Kon sa Unsang Paagi Ginasagubang sa mga Doktor ang AIDS

ANG kapeligrohan nga matakdan sa AIDS pinaagi sa dugo nagpahinabo sa ubang mga siruhano sa paggamit nianang gitawag sa The New York Times nga “bag-ong hinagiban sa operasyon alang sa panahon sa AIDS.” Alang sa mga siruhano ang hinagiban naglakip sa “gomang mga botas, apron nga dili mabasa nga kutob sa tiil, duha ka parisang guwantis, dili mabasa nga mga panalipod sa bukton ug antipara.” Ug sa mga kaso nga madugoon, nag-ingon ang Times, “usa ka kalo nga dunay tabon sa nawong ug liog.”

Hinungdanon, sa hinapos sa 1990, ang Federal Centers for Disease Control miingon nga gikan sa 153,000 sa gitahong mga kaso sa AIDS, 637 maoy mga doktor, 42 mga siruhano, 156 maoy mga dentista ug hygienists, ug 1,199 maoy mga nars.

Ang AIDS unang nailhan sa 1981. Sa usa ka higayon kini makita lamang sa lalaking mga homoseksuwal ug mga giyanon sa droga nga natakdan gikan sa hugawng mga dagom. Apan kusog nga mikaylap kini diha sa mga babaye. Ang World Health, ang magasin sa WHO (World Health Organization), sa gula niini sa Nobyembre-Disyembre 1990 mitaho: “Ang gidaghanon sa mga babaye sa [tibuok kalibotan] nga gidahom nga magkasakit sa AIDS sulod sa sunod nga duha ka tuig mosobra pa sa tibuok nga total sa tanang mga kaso sa AIDS nga gitaho ngadto sa WHO sa panahon sa unang dekada sa epidemiya.”

Sa Tinipong Bansa, ang Federal Centers for Disease Control mitaho nga sa ulahing mga bulan sa 1990, dihay 15,696 ka tawo nga kapin sa 50 ang edad ang nakabaton ug mga simtoma sa AIDS. Dako kana nga numero kon itandi sa 2,686 lamang ka kaso sa AIDS diha sa mga bata ubos sa 13, usa ka grupo sa mga biktima sa AIDS nga nakadawat ug mas dako nga publisidad.

Sa unsang paagi matakdan ang mga edaran sa AIDS? Natakdan ang kadaghanan ingong resulta sa homoseksuwal nga mga buhat. Apan, sumala sa The New York Times, “duolan sa 17 porsiento sa mga biktima natakdan sa virus pinaagi sa hugaw nga mga pagpadugang ug dugo.” Katumbas kana halos sa samang gidaghanon sa mga kaso sa AIDS diha sa mga tigulang tungod sa mga pagdugang ug dugo sa gidaghanon sa mga kaso sa AIDS diha sa mga bata nga ubos sa 13!