Duol na ba ang Kataposan sa Polusyon?
ANG kalaoman alang sa usa ka hinlong yuta tinuod nga kahimut-anan. Apan pagkamatud-anon ba kini? Aw, ang pila ka nasod naningkamot pag-ayo sa pagpauswag sa kahimtang bahin sa polusyon. Ang pag-us-os sa polusyon sa hangin karon gitaho tungod sa estriktong mga lakang sa pagpukgo sa unod nga tingga diha sa binuga sa kotse. Sa pila ka dapit, ang industriyal nga polusyon mopatim-awng nag-us-os usab. Hinuon, kini dili kanunay tungod sa estriktong mga pagpiot. Hinunoa, kini usahay sangpotanan sa pag-otro sa gambalay sa industriya nga gipahinabo sa kahimtang sa ekonomiya sa kalibotan.
Yuta—Gidesinyo sa Paghinlo sa Kaugalingon?
Dugang pa, adunay kinaiyanhong mga paagi sa panghinlo nga nagaobra. Pananglitan, ang phytoplankton maoy usa sa pangunang kontra-polusyong mga galamiton sa dagat, sumala kang Dr. Aubert sa Medical Oceanography Center sa Nice, Pransiya. Kining gagmitoyng mga organismo nagapagawas sa kinaiyanhong mga antibiotik nga nagapukgo sa impeksiyon. Ikasubo, sila mapildi. Sa Italya, Venice ug ang kanait nga Adriatic nga Dagat napuno sa lumot. Sa Adriatic ang polusyon nagapatunghag “lumot, nga baho ug danlog nga jelly, dalag, brawon ug abuhon, nga mosalanap pahabagatan sa ginatos ka kilometros” sa ting-init. (The Globe and Mail, Toronto, Canada) Ang usa ka nakaamot nga hinungdan mao ang inawas gikan sa subang Po, “uban sa wala-matambaling hugawng tubig gikan sa kapig 15 milyong tawo, sa biya gikan sa daghan sa dagkong mga industriya sa Italya . . . ug sa tai sa kapig lima ka milyong baboy.”
Komosta ang polusyon sa yuta? Ang panukiduki sa usa ka dakong kompaniya sa kemikal uban sa Departamento sa Enerhiya sa U.S. nagpadayag sa presensiya sa daghang matang sa bakterya, fungi, ug amoebas sa yuta, nga ang pipila abot sa 260 metros sa ilalom. Si Dr. David Balkwell sa Florida State University mikomento: “Kining mga organismo sa kahiladman tingali nagalimpiyo sa aquifer [kinaiyanhong tubig sa yuta].” Ingong kapaingnan, si Dr. Balkwell naglaom nga ang genetic nga mga inhenyero makapalihok niining ilalom sa yutang mga organismo sa “paghilis sa tinong mga maghuhugaw.”
Hinuon, sa matinud-anong paagi, kita makahinapos nga ang kahimtang karon dili maayong timailhan alang sa duol nang kataposan sa pisikal nga paghugaw sa yuta. Bisan pa niana, makaseguro kita nga duol na ang kataposan sa polusyon. Ngano?
Pagwagtang sa Moral nga Polusyon
Aron ang planeta mahimong tinuod nga hinlong puy-anan sa katawhan, ang mga nagapuyo niini kinahanglang hinlong katawhan, sa moral ingon man sa lawas. Ang mga tawo kinahanglang magbuntog sa ilang pangunang pagkamagarbohon sa kaugalingon ug mag-ugmad sa dili-hakog nga mga hiyas, nga magapakitag konsiderasyon alang sa ilang isigkatawo ug sa ilang mga silingan nga kahayopan. Mahimo ba kini?
Latas sa mga dekada, nakaplagan sa mga Saksi ni Jehova nga sila makahimo. Ilang gibutang sa pagsulay ang nagaumol-sa-pagkatawo nga gahom sa Bibliya, ug ilang nakaplagan nga kining basahona may gahom sa pagbag-o sa mga tawo, uban ang maayong mga epekto diha sa silinganan. Pananglitan, ang opisyales sa estadyum nasibot sa kahapsay ug kahinlo sa mga panon nga mitambong sa dagkong mga kombensiyon sa mga Saksi ni Jehova. Ang subsob nga komento mao nga ‘ang estadyum gibiyaan nga mas limpiyo kay sa dihang ang mga Saksi misulod.’
Usa ka trabahante sa usa ka dulaanan sa Lisbon, Portugal, misaysay ngadto sa usa sa mga Saksi ni Jehova: “Sa dihang ang mga tawo mangutana kanako kon unsay akong hunahuna kaninyo, ako dili makabakak. Sultihan ko sila nga ang mga Saksi ni Jehova may maayo kaayong pamatasan, kahinlo ug organisasyon. . . . Kon kamo makahugaw sa usa ka butang, limpiyohan ninyo ang 99!”
Ang pag-insistir sa mga Saksi sa pisikal nga kahinlo nalangkit sa ilang hatag-as moral nga mga prinsipyo. Unsang mga prinsipyoha? Ang gilaraw diha sa Bibliya, nga mao ang sinulat nga Pulong sa Diyos. Mahitungod sa mga namalik sa naandan, ang Bibliya nagaingon nga ang mga dalan sa Diyos ‘labi pang hataas kay sa ilang mga dalan, ug ang iyang mga hunahuna kay sa ilang mga hunahuna.’ (Isaias 55:7-9) Bisan pa niana, makat-onan nato ang mga dalan sa Diyos kay ang Diyos mismo nagahimo sa iyang mga balaod nga masayran niadtong buot nga mosunod niana. Kining balaang edukasyon hinungdanon alang sa atong kaugmaon.
Milyonmilyong Saksi karong adlawa naningkamot pag-ayo sa pagsunod sa maong hinlong moral nga mga sukdanan, ug nakabaton silag dakong kaayohan. Alang sa daghan, hinuon, kini nagpasabot sa dagkong kausaban sa ilang mga batasan ug mga paagi sa kinabuhi.
Mga Droga, mga Pagdagmal, ug Kadaogan
Tagda ang kaso ni Marie, usa ka membro sa pamilya sa 13 gikan sa usa ka dapit nga punog krimen sa usa ka siyudad sa Inglaterra.
“Ang akong pamilya ilado sa pagkabagis, ug sama ra sa uban, ako ilado sa pagkamaton. Sa 15 anyos nga edad, ako naapasan. Duha ka tuig sa ulahi, natawo ang akong anak babaye, ug ako gipasagdan nga mag-atiman niya sa akong kaugalingon. Ang akong trato gihuptan sa usa ka [koreksiyonal] nga tunghaan. Siya milayas, ug ako nagsabak na usab. Gisulayan ko ang tanang matang sa mga paagi sa pagkuha sa akong gisabak ug sa kataposan milampos, apan hapit ako mamatay.
“Ang akong trato misugod sa pagtabakog marijuana ug nahimong mabangis kanako, bisan pag ako nagsabak na usab. Nalangkit usab ako, sa pagtabako ug pagbaligya sa droga. Sa maong panahon ako nagpuyo sa usa ka balay nga punog mga puta. Ako ang tig-atiman sa ilang mga anak.
“Sa dihang ako nakagusto sa laing lalaki, ang akong unang trato nagtapos sa relasyon pinaagi sa pagduslak kaniyag walo ka beses. Tungod niadto siya gidakop na usab. Sa pagkagawas niya sa bilanggoan kami nagminyo ug kaming duha nalangkit sa mga droga sa dinagkong paagi.”
Tapos makahibalag sa mga Saksi ni Jehova ug makatuon sa Bibliya uban nila, kining batan-ona misugod sa pagtambong sa Kristohanong mga tigom ug inanayng nahitabo ang kausaban. Si Marie misaysay:
“Nakaamgo ako nga ang pagtabako ug paggamit sa droga maoy daotan. Human ko sultihi ang akong bana nga ihunong ko kining tanan, ako iyang bulhotan sa aso gikan sa iyang sigarilyong marijuana sa akong nawong, nga sulayan ako sa paghaylo sa pagbalik sa paggamit sa droga. Ako nagsabak na usab. Sa wala madugay, ang akong bana misugod sa dili pagpauli sa balay sa tibuok nga gabii.
“Walo ka bulan sa ulahi iyang gikuha ang tanan niyang butang gikan sa balay ug ako gibiyaan. Ako nag-ampo kang Jehova nga tabangan ako sa pag-antos niadto, ug siya mitabang gayod. Dayon, tapos sa tulo ka bulan, ang akong bana mibalik. Miampo ako alang sa kusog aron sa pagbuhat kon unsay matarong. Sa makausa pa gisulayan ko ang pagpalampos sa akong kaminyoon, apan sa unom ka bulan ako nagpaalim sa 14 ka tahi palibot sa akong mata, ang sangpotanan sa kabangis sa akong bana; ang droga mao gihapon ang una niyang gugma. Ang among balay nahimong pangunang pondohanan sa droga sa tibuok nga lugar. Napuno kadto sa iyang ‘mga higala,” nga kadaghanan kanila hubog sa droga.
“Sa tabang ni Jehova, ako nakabatog kaisog ug giatubang ang mga lalaki. Matinahoron ko silang gihangyo nga mogawas kon buot nilang mopadayon sa pagtabako sa ilang mga droga. Sa nadunggan kana sa akong bana, siya nasuko, gitawag ako ngadto sa kusina, ug giparokparok ang akong ulo sa bungbong. Nakigbisog ako sa pagsulti kaniya nga ako nabalaka sa mga bata ug gusto ko silang hatagag higayon nga motubo sa hinlo, maayong palibot. Ang akong bana sukong migawas nga mibalik ngadto sa iyang mga higala. Ako naghulat, nga nag-ampo. Siya misulod na usab sa kusina, ug abi nakog ako patyon niya.
“Sukad niadtong panahona, hinunoa, ang kahimtang mikalma. Sa ulahi kami mibalhin. Sa dihang ang mga giyanon sa droga moduaw, sila dili na mamalikas o mohisgot sa ilang imoral nga mga kinabuhi sama sa nangagi. Mipatim-aw nga sila may pagtahod alang namo.”
Ang pagbarog ni Marie alang sa hinlong mga moral ug dili-hugaw nga kinabuhi nakatandog sa kasingkasing sa iyang bana, ug siya usab sa kadugayan mituon sa Bibliya uban sa mga Saksi ni Jehova. Si Marie ug ang iyang bana karon maoy bawtismadong mga Saksi ug puliking nagatabang sa uban sa paghinlo sa ilang mga kinabuhi sa tabang sa kahibalo sa Bibliya. Si Marie miingon:
“Inigkadungog ko nga mag-ampo ang akong bana, o inigkadungog ko nga siya mopahayag sa iyang gugma alang kang Jehova, mokusog gayod ang pinitik sa akong kasingkasing! Ang kausaban sa iyang panagway nakapahingangha sa iyang kanhing mga higala. Karon ang among pamilya tinuod nga nahiusa. Ako labi pang malipayon kay sukad masukad, ug ako kanunay nagapasalamat kang Jehova tungod sa pagkuha kanamo gikan niining hugaw nga sistema sa mga butang.”
Ang maong kalamposan sa pagbugno sa moral nga polusyon nagapadayag sa gahom sa Pulong sa Diyos. Dugang pa, nagapunting kini sa paglaom sa duol nang kataposan sa tanang matang sa polusyon. Unsay ginaingon sa Bibliya bahin niini?
Usa ka Hinlong Yuta—Segurado
Ang makugihong pagtuon sa Bibliya nagapadayag nga kita nagapuyo sa “kataposang mga adlaw” sa presenteng sistema sa mga butang. (2 Timoteo 3:1-5) Ang kahimtang sa silinganan usa ra ka bahin sa ebidensiya nga nagapamatuod niini. Unsay kahulogan niini maylabot sa atong paglaom alang sa usa ka hinlong yuta?
Kini nagkahulogan nga ang Diyos duol nang mobalda sa tawhanong kahikayan. Sa dili madugay siya molihok sa gamhanang paagi aron sa pagpapas sa tanang moral ug pisikal nga polusyon gikan sa atong planeta. Sa basahong Pinadayag nagasaad siya sa “paglaglag niadtong nagalaglag sa yuta.”—Pinadayag 11:18.
Sa tinuoray, ang Diyos lamang ang may gahom sa pagpatungha sa usa ka hinlo, wala-mahugawing yuta. Makalipay ang pagkasayod nga kana ang intensiyon niya nga buhaton. Iniglihok niya, sa duol na, kini maoy sumala sa iyang giingon: “Tan-awa! Ginabag-o ko ang tanang butang.” (Pinadayag 21:5) Unya, sa kataposan, ang atong planeta mahimong angayang pinuy-anan sa hinlo, matul-id nga katawhan, nga magpahimulos sa kadagaya niini sa walay kataposan.