“Ako Mao ang Iyang mga Mata ug Siya Nagsilbing Akong mga Tiil”

SI José Luis Escobar ug si Artemio Duran nag-alagad ingong mga ansiano sa usa ka Kristohanong kongregasyon sa mga Saksi ni Jehova sa Mexico. Si José Luis buta, ug si Artemio bakol.

Sa 16 anyos pa siya, si José Luis gusto ug boksing. Usa ka adlaw siya gidapit sa pagpuli sa usa ka propesyonal nga boksingero diha sa usa ka bangga. Sa ikaupat nga round, grabe kaayo ang pagsinontokay sa duha nga tungod niana gipaundang ang boksing. Bisan pa nga gihatag kang José Luis ang kadaogan, ang mga sukmag nga iyang nadawat misangpot ug pagkabuta.

Giadto ni José Luis ang nagkalainlaing doktor ug nakigkita usab ug daghang mga espiritista. Apan walay nakatabang kaniya. Nasubo, daghang higayong misulay siya sa paghikog. Sa ulahi giduaw siya sa mga Saksi ni Jehova, nakakat-on sa mga kamatuoran sa Bibliya, ug sa kataposan nagpahinungod sa iyang kinabuhi sa Diyos. Siya gibawtismohan niadtong Agosto 1974.

Si Artemio, sa laing bahin, grabeng naaksidente sa awto niadtong 1981. Kini nahitabo samtang nagpuyo ug nagtrabaho pa siya sa ilegal nga paagi sa Tinipong Bansa. Ang mga hawas sa nagkalainlaing mga grupo sa relihiyon miduaw kaniya sa hospital ug gisultihan siya nga siya gisilotan sa Diyos tungod sa iyang daotang paagi sa kinabuhi. Si Artemio usab sa ulahi naduaw sa mga Saksi ni Jehova. Siya nagtuon sa Bibliya, mihimo sa gikinahanglang mga kausaban sa iyang kinabuhi, ug gibawtismohan niadtong Mayo 1984.

Karong adlawa kining duha managkauban sa usa ka Kristohanong kongregasyon. Sila regular nga nag-ubanay sa balay-ug-balay nga ministeryo, nagahimog mga pagbalik duaw sa mga tawong interesado, ug nagabisita sa mga sakop sa kongregasyon sa paglig-on kanila sa espirituwal. Si José Luis mao ang motulod sa wheelchair samtang si Artemio maoy mohatag kaniyag direksiyon kon asa moadto. Gitawag ni Artemio silang duha ingong usa ka yunit: “Ako mao ang iyang mga mata ug siya nagsilbing akong mga tiil.”