Butang nga Bililhon pa Kay sa Salapi
“Ang atong sistema sa pagdasig sa mga tawo hangtod niining adlawa halos bug-os gipasukad sa mga balos nga salapi.”—Psychology Today.
SI Nancy ug si Howard may dagkong mga plano pagkahuman sa ilang kasal niadtong 1989. Buot nila ang usa ka balay, usa ka anak, bag-ong mga kotse, ug usa ka talagsaong bakasyon. Sila may kinitaan nga makaabot niana. Apan silang duha kalit nawad-ag trabaho. Ang salapi nga natigom alang sa paunang bayad sa usa ka balay gigamit na lang sa abang.
Kay nabalaka sa ugma-damlag, gioktaba nila ang tanan nilang mga plano—apil ang pagsugod sa usa ka pamilya. “Lima ka tuig gikan karon,” matud ni Nancy, “Sa akong hunahuna dili pa kami mahibalik sa among kahimtang niadto. Nawagtang kanang tanan, ug ambut kon mahibalik pa ba.”
Pagkamaayo ang paghulagway niini sa makapagun-ob nga epekto sa pagkawala sa trabaho! Ug gipadayag usab niini ang malinglahong gahom sa salapi. Ang ania karong adlawa mahimong mawala ugma. Sumala sa matinud-anong gipasidaan sa Bibliya: “Ang imong salapi mahimong mawala sa kalit, nga samag kini may mga pako ug milupad sama sa usa ka agila.”—Proverbio 23:5, Today’s English Version.
Ang pagdawat sa umalaging kinaiya sa salapi labi pang sayon isulti kay sa buhaton. “Ang salapi mao ang tibuok-kalibotang sukdanan,” miingon ang Psychology Today bahin sa kasagarang mga tinamdan sa salapi. “Kita nagasukod sa mga butang pinaagi sa salapi, kasagaran bisan sa atong kaugalingon.” Ang pagkabalaka sa pagbatog salapi mitultol pa gani sa mga dato ngadto sa kahigwaos, depresyon, ug ubang mga sakit.
Ang Pagkabililhon sa Kaalam
Apan adunay butang labi pang bililhon kay sa salapi. Gipaila kini sa Bibliya diha sa Ecclesiastes 7:12: “Ang kaalam maoy alang sa panalipod sama nga ang salapi maoy alang sa panalipod.” Dayon ang bersikulo nagdugang sa usa ka kamatuoran bahin sa kaalam nga nagpadayag nga kini labaw kay sa salapi: “Ang kaalam nagatipig nga buhi sa mga nakabaton niini.”
Ang kaalam nag-apil sa katakos sa paggamit sa maayong panghukom sa diha nga moatubang kitag mahagitong mga kahimtang. Kon moatubang kita sa pagkawala sa trabaho, ang maayong panghukom angay magtug-an kanato nga ang tinuod nga bili sa kinabuhi dili masukod sa mga pisos ug sentabos. Ang maayong panghukom motabang usab kanato sa paghatag ug hustong pagtagad sa atong mga pagaunahon.
Unsa ang Imong mga Pagaunahon?
Unsay panguna sa imong kinabuhi? Ang imong trabaho labaw pa bag bili kay sa imong kaminyoon? Ang imong balay labaw bag bili kay sa imong mga anak? Ang salapi ba labaw pag bili kay sa imong panglawas? Kada adlaw kita nagahimog mga desisyon nga gipasukad sa atong kahikayan sa pagdasig sa mga tawo, atong mga pagaunahon. Sa diha nga moatubang ug pinansiyal nga mga suliran, ang maong mga pagaunahon maoy magdiktar sa atong pagabuhaton. Sa unsa natumong ang imong mga pagaunahon?
Si Jesu-Kristo miingon: “Malipayon ang mga mahunahunaon sa ilang espirituwal nga panginahanglan.” (Mateo 5:3) Matikdi nga gipakita ni Jesus nga ang espirituwalidad maoy usa ka panginahanglan, usa ka pagaunahon, dili lamang hiyas sa luyo nga pangagpason sa diha nga lig-on na ang ubang butang sa kinabuhi.
Usa ka hagit nga pagaunahon ang maong espirituwal nga panginahanglan samtang malisdan sa pagtaganag materyal sa pamilya. Bisan pa, kadtong nagabuhat niana, sumala ni Jesus, maoy malipayon. Bisan tuod nabalaka sa pagpangitag kabuhian, sila nahigawas sa “diikabatbat nga mga kasakitan sa hunahuna” nga masinati sa usa sa dihang unahon ang salapi. (1 Timoteo 6:10, Phillips) Kana sila makakaplag usab ug paglipay diha sa mga pulong ni David sumala sa nahitala diha sa Salmo 37:25: “Ako kaniadto usa ka batan-on, ako natigulang na usab, apan wala ako makakita sa usa nga matarong nga gibiyaan sa bug-os, ni sa iyang kaliwat nga mangitag tinapay.”
Tagbawa ang Imong Espirituwal nga Panginahanglan
Ang espirituwal nga panginahanglan sa tawo maoy dala sa pagkatawo. Labaw pa kay sa pagkaon, panapot, ug puy-anan ang iyang gikinahanglan. Ang espirituwalidad molapaw pa, nga magatubag sa mga pangutana sama sa, ‘Nganong ako ania dinhi?’ ug, ‘Asa ba kining kalibotana—ug akong kinabuhi—nagapadulong?’
Ang kahadlok sa usa ka “kagun-oban sa ekonomiya” nakatukmod sa daghan sa pagsabot sa ilang espirituwal nga panginahanglan. Ang Newsweek mitaho: “Ang halin sa mga libro sa tagna—mga libro nga nagahubad sa mga panghitabo karon ingong Biblikanhong mga ilhanan sa kataposan sa kalibotan—miuswag ug 50 ngadto 70 porsiento kay sa miaging tuig.” Ugaling, sa pagtagbaw nianang espirituwal nga panginahanglan, ang usa kinahanglang mangita sa tukmang kahibalo, dili lamang sa tawhanong pangagpas.
Gidapit ka namo sa pagsusi sa Pulong sa Diyos, ang Balaang Bibliya. Kini nasudlan ug praktikal nga kaalam sa pagtabang nimo sa pagsagubang sa mga kabalaka sa kinabuhi. Labaw pa niana, ang Bibliya makahatag nimog tukmang kahibalo sa kahulogan nga nagpaluyo sa “mga panahong lisod sagubangon” karong adlawa. (2 Timoteo 3:1) Pinaagi sa pagsulat sa mga magpapatik niining magasina, ang libreng pagtuon sa Bibliya sa balay mahikay. Karon labaw kay sukad masukad mao ang panahon sa pagpangitag praktikal nga kaalam alang sa karon—ug sa tukmang kahibalo sa umaabot—gikan sa Pulong sa Diyos, ang Bibliya.
[Hulagway sa panid 9]
Ang espirituwal nga mga butang kinahanglang pabilhan