong mga Testamento.”

Kini dili angay magmatuod sa usang magpabawtismo. Ang usa kinahanglan unang ‘magbatog kahibalo’ aron mahimong usa ka tinun-an, o tinudloan. (Juan 17:3; Mateo 28:19) Busa dili ba makataronganon ang pagdahom nga una magpabawtismo, imong nahibaloan labing menos “ang paninugdang mga butang sa balaang mga pahayag sa Diyos”? (Hebreohanon 5:12) Kana mag-apil sa pagkahibalo kon unsay ginatudlo sa Bibliya bahin sa mga butang sama sa kalag, kahimtang sa mga patay, pagbalaan sa ngalan sa Diyos, Gingharian, ug ang lukat.

Tinuod, lagmit may nahibaloan ka bahin sa Bibliya tungod lang kay nagauban ka sa imong mga ginikanan sa Kristohanong mga tigom. Apan ang kahibalong nabatonan nianang paagiha basin pangibabaw ug lagmit dili “makabarog ubos sa pag-atake ug pagsulay.” Kinahanglang makaarang ka sa paghatag sa uban ug “katarongan sa paglaom diha kanimo.”​—1 Pedro 3:15.

Si Terry nag-ingon nga siya nagtuo sa mga kamatuoran sa Bibliya. Bisan pa niana siya miangkon: “Wala gayod ako makatagbaw sa akong kaugalingon pinaagi sa pagsukna sa akong kaugalingong mga pangutana ug dayon pagtubag kanila. Dili pa dugay, gisugdan ko pagbuhat kini.” Ang resulta sa maong programa sa pagtuon sa Bibliya? “Nagauswag ang akong pagtuo, ug karon ako makaarang sa pagpakigsulti sa mga tawo uban ang tinuod nga kombiksiyon. Ginasultihan ko ang tanang batan-ong Saksi nga dili mahadlok sa pagsukna sa ilang kaugalingon kon kini ba ang kamatuoran. Pagsusi! Panukiduki, pagtuon. ‘Tinoa ang tanang butang.’ Dayon ikaw makapahinungod sa imong kaugalingon sa bug-os nga kasingkasing kang Jehova.”​—1 Tesalonica 5:21.

“Mga Magtutuman sa Pulong”

Hinuon, kinahanglan kita mahimong “mga magtutuman sa pulong, ug dili mga mamiminaw lamang.” (Santiago 1:22) Dili ka makapresentar sa imong kaugalingon alang sa bawtismo ug mahimong usa nga ‘nagatago kon unsa siya’ pinaagi sa pagtago sa seryosong mga buhat nga daotan. (Salmo 26:4) Ang maong mga buhat nga daotan mag-apil sa seksuwal nga imoralidad, paghuboghubog, pag-abusar sa droga, o bisan hain sa mga salang gihisgotan sa 1 Corinto 6:9, 10. Kon ikaw may mga suliran bahin niini, nganong dili maghikay uban sa imong mga ginikanan nga makigsulti sa pila ka Kristohanong ansiano? Salig nga ihatag kanimo ang malulutong tabang.​—Santiago 5:14, 15.

Mamahimo usab nga gikinahanglan ang pila ka kausaban sa paagi sa pagtratar nimo sa imong mga ginikanan o pag-isip sa tambag nga nagagikan sa Kristohanong mga ansiano, bisan sa paagi sa pagpili nimog mga higala. (Proverbio 6:20; 13:20; 1 Corinto 15:33; Hebreohanon 13:17) Mahimong dili sayon ang paghimo sa maong mga kausaban, apan ang Proverbio 11:19 nagapasidaan kanato: “Ang usang malig-ong nagabarog dapig sa pagkamatarong nahalinya alang sa kinabuhi, apan ang nagapangagpas sa kadaotan nahalinya alang sa iyang kaugalingong kamatayon.”

Gipangayo ba ni Jehova nga ikaw mahimong hingpit? Wala gayod. “Kinsay makaingon: ‘Gihinloan ko ang akong kasingkasing; ako nahimong putli gikan sa akong sala’?” nangutana ang Proverbio 20:9. Kay dili hingpit, kita lagmit gihapong makahimog mga sayop. Apan tungod sa lukat ni Kristo, kita makapabilin diha sa maayong baroganan uban sa Diyos. (1 Juan 2:1, 2) Pananglitan, ang usa ka batan-ong nakigbisog pag-ayo batok sa usa ka daotang bisyo, sama sa mahugawng buhat sa masturbasyon, dili kinahanglang mobati nga siya dili na gayod kuwalipikado alang sa bawtismo.b Sa pagkamatuod, pinaagi sa pagsukol nga masingkamoton sa pagkadili-matarong, ang usa makapasadya sa kasingkasing ni Jehova!​—Proverbio 27:11.

‘Gihimo Ko ba ang Diyos nga Akong Higala?’

Ugaling, ang labing kritikal nga pangutana nagalangkit sa imong relasyon uban sa Diyos. Hinumdomi: Gipahinungod nimo ang imong kaugalingon, dili ngadto sa usa ka buluhaton o sa usa ka kawsa, o bisan ngadto sa usa ka organisasyon, apan ngadto sa Diyos mismo. Ang Diyos ba daw abstrakto, halayo? O nakaila ka ba ug nakahigugma kaniya ingong usa ka Persona? (Exodo 34:6, 7) Kon mao, imong makaplagan nga ikaw makigsulti kaniya nga subsob, dili sa mekanikal nga paagi, kondili gikan sa kasingkasing.​—Salmo 62:8.

Makaplagan usab nimo nga ikaw gitukmod sa pagpakigsulti sa uban bahin sa Diyos. (Itandi ang 2 Corinto 5:14.) Nagaingon ang Proverbio 15:7: “Ang mga ngabil sa mga makinaadmanon magasabwag ug kahibalo.” Nagahimo ka ba niana pinaagi sa regular nga pagsangyaw sa uban? O gitugotan ba nimo ang paglingawlingaw, kalingawan, o pagkatapolan pa nga mopugong nimo sa pagtabang sa uban sa pagkaila sa Diyos?​—Proverbio 19:24.

Oo, aron ang bawtismo mahimong makahuloganon, ang Diyos kinahanglang mahimong imong labing suod nga higala. (Itandi ang Santiago 2:23.) Kon kini dili matuod karon, ang sayop dili sa Diyos, kay siya mainitong nagadapit sa tanan sa pagpangita kaniya. (Buhat 17:27) Ug pinaagi sa paglahutay sa personal nga pagtuon, pag-ampo, ug pakig-uban sa iyang katawhan, sa dili madugay mobati kang mas suod sa Diyos. (Roma 12:12; 1 Timoteo 4:15; Hebreohanon 10:24, 25) Ang bawtismo mahimong kinaiyanhong sangpotanan sa maong ‘pagpakigsuod sa Diyos.’​—Santiago 4:8.

Tagda, pananglitan, ang usa ka batan-ong babaye nga ginganlang si Cindy. Siya misulat: “Sa edad 14 ako nabawtismohan. Ako nasayod kon unsa ang pag-ukon-ukon sa paghimo niana. Apan buot kong isulti nga kini ang labing kahibulongang butang imong mabuhat. Tiaw na, ang pagkasayod nga ikaw giuyonan ni Jehova ug nga ‘dili ka niya pagabiyaan o pasagdan’! (Hebreohanon 13:5) Kon may mangutana kanako kon siya angay magpahinungod sa iyang kaugalingon kang Jehova, ako magaingon oo! Apan ayaw kanag buhata sa pagpahimuot sa laing tawo. Buhata kana kay gusto nimo.”

[Mga footnote]

[Hulagway sa panid 16]

Daghang batan-on ang kuwalipikado alang sa bawtismo. Ikaw ba kuwalipikado?