Ang Hunahuna sa Bibliya

Kon Nganong Peligroso ang Pornograpiya

ANG pornograpiya dili na limitado sa mga tindahag mahilas nga mga butang ug sa mga salida sa sekso. Kini mabatonan na sa kadaghanan. Sa sunodsunod nga nasod, giduso kini atubangan sa mga mata sa kasarangang lungsoranon diha sa mga magasin, mga mantalaan, mga libro, mga programa sa TV, mga pelikula, ug mga video. Ang butang nga sama ka kaylap tinuod bang peligroso?

Hinuon, unsa ba ang pornograpiya? Ang pornograpiya gibatbat ingong “ang paghulagway sa erotikong kagawian (sama sa diha sa mga letrato o sinulat) nga may tuyo nga pukawon ang kahinam sa sekso.” Tin-aw ang maong kabatbatan. Apan motungha ang mga argumento kon bahin sa pagtino kon unsay mopukaw sa kahinam sa sekso ug kon unsay dili. Tinuod, sa usa ka sukod, ang butang nga mahimong pornograpiya nagdepende sa indibiduwal nga panghunahuna. Sa laing mga pulong, ang butang nga makapagana sa sekso sa usa ka tawo basin dili alang sa lain. Bisan pa niana, ang usa ka bag-ong surbi sa 5,000 ka tawo sa Alemanya mipadayag nga sa usa ka lebel, ang erotikong materyal mag-apektar sa halos tanan, mga lalaki ug mga babaye.

Daotan ba ang Pagpukaw sa Pangibog?

Ang pagpukaw sa angayang pangibog​—bisan unsay kinaiya—​dili maalamon kon walay paagi sa tukmang pagtagbaw niana. Pananglitan, kon ang usa sa imong paboritong mga pagkaon wala diha, lagmit dili ka matagbaw kon kanunay kang motutok sa mga letrato niana diha sa mga magasin o mga libro. Sa laing bahin, kon ikaw​—tingali tungod sa mga hinungdang labot sa panglawas​—dili tugotan sa pagkaon niana, ang kanunay nga paghunahuna niana lagmit kaayong mosangpot sa makuyaw nga mga paglapas. Sa susamang paagi, ang usa ka hinabako nga maningkamot sa pagbulag sa bisyo dili makapauswag sa iyang purohan sa paghimo niana pinaagi sa mapangandoyon nga pagtan-aw sa ubang tawo nga magtabako.

Mahitungod sa mga pangibog sa sekso, gikan sa punto de vista sa Bibliya, ang kalipay mosangpot gikan sa tukmang pagtagbaw niana sulod sa mga utlanan sa usa ka mahigugmaong kaminyoon. (1 Corinto 7:2-5; Hebreohanon 13:4) Busa pagkadili maalamon nga ang usa ka tawong tagsaanon magpukaw sa mga pangibog nga dili niya matagbaw! Kana mosangpot lamang sa pagbati sa kapakyasan o, daotan pa, sa pagtagbaw niana pinaagi sa pagdangop sa masturbasyon o pakighilawas, sa ingon maglapas sa balaang mga balaod ug mga prinsipyo.​—1 Tesalonica 4:3-7.

Nagkahulogan ba kining ang pornograpiya dili peligroso kon ikaw minyo? Dili ingon, kanang Kasulatanhong mga lagda sa kagawian mapadapat usab sa minyong katawhan. Gawas pa, ang pornograpiya nagahaling sa hakog kusganon nga mga pagbati, nga mopatuman sa pagtagbaw sa kaugalingong mga pangibog, samtang ang gugma nasentro sa pagtagbaw sa mga panginahanglan sa kapikas sa usa. Ang pornograpiya mosangpot sa dili-mahunahunaon ug nasentro-sa-kaugalingong sekso, nga, bisan pag sulod sa panagtiayon, mahimong makauulaw ug dili mahigugmaon.​—1 Corinto 13:5.

Inay makapalig-on sa gugma sa magtiayon, ang pornograpiya mopatay niana tungod sa pagdaot sa kahalangdon niana, paghiwi niana. Ang relasyon sa sekso sumala sa gihulagway diha sa pornograpiya maoy panghanduraw nga labing mangil-ad ang matang kay kini nagapahayag sa dili-husto ug makadaot nga mga mensahe bahin sa seksuwal nga mga buhat sa magtiayon. Gawas pa, ang tinuod-kinabuhing mga relasyon labaw pa kaayo kay sa seksuwal lamang; kana gitukod ibabaw sa kalumo, pagkasiawan, komunikasyon o pagpahayag, ug pagkamabination. Sa kasukwahi, ang pornograpiya basin mahimo pang bangil tali sa magtiayon.

Ang pornograpiya nagapaubos sa mga tawo ngadto sa lebel sa mga hayop nga nagalihok pinasukad lamang sa kinaiya o instinto. Dili kini modasig sa pagpugong-sa-kaugalingon, nga usa ka bunga sa espiritu sa Diyos. (Galacia 5:22, 23) Kini basin mohatag pag dalan alang sa seksuwal nga kahiwian. Kini pipila lang ka katarongan nganong likayan sa mga Kristohanon ang pornograpiya.

Busa, ang maalamong tambag sa Bibliya mao: “Pagmalipayon sa asawa sa imong pagkabatan-on . . . Nganong ikaw, anak ko, magkalipay uban sa usa ka babayeng langyaw o mogakos [sa literal o pinaagi sa pornograpiya ingong kapuli] sa sabakan sa usa ka babayeng dumuloong?”​—Proverbio 5:15-20.

Ugaling, sa unsang paagi ang usa ka tawo makalikay o makabulag sa pangupot sa pornograpiya?

Kon Unsaon sa Pagbulag sa Pangupot Niini

Sa pagsukol sa pangdani sa pornograpiya, ang Bibliya nagatambag: “Busa, patya ninyo ang mga sangkap sa inyong lawas nga anaa sa yuta kon bahin sa pakighilawas, kahugawan, kagana sa sekso.” (Colosas 3:5) Dinhi, ang pulong “patya” tin-awng nagapasa sa ideya sa pagpatay gayod​—dili lamang sa pagpukgo—​sa bisan unsang sangkap sa lawas nga magamit sa maong mga bisyo.

Bisan pa niana, kini kinahanglang sabton sa matandion, dili sa pisikal nga kahulogan. Ang mga Kristohanon dili maghiwahiwa sa ilang mga lawas. Kon atong “patyon” sa tino ang dili angay seksuwal nga mga hunahuna, dili kita magpadaog sa pangdani sa pornograpiya, sa ingon gamiton ang mga sangkap sa atong lawas, sama sa mga mata, sa sayop nga paagi. (Itandi ang Mateo 5:29, 30.) Busa, ang Bibliya nagatambag, nga pulihan ang dili angay nga mga pangibog sa “bisan unsang mga butang nga matarong, bisan unsang mga butang nga maputli,” ug unya “magpadayon sa pagpalandong niining mga butanga.”​—Filipos 4:8.

Unsa pa ang makatabang? Pagbutang sa hunahuna​—tingali sa pagsag-ulo pa—​sa mga teksto sa Bibliya, sama sa mosunod:

“Ilikay ang akong mga mata sa pagtan-aw sa butang walay kapuslanan.”​—Salmo 119:37.

“Ang tanan sa kalibotan​—ang pangibog sa unod ug ang pangibog sa mga mata . . . dili gikan sa Amahan, kondili gikan sa kalibotan.”​—1 Juan 2:16.

“Ang matag usa ginasulayan pinaagi sa pagdaldal ug pagkahaylo sa kaugalingong pangibog niini. Unya ang pangibog, sa dihang mahinog na, manganak sa sala; sa baylo, ang sala, sa dihang mabuhat na, magpatungha sa kamatayon.”​—Santiago 1:14, 15.

Ang bisan unsa nga makapasugod sa sunodsunod nga reaksiyon nga mosangpot sa kamatayon tukmang manganlang peligroso, ug ang pornograpiya mohaom sa maong kabatbatan! Hinumdomi: “Siya nga nagapugas nga nagapanglantaw sa iyang unod magaani ug kadunotan gikan sa iyang unod, apan siya nga nagapugas nga nagapanglantaw sa espiritu magaani ug kinabuhing walay kataposan gikan sa espiritu.” Ayaw itugot nga mahikawan ka sa kinabuhing walay kataposan tungod sa pornograpiya!​—Galacia 6:8.

[Blurb sa panid 19]

Inay makapalig-on sa gugma sa magtiayon, ang pornograpiya mopatay niana tungod sa pagdaot sa kahalangdon niini, paghiwi niini