Ang Tinuod nga Katuyoan sa Kinabuhi
HANDURAWA nga nagduaw ka sa buhatan sa imong higala. Mao pay pagkatapos sa iyang proyekto, ug nadani ka niana. Ang butang matahom kaayong pagkagama ug maanindot nga pagkaporma. Bisag naningkamot ka pa, dili ka gayod makatino kon para kana sa unsa. Unsaon nimo sa pagkasayod niini? Aw, mangutana ka lang sa imong higala, ug lagmit malipay siya sa pagsulti kanimo.
Busa sa unsang paagi kita mahibalo sa katuyoan sa kinabuhi? Aw, nganong dili pangutan-on ang Diyos, “ang tuboran sa kinabuhi”? (Salmo 36:9) Sa unsang paagi mahimo nimo kana? Makalilipay, siya nakigsulti kanato pinaagi sa Bibliya. Iyang gisugo ang mga tawong may pagtuo sa pagsulat sa iyang mga hunahuna sa paagi nga atong masabtan. Sa tinuod, ang katuyoan sa kinabuhi mahimong ikapahayag sa pipila lamang ka pulong: Kita ania dinhi aron sa pagkat-on mahitungod sa Diyos ug sa pagtuman sa iyang kabubut-on. Ang Bibliya nag-ingon: “Kini ang kataposan sa butang, ang tanan nadungog na: Kahadloki ang Diyos ug bantayi ang iyang mga sugo. Kay kini mao ang tibuok nga katungdanan sa tawo.”—Ecclesiastes 12:13.
Simple ra ba kaayong pamation kana? Aw, dili. Ang atong pagkaania dinhi aron sa pagkat-on mahitungod sa Diyos ug sa pagtuman sa iyang kabubut-on adunay katingalahan ug lalom nga mga kahulogan.
Ang Orihinal nga Katuyoan sa Diyos
Ang pagtuon sa orihinal nga katuyoan sa Diyos alang sa katawhan motabang nimo nga masabtan pag dugang ang katuyoan sa kinabuhi. Ginapatin-aw usab niini kon nganong ang ubang mga butang nga gihisgotan sa nag-unang artikulo naghatag ug igong kahulogan sa katuyoan sa mga kinabuhi sa daghan karong adlawa.
Ang asoy sa Bibliya bahin sa paglalang sa tawo nag-ingon: “Ug miingon ang Diyos: ‘Buhaton nato ang tawo sumala sa atong dagway, ingon sa kasama nato.’” (Genesis 1:26) Busa, ang mga tawo gihimo nga may potensiyal nga mahisama sa Diyos, nagabaton sa talagsaong mga hiyas nga iyang nabatonan, apil ang kaalam, gahom, pagkamatarong, ug gugma. Nan, ikahibulong ba nga nakita sa uban nga matagbawon ang pagpangitag bag-ong kahibalo o ang pagpakig-ambit sa mga buluhaton nga nagahagit sa ilang mental o pisikal nga mga gahom? Ug wala ba laomi nga ang pagtabang sa uban makahatag matagbawong katuyoan sa mga kinabuhi diha sa kadaghanan? Wala gayod. Kini, sa usa ka bahin, maoy katuyoan nga kita gilalang nga atong pagabuhaton.
Ang rekord sa Bibliya nagpadayon sa pag-ingon nga ang mga tawo gihatagan sa pagdumala sa tanang ubang kinabuhi sa yuta—“sa mga isda sa dagat ug sa mga langgam sa kalangitan . . . ug sa tanang mga mananap nga nagakamang sa yuta.” (Genesis 1:26) Dili ikahibulong, hinunoa, nga bisan karong adlawa daghan ang nakakitag katagbawan sa pagkaadunay mga hayop sa ilang palibot ug sa pagpakigdula kanila. Gibati sa uban ang responsabilidad sa mga hayop sa usa ka sukod nga sila naningkamot aron dili mapuo ang nameligrong mga espisye, o kaha mangampaniya sila batok sa pagladlad sa mga hayop sa wala-kinahanglanang pag-antos.
Ang mga tawo gisugo usab sa ‘paggahom sa yuta.’ (Genesis 1:28) Unsay gipasabot niini? Siyempre kini wala magpasabot nga sa kamahakogon ug sa pagkadi-masaligan pahimuslan sa tawo ang yuta hangtod ang mga bahandi niini mahurot, ang atmospera niini mahugawan, ug ang kadagatan ug kayutaan niini mapuno sa basura. Hinunoa, ang Diyos naghatag ug sumbanan sa pagmando sa yuta sa dihang siya “nagbuhat ug usa ka tanaman sa Eden, sa silangan, ug didto iyang gibutang ang tawo nga iyang giumol.” (Genesis 2:8) Kini nga tanaman sa Eden mao ang modelo sa pagpakita sa kon unsay modangat sa yuta. Kini nagapabanaag sa katuyoan sa Diyos alang sa atong planeta.
Ang asoy sa Bibliya nagpatin-aw: “Dugang pa, gipanalanginan sa Diyos [ang unang lalaki ug babaye] ug ang Diyos miingon kanila: ‘Sumanay ug dumaghan kamo ug pun-on ninyo ang yuta ug magagahom kamo niini.’” (Genesis 1:28) Buot sa Diyos nga ang mga tawo manganak ug pun-on ang yuta ug mga tawo. Iyang gidala kining unang lalaki ug babaye ug, sa ingon, gihimo ang unang kasal. (Genesis 2:22-24) Dili ikahibulong nga ang kaminyoon ug pamilya nakahatag ug dugang kahulogan ug katuyoan sa mga kinabuhi sa daghan kaayo!
Kon Unsa Untay Kahimtang sa Kinabuhi
Samtang tun-an nato ang Bibliya, madayag nga maoy katuyoan sa Diyos nga modaghan ang pamilya ni Adan ug isangkad niya ug sa iyang mga anak ang mga utlanan sa tanaman hangtod mapuno sa mga tawo ang tibuok yuta. Ug ang gigamhan nga yuta mahimong usa ka paraiso. Matuod, gamiton sa tawo ang mga bahandi sa yuta alang sa iyang kaugalingong kaayohan. Apan kini buhaton sa responsableng paagi. Ang tawo gisugo nga maoy piniyalan sa yuta, dili tigdaot niana. Ang kalaglagan sa yuta nga atong nakita karong adlawa maoy supak sa kabubut-on sa Diyos, ug kadtong nagapakigbahin niana nagsupak sa katuyoan sa kinabuhi.—Pinadayag 11:18.
Makakat-on kitag laing butang gikan sa unang rekord sa Bibliya, ug kana mao nga dili katuyoan sa Diyos nga mamatay ang tawo. Ang atong unang mga ginikanan namatay lamang tungod kay ilang gisupak ang Diyos. (Genesis 2:16, 17) Sa dihang sila misupak, sila wala motuman sa katuyoan sa kinabuhi—sila wala na motuman sa kabubut-on sa Diyos. Busa dili lamang nga sila namatay kondili ang tanan nilang mga anak nailalom usab sa kamatayon tungod sa napanunod nga pagkadili-hingpit gikan kanila. (Roma 5:12) Ang mga tawo, hinunoa, sa sinugdan gilalang aron mabuhi nga walay kataposan, dili aron mamatay. Tingali kini mao ang hinungdan kon nganong nakita sa kadaghanan nga makapaluya ang pagpalandong nga maputol ang ilang tibuok kinabuhi nga trabaho tungod sa kamatayon.
Nagatuman sa Katuyoan sa Diyos
Ang orihinal nga katuyoan sa Diyos alang sa katawhan ug niining yutaa wala mausab. Katuyoan gihapon niya nga adunay usa ka paraiso sa yuta nga puy-an sa usa ka hingpit tawhanong rasa. Apan, siya kinahanglang maghimog mga kahikayan sa pagbuntog sa makasubong mga epekto sa kapakyasan sa atong unang mga ginikanan. Ang pagtuman sa kabubut-on sa Diyos karon nalangkit sa paglihok nga nahiuyon sa tanan sa mga kahikayan sa Diyos. Makalilipay, ang Bibliya naghatag katin-awan bahin sa mauswagong katumanan sa iyang katuyoan.
Atong mabasa diha sa unang libro sa Bibliya nga ang Diyos naghisgot mahitungod sa usa ka “binhi” nga moabot sa pagwala sa tanang kadaot nga resulta sa kapakyasan ni Adan ug Eva sa pagtuman sa Iyang kabubut-on. (Genesis 3:15) Diha sa Kristohanon Gregong Kasulatan (“Bag-ong Tugon”), kita makabasa bahin sa pagtungha ni Jesu-Kristo ingon nga mao ang “binhi,” bahin sa iyang walay-sala nga kinabuhi, bahin sa iyang kamatayon sa mga kamot sa iyang mga kaaway. Ang kamatayon ni Jesus maoy, sa aktuwal, usa ka halad alang kanato, nga nagabukas sa dalan aron kita makabaton ug kinabuhing dayon nga nawala ni Adan ug Eva. (Hebreohanon 7:26; 9:28) Oo, ang Bibliya nag-ingon: “Ang motuo kaniya dili malaglag kondili makabaton ug kinabuhing walay kataposan.”—Juan 3:16.
Ug aduna pay daghan. Human sa iyang kamatayon, si Jesus gibanhaw ingong dili-mamatay nga espiritu nga linalang ug karon nagamando ingong Hari sa langitnong Gingharian sa Diyos. Sa dili madugay kana nga Gingharian molihok aron pulihan ang presente yutan-ong mga kagamhanan ug usa ka bag-ong kalibotan nga katilingban nga maoy mopuli sa pagdumala sa mga kalihokan sa tawo. Ang tagna sa Bibliya nagsaad: “Kini nga gingharian dili igabilin sa laing katawhan. Kini magadugmok ug magaut-ot sa tanan niining mga gingharian, ug kini molungtad sa walay kataposan.”—Daniel 2:44.
Human niana, kini nga Gingharian maoy modumala sa matahom nga kalihokan sa pagpasig-uli sa Paraiso sa yuta ug sa pagtuboy sa katawhan ngadto sa kahingpitan. Ang Bibliya naghisgot pa gani mahitungod sa pagkabanhaw sa mga patay, aron sila usab makahigayon sa pag-ambit sa katumanan sa dakong katuyoan sa Diyos alang sa katawhan. (Buhat 24:15) Matuman na unya ang matahom nga saad: “Ang mga maaghop magapanunod sa yuta, ug sila makakaplag ug tugob nga kalipay tungod sa kadagaya sa pakigdait. Ang mga matarong magapanunod sa yuta, ug sila magapuyo niana sa walay kataposan.”—Salmo 37:11, 29.
Pagbaton ug Kaayohan Mismo
Aron makabatog kaayohan mismo gikan sa katumanan sa dakong katuyoan sa Diyos alang sa yuta, kita kinahanglang masayod una sa Diyos. Si Jesu-Kristo nag-ingon: “Kini nagkahulogang walay kataposang kinabuhi, ang ilang pagkuhag kahibalo kanimo, ang bugtong tinuod nga Diyos, ug ang usa nga imong gipadala, si Jesu-Kristo.” (Juan 17:3) Sa unsang paagi mahimo nato kana? Kita makakat-on ug pipila ka butang mahitungod sa Diyos pinaagi sa pag-obserbar sa kalibotan sa atong palibot, ang kalalangan, apil ang mabitoonong kalangitan. (Salmo 19:1) Ilabina, hinunoa, nga kita makakat-on mahitungod sa Diyos—ug sa iyang Anak, si Jesu-Kristo—pinaagi sa Bibliya. Atong mahibaloan ang iyang ngalan ug ang iyang mga hiyas, ug atong matuki sa detalye kon unsay nahimo sa Diyos alang sa katawhan. Kini nga kahibalo maoy motukmod kanato sa paghigugma kaniya ug mopasuod kaayo kanato ngadto kaniya ug sa iyang Anak.
Ang pagkuhag kahibalo sa Diyos mopahimo kanato sa pagtuman sa iyang kabubut-on. Tingali kita nakaampo sama sa gitudlo ni Jesus: “Paanhia ang imong gingharian. Matuman ang imong kabubut-on, sa langit, ug maingon man usab sa yuta.” (Mateo 6:10) Ang tinuod nga kahulogan sa kinabuhi—ang usa nga mohatag ug tinuod nga katagbawan—mao ang pagkinabuhi nga nahiuyon sa kabubut-on sa Diyos.
Nan, unsay nalangkit sa pagtuman sa kabubut-on sa Diyos? Alang kang Adan ug Eva, kadto nalangkit sa pagdumala sa gingharian sa mga hayop ug sa paggahom sa yuta ug pun-on kana sa hingpit nga mga anak. Kon atong tumanon ang kabubut-on sa Diyos karon, kinahanglang magtuon kita ug motuo sa halad lukat ni Jesus. Ug kinahanglang atong sundon ang panig-ingnan ni Jesus pinaagi sa pagsulti sa uban mahitungod sa ‘maayong balita sa Gingharian sa Diyos.’—Mateo 24:14.
Ang pagtuman sa kabubut-on sa Diyos nag-apil usab sa pag-ugmad sa diyosnong personalidad. Busa kinahanglang mahibalo kita sa mga butang nga gidumtan sa Diyos—sama sa pagpamakak, pangawat, makadaot nga tabi, pagsilaob sa kasuko—ug atong isalikway kana. Atong tun-an usab ang mga hiyas nga gimahal sa Diyos—sama sa gugma, kalipay, pakigdait, kalulot, ug pagkamaayo—ug atong ugmaron kana uban sa tabang sa balaang espiritu sa Diyos. (Galacia 5:19-24) Aron kita makabaton ug kinabuhing walay kataposan, kita kinahanglang mao ang matang sa mga tawo nga maoy gustong ikauban sa Diyos hangtod sa kahangtoran. Tinuod, ang pagtuon mahitungod sa Diyos ug ang pagtuman sa iyang kabubut-on mohatag katuyoan ug kahulogan sa atong mga kinabuhi kay wala nay lain pa niini!
Ang Kalainang Mahatag Niini
Ang mga kinabuhi sa milyon-milyong mga tawo sa tibuok kalibotan nagapamatuod nga ang pagkaplag ug tinuod nga kahulogan sa kinabuhi mohatag gayod ug kalainan. Palandonga ang pananglitan ni Wayne, nga naguol kaayo sa kamatayon sa iyang unang asawa. Ang iyang lokal nga klero wala gayod makahatag kaniyag paglipay, busa nagmaokupado si Wayne sa buluntaryong buluhaton. Siya nag-alagad ingong komander sa American Legion ug aktibo sa politikal nga mga partido. Unya nagminyo siya pag-usab, apan dili-hapsay ang kaminyoon. Siya ug ang iyang asawa walay tumong sa ilang mga kinabuhi.
Usa ka adlaw, hinunoa, gipunit ni Wayne ang Bibliya ug misugod sa pagbasa. Tulo ka bulan nga iyang natapos kana sa pagbasa, ug siya miingon: “Karon ako nahibalo nga dunay katuyoan ang atong pagkaania dinhi ug paglaom sa usa ka kinabuhi human sa kamatayon.” Iyang gisultihan ang iyang asawa: “Pangitaon gayod nato ang mga tawo nga atong ikauban nga nagasunod sa Bibliya.” Sa ulahi nakahibalag sila sa mga Saksi ni Jehova, ug ang ilang mga panaghisgot uban kanila nagpadako sa ilang tinguha sa pagtuman sa kabubut-on sa Diyos. Si Wayne ug ang iyang asawa nagpahinungod sa ilang mga kinabuhi sa Diyos, ug ang ilang pamilya nakabaton ug dako kaayong kaayohan.
Si Susan, usa ka anak sa mga misyonaryo nga Presbyterian, buot mohimog usa ka butang sa iyang kinabuhi nga tinuod gayod nga makatabang sa kalibotan. Ang pakigpulong bahin sa mga kapeligrohan sa nukleyar nga gahom nakapakombinsi kaniya nga kini mao ang labing hinungdanon. Busa miundang siya sa kolehiyo aron igugol ang iyang panahon sa pagpaedukar sa mga tawo bahin sa suliran. Sa 21 anyos pa siya, siya nag-alagad ingong koordinetor sa usa ka dakong batok-nukleyar nga rali. Unya naduaw siya sa mga Saksi ni Jehova ug gipakitaan siya kon unsay gipamulong sa Bibliya ug, sa ulahi, nakakaplag sa tinuod nga katuyoan sa kinabuhi. Sa walay duhaduha nabalaka gihapon sa pagdaot sa katawhan sa yuta, iyang naamgohan nga ang Diyos maoy mosulbad niining mga sulirana pinaagi sa iyang Gingharian. Busa, iyang ginatabangan ang mga tawo sa pagtuo niana.
Gihimong katuyoan sa kinabuhi ni Marielle ang pagpahimulos sa mga butang nga itanyag sa kalibotan. Siya mikuha ug karera. Nakahatag kaayo kaniyag kalipay ang tanang ‘mga butang’ sa Los Angeles, California, U.S.A., apil ang mga parti ug mga droga. Apan sa dihang nagsugod siya sa pagtuon sa Bibliya, sa pagkaila ug sa pag-alagad sa Diyos, iyang nakita nga pagkawalay kahulogan diay niadtong mga butanga. Siya miingon nga mas tugob na ang iyang kinabuhi karon nga kini nahiuyon na sa mga katuyoan sa Diyos.
Ang kadaghanan niadtong kansang mga kinabuhi napatugob tungod sa pagkahibalo sa tinuod nga katuyoan sa kinabuhi nagakadaghan sa ginatos kada adlaw. Ang pagkinabuhi nga nahiuyon sa tinuod nga katuyoan sa kinabuhi pinaagi sa pagtuman sa kabubut-on sa atong mahigugmaon, langitnong Amahan tinuod nga mohatag gayod ug kalainan. Usa kini ka butang nga makabag-o sa imong tibuok kinabuhi alang sa labing maayo. Among gidapit ka sa pagtan-aw niining mga butanga sa imong kaugalingon. Ang imong kinabuhi mahimong magmapuslanon kon imo kanang buhaton.
[Hulagway sa panid 9]
Ang Maghahatag sa kinabuhi adunay katuyoan sa paglalang sa mga tawo
[Hulagway sa panid 10]
Wala mobiya ang Diyos sa iyang katuyoan sa pagbatog usa ka paraiso sa yuta nga puno sa hingpit nga tawhanong rasa