Sila Nakabukas sa Kasingkasing sa Akong Amahan

“Ang akong mga ginikanan maoy Italyanong mga Katoliko nga dili gayod mopunit ug magasing Watchtower ug Awake! aron basahon,” misulat ang usa ka babaye gikan sa Westerly, Rhode Island, T.B.A. Apan karon, siya miingon, ang The Watchtower nakabukas sa kasingkasing sa iyang amahan. Iyang giasoy kon sa unsang paagi kini nahitabo:

“Usa ka adlaw akong gihulaman ang trak sa akong amahan, nga adunay tape deck nga wala gayod niya gamita. Busa akong gipahimuslan kini. Akong gibutang diha sa cassette ang magasing Watchtower. Sa dihang akong giuli ang trak, wala nako kuhaa ang cassette. Kasamtangan, gidala sa akong amahan ang trak ug misugod sa pagpaminaw sa cassette.

“Siaw kaayo ang akong amahan​—abi niyag diha ang mga Saksi sa radyo, ug iyang lisoon kanunay ang estasyon apan padayon siyang nakadungog mahitungod sa mga Saksi. Sa kataposan, sa miagi ang duha ka adlaw, iyang naamgohan nga cassette diay kadto ug dili radyo. Apan sa maong panahon siya nawili na sa iyang napamatian.

“Nga dunay nakat-onan ang akong amahan nadayag sa dihang siya ug ang akong inahan misugod sa pagsulti kanako mahitungod sa mga butang nga iyang napamatian. Sal-ang ug usa ka adlaw samtang mopaingon ako sa pag-alagad, akong bayloan ang cassette diha sa iyang trak. Ug kada buntag sa dihang makita ko siya sa pamahaw, mobangon siya ug mga pangutana sama sa: ‘Ansiano ba ang imong bana?’ o, ‘Ang Bibliya wala magtudlo ug purgatoryo o impiyernong kalayo, dili ba?’ Busa siya anam-anam nga nagpakakat-on sa Bibliya.”