Ang Hunahuna sa Bibliya

Mga Pag-ampo—Sinumaysumay o Kinaugalingon?

USA ka jumbo jet naglupad sa gihabogong 12,500 metros. Sa ubos nahimutang ang kamig nga katubigan sa Pasipiko. Sa kalit, usa ka makina namatay. Unya, ang laing tulo nawad-an ug kusog. Ang ayroplano mituarok ug 10 kilometros sulod sa duha ka minutos! Apan sa 2,700 metros ang jet nakabawi ug kusog ug nakaabot nga luwas sa San Francisco. Panghupaw sa usa ka pasahero: “Ako miampo nga mas tim-os kay sa bisan unsang panahon sa akong kinabuhi.”

Sa mga panahon sa kapildihan, katalagman, o labihang kagul-anan, daghang mga tawo, ngani bisan dili-relihiyoso, modangop sa Labing Gamhanan alang sa tabang. Sa kasukwahi, ang relihiyoso sa regular magsublisubli ug pormal nga mga pag-ampo diha sa mga simbahan ug templo o sa balay. Uban sa tabang sa mga rosaryohan, daghan ang mokutib ug mga Amahan Namo ug Ave Maria. Ang uban mogamit ug mga basahon sa pangadye. Minilyon sa mga taga-Oriente mopatulilik ug mga ligid nga may mga pangadyeon sulod nila ingong paagi sa tulin nga pagsumay sa mga pag-ampo.

Nakahunahuna ka na ba, ‘Sa unsang paagi kita moampo? Kinahanglan bang ang mga pag-ampo sinumaysumay o kinaugalingon?’

Kon Sama sa Unsa ang Pag-ampo

Ibutang nato nga ang imong hinigugma kaayo nga amahan, nagpuyo sa laing nasod, nag-aghat nimo sa pagtelepono bisan kanus-a nga gusto nimo​—nga walay bayad. Dili ka ba motawag kanunay? Dili ba nimo ikalipay ang pagmentinar, ngani pagpalig-on, sa inyong bililhong panaghiusa? Dili ba nimo hisgotan ang imong mga kabalaka ug magpahayag sa halalom nga utang-kabubut-on tungod sa tabang ug pagdasig nga iyang gihatag kanimo sa tibuok nimong kinabuhi? Kanang personal nga relasyon mahimong dakong bahandi alang kanimo, dili ba?

Sa imong mga pagtelepono, lagmit imong lakbitan ang pila sa mga butang sa balikbalik, apan dili nimo ipahayag ang imong kaugalingon pinaagi sa pagbasa gikan sa usa ka basahon o sa pormal magsumaysumay sa imong kaugalingon, dili ba? Nan, ang Kristohanong pag-ampo dili usab ingon niana. Sa pagkamatuod, si Kristo Jesus nag-ingon nga ang mga pag-ampo dili mahimong ingon niana.

Unsay Gisulti ni Kristo Jesus?

“Sa dihang mag-ampo, ayaw pagsulti sa mao rang mga butang sa balikbalik, sama sa gihimo sa katawhan sa mga nasod, kay sila naghunahuna nga sila dunggon tungod sa ilang paglitok ug daghang mga pulong.”a (Mateo 6:7) Ang ubang mga bersiyon nagpahayag niining paagiha: “Sa inyong mga pag-ampo, ayaw pagyamyam sama sa mga pagano.” (The New English Bible) “Sa pag-ampo ayawg daghana ang walay unod nga mga pamulong sama sa ginabuhat sa mga Gentil.”​—Revised Standard Version.

Saypon sa pila ka tawo ang pagkadaghan ug pulong nga pagkarelihiyoso, pagkalarino nga debosyon, pagsumay ug gitas-on nga garantisadong tubag. Ugaling, ang Diyos wala magsukod sa katim-os sa pag-ampo pinaagig yarda o metro. Tataw, dili buot ni Jesus nga ang iyang mga sumusunod mogamit ug estriktong mga pormula o sa pagsag-ulo sa mga pag-ampo. Busa, sa unsang dumalayong bili ang mga rosaryohan, mga basahon sa pangadyeon, o ligid sa pangadyeon?

Pagkatapos isulti ang sa ibabaw, si Jesus nagpadayon sa paghatag sa iyang mga disipulo ug modelong pag-ampo​—ang ilado-kaayong Pag-ampo sa Ginoo o Amahan Namo. (Mateo 6:9-13) Apan iya bang katuyoan alang kanila sa pagsumay niadto mismong mga pulonga? Dili. Sa pagkamatuod, sa dihang iyang gipahayag kana pag-usab kapig usa ka tuig sa ulahi, bisan si Jesus wala ngani mogamit sa eksaktong mga pulong. (Lucas 11:2-4) Naa bay rekord sa sayong mga Kristohanon nga nagbuhat niadto o sa ilang pagsumay sa laing pormal nga mga pag-ampo? Sa makausa pa, wala.

Kini ba nagpasabot nga dili kita makahisgot sa samang punto o sa paghangyo sa makadaghan? Wala baya, kay si Jesus usab nag-ingon: “Padayon sa pagpangayo, ug kana igahatag kaninyo; padayon sa pagpangita, ug inyong makaplagan.” (Mateo 7:7) Sa subsob kinahanglanon alang kanato sa paghimog samang hangyo sa makadaghan. Si Jehova sa ingon makakita kon unsa kita ka sinsero sa atong mga hangyo ug unsa kalalom sa atong pagbati mahitungod sa butang.

Pananglitan, niadtong ikalimang siglo W.K.P., nagkinabuhi ingong sakop sa gipalalin Hudiyonhong kapunongan didto sa Babilonya maoy usa ka debotadong lalaki nga ginganlag Nehemias. Siya ang harianong tigtagay sa Persianhong hari. Sa dihang siya giingnan nga ang iyang kadugo, ang mga molupyo sa Judea, nagkalisod, siya miampo “adlaw ug gabii” alang sa ilang kahupayan. (Nehemias 1:6) Ang iyang mga pag-ampo gidungog nga may pag-uyon. Gitukmod ni Jehova ang mabinationg Persianhong magmamando sa paghatag kang Nehemias ug katungod sa pagpanaw pa-Jerusalem sa pagtul-id sa mga butang. Kini iyang gihimo, sa kalipay sa iyang katawhan ug sa pagpreserbar sa ilang pagtuo.​—Nehemias 1:3–2:8.

Kon sa Unsang Paagi Makatabang ang Kinasingkasing nga Pag-ampo

Bisan tuod siya ang Supremong Gahom sa uniberso, si Jehova nagaagda sa iyang “mga anak” sa pagduol kaniya sa bug-os kasingkasing. “Dumuol kamo sa Diyos, ug siya moduol kaninyo,” matud sa disipulo ni Jesus nga si Santiago. (Santiago 4:8) Apan sa unsang paagi? Sa ato pa, kinahanglang moampo kita diha sa ngalan ni Jesus. (Juan 14:6, 14) Dugang pa, sama sa gipahayag ni Pablo: “Kon walay pagtuo dili gayod mahimo ang pagpahimuot kaniya, kay siya nga magaduol sa Diyos kinahanglan magatuo sa iyang pagkaanaa ug nga siya magabalos ra sa mga nagapangita kaniya.”​—Hebreohanon 11:6.

Silang may mga suliran, ngani bisan silang nakahimog seryosong kalapasan, makahangyo ug makadawat ug tabang ug kapasayloan. Giilustrar kini ni Jesus pinaagi sa iyang estorya mahitungod sa usa ka relihiyosong pangulo kinsa, sa dihang nag-ampo, nagpasalamat sa Diyos nga siya mas balaan kay sa uban; apan ang usa ka tigkolektag buhis (gikayugtan ug giisip ingong usa ka seryosong makasasala niadtong mga adlawa) sa yano nag-ingon: “Oh Diyos, maluoy ka kanako nga usa ka makasasala.” Tino, kanang yano, kinasingkasing nga pag-ampo wala maggikan sa usa ka basahon. Ug si Jesus nagsaway sa relihiyosong salingkapaw apan nakasulti mahitungod sa lain: “Siya nga nagpaubos sa iyang kaugalingon igapahitaas.”​—Lucas 18:10-14.

Ang maot nga mga lakat sa kalibotan nakapabalaka ug nakapaantos sa daghan sa depresyon. Ang mga Kristohanon ngani basin mabalaka mahitungod sa ilang pagbarog sa atubangan sa Diyos. Apan ang regular, kanunay, natural nga pagdangop kang Jehova alang sa tabang makadalag kaayohan nga molabaw pa sa bisan unsang madahom. Si Pablo nagsulat: “Ayaw kamo pagkabalaka mahitungod sa bisan unsang butang, hinunoa sa tanang butang ipahibalo ninyo sa Diyos ang inyong mga hangyo pinaagi sa pag-ampo; ug ang kalinaw sa Diyos nga lapaw sa tanang pagpanabot magabantay sa inyong mga kasingkasing ug sa mga galamhan sa inyong panghunahuna pinaagi ni Kristo Jesus.”​—Filipos 4:6, 7.

Ang pangaliyupo nagkahulogan ug tim-os nga paghangyo, pagpakiluoy sa Diyos alang sa tabang, paghaw-as kaniya sa atong mga pagbati sama sa pagahimoon sa usa ka bata ngadto sa mahigugmaon kaayo ug masinabtanong ginikanan. Ang maong mga pag-ampo wala magagikan sa mga basahon, ni sila gisumay sama sa periko. Sila nagatubod gikan sa mga kasingkasing nga nanginahanglag tabang ug may tinuod nga pagtuo kang Jehova, ang “Nagapatalinghog sa pag-ampo.”​—Salmo 65:2.

[Footnote]

[Picture Credit Line sa panid 20]

Mga dibuho ni Albrecht Dürer/Dover Publications, Inc.