Ang Hunahuna sa Bibliya

Uyon ba ang Bibliya sa Pagkupot ug Halas?

SULOD sa gagmayng mga simbahan, ang mga matinuohon magtigom. Manugtog silag dekoryenteng mga sista ug manganta sa musika sa ebanghelyo. Himoon nila ang mga pag-ampo aron mamaayo ang mga sakit. Manimati silag ginama-sa-balay nga mga wali ug magyagaw sa pagyawyaw sa gitawag nilang “bag-ong mga pinulongan.” Niining tanan, sila kaamgid gayod sa daghang Pentekostal o karismatik nga mga grupo sa Kakristiyanohan. Dayon ipagula nila ang hilo, ang kalayo, ug ang mga halas.

Ang hilo kasagaran mao ang strychnine, nga gitunaw sa tubig. Ang kalayo tingali maoy iya sa nagdilaab gihumol-sa-gas nga panapton o usa ka acetylene nga sulo, ug ang mga halas mahimong mga rattlesnake o copperhead, nga dili lisod mapalgan diha sa Appalachian nga Kabukiran sa Tinipong Bansa, diin kining mga grupoha kasagaran kaayo. Inigbati nila nga sila gitawag sa “ang espiritu” sa pagbuhat niana, imnon nila ang hilo ug ipatungod ang ilang mga kamot sa kalayo. Mahimong kuptan usab nila ang mga halas, nga ibalikos sa ilang mga bukton ug mga abaga, nga halogon kana, nga ipasa ngadto sa usag usa. Ngano?

“Ako nagkupot ug mga halas kay kana anaa sa Bibliya, sama sa usa ka sugo,” matud ni Dewey, ang pangulo sa usa ka gamayng simbahan sa West Virginia.a Giangkon ni Dewey nga siya gipaak na sa 106 ka beses, ug siya may mga ulat sa pagpamatuod niana. Tinuod bang ang Bibliya nagsugo nianang mga butanga?

“Ayaw Ninyo Pagtentala ang Ginoo”

“Siya nga wala mahigugma wala makaila sa Diyos; kay ang Diyos gugma,” matud sa Bibliya sa 1 Juan 4:8, King James Version. Ang Diyos sa gugma magbaod ba sa iyang mga magsisimba sa paghimog wayhinungdang kasakit sa ilang kaugalingon? “Sakit ang usa ka pinaakan,” matud ni Dewey. “Kini sakit nga mga 100 ka beses ka grabe kay sa sakit sa ngipon . . . Imong bation nga ikaw gisilaban.” Bisan tuod ang kadaghanang biktima sa pinaakan sa halas maluwas, ang tinagkawhaang kamatayon napamatud-an, apil ang kamatayon sa igsoong babaye ni Dewey niadtong 1961.

Hinuon, ang mga Kristohanon andam kanunay nga mamatay tungod sa ilang pagtuo, apan ang ilang mga kamatayon kasagarang ipahinabo sa uban tungod sa pagdumili nga ikompromiso ang mga prinsipyo sa Bibliya. Sa laing bahin, sa gidapit ni Satanas si Jesu-Kristo nga ipameligro ang iyang kinabuhi nga wayhinungdan ug tinuyo pinaagi sa paglukso gikan sa salipdanan sa templo sa Jerusalem, “si Jesus miingon kaniya, Nahisulat na usab, Ayaw pagtentala ang Ginoo nga imong Diyos.” (Mateo 4:7, KJ) Dili ba pagtental sa Diyos, o mapangahasong paghagit kaniya, ang pagduladula sa mga halas, kalayo, o hilo? Ang maong pagsulay dili ba magpaila sa dakong kakulang sa pagtuo sa bahin sa magsisimba, usa ka paninguha sa pagpugos sa Diyos nga pamatud-an niya ang iyang kaugalingon nga magtutuman sa iyang Pulong pinaagig talagsaong mga binuhatan?

Unsay Gisugo sa Kasulatan?

Ang mga membro sa mga grupong tigkupot ug halas nangangkon nga ang ilang mga buhat gisugo sa Pulong sa Diyos, ug ilang isitar ang Marcos 16:17, 18 ingong pamatuod. Sumala sa King James Version, kining mga bersikuloha mabasa: “Ug maganunot kanila nga motuo kining mga ilhanana; Sa akong ngalan ilang pagulaon ang mga yawa; magasulti silag bag-ong mga pinulongan; magakupot silag mga bitin; ug kon magainom silag bisan unsang butang makapatay, sila dili mangadaot; ang mga masakiton pagapandongan nila sa ilang mga kamot, ug mangaayo sila.”

Nahauna, pagamatikdan nga halos ang tanang eskolar sa Bibliya mouyon nga kining mga bersikuloha sa sinugdan dili bahin sa Ebanghelyo ni Marcos. “Ang kaduhaduhaang pagkatinuod sa mga bersikulo 9-20 nagahimo nga dili maalamon ang paggamag usa ka doktrina o pagbase niana sa usa ka kasinatian (ilabina ang vv. 16-18),” mipunting ang iladong komentaristang si Charles Ryrie.

Bisan pa niana, kadtong nagkupot ug mga halas diha sa ilang pagsimba kasagarang dili motuo sa hunahuna sa mga eskolar sa Bibliya bahin sa pagkatinuod sa Marcos 16:9-20. Ang mga bersikulo anaa sa King James Bible, nga mao ang bugtong Bibliya nga gisaligan sa kadaghanan kanila, ug alang kanila kana ang kataposan sa butang.

Apan bisan pag kining mga bersikuloha tinuod, kana wala magsugo sa pagkupot ug mga bitin o pag-inom ug hilo, ug kana walay ginasulti bahin sa kalayo. Busa kana dili mabasa ingong usa ka kinahanglanon sa pagsimba. Ngani, si apostol Pablo nakabagat sa usa ka bitin sa isla sa Malta (Melita, KJ) apan sa aksidente lang kay kadto didto sa bangan sa mga kahoy nga iyang gisugnod sa daoban. Bisan tuod si Pablo gipaak ug gipanalipdan sa balaanong paagi gikan sa kadaot, wala niya ipasa ang halas aron makuptan sa uban. Hinunoa, iyang “gisawilik ang mananap ngadto sa kalayo.” Siya, nga wala gayod mobatig sakit sa pagkagisilaban sama sa gibati sa modernong mga tigkupot ug halas, “wala maunsa.”​—Buhat 28:3-6, KJ.

Usa ka Pagtigi sa Pagtuo?

Sumala sa The Encyclopaedia of American Religions, ang pagkupot ug halas maoy bulobag-o pang hitabo. “Niadtong 1909,” nag-ingon kini, “Si George Went Hensley, usa ka batan-ong molupyo sa banikanhong Grasshopper Valley, Tennessee, nakombinsir nga ang mga paghisgot sa Marcos 16:17-18 sa mga halas ug hilo, sa pagkamatuod, maoy usa ka sugo. Nagdakop siyag usa ka rattlesnake ug pila ka adlaw sa ulahi sa haduol nga Sale Creek, sa tunga sa usa ka serbisyo sa simbahan, iyang gipagula ang halas aron ang mga misalmot makakupot ingong usa ka pagtigi sa ilang pagtuo.” Apan walay ebidensiya, Kasulatanhon man o makasaysayanhon, nga gibaod sa unang mga Kristohanon ang ingon nga ‘mga pagtigi sa ilang mga pagtuo.’

Dugang pa, palandonga kini: Si Pablo gigamit sa Diyos sa pagbanhaw sa mga patay; bisan pa niana gihimo niya ang makataronganong mga pagbantay bahin sa iyang kaugalingong panglawas ug sa panglawas sa iyang mga kaubanan. (1 Timoteo 5:23; 2 Timoteo 4:13) Si Pablo wala mosulay sa pagmugnag kahigayonan sa pagbanhaw ug mga tawo.

Busa, inay nga himoong ang mga lawas manghiwid tungod sa sakit o maulatan tungod sa mga paak sa halas, ang mga Kristohanon giawhag nga ‘itanyag ang ilang mga lawas nga usa ka halad nga buhi, balaan, dalawaton sa Diyos, nga mao ang ilang makataronganong pag-alagad.’ (Roma 12:1, KJ) Inay sa pagsugo nga tigion sa mga Kristohanon ang ilang pagtuo pinaagi sa mapangahasong mga buhat, ang makataronganong tambag sa apostol mao: “Susiha ninyo ang inyong kaugalingon, kon kaha kamo anaa sa pagtuo; pamatud-i ninyo ang inyong kaugalingon.” (2 Corinto 13:5, KJ) Tigia ang imong mga pagtuo pinasukad sa Pulong sa Diyos. Ang matinud-anong pagsusi-sa-kaugalingon, pagtandi sa imong mga pagtuo sa Kasulatan, motabang nimo sa pagtino kon ang imong pagtuo makapasar sa hinungdanon-sa-tanang pagtigi sa pag-uyon sa Diyos.

[Footnote]