Ang Kahulogan sa mga Balita Karong Adlawa
TAN-AW ug usa ka mantalaan o buksi ang imong telebisyon. Unsay imong mabasa, madunggan, o makita? Mga taho bahin sa pagpatay, panglugos, mga droga, pagkabungkag sa pamilya, mga kudeta, rebolusyon, mga iskandalo, pagtabon-tabon, mga sakit sama sa AIDS, linog, gutom, kagutmanan. Mao kini kanunay ang mga balita karong adlawa. Apan, ang hinungdanon usab nga bahin sa mga balita sa kadaghanan wala tagda, ug bisan kon kini gihisgotan, kini kalimtan ra dayon.
Pananglitan, sa panahon sa iyang unang paglingkod sa katungdanan ingong presidente sa U.S., si Ronald Reagan mihisgot bahin sa “Armageddon,” nga nag-ingon: “Ako nahibulong kon—kon kita ba nga kaliwatan ang makakita niana nga moabot.” Human niadto, hinunoa, iyang gitabon-tabonan ang maong butang, miinsister nga siya wala moingon nga “kita kinahanglang magplano sumala sa Armageddon.”
Bisan pa, ang basahon sa Bibliya nga Pinadayag nag-asoy mahitungod sa pag-abot sa Armageddon, nagbatbat nga “ang mga hari sa yuta ug sa tibuok nga kalibotan” pagatigomon unya “ngadto sa gubat sa dakong adlaw sa Diyos nga Labing Makagagahom.” Nagpadayon, ang Bibliya nag-ingon nga ang mga nasod pagatigomon unya “ngadto sa usa ka dapit nga sa Hebreohanong pulong gitawag Armageddon.”—Pinadayag 16:14, 16, King James Version.
Kanus-a mahitabo kanang makatay-og sa yuta nga gubat sa dakong adlaw sa Diyos nga Labing Makagagahom? Mahitabo kaha kini sa atong panahon? Bisan si Ronald Reagan napukaw sa pagkomento: “Ambot kon nakamatikod ba kamo bahin niining mga tagnaa karon, apan, tuohi ako, sila tinong naghubit sa mga panahong atong naagoman.”
Balita nga Makahuloganon Kaayo
Matikdi sa imong kaugalingon ang mosunod nga tagna sa Bibliya: “Hibaloi kini, nga sa kataposang mga adlaw [niining sistema sa mga butang] moabot ang panahong malisod sagubangon. Kay ang mga tawo mga mahigugmaon sa ilang kaugalingon, mga hinapi, tigpagawal, hambogiro, tampalasan, masukihon sa mga ginikanan, dili-mapasalamaton, dili-maunongon, walay kinaiyanhong pagbati, dili malukmay, tigbutangbutang, walay pagpugong sa kaugalingon, mabangis, dili mahigugmaon sa maayo, mabudhion, gahig-ulo, tigpaburot, mahigugmaon sa kalingawan inay sa Diyos, nagabaton sa dagway sa diyosnong pagkamahinalaron apan nagapanghimakak sa gahom niini.” (2 Timoteo 3:1-5) Nakita ba nimo nga kining tagnaa karon nga nagakatuman?
Dugang pa, sa naghisgot bahin sa iyang umaabot nga presensiya ug sa konklusyon sa sistema sa mga butang, si Jesus nanagna: “Kamo makadungog ug mga gubat ug mga dungogdungog sa gubat . . . Kay ang mga nasod moalsa batok sa laing nasod ug gingharian batok sa laing gingharian, ug aduna unyay kakulangan sa pagkaon ug mga linog sa nagkalainlaing dapit. . . . Ug tungod sa pag-usbaw sa pagkadaotan mobugnaw ang gugma sa kadaghanan.” (Mateo 24:3-12) Dili ka ba usab mouyon nga kining tagnaa nagakatuman na?
Aron nga ang iyang mga sumusunod nga nagkinabuhi sa panahon sa katumanan niining mga tagnaa makasabot kon unsay ilang tinuod nga kahulogan, si Jesus mihatag niining ilustrasyona: “Tan-awa ninyo ang kahoyng igira ug ang tanang ubang mga kahoy: Inigpanalingsing nila, sa pagkakita niini kamo nahibalo nga haduol na ang ting-init. Niining paagiha kamo usab, inigkakita niining mga butanga nga nagakahitabo [sa pagkatinuod, ang mismong mga hitabo nga atong nakita nga nagakahitabo karon] hibaloi nga ang gingharian sa Diyos haduol na.”—Lucas 21:29-31.
Sa pagkatinuod, daghan kaayo ang ebidensiya nga kita nagkinabuhi sa panahong ang pag-abot sa Gingharian sa Diyos ug sa iyang gubat sa Armageddon haduol na kaayo! Samtang kining hinungdanong balita wala panumbalinga halos sa tanang palumagian sa balita sa kalibotan, ang mga Saksi ni Jehova nakig-ambit sa pagpakaylap niini sa tibuok-yuta. Kining maayong balita nga ilang gisangyaw dili lamang nga hinloan sa Diyos ang yuta sa tanang kadunotan kondili, ubos sa pagmando sa iyang Ginghariang kagamhanan, ang tibuok-yuta pagahimoong usa ka matahom, samag-hardin nga paraiso.
Mahitungod niining mga butanga, ang Bibliya nagsaad: “Kay ang mga matul-id magapuyo sa yuta, ug ang matarong magapabilin diha niana. Apan ang mga daotan, sila pagaputlon gikan sa yuta; ug ang mga mabudhion pagalukahon gikan niini.” Ug dugang pa: “Ang mga maaghop magapanunod sa yuta, ug magakalipay sa ilang kaugalingon tungod sa kadaya sa pakigdait. Ang mga matarong magapanunod sa yuta, ug magapuyo sila sa ibabaw niini sa walay kataposan.”—Proverbio 2:21, 22; Salmo 37:11, 29.
Buot ba nimo nga mahibalo pag dugang bahin sa mga ebidensiya nga ang katumanan niining dagkong mga tagna haduol na kaayo? Kon mao, pahibaloa niini ang mga Saksi ni Jehova. Sila malipay sa pagtabang kanimo sa pagsabot nga ang mga balita karong adlawa sa pagkatinuod nagkahulogan nga ang Gingharian sa Diyos taliabot na, oo, nga ang usa ka bag-ong kalibotan sa pagkamatarong haduol na.
[Picture Credit Lines sa panid 9]
Nordhausen/Kampo sa Ulipon: Opisyal nga Hulagway sa USAF; Batang walay-kaon: Hulagway sa WHO ni W. Cutting; Pabrika: Hulagway sa WHO ni P. Almasy