Gikan sa mga Kamarin Ngadto sa mga Estadyum
Sinulat sa koresponsal sa Pagmata! sa Espanya
GIKAN sa tumoy sa bungtod hangtod sa baybay, ang usa ka sinating bahin sa palibot nga talan-awon sa Galicia, amihanan-kasadpang Espanya, mao ang hórreo. Diyutay rang mga homsted sa Galicia ang wala niini. Kasagarang binuhat sa granito o kahoy ug waysipyat nga inadornohag krus, ang hórreo daling hisaypan nga lubnganan sa pamilya.
Ang tuyo, hinunoa, mas yutan-on. Kini usa ka gamayng kamarin, o granaryo, nga gigamit sa paghupot sa mais, patatas, ug sa ubang abot nga uga sulod sa umogong mga bulan sa tingtugnaw. Ang samag-uhong nga mga haliging gitungtongan niini nagasilbing panglansis sa mga ilaga, nga gusto kaayong maningaon sa ani.
Apan 30 anyos kanhi, ang usa ka partikular nga hórreo sa gamayng balangay sa Xeoane gikuhaan sa iyang krus. (Tan-awa ang hulagway sa ibabaw.) Kining gamayng kamarin—10 metro kuwadrado—nagsilbing unang sekretong tigomanan sa mga Saksi ni Jehova sa Galicia. Abot sa 23 ka Saksi ang magdasok sa maong gamitoyng luna, nga mangabot ug manglakaw sa takoban sa kangitngitan aron makalikay sa dakop panahon sa diktador nga pagmando ni Franco.
Karon, mga kawhaan ka tuig na ang milabay sukad gihatagan ang mga Saksi ni Jehova ug relihiyosong kagawasan sa Espanya. Karong bag-o, ang mga Saksi sa Galicia naghimo sa tinuig nilang distritong kombensiyon. Ang usa ka rehiyonal nga mantalaan, La Voz de Galicia, miingon:
“Maingon nga ang unang mga Kristohanon nagtigom sa Romanhong mga lubong sa paghimo sa ilang mga seremonyas, nga gidili sa mga awtoridad, ang unang mga Saksi ni Jehova sa Galicia, balik sa katuigang 1950, migamit usab sa usa ka hórreo. . . . Karon adunay 4,000 [Saksi] sa upat ka probinsiya sa Galicia. . . . Niining panahona, ang ilang tigomanan—ang estadyum sa dula sa munisipyo—mas luag.” Kadto halayo kaayo niadtong timawang hórreo! Ug karon, sa tibuok nga Espanya, adunay mga 80,000 ka Saksi diha sa kapig usa ka libong kongregasyon!
[Hulagway sa panid 24]
Dakong kombensiyon sa potbol estadyum sa Barcelona