Nganong “Propaganda”?

Niadtong 1622, gitukod ni Papa Gregorio XV ang usa ka kongregasyon, o komite, sa 13 ka kardinal, 2 ka prelado, ug usa ka sekretaryo aron sa pagdumala sa mga misyonaryo sa Iglesya Romana Katolika. Iyang gitawag kadto nga Congregatio de Propaganda Fide​—ang Kongregasyon sa Pagpalapnag sa Pagtuo​—o Propaganda sa minubo. Sa lakat sa panahon kining pulonga nahimong nagkahulogan sa bisan unsang paningkamot sa pagsabwag sa mga ideya o mga pagtuo aron sa paghimog mga kinabig.

Karong adlawa, ang “propaganda” kasagaran nga nalangkit sa pagtuis sa mga kamatuoran, ang malimbongon nga pag-impluwensiya sa mga kaisipan sa mga tawo, sama pananglitan sa panahon sa gubat. Apan gibati sa pila ka awtoridad nga bisan ang labing maayong panganunsiyo angay mabatbat nga propaganda, ilabina kon ang panghaylo nalangkit. Mipahayag ang The World Book Encyclopedia: “Ang mga edukador diha sa mga katilingban nga demokratiko nagtudlo sa mga tawo kon unsaon paghunahuna, apan ang mga propagandista nagsugo kanila kon unsay pagahunahunaon.”