Aduna ba Gayoy Usa ka Matarong nga Gubat?
LATAS sa kasiglohan, ang Kakristiyanohan daghag nahisgotan bahin sa ideya sa “matarong nga gubat.” Sa miaging tuig ang magasing Time mipatik ug usa ka listahan sa unom ka pangunang mga kinahanglanon nga gibati sa mga teologo nga angay kab-oton sa usa ka gubat aron pagaisipon nga “matarong.” Ang kasaysayan nagpamatuod nga walay usa sa mga gubat nga gipaluyohan sa Kakristiyanohan ang nakakab-ot niining maong mga kinahanglanon.
Apan ang Har–Magedon, ang gubat nga gisaad sa Diyos nga ipahamtang batok niining dunot nga sistema sa mga butang, makakab-ot sa tanang unom ka sukdanan sa mga teologo.
“Ginapaluyohan niini ang ‘matarong nga kawsa,’ sama sa pagdepensa-sa-kaugalingon o sa pagdaog sa daotan.” Ang Har–Magedon mopapha sa tanang mga bahin sa daotang kalibotan diin si Satanas nga Yawa mao ang diyos. Busa, ikaingon sa “Matinumanon ug Matuod” nga Manggugubat sa Diyos sa Har–Magedon, si Kristo Jesus, nga “siya nagapanghukom ug nagapakiggubat sa pagkamatarong.”—Pinadayag 19:11; 2 Corinto 4:4.
“Kini igapahayag ug pagadumalahon sa ‘may katakos nga awtoridad.’” Ang Har–Magedon dayag maila ingong “ang gubat sa dakong adlaw sa Diyos nga Labing Gamhanan”—iyang gubat. Kinsa ba ang mas labaw pang may katakos nga awtoridad kay sa Maglalalang sa uniberso mismo?—Pinadayag 16:14; tan-awa usab ang 11:17, 18; itandi ang Isaias 36:10.
“Kini ang ‘kataposang kapilian’ human nga mapakyas ang malinawong mga paagi.” Sulod sa kaliboan na ka tuig karon, ang Maglalalang nagdasig—gani naghangyo—sa katawhan nga “magpasig-uli sa Diyos” ug “mag-alagad kang Jehova uban ang kahadlok.” Apan tungod kay nagpakabungol sa malinawong mga paningkamot ug mga pasidaan sa Diyos sulod na sa 6,000 ka tuig, walay gihatag ang tawo nga kapilian sa Maglalalang gawas sa gubat.—2 Corinto 5:20; Salmo 2:2, 10-12.
“Kini sa labing menos ‘may posibilidad nga molampos.” Tagda ang magkaatbang nga kiliran. Sa usa ka kiliran mao ang natingob nga gahom sa mga nasod niining kalibotana, uban sa tanan nilang mga arsenal sa makahahadlok nga mga hinagiban. Sa laing kiliran mao ang Maglalalang sa uniberso. Ang usa sa iyang gamay nga mga linalang, ang adlaw, maoy usa ka dakong hudno sa termonukleyar nga mga pagbuto nga kusog kaayo nga bisag pabuthon sa mga nasod ang ilang tanang nukleyar nga mga hinagiban sa dungan dakong pagpabuto, kana nga pagpabuto sama rag sagitsit sa posporo. Magamit ni Jehova ang iyang tanang gamhanang mga puwersa sa kalalangan sa pagtino nga ang iyang gubat seguradong molampos.—Isaias 40:15; 54:17.
“Kini nahiuyon sa ‘pagkaangay’—ang kaayohang makab-ot mas dako kay sa mahimo nga kadaot.” Hunahunaa ang umaabot nga walay gubat sa Diyos sa Har–Magedon. Ang katawhan determinado sa paglaglag sa kaugalingon. Kon pasagdan lang sa iyang kaugalingong mga tinguha, kanus-a pa mohunong ang tawo sa pagdaot niining planetaha ug magtakiang sa dalan ngadto sa pagkalaglag, ang kataposan sa makalilisang nga parada sa mga espisye nga mapuo sa tawo? Mahimo ba unya kining usa ka hapon sa nukleyar nga kalaglagan? o pipila ka dekada sa paghugaw sa yuta? Sa bisan hain nga paagi, ang katawhan wala nay kaikyasan kon ang Diyos dili mangilabot sa tawhanong mga kalihokan. Sa laing bahin, palandonga ang kaayohan nga gisaad nga ipahinabo sa Har–Magedon—malinawong umaabot sa diyosnong katawhan niining planetaha, wala nay polusyon, wala nay gubat, wala nay kawalad-on, wala nay sakit o bisan kamatayon. Ang Diyos nagasaad: “Tan-awa! Ginabag-o ko ang tanang butang.”—Pinadayag 21:3-5.
“Kini ‘mapilion,’ nagalikay nga madaot ang mga way-labot kon mahimo.” Ang Har–Magedon mapilion. “Kay ang mga mamumuhat sa daotan pagalaglagon; apan ang mga nagahulat kang Jehova, ang magapanunod sa yuta.”—Salmo 37:9.
Ang tanan nga interesadong makalabang-buhi niining tinuod matarong nga gubat kinahanglang magtuon sa basehanan sa “paglaom kang Jehova” pinaagi sa personal nga pagtuon sa iyang pulong.