Usa ka Drama sa Chile Nakatukmod sa Kristohanong Gugma
Sinulat sa koresponsal sa Pagmata! sa Chile
ANG amihanang Chile ilado tungod sa iyang uga nga Desyerto sa Atacama, uban sa iyang hataas wala kapuy-ing mga dapit nga dili na makita sa halayo. Tagsa ra kaayo ang ulan nga ang sagad tawgon sa mga tawo ug hamog giila ingong ulan dinhi ning awaawng dapit tungatunga sa Dagat Pasipiko ug sa Kabukiran sa Andes. Tungod niining mga kahimtang sa klima, halos tanang balay dili andam sa pag-ulan, ug ngani kon duna may panagsang pag-ulan—tingali makausa matag lima ka tuig—kadaghanan dili motagad sa pagsusi sa kalagmitan sa nagatulo nga atop hangtod ang ulan moabot. Kining kahimtanga tingali nagluwas sa mga kinabuhi sa daghan diha sa Antofagasta, usa ka siyudad sa mga 250,000 ka molupyo.
Sa Lunes sa gabii, Hunyo 17, 1991, daghang tawo nagpangandam na sa pagpahulay sa gabii, sa dihang mibunok ang kusog nga ulan. Ang mga atop sa daghang balay nagtulo, busa inay sa pagkatulog, ang mga tawo nagsulay sa pag-ayo sa mga tulo o sa paglimiti sa kadaot—wala magsuspetsa nga dunay mas grabe pang mahitabo sulod sa pila ka oras.
Sayo sunod buntag, tulo ka dagkong banlas sa lapok, nga nagbanlas sa minilyon ka toneladang yuta sa gibanabanang gikusgon nga 30 kilometros matag oras, nagpahinabog kamatayon sa mga 85 ka tawo, nagsamad sa mga 700, ug nagguba o nagdaot sa mga balay sa kapig 30,000!
Kaguol Diha sa Dagat sa Lapok
Sa Antofagasta dunay napulo ka kongregasyon sa mga Saksi ni Jehova, nga may mga 1,400 ka sakop, busa dihay tinuod nga kabalaka alang sa ilang kaayohan. Malipayon kami kaayo sa pagkadungog nga walay mausa ang nakalasan ug kinabuhi, bisan tuod usa ka sister nakaagom ug grabeng samad sa dihang siya gianod sa lapok sa gilay-ong hapit tulo ka kilometros. Sa dihang siya nadiskobrehan sa mga sakop sa magluluwas, sila nagtuo nga siya patay na hangtod usa ka nars nakamatikod nga siya nagginhawa ug, sa pagduol, nadungog siyang nagtawag “Jehová, Jehová.” Nakalamoy siyag daghan-daghang lapok, mao nga gidali nila siya ngadto sa hospital aron matambalan siya alang sa impeksiyon.
Sa Kongregasyon sa Oriente, mga 70 porsiento sa mga pamilya nawad-an sa ilang balay o grabeng nadaotan niana. Ubang mga pamilya sa Costanera ug Corvallis nga mga Kongregasyon nakaagom usab ug grabeng kadaot sa ilang mga balay, sanglit ang lapok nakaabot kutob sa mga atop diha sa pila ka mga dapit o misulod sa mga balay, nga nagpuno sa mga kuwarto kutob sa usa ka metros ug tunga sa lapok. Sa usa ka balay ang inahan ug iyang duha ka bata sakay sa ilang kama naglutaw diha sa dagat sa lapok, nga ang lapok hinayhinayng nagduso kanila ngadto sa kisame; sila naluwas sa dihang ang amahan sa babaye nakaarang pagsulod pinaagi sa atop. Ang uban diha sa igo-igong luwas nga mga dapit mibati nga ang kataposan duol na samtang sila naminaw sa dahunog sa banlas sa lapok nga nagbungkag sa tanang butang diha sa ilang agianan ug nakadungog sa siyagit sa kaguol diha sa kabugnaw sa mangitngit nga kagabhion.
Butang Labawng Bililhon Kaysa Kabtangan
Bisan tuod nawad-ag daghan nilang mga kabtangan, ang mga Saksi nakapasundayag ug dalayegong espiritu. Usa ka Saksi mikomento kon sa unsang paagi ang mga higala ug mga kauban sa trabaho nahingangha sa pagkakita sa iyang mangayang espiritu bisan pa sa dakong kapildihan sa materyal. Iyang giingnan sila nga kon ang materyal nga mga butang maoy ilista diha sa alpabeto sumala sa ilang importansiya, sila mahimutang diha sa dapit sa letrang z. Siya malipayon nga naluwas ug nabuhi kauban ang tanan sa ilang pamilya.
Laing inahan, kinsa nahimulag sa iyang mga anak babaye ug hapit mawad-an sa duha kanila lakip sa iya mismong kinabuhi, sa hugot miampo kang Jehova nga kon siya makabalik sa kinabuhi sayo sa pagpamanhaw, siya buot moalagad ingong kusinera samtang ang uban nagatrabaho sa pagpasig-uli sa yuta! Siya wala mamatay, ug sa imong hunahuna asa siya gihangyo sa pag-alagad sa mga adlaw pagkatapos sa pagbanlas sa lapok? Oo, diha sa kusina nga gitukod sa mga Saksi aron sa pagpakaon ug gatosan ka kan-anan alang sa mga Saksi ni Jehova ug silingang mga pamilya nga nawad-an sa ilang mga balay!
Kristohanong Gugma Nagalihok
Ang mahigugmaong mga Saksi sa Calama ug Iquique naghimog mga kahikayan sa pagpadalag tinapay, tubig, sinina, ug ubang kinahanglanong butang ngadto sa Antofagasta. Ang sangang buhatan sa Sosyedad sa Watch Tower naghikay sab alang sa tabang, ug taodtaod ang sinina, mga habol, higdaanan, gamit sa kusina, pagkaon, ug ubang butang nagsugod sa pagpangabot. Makapatandog gayod sa pagkakita nga daghang mga butang gidonar maoy dili gamit na o mga salin apan bag-ong pinalit! Sa wala madugay ang duha ka trak sa Sosyedad ug ikatulo gikan sa Rancagua padulong na sa Antofagasta, mga l,400 kilometros padulong sa amihanan, dala ang mga 14 toneladas nga galamiton. Bisan pag gipahibalo na nga dili na kinahanglan ang dugang donasyon, sila padayon nga nangabot. Ingong sangpotanan, ang ekstrang trak giabangan sa pagdala sa laing 16 toneladas! Kining mga abiyoha sa kamanggihatagon gipaambit sa mga silingang dili mga Saksi.
Bisan tuod nahimutang sa usa sa labihang nadaot nga mga dapit, ang balay sa usa ka pamilya sa mga Saksi wala matatsahi. Sila abtik nga nagpakita sa ilang gugma sa silingan, nga nagpasaka sa ilang balay ug 9 ka pamilyang mga Saksi maingon sab sa 70 ubang silingan nga dili mga Saksi, daghan kanila miabot nga puno sa lapok ug walay mga sinina. Ang mga Saksi nagpagamit sa tanang sinina ug mga habol nga ilang nabatonan.
Daghan ang naghatag sa ilang panahon, kahinguhaan, ug kusog aron makatabang. Bisan kini usa ka dakong trahedya alang sa Chile, ang katawhan ni Jehova sa makausa pa nagpasundayag sa ilang pagkahiusa ug inigsoong kabalaka, ngani nagpadalag salaping donasyon gikan sa sama kalayo sa Texas sa Tinipong Bansa. Usa ka tawo nagsumada sa duha ka semanang hinabang diha sa Antofagasta: “Sukad wala pa kami ing asembliya nga 13 ka adlaw, nga may daghang tinuod nga mga drama, daghang pagpadayag sa gugma, daghan nga naghatag sa ilang kaugalingon sama sa makita sulod sa milabayng mga adlaw.”