Unsay Kahupayan Alang sa mga Biktima?

ALANG sa mga nag-atubang sa kalit nga pagkamatay sa ilang mga minahal diha sa mga aksidente nga nalangkit ang alkohol, “walay panahon . . . sa pag-ingong ‘Adiyos,’ . . . o ‘Gihigugma ko ikaw,’” matud ni Janice Lord, awtor sa Survivor Grief Following a Drunk-Driving Crash.

Sumala sa atong nakita, daghan ang atubangon sa mga naluwas: kakurat, kalisang, kasuko, ug kawalay-paglaom. Ang pagkamatay sa mga minahal sa maong paagi magmugna sa pagbati sa permanente nga kapildihan. Ang mga naluwas tingali mobati nga ang kaguol nga nasinati nila dili na gayod mabakwi.

Kay nakaamgo sa kaguol nga ipahinabo sa maong kamatayon, daghang awtoridad naningkamot nga mahimo ang mga balaod o ipatungha ang mga kahimtang nga makapamenos sa makalilisang nga gidaghanon sa mga mamatay kada tuig. Pananglitan, usa ka opisyal mipunting sa mga kahuyangan sa kinaiya diha niadtong sad-an sa pagmaneho nga nakainom ug misugyot nga tukoron ang mga sentro sa pagreport alang kanila diin, pinaagi sa pag-edukar ug panambag bahin sa trabaho ug droga, sila ‘mabuligan ug mapalig-on’ sa pagbuntog sa ilang mga kahuyangan.

Unsay Tinuod nga Gikinahanglan?

Bisan unsa ka tilinguhaon kini, walay tawo o tawhanong ahensiya ang makapapas sa kaguol nga gipahamtang diha sa mga biktima, ni ang mga tawo makabanhaw sa mga patay. Ang gikinahanglan sa pagbakwi sa tanang kadaot labaw kaayo kay sa ikatagana sa mga tawo. Ang tinuod nga gikinahanglan mao ang bug-os laing kahikayan sa kalibotan, usa nga dili ipasukad sa mahakogon ug madaotong ‘mga paukyab bisan unsay mahitabo’ nga mga ideya nga makahunos ug daghan kaayong kinabuhi.

May makataronganon bang pasikaranan sa paglaom nianang matanga sa usa ka mas maayong kalibotan diin ang maong mga trahedya mahimong usa ka butang sa kagahapon? Oo, aduna. Ngani, adunay tinong paglaom sa usa ka bag-ong kalibotan dinhi sa yuta diin mawala na ang maong mga trahedya, usa ka kalibotan nga diha niana bisan ang mga biktima sa aksidente mahibalik sa kinabuhi. Pagkadili-ikabatbat ang kalipay sa dihang kini sila mahiusa pag-usab sa ilang mga minahal! Kini unya maoy usa ka bag-ong kalibotan diin, sa nahaigong panahon, ang makapasubong mga handumanan sa nangaging mga trahedya mapapas na sa walay kataposan.

Ang maong paglaom sa usa ka bag-ong kalibotan makaplagan diha sa dinasig nga Pulong sa Diyos, ang Bibliya, nga nagaingon: “[Ang Diyos] magalamoy sa kamatayon sa walay kataposan, ug pagapahiran sa Soberano Ginoong Jehova ang mga luha gikan sa tanang mga nawong.” (Isaias 25:8) Mag-apil kini sa pagpabalik sa mga patay gikan sa lubnganan. Sumala sa gisulat ni apostol Pablo: “Ako adunay paglaom ngadto sa Diyos . . . nga adunay usa ka pagkabanhaw sa mga matarong ug sa mga dili-matarong.” (Buhat 24:15) Gipasundayag kini ni Jesus ug sa mga apostoles pinaagi sa pagbanhaw sa mga namatay.​—Lucas 7:11-16; 8:40-42, 49-56; Juan 11:1, 14, 38-45; Buhat 9:36-42; 20:7-12.

Ang kinabuhi sa yuta diha sa usa ka bag-ong kalibotan, apil ang kinabuhi alang sa mga namatay nga banhawon gikan sa lubnganan, purongpurongan sa tawhanong kahingpitan. Tungod sa gahom sa Diyos sa pagpang-ayo sa Diyos ang mga hunahuna ug mga lawas sa tanan nga buhi unya mahimong bug-os mahimsog: “Walay molupyo ang magaingon: ‘Ako masakiton.’” “Nianang panahona ang mga mata sa mga buta mabuka, ug ang mga igdulongog mismo sa mga bungol makadungog. Nianang panahona ang bakol mokatkat sama sa lagsaw, ug ang dila sa amang mosinggit sa kalipay.”​—Isaias 33:24; 35:5, 6; tan-awa usab ang Mateo 15:30, 31.

Gibatbat sa Bibliya ang umaabot nga kahimtang sa katawhan sa yuta pinaagi sa pagpahayag nga “pagapahiran sa Diyos ang tanang luha gikan sa ilang mga mata, ug ang kamatayon mawala na, ni may pagbalata ni paghilak ni kasakit pa. Ang unang mga butang miagi na.” (Pinadayag 21:4) Ang Magtatagana sa kahibulongang mga kaayohan ug makapalipayng mga kahimtang nga umaabot nagpahayag: “Ang unang mga butang dili na pagahinumdoman, ni motungha pa kini sa kasingkasing. Apan magmaya, kamong katawhan, ug magmalipayon sa walay kataposan diha sa akong ginalalang.”​—Isaias 65:17, 18.

Pinaagi sa kang kansang pagbulot-an mahitabo kining tanan? Pinaagi sa pagbulot-an ug gahom sa dakong Maghahatag ug paglaom, ang Maglalalang sa uniberso, si Jehova nga Diyos. Iyang gipasalig diha sa iyang Pulong nga ang maong usa ka bag-ong sistema diin “ang pagkamatarong magapabilin” sa dili na madugay magpuli niining mahakogon ug mabangisong sistema sa mga butang karon, usa ka sistema nga lalom na sa iyang “kataposang mga adlaw.”​—2 Pedro 3:13; 2 Timoteo 3:1-5, 13; Proverbio 2:21, 22.

Paghupay Gikan sa Pulong sa Diyos

Ang mga Saksi ni Jehova, sama sa ubang mga tawo, dili kay dili maapektahan sa mga trahedya sa atong mga panahon, ni sila, niining peligrosong kalibotan, nagadahom ug balaang panalipod gikan sa kamatayon, nga aksidente o sa laing paagi. Nasayod sila nga kini dili kabubut-on sa Diyos sa pagkakaron. Ang Ecclesiastes 9:11 nagaingon: “Ang panahon ug ang wala makita daang hitabo mahitabo kanilang tanan.” Bisan pa niana, dugay nang gitumong sa mga Saksi ang pagtagad ngadto sa Pulong sa Diyos, kay ang iyang mga saad nagtaganag malungtarong paghupay sa tanang motuo niana.

Usa sa mga Saksi ni Jehova dulot naapektahan sa dihang ang usa ka hubog nga drayber nakapatay sa iyang bayaw nga lalaki ug nagbilin sa iyang asawa (iyang igsoon) nga inutil sa utok gumikan sa grabeng samad sa ulo, mao nga siya nagkinahanglag padayong pag-atiman. Sila usab maoy mga Saksi ni Jehova. Miasoy siya:

“Sa dakong bahin sa tuig, ako kanunay naghilak, ug ako nasuko. Nasuko ako sa batan-ong lalaki nga nagpahinabo sa maong trahedya, nasuko sa iyang mga ginikanan tungod sa dili pagdumalag maayo kaniya. Usahay ang maong kasuko natumong pa sa Diyos ug sa mga manulonda tungod kay wala santaa kadto. Usik kaayo ang duha ka buotang tawo nga nag-alagad kaniya!

“Tinuod, ako nasayod nga ang Diyos dili mao ang laktud nakaingon ug dili buot nga kana mahitabo. Apan gibati ko nga siya nagtultol sa matag tikang nato ug nagpanalipod kanato gikan sa maong kadaot. Karon nakaamgo ako nga kinahanglang mabatonan ko ang mas timbang nga panglantaw niini, ug misugod ako sa pagpangita sa mga tubag.

“Nadugaydugay una ako nakalimot sa kasakitan ug mao nga nakapangatarongan bahin niana. Gibati ko nga sama kang Asap, kinsa miingon diha sa Salmo 73 nga mipatim-aw nga ang mga daotan mao ang mga pinangga. Apan sa mao mismong salmo, ang Pulong sa Diyos nagpadayon sa pagpakita nga dili kana matuod, nga ang Diyos dili mopabor sa daotan, ug sa iyang nahitakdang panahon, sila mangalaglag.

“Nakaamgo ako nga ang akong panghunahuna, dili ang iya sa Diyos, mao ang sayop. Sayop ang akong pagpadapat sa mga kasulatan. Ang Diyos dili mopasalig sa kagawasan gikan sa mga aksidente, sakit, o kamatayon karong panahona apan nagsaad sa maong mga panalangin sa umaabot, sa iyang bag-ong kalibotan. Sa dihang nasabtan ko kon unsay tinuod giingon sa Pulong sa Diyos bahin sa pagpanalipod sa Diyos karon sa espirituwal nga paagi, dili sa pisikal, unya ang akong kasuko inanay nahupay. Ako nakatumong na karon sa pagtagad sa tinuod nga tinubdan sa mga katalagman, si Satanas nga Yawa, kinsa mamumuno ug bakakon sukad sa panahong siya mirebelde batok sa Diyos. Ang Bibliya nagtin-aw nga si Satanas mao ang diyos niining kalibotana nga puno kaayo sa pag-antos.​—Juan 8:44; 2 Corinto 4:4.

“Sa dihang akong napabilhan nga mas bug-os ang kamatuoran nganong adunay pag-antos, nganong gitugotan kini sa Diyos, ug sa unsang paagi iyang papason kini, natin-aw nga ang Diyos dili mao ang atong kaaway, kondili siya mao ang atong kaluwasan!

“Gawas pa, dakong kahupayan ang pagkahibalo nga pinaagi sa iyang balaang espiritu, si Jehova nagalig-on niadtong nagaalagad kaniya. Ang Bibliya nagpasalig kanato nga itagana sa balaang espiritu ‘ang gahom nga labaw sa kasagaran.’ Pinaagi niini siya nagahatag kanato sa kusog sa pag-antos sa dili maantos. Ug siya nagalipay usab kanato pinaagi sa paglaom nga makita ang atong mga minahal diha sa pagkabanhaw. Sa ingon kita mahimong modaog ibabaw sa kalisdanan.”​—2 Corinto 4:7.

Usa ka Maayong Kaugmaon

Ang lainlaing matang sa mga trahedya nahitabo sa daghan, apil sa mga Saksi ni Jehova, latas sa mga katuigan. Kini nagapamatuod sa kamatuoran sa Pulong sa Diyos nga ang panahon ug wala makita daang hitabo mahitabo sa tanan. (Ecclesiastes 9:11) Apan ang mga kasinatian sa mga alagad sa Diyos nagapamatuod usab sa kamatuoran sa Pulong sa Diyos nga si Jehova nagalipay ug nagalig-on sa iyang katawhan sa ilang panahon sa panginahanglan ug nagapasalig usab sa maayong kaugmaon diha sa iyang bag-ong kalibotan, diin ang maong mga katalagman mahimong butang sa kagahapon.

Tinuod makalipay ang pagkahibalo nga sa matarong bag-ong kalibotan sa Diyos, adunay tinuod nga gugma alang sa mga isigkatawo ug pagtahod sa bililhong gasa sa kinabuhi. Pulihan sa maong maayong mga hiyas ang kahakog ug pagpanghimulos sa mga kahuyangan sa tawo alang sa ganansiya nga karon nakatuhop niining kalibotana. Mawala na usab unya ang mga kabalaka, mga kalisod, ug mga kahadlok niining kalibotana karon nga magduso sa daghan sa pagbati nga gikinahanglan ang hinobrang pag-inom sa alkoholikong ilimnon o pagtomar sa ubang mga droga.

Bisan karon, ang mga Saksi ni Jehova naglangkob sa usa ka tibuok-kalibotang pag-igsoonay nga gihugpong sa makapahiusang gahom sa gugma. (Juan 13:34, 35) Kadtong bahin sa maong pag-igsoonay nagatagana sa lig-ong tigsuportar nga sistema sa pagtabang sa mga tawo nga nakaagom sa kapildihan. Malipay sila sa pagtabang ni bisan kinsa nga buot mahupayan sama kanila​—2 Corinto 1:3, 4.

[Hulagway sa panid 13]

Ang Bibliya nagsaad nga adunay pagkabanhaw sa mga patay