Akong Paninguha sa Pagkabituon Ingong Bailerina

MAO pay pagtungtong nakog 12 anyos sa diha nga ako gipailaila sa katilingban ingong bailerina sa akong lungsod sa Roma, Italya. Kadto maoy niadto pang 1945, sa pagkatapos gayod sa ikaduhang gubat sa kalibotan.

Hunahunaa lang kon sama sa unsa kadto alang sa usa ka bata si kinsa nakakita ug nakabatyag sa mga epekto niadtong makalilisang nga pagpinatyanay sa pagtindog sa sayawanan ug pagbuhat sa butang nga gusto kaayo niyang buhaton​—pagsayaw! Ako mibatig kakulbahinam!

Gikan sa pagsayaw nga kauban sa grupo, ako ngadtongadto nahimong solong bailerina. Nag-espesyalisar ako sa Afro-Cubano, Oriental, ug Hawaiianong mga estilo, apan gisayaw ko usab ang lainlaing mga rumba, cha-cha, tango, boogie-woogie, ug ubang sayaw nga nauso niadto.

Ang sayaw nagbukas ug mga kahigayonan sa makalingaw bag-ong mga kalibotan alang kanako. Pananglitan, sa katuigang 1950 ako nakasalmot sa iladong mga pelikula, lakip ang War and Peace ug Quo Vadis. Kulbahinam ang pagtrabaho kauban sa mga tawong ilado sama kang Elizabeth Taylor, May Britt, Eleanora Rossi Drago, Robert Taylor, Valentina Cortese, ug Gabriele Ferzetti.

Pagkab-ot sa “Kalamposan”

Sa akong paninguha sa kalamposan, ako mobiyahe gikan sa usa ka tumoy sa kalibotan ngadto sa lain, nga miduaw sa Aden, Yemen; Cape Town, South Africa; London, Inglaterra; Bangkok, Thailand; Tehran, Iran; ug sa lainlaing mga siyudad sa Australia. Sa kataposan ang kalamposan miabot. Samtang 19 anyos pa ako, nagpahimulos ako sa giingong matahom nga kalibotan.

Ang hago nga pagbansay ug mapintas nga tratasyon nga akong giagian sa pagmentenar ug maayong panglawas ug padayong paghupot ug lawasnong kamadanihon lisod kaayo. Ugaling, sa naghunahuna ako sa kalamposan nga ako nang nakab-ot ug sa akong tumong nga labi pang mabantog, gidawat ko dayon ang maong mga kapig-otan.

Sa hut-ong sa katilingban nga akong gianiban, mga tawong dato ug tinahod nakigbuylog sa mga kawatan, sa mga tigbaligyag ilegal nga mga droga, ug sa mafiosi. Kadto tuman ka imoral nga kalibotan, usa ka kalibotan nga natuphan sa mga droga, alkohol, imoralidad, ug kapintasan. Apan kana wala ko kaayo tagda niadto. Ang akong kinabuhi nasentro sa pagsayaw ug sa luhong pagkinabuhi sa mga kotseng mahal, alahas, sinina, ug bantogang mga hotel.

Bisan pag mikita ako ug daghang kuwarta, kadaghanan niana misangko sa mga bulsa sa akong mga manedyer. Aron mapadayon ang sukdanan sa pagkinabuhi nga akong naandan, ako nakakaplag ug trabaho sa maadlaw ingong cashier. Ug ikasubong isulti, ako mius-os ngadto sa paglapas sa akong mga prinsipyo ug nagbuhat sa imoral nga kalihokan.

Akong Pagpauli sa Balay

Niadtong 1965, human makapahimulos ug dakong kalamposan sa propesyon sa laing nasod, mihukom ako sa pagpauli sa Italya aron ideboto ang akong kaugalingon sa pagkahimong tinuod talagsaon nga bailerina sa among panahon. Ako naghunahuna nga ang akong kasinatian ug dungog sa laing nasod magbukas ug kahigayonan alang kanako diha sa kaugalingon kong nasod. Hinunoa, nasinati ko ang kahapdos sa kapakyasan. Ang dalan padulong sa kalamposan daw sa kalit giabongan.

Sa ulahi, ako misugod sa pagsayaw diha sa daotag moral nga mga naytklab ug mga diskohan. Gibati ko nga nag-inusara, nga nalit-agan sa daotang palibot ug napugos sa pagpadaog sa tanang matang sa mga pagbahad ug kapintasan. Ako sa kaduha nagpataktak ug hapit mamatay. Pagkadako nga bayad sa akong binuang nga paninguha sa kalamposan! Sa dihang nahidangat ako sa kinaubsang kahimtang, may nakaplagan ako nga naghimo sa akong kinabuhi nga tinuod malamposon.

Usa ka Halandumong Adlaw sa Akong Kinabuhi

Usa ka hapon kadto sa ting-init sa 1980, ug ako nagpaingon sa swimming pool duol sa akong apartment sa probinsiya sa Alessandria. Didto nahibalag ko ang usa ka higala, kinsa mihimog katingad-anang hangyo. “Mahimo ba nga ubanan mo ako sa pagtuon sa Bibliya nga akong ginahimo uban sa usa sa mga Saksi ni Jehova?” siya mihangyo.

“Jehova? Ug kinsa ba si Jehova?” ako buot mahibalo.

“Ang Jehova maoy ngalan sa Diyos,” mitubag siya.

Ang bibo nga kabildohay misangpot nga nagpahikalimot nako sa bug-os sa paglangoy. Gihatod ko ang akong higala sa sakyanan aron sa pagduaw sa Saksi nga babaye, ug mihangyo ako kon mahimo bang moapil sa pagtuon sa Bibliya. Ako naghunahuna nga makakaplag ug misteryosong palibot, nga tingali may usa ka guru o tawong balaan nga maghimog katingad-an ug kahadlokang mga rituwal ubos sa gipadulom nga suga. Hinunoa, nakakaplag ako sa akong kaugalingon nga didto sa kasagarang balay atubangan sa usa ka babayeng ordinaryo nga matinahoron kaayong nagpadayon kanamo. Ang pagtuon maoy sa ikatulong kapitulo sa librong Ang Kamatuoran nga Motultol sa Kinabuhing Dayon, nga nag-ulohang “Kinsa ang Diyos?”

Ang pagkasayod nga ang Diyos adunay personal nga ngalan ug ang ngalan sa Diyos maoy “Jehova” maoy talagsaong pagpadayag alang kanako. (Salmo 83:18) Naghunahuna ako sa kaugalingon, ‘Kon ang mga simbahan nagtago bisan sa ngalan sa Diyos, kinsay nasayod kon unsa pay ubang mga kamatuoran ang tingali ilang gitagoan!’ Nangutana ako sa Saksi kon pilay bayad sa iyang mga leksiyon ug natingala kaayo sa pagkahibalo nga kana libre. Sa kalibotan nga akong gikinabuhian, walay usa nga nagbuhat ug bisan unsa nga walay bayad. Nadasig ako sa pagsugod sa pagtuon ug Bibliya.

Paghimog mga Kausaban

Diyutay kaayo ang akong libreng panahon tungod sa eskedyul sa akong trabaho​—ako nagtuman pa ug mga kasabotan sa pagsayaw sa lainlaing mga siyudad. Bisan pa, ako maikagon nga ang maong babaye moabot ug moduaw nako aron nga ako sa dugang makakat-on mahitungod sa matuod nga Diyos, si Jehova. Gawas sa pagkahibalo nga ang Diyos adunay ngalan, akong nadiskobrehan nga si Jesus ug ang Diyos dili mao ra nga persona. Sila dili bahin sa usa ka Trinidad. Akong nadiskobrehan usab nga sayop kaayo ako sa pagtuo nga ang Diyos patay! Sa kapulihay, ako karon nagsugod na sa pagkasinati sa usa ka tinuod nga Persona, usa ka Diyos nga buhi ug nagapalampos sa mga butang!

Sa kataposan nakaplagan ko ang hugot nga tinguha nga mabuhi! Pagkadako sa akong pasalamat kang Jehova! Misugod ako sa pagtambong sa tanang tigom sa mga Saksi ni Jehova. Didto naangkon nako ang labaw nga pagsabot sa kahibulongang mga hiyas niining mahigugmaon ug maluluy-on nga Diyos. Kadto sa tuman nakapalipay kanako, sa pagpalandong sa akong matang sa pagkinabuhi. Sa pagkakita sa kamalinawon diha sa mga nawong sa mga nanambong sa mga tigom sa Kingdom Hall, naamgohan ko nga akong nakaplagan ang tinuod matahom nga kalibotan, ug ako determinado nga dili gayod kini biyaan.​—Salmo 133:1.

Ugaling lang, nakasugod ako sa pagkaamgo nga kon buot nakong mopuyo nianang kalibotana, kinahanglang himoon ko ang dagkong mga kausaban sa akong kinabuhi. Human sa pagtambong sa usa ka kombensiyon sa mga Saksi ni Jehova ug sa pagkadungog sa mga prinsipyo sa Bibliya nga gisaysay sa tin-aw, sa hugot mihukom ako sa pagbag-o sa akong kinabuhi. Gihunong nako ang pagsayaw, nga hangtod niadto mao ang dako kong kalipay sa kinabuhi. Gibiyaan ko ang lalaki nga akong gipuyopuyo ug unom ka tuig ug sa bug-os giputol ang tanang kalangkitan sa akong kinabuhi sa miagi ug sa daotan nga palibot sa kalibotan sa kalingawan. Gidispatsar ko usab ang mga adres ug mga handumanan sa mga manedyer ug sa mga higala konohay.

Usa ka Bag-ong Kinabuhi

Sa maong punto, wala akoy trabaho ug walay puy-anan, apan nagtuon ako sa pagbutang sa bug-os nakong pagsalig kang Jehova. Sanglit gikinahanglan ko ang salapi, gibaligya ko ang mahalon kong mga butang​—kotse, mga kupo nga balhibo, alahas—​mga butang nga abi kog mao ang tinuod nga kalamposan sa kinabuhi. Alang sa sekular nga trabaho, misugod ako sa pagbagnos sa hagdanan sa mga apartment ug sa pagpanghinlo alang sa mga pamilya. Nadiskobrehan ko nga ang tinuod nga kalamposan sa kinabuhi ginasukod, dili sa mga kabtangan o sa posisyon, kondili pinaagi lamang sa kon kaha nabatonan sa usa ang panalangin ni Jehova.

Niadtong Abril 23, 1983, ako nabawtismohan ingong usa sa mga Saksi ni Jehova. Walay mga letratista ang mialirong kanako niadtong adlawa, mga kaubanang Saksi lamang nga nahinangop sa pag-abiabi ug usa ka bag-ong magdadayeg kang Jehova diha sa ilang taliwala. Wala madugay tapos niadto milarga ako paingon sa Australia aron tabangan ang igsoon kong lalaki sa pagkakat-on sa katingalahang mga butang nga akong nakat-onan. Bisan pag siya ug iyang mga anak wala makaambit sa akong kasibot alang sa kamatuoran sa Bibliya, ang akong pag-estar sa Australia misangpot nga mabungahon kaayo.

Sa wala madugay nakasulod ako sa bug-os-panahong ministeryo ingong payunir ug nakakaplag ug daghang Italyano nga nagpuyo sa Australia nga nagpakitag interes sa Bibliya. Sa nahaigong panahon, ako nagdumalag daghan nga mauswagong mga pagtuon sa Bibliya. Dayon, niadtong 1985, ako mibalik sa Italya. Sa sinugdan ako naglisod sa pagpahiluna, apan karon ako may gamayng apartment ug nagkinabuhi sa pensiyon, nga nagatugot kanako sa pag-alagad nga bug-os-panahong ministro ug pagtambong sa tanang tigom sa kongregasyon.

Sa daghang katuigan gitinguha nako labaw sa tanan ang kalamposan diha sa pagsayaw. Abi kog ang maong himaya ug kabantog mao ang labing bililhon. Misulay ako sa pagsundog sa kalibotanong mga idolo. Pagkalahi kaayo sa kahimtang karon! Hinuon, ang pagsayaw maoy butang kahibulongan, apan karon ako nakadiskobre nga ang tinuod nga kalamposan sa kinabuhi nagagikan sa pagtabang sa uban nga makakat-on sa kahibulongang mga saad ni Jehova nga Diyos, dili ang pagkinabuhi alang sa kaugalingong himaya.

Sa kamasaligon ako nagapaabot sa pagkatuman sa kahibulongang saad: “Paglaom kang Jehova ug sunda ang iyang dalan, ug ikaw pagabayawon niya aron sa pagpanag-iya sa yuta. Sa dihang ang mga daotan pagaputlon, ikaw makakita niana.” (Salmo 37:34; 2 Pedro 3:13)​—Sumala sa giasoy ni Edvige Sordelli.

[Blurb sa panid 13]

Ako nakasalmot sa iladong mga pelikula, lakip ang War and Peace ug Quo Vadis