Relihiyosong Kagawasan sa Bulgaria

Unom ka bus gikan sa Bulgaria, nga may kapig 300 ka delegado ngadto sa “Mahigugmaon sa Kagawasan” Distritong Kombensiyon, miabot sa mga tugkaran sa kombensiyon sa gawas sa Tesalonica, Gresya, sa Huwebes sa gabii, Hulyo 11, 1991. Tungod sa sibil nga gubat sa kasikbit nga Yugoslavia ug ang kagubot nga namugna niana diha sa maong dapit, kini nga mga delegado wala makakuha sa ilang mga bisa hangtod sa kataposang gutlo.

Sa hapon sa Miyerkoles ang mga kawani sa embahada sa Sofia, Bulgaria, nagpulaw aron sa pagproseso sa mga bisa. Busa, gihapit sa mga bus ang mga delegado gikan sa nagkalainlaing mga bahin sa Bulgaria nga tukma sa panahong makaabot sila sa kombensiyon sa gabii sa dili pa magsugod ang kombensiyon sa Biyernes, Hulyo 12.

Sa maong panahon, ang mga Saksi ni Jehova gidili sa Bulgaria, busa pagkamakapalipay kadto alang kanila nga may kagawasang tagamtamon ang Kristohanong panag-ubanay diha sa silingang nasod sa Gresya! Ang tigomanan sa kombensiyon, nga matahom nga pagkaadornong entablado (makita diha sa letrato), giandam alang sa mga bisita sa Bulgaria. Pagkadako sa kalipay ug pasalamat sa mga bisita nga nakapahimulos halos sa enterong programa nga gipresentar sa ilang kaugalingong pinulongan! Gawas lang sa drama sa Bibliya. Gisumariyo sa 15-minutos nga pakigpulong ang drama nga gihatag sa pinulongan sa Bulgaria, ug dayon ang mga delegado nag-usa uban sa Gregong mga igsoon aron matan-aw ang pasundayag niini.

Ang pangunang bahin sa Bulgarianong kombensiyon mao ang pakigpulong sa bawtismo sa buntag sa Sabado. Ang kinatas-ang 342 ang mitambong, ug 39 ang nabawtismohan (ang uban kanila makita nga nagbarog sa itaas). Ang mga delegado nalipay usab sa pagluwat, diha sa ilang kaugalingong pinulongan, sa brosyur Mga Espiritu sa mga Patay​—Sila ba Makatabang o Makadaot Kanimo? Tinuod ba Silang Naglungtad? ug ang publikasyong Akong Basahon sa mga Estorya sa Bibliya.

Apan ang labing dakong kalipay sa tanan nagpaabot sa mga delegado wala magdugay human sa ilang pagpauli sa Bulgaria. Sa Hulyo 17, wala pay usa ka semana human sa kombensiyon, ang kalihokan sa mga Saksi ni Jehova gihimong legal sa Bulgaria! Talagsaon, sa misunod nga bulan ang magmamantala sa kongregasyon sa Bulgaria miaberids ug 21.2 ka oras diha sa ilang ministeryo. Pagkadako sa atong kalipay nga ang relihiyosong kagawasan natagamtam na usab diha sa lain pang nasod sa Silangang Uropa!