Pagkamaabiabihon sa mga Taga Pinlandiya

ANG lanaw mibagtok, natabonan sa 41 sentimetros nga kabag-ong yelo. Ang temperatura sa hangin maoy -15 degrees Celsius, normal lang nga adlaw kon Pebrero sa Pinlandiya. Ug anaa ang among tig-abiabi, si Martti, nagbuslot sa yelo. Kini mao ang unang higayon sa iyang pagpaabot sa pagkamaabiabihon sa mga taga Pinlandiya diha sa usa ka langyaw gikan sa mga Isla sa Caribeano.

Tali sa mga tawo sa tropikal nga Puerto Rico, ang akong pagabuhaton malantaw nga binuang. Apan taliwala sa mga taga Pinlandiya, ang paglusbog diha sa nagyelo nga tubig maoy usa ka karaang praktis nga nagakapopular. Ang pinulongang Pinlandes adunay espisipikong pulong gani alang niana, avanto, nga nagpasabot sa usa ka lungag nga gipasagdang bukas diha sa yelo alang sa makadiyot nga paglusbog diha sa nagyelo nga tubig.

Kining “bugnaw nga pag-abiabi” himoon sa pipila ka segundo lamang ug sundan sa 15 minutos nga mainit nga sauna diha sa 85 degrees Celsius. Akong gibating makaparelaks ang maong eksperyensiya ug midesider sa pag-usab niadto, sa kalipay sa akong mga Pinlandes nga mga higala!

Alang sa pipila ang praktis maoy lulinghayaw lamang. Ang uban nangangkon nga kini nakapauswag sa kahimsog sa ilang panglawas, nakapugong sa pipila ka sakit, nakakunhod sa kalisod, ug nakauswag sa kalig-on sa lawas. Kining maong mga pangangkon ug ubang mga isyu nga nalangkit sa Pinlandes nga sauna ug ang praktis sa pagkaligo sa yelo sa pagkakaron gisusi sa siyensiya.​—Inamot.