Ang Hunahuna sa Bibliya

Pagkadaotan—Kinsay Basolon?

SA IYANG pagsulod sa iyang balay, dali siyang nakamatikod nga may daotan nga nahitabo. Ang kalit nga pagpasiklap sa palibot sa balay naglig-on sa iyang labing daotang mga katahap​—ang telebisyon, stereo, pila ka sinina, ug ubang butang nangawala. Dayon, ang makahadlok nga hunahuna misantop sa iyang hunahuna, ‘Unsa kaha kon ang mga kawatan ania pa sa balay?’ Siya misibog aron malayo sa peligro ngadto sa balay sa usa ka silingan aron motawag ug polis. Oo, siya usa pa ka biktima sa krimen.

Kon ikaw wala sa personal makasinatig krimen, lagmit ikaw may nailhan nga nakasinati na. Kini usa ka esena nga kasagaran kaayong gidula sa tibuok kalibotan sa dili-gustong mga aktor. Sumala sa usa ka surbi sa Komite sa Pagsanta ug Pagpukgo sa Krimen sa HK, ang gidaghanon sa gikatahong krimen nagauswag nga mas kusog kay sa nasodnong mga ekonomiya ug mga populasyon.

Ang sinsero, buotan-ug-kasingkasing nga katawhan sa bisan diin mabalak-on bahin sa krimen, makalilisang lipot nga mga pagpatay, inhustisya, ug kahiwian nga nagaapektar sa kalibotan ug nahilansang sa kahadlok sa paturagas nga kapintasan. Daghan mangutana, ‘Nganong dili kini pahunongon sa Diyos?’

Kana usa ka maayong pangutana, ug ang Bibliya nagahatag sa tubag. Ugaling, aron sa pag-apresyar sa tubag, hinungdanon ang pag-ila sa tinubdan, sa lintunganayng hinungdan, sa pagkadaotan.

Ang Diyos Dili Mabasol

“May inhustisya ba uban sa Diyos?” nangutana ang magsusulat sa Bibliya si Pablo. “Palayo kana!” siya nagatubag. (Roma 9:14) Apan ang pipila tingali mobati nga sanglit ang Diyos labing gamhanan, siya ang responsable sa tanan nga mahitabo. Dili kana tinuod. Palandonga: Usa ka arkitekto magadesinyog matahom apan mapuslanong tinukod. Labing maayog kalidad ang trabaho, ug labing maayo ang materyales nga gigamit. Ugaling, gidaot ug giabusohan sa mga nangabang ang tinukod. Sa dili madugay magkinahanglan kanag dakong pagpang-ayo. Tino nga mouyon ka nga ang mga nangabang, dili ang tigdesinyo o ang magtutukod, maoy responsable sa pagkadaot sa tinukod! Kana tinuod usab sa katawhan ug sa yuta karong adlawa. Sumala sa ginapatin-aw sa Deuteronomio 32:4, 5, ang mga buhat ni Jehova maoy hingpit. “Ang tanan niyang mga dalan maoy hustisya. Usa ka Diyos nga matinumanon, nga kaniya walay inhustisya.” Nan, kinsay basolon tungod sa hilabihang suliran sa yuta karong adlawa?

Ang kasulatan nagpadayon: “Sila milihok nga madinaoton sa ilang bahin mismo . . . Ang kadaot maoy ilang kaugalingon.” Sa pagkamatuod, kadaghanan sa suliran sa kalibotan karong adlawa mao ang direktang resulta sa kaugalingong kahuyangan o, tingali, pagkagahig-ulo sa katawhan. Bisan pa niana, adunay lain, dako pa kaayong tinubdan ug hinungdan sa pagkadaotan.

Ang Tinuod nga Hinungdan Gipadayag

Sa Pinadayag 12:9, atong mabasa nga si Satanas nga Yawa, “nga nagalimbong sa tibuok gipuy-ang yuta,” gitambog sa silinganan sa yuta. Ang sangpotanan? Ang bersikulo 12 sa samang kapitulo nagpadayon: “Alaot ang yuta ug ang dagat, tungod kay ang Yawa nanaog nganha kaninyo, nga may dakong kasuko, kay nahibalo nga siya may hamubo lamang nga panahon.” Busa mao siya, ang dakong Kaaway, kinsa nagahulhog sa mga inhustisya nga lukop sa yuta. Tinuod, adunay mga tawo nga nakigtambayayong sa iyang mga singkamot; apan siya mao ang gibatbat nga “usa ka mamumuno sukad sa iyang pagsugod.” (Juan 8:44) Ang Kasulatan nagpakita kanato nga si Satanas nga Yawa mao ang lintunganayng hinungdan sa mga suliran sa tawo. Dili lang siya ang hinungdan apan siya usa ka mapinadayonong tighimo sa pagkadaotan, nga nagapakusog sa iyang mga panlimbasog niining “kataposang mga adlaw.” (2 Timoteo 3:1-5, 13) Busa si Jehova nga Diyos dili mao ang hinungdan sa pagkadaotan. Apan siya may igo bang pagtagad aron hunongon ang pag-antos sa katawhan?

Pahunongon ba sa Diyos ang Pagkadaotan?

Oo, siya may pagtagad, ug taposon niya ang pagkadaotan ug pag-antos. Siya usa ka Diyos sa gugma, ug ingong usa ka mahigugmaong Amahan, siya nahibalo ug buot magtagbaw sa mga panginahanglan ug mga tinguha sa iyang mga anak. (Salmo 145:16; 1 Juan 4:8-10) Nga kana wala pa buhata sa Diyos dili usa ka ilhanan sa pagkadili-matinagdanon. Hinunoa, ang iyang pagpugong ug pailob maoy ebidensiya sa iyang pagkagamhanan sa tanan ug pagkanasayod sa tanan. Nasayod siya sa labing maayong panahon sa pagtapos niining daotang sistema sa mga butang, ug sa eksakto hustong panahon, kana iyang buhaton.

Ang kahimtang ikatandi ngadto sa iya sa usa ka mabdos nga inahan. Samtang siya mabalak-on sa pagkahimugso sa iyang anak, siya nasayod nga dili kinahanglang ikaw sobra ka mabalak-on. Nakasabot siya nga kinahanglan ang usa ka tinong panahon aron ang bata diha sa iyang tagoangkan bug-os makatubo. Sa walay duhaduha, may diyutayng kabalaka ug kagil-as sa pagbati sa pagmabdos, apan ang pagkahimugso sa usa ka himsog, nakatubo-sa-bug-os, husto-sa-edad nga bata mohimo sa tanang pagkabalaka ug pagpaabot nga takos.

Mao, usab, sa mahimayaong bag-ong kalibotan nga may kalinaw nga gibatbat diha sa Bibliya. Moabot dayon kini tapos mosalga ang Gingharian sa Diyos sa kahikayan sa tawo, nga magwagtang sa dili-matarong kalibotan karon. Dayon, ang tanang pagkadaotan mahimong butang sa kagahapon. Ang pag-antos, kasakit, balatian, ug kamatayon​—kining tanan nga butang mawala na. (Pinadayag 21:3, 4) Ang mga nakaingon sa tanang pag-antos hanawon usab. Si Satanas ug iyang mga demonyo, ingon man ang mga tawong nahimong bahin sa iyang sistema sa mga butang, atubangon.​—Malakias 4:1; Pinadayag 20:1-4.

Kadtong sama sa babaye nga gihisgotan sa sinugdanan niining artikuloha dili na kinahanglang mahadlok sa pagpauli sa balay nga mag-inusara. Sumala sa gipahayag niya ug sa iyang bana: “Human lungkaba ang among balay, nagpataod kamig sistema sa alarma. Daghan nang katuigan ang milabay sukad sa pagpangawat, busa kami dili na kaayo mabalaka bahin niana. Apan nasayod kami nga sa umaabot lamang, ubos sa kahikayan sa Gingharian sa Diyos, nga atong matagamtam ang tinuod nga kalinaw ug kasegurohan.”

Hangtod nga ang maong hapit-nang-makitang adlaw mamanagbanag, kinahanglang atong gamitong maalamon ang panahong nabatonan nato karon. Si Pedro nagsugo kanato sa pag-isip sa “pailob sa atong Diyos ingon nga kaluwasan.” (2 Pedro 3:15) Ug kaluwasan sa uban usab, kay samtang atong suginlan ang katawhan mahitungod niining kahibulongang paglaom, atong ‘pagaluwason ang atong kaugalingon ug kadtong magapatalinghog kanato.’ (1 Timoteo 4:16) Karon mao na ang panahon nga kita magpauswag sa mga hiyas nga maghimo kanatong ang matang sa katawhan nga magapuyo nianang bag-ong kalibotan, diin ang pagkadaotan mahimong usa ka butang sa kagahapon. (Salmo 37:9-11) Kinahanglang atong susihon ang Bibliya dili lamang alang sa mga tubag sa atong mga pangutana kondili alang usab sa giya nga atong gikinahanglan sa pagpahiuyon sa atong mga kinabuhi sa kabubut-on sa Diyos.

[Hulagway sa panid 28]

Ilustrasyon ni Doré kang Lusiper alang sa kang Dante nga Divine Comedy