Mga Batan-on Nangutana . . .

Unsa man kon Dili Mopaluyo Kanako ang Akong mga Ginikanan sa Akong Pagtuo?

DAGHAN nga Kristohanong batan-on dunay mga ginikanan nga dili magtutuo. “Sa akong pamilya ako lamang ang nagtuon ug Bibliya,” matud sa usa ka 12-anyos batang babaye. “Ug gusto sa akong inahan nga moundang ako sa pagtuon.” Ang uban dunay mga ginikanan nga napakyas sa pagpanguna sa espirituwal nga paagi. Kining mga kahimtanga mahimong usa ka dakong pagsulay alang sa usa ka sinserong batan-on nga buot moalagad sa Diyos.

Ang pagsingkamot nga mahimong tinuod nga Kristohanon nga walay tabang ug pagdasig sa mga ginikanan maoy lisod. Apan ikaw mahimong molampos! Ang daghang panig-ingnan, sa nangagi ug karon, nagapamatuod niana.

Matinuohong mga Batan-on sa Panahon sa Bibliya

Tagda si Abel, anak lalaki sa unang tawhanong magtiayon, si Adan ug si Eva. Si Adan ug si Eva angay untang maghatag ug hingpit espirituwal nga pagpaluyo sa ilang mga anak. Apan sila mingrebelde ug mingtalikod kang Jehova, nga gipasagdan ang ilang mga anak sa pagsingkamot sa ilang kaugalingon sa relihiyosong paagi. Inay mobatig kaluoy sa kaugalingon o tugotan nga ang kawalay espirituwalidad sa iyang mga ginikanan magpalong sa iyang pagpabili sa sagradong mga butang, lagmit nakat-onan ni Abel kutob sa iyang maarangan ang bahin sa Maglalalang. Nakigsulti si Jehova sa mga anak ni Adan, si Cain ug Abel, ug naugmad ni Abel ang usa ka relasyon uban sa Diyos ug nagtubo nga nahimong tawong matinuohon. “Pinaagi sa pagtuo si Abel mitanyag sa Diyos sa usa ka halad nga labaw ug bili kay sa kang Cain, nga pinaagi sa maong pagtuo iyang gipamatud-an nga siya matarong.”​—Hebreohanon 11:4; Genesis 4:2-15.

Si Josias usa ka laing panig-ingnan sa batan-on nga nakapadayon nga walay relihiyosong pagpaluyo sa ginikanan. Ang iyang amahan, si Haring Amon sa Juda, gipatay sa lipot sa dihang si Josias walo pa ka tuig sa edad. Samtang buhi pa, si Haring Amon “nagbuhat kon unsay daotan sa mga mata ni Jehova, sumala sa gibuhat ni Manases nga iyang amahan; ug si Amon mihalad ngadto sa tanang linilok nga mga larawan nga gibuhat ni Manases nga iyang amahan, ug siya mipadayon sa pag-alagad kanila. . . . Si Amon nagpasamot sa pagkasad-an.” (2 Cronicas 33:22, 23) Busa, hunahunaa ra ang makapadaot sa espirituwal nga palibot nga gituboan sa anak ni Amon nga si Josias.

Bisan pa, si Josias “nagbuhat kon unsay matarong sa mga mata ni Jehova ug naglakaw sa mga dalan ni David nga iyang amahan . . . Siya nangita sa Diyos ni David nga iyang amahan; ug sa ikanapulog-duha ka tuig [sa mga edad nga 20] siya misugod sa paghinlo sa Juda ug Jerusalem gikan sa hatag-as nga mga dapit ug sa balaang mga haligi ug sa linilok nga mga larawan ug sa tinunaw nga mga larawan.”​—2 Cronicas 34:2-4.

Sa unsang paagi naugmad ni Josias ang dakong kalig-on nga walay tabang sa usa ka amahan? Nakabaton siyag pagpaluyo gikan sa ubang espirituwal nga mga tawo, sama sa hataas nga saserdoteng si Hilkias ug ang iyang sekretaryong si Sapan. Ang ilang positibong impluwensiya diha sa batan-ong si Josias nakatabang niya sa “pagtuman sa mga pulong sa kasugoan.” (2 Hari 23:24; 2 Cronicas 34:14-19) Ang maong Kasugoan nagbaod sa mga hari sa paghimog personal nga kopya niana ug sa pagtuon niana sa adlaw ug sa gabii. (Deuteronomio 17:18; Josue 1:8) Ang pagbuhat niana sa walay duhaduha nakatabang ug dako sa espirituwal nga pagtubo ni Josias.

Pagkaplag sa Pagpaluyo Karong Adlawa

Ikaw usab mahimong motubo sa espirituwal nga paagi, bisan pag wala ka magdawat sa pagpaluyo nga buot nimo gikan sa imong mga ginikanan. Ang pagpaluyo sagad mabatonan gikan sa espirituwal nga mga igsoong lalaki ug mga babaye ug mga inahan ug mga amahan sulod sa mga kongregasyon sa mga Saksi ni Jehova. (Marcos 10:30) Tingali dunay pila ka batan-ong mahunahunaon sa espirituwal diha sa kongregasyon nga imong mahigala. O tingali may pila ka edarang Saksi nga magmaikagon kanimo. Pananglitan, usa ka walay-amahang tin-edyer nga ginganlag Jerry gidapit sa usa ka ansiano sa kongregasyon nga mokuyog niya sa usa ka pagtuon sa Bibliya sa balay. Tapos sa pagtuon, sila sagad mangaon sa usa ka restawran ug mag-estoryahay. “Siya nahimong samag amahan alang kanako,” nahinumdom si Jerry. Karong adlawa si Jerry minyo na ug nagaalagad nga ministeryal nga alagad. Siya mapasalamaton gayod sa pagpaluyo nga gihatag kaniya sa ansiano.

May mga edaran ba nga mitanyag sa pagtabang kanimo sa usa ka paagi? Nan nganong dili dawaton kana? Ug kon walay mitanyag niana, manguna sa pag-ugmad ug maayong mga relasyon. Tingali makasulay ka sa pagduol sa usa sa mga magtatan-aw sa lokal nga kongregasyon. Tingali nanginahanglan ka nga may modumala ug pagtuon sa Bibliya sa balay uban nimo o motabang nimo sa pag-andam sa mga asaynment alang sa Tunghaan sa Teokratikanhong Ministeryo.a O tingali nanginahanglan ka lang ug maayong pamilyahanong pakig-uban. Hisabtan, tingali kulbaan ka bahin sa pagpahibalo sa imong mga panginahanglan niining paagiha. Apan hinumdomi, ang mga ansiano sa kongregasyon gitudlo sa pag-atiman sa espirituwal nga mga panginahanglan sa tanan diha sa kongregasyon​—lakip ang mga batan-on. (1 Pedro 5:2) Sila mahimong usa ka dakong tabang.

Pag-ugmad sa Pagpaluyo Diha sa Balay

Nan, nagpasabot ba kini nga wala kay mahimo sa pagpauswag sa kahimtang diha sa balay? Wala gayod. Tagda, pananglitan, ang batan-ong si Joe. Gibatbat niya ang gidak-on sa espirituwal nga pagpaluyo nga gihatag sa iyang di-matinuohong mga ginikanan ingong “limitado.” Bisan pa, si Joe miangkon nga mahimong siya aktuwal nakaamot sa ilang kakulang sa pagpaluyo. Sa unsang paagi naingon? Aw, mopatim-aw nga sa unang misugod si Joe sa pagtuon sa Bibliya uban sa mga Saksi ni Jehova, wala kaayo siya magpadapat sa iyang nakat-onan diha sa iyang personal nga kinabuhi. Busa nagpadayon siya sa pagsupak sa iyang mga ginikanan. Natural lamang, wala sila makakitag katarongan sa pagtuon sa Bibliya sa ilang kaugalingon, unsa pa kayha ang pagdasig sa dugang pagtuon sa Bibliya sa iyang bahin.

Komosta ka man? Kon ang imong mga ginikanan dili matinuohon, ang imo bang mga lihok nagahatag nilag katarongan sa pagtuo nga ikaw seryoso mahitungod sa pagkabuot moalagad sa Diyos? Ang Kristohanong mga asawa gisugo sa pagkabig sa ilang mga bana nga dili matinuohon pinaagi sa ilang maayong kagawian. Ang imong mga ginikanan ba sa susama “makabig nga walay usa ka pulong” kon ikaw mas masinugtanon ug matinahoron kanila? (1 Pedro 3:1; Efeso 6:1-3) Kon mao, dili ba kaha lagmit pa nga sila mopaluyo kanimo?

Apan, unsa man kon ang imong mga ginikanan mga Kristohanon apan wala magbuhat sa tanan nga angay nilang buhaton sa pagtabang ug pagdasig nimo? Bisan unsa man ang ilang katarongan, ikaw dakog mahimo sa pagpausbaw sa maayong kahimtang sa espirituwal diha sa inyong balay pinaagi sa paghatag ug maayong panig-ingnan. (1 Timoteo 4:12) Sa dihang panahon na sa pagtambong sa Kristohanong mga tigom, mahimong ikaw nakailis na ug andam nang molakaw. Boluntaryo sa pagbuhat sa pila ka ekstrang buluhaton sa pamilya aron ang imong mga ginikanan samang maandam sa igong panahon. Kinsay nahibalo? Tingali ang imong kadasig alang sa mga tigom mag-impluwensiya nila sa maayong paagi.

Ang imo bang mga ginikanan nagadumalag senemanang pagtuon sa Bibliya sa balay uban nimo? Kon wala, nganong dili hangyoon sila sa pagbuhat niana sa malulutong paagi, sa paaging dili makig-awayon o magbagutbot. Sa dihang himoon ang pagtuon, ayaw sila paglisora sa pagpagawas sa imong mga komento; mahimong bug-os andam sa pagpakig-ambit. Buhata ang imong bahin sa paghimo niana nga kahimut-anang okasyon. Pasalamati sila sa paghimo sa pagtuon. Kini basin mohatag gayod sa imong mga ginikanan sa gikinahanglang pagdasig sa paghimo sa pagtuon nga regular.

Unsa man kon gamay ra ang sanong sa imong paningkamot? Ayaw paghunong. (Galacia 6:9) Ipahayag sa dayag ang imong gugma alang sa Diyos ug sa kamatuoran sa Bibliya. Ayaw wad-a ang imong kadasig o panabot sa pagkadinalian sa pagtabang sa uban nga makakat-on bahin sa Diyos. Magpadayon sa ‘paglig-on sa imong kaugalingon diha sa imong labing balaang pagtuo, ug pag-ampo uban sa balaang espiritu.’ (Judas 20) Usa ka batan-ong ginganlang si Laverne nagabuhat gayod niana. “Ako nakahukom nga dili tugotan ang akong amahan sa pagbabag nako sa pagkat-on sa kamatuoran,” matud niya. “Busa ako nagatuon sa Ang Bantayanang Torre sa akong kaugalingon inay sa pagtan-awg TV.b Ako nagabasa usab sa teksto sa Bibliya kada buntag. Ako makahimo sa buluhatong pagsangyaw pinaagi sa pagkuyog sa ubang Kristohanong mga igsoong lalaki ug mga babaye.”

Ipakita ang samang determinasyon. Ayaw itugot nga ang kakulang sa pagpaluyo sa balay makapaluya nimo. Magpabiling lig-on sa imong mga pagtuo. Kon mahimo, pakigsuod sa mga isigkaingon ug sa mga edaran diha sa kongregasyon nga mahunahunaon sa espirituwal. Apan kon duna man o walay pagpaluyo, mahimong disidido sa pagpadayon sa imong pagpakighigala sa Diyos. Ikaw makasalig kaniya alang sa pagpaluyo.​—Itandi ang Salmo 119:116.

[Mga footnote]

[Hulagway sa panid 19]

Ang hamtong nga mga membro sa kongregasyon makatabang pinaagi sa pagkaikag kanimo