Mga Bata, Dugo, ug AIDS

DILI pa dugay ang The New York Times adunay makalilisang nga taho diha sa unang-panid: “Ang Romania gihulga sa usa ka tagsaong epidemiya sa AIDS sa mga bata, nga makita diha sa nagdasok nga balay sa mga ilo ug mga klinika, nga nakaylap tungod sa kinaraan nga batasan sa pagdugang ug mga dugo diha sa bag-ong natawong mga bata.”​—Pebrero 8, 1990.

Tingali maoy naandan sa ubang mga doktor sa Romania ang pag-indiyeksiyon ug dugo diha sa pusod sa bag-ong natawong mga bata sa paglaom nga kining “micro-transfusion” makakusog sa pagtubo sa bata. Ang praktis napamatud-ang usa ka episyente kaayong paagi sa pagkaylap sa AIDS; ang usa ka pinta sa nahugawang dugo nagdala ug igong dosis alang sa kadaghanang mga bata.

Ang World Health Organization, nga nagpadala ug usa ka pundok sa mga doktor alang sa emerhensiya ngadto sa Romania, nagbanabana nga 700 ka bata sa Romania nasusihan nga may virus sa AIDS, nga dunay dugang 50 nga nag-antos sa grabe na nga AIDS. Ang pangulo sa organisasyon sa programa sa AIDS miingon sa Times nga ang gidaghanon sa natakdan sa AIDS taliwala niining mga bataa mao ang labing taas sa kalibotan.

Ubos sa dili pa dugay nga pagkapukan sa rehimen ni Ceausescu, ang Romania sa opisyal walay hulga sa AIDS. Ang bisan unsang balita bahin sa pagkaylap sa sakit higpit nga gikontrolar ingong sekreto sa estado. Ang mga tighatag ug dugo wala gani tukia kon duna bay AIDS. Karon kana nausab na. Apan sulod sa usa ka tuig ug tunga sa wala pa ang rebolusyon, daghang mga doktor sa Romania wala gayod makahunahuna bahin sa AIDS sa dihang misugod sila sa pagkakitag dugang ug dugang mga bata nga may mga impeksiyon nga dili gayod mohawa. Ingon sa gipamulong sa usa kanila: “Kon sultihan ka nga walay ingon niini nga virus sa Romania, nganong tun-an pa man kana?”