Angay Bang Mogamit ug Relihiyosong mga Titulo ang mga Kristohanon?

NAHISGOTAN nag makadaghan ang mahitungod sa kakulang sa klerigo diha sa Kakristiyanohan karong adlawa, apan walay kakulang sa relihiyosong mga titulo taliwala kanila. Ang pila ka mga titulo maoy yano; ang uban maoy mapagarbohon. Ania ang pipila ka mga pananglitan:

• Klerigo: “Reverendo.”

• Anglikanong Obispo: “Labaw nga Reverendo Ginoong Obispo.”

• Romano Katoliko nga obispo (sa Italya): “Iyang Kamahalan, ang Labing Dungganan ug Labing Talahurong Monsinyor.”

• Kardinal: “Iyang Kamahalan.”

• Ang papa: “Labing Balaang Amahan.”

Ang mga titulong “reverendo” ug “obispo” gigamit na sulod sa hataas nga panahon nga sila dili hilas sa pandungog sa kadaghanan sa mga sakop sa simbahan. Apan ang mao bang mga titulo giawtorisahan sa Bibliya?

“Reverendo,” “Obispo,” ug “Kardinal”

Diha sa King James Version, ang terminong “reverendo” o “talahuron” makita lamang ug makausa, sa Salmo 111:9, nga nagaingon: “Balaan ug talahuron ang iyang ngalan.” Kansang ngalan? Ang sunod nga bersikulo nagaingon: “Ang kahadlok sa GINOO mao ang sinugdanan sa kaalam.” (Salmo 111:10) Sa usa ka Katolikong bersiyon, kining duha ka mga teksto mabasa: “Balaan ug makapahibulong ang iyang ngalan. Ang gamot sa kaalam mao ang kahadlok kang Yahweh [Jehova].” (The New Jerusalem Bible) Busa, sumala sa Pulong sa Diyos, ang diyosnong kahadlok, o pagtahod, igahatag lamang kang Jehova, ang Labing Gamhanan. Nan husto ba nga ihatag kana sa tawo?

“Kon ang usa ka tawo nagtinguha sa katungdanan sa pagkaobispo, siya nagtinguha ug hamiling buluhaton,” sulat ni Pablo kang Timoteo. (1 Timoteo 3:1, KJ) Hinuon, sumala sa The New Jerusalem Bible, ang bersikulo mabasa: “Ang pagtinguha nga mahimong usa ka nagadumalang ansiano maoy pagtinguha sa halangdong buluhaton.” Ang sayong mga Kristohanon nga may responsableng mga katungdanan gitawag nga “mga ansiano” ug “mga magtatan-aw.” Kadto bang mga terminoha gigamit ingong mga titulo? Wala. Ang maong mga lalaki wala gayod tawga nga “Obispo Pedro” o “Ansiano Santiago.” Mao nay katarongan nganong ang hamtong Kristohanong mga lalaki taliwala sa mga Saksi ni Jehova nga nag-alagad sa kongregasyon ingong mga ansiano wala gayod mogamit sa terminong “ansiano” ingong usa ka titulo. Ang terminong “ansiano” ug “magtatan-aw” (obispo) mapadapat kanilang nagkupot ug katungdanan sa awtoridad ug kaakohan. Ang mga termino usab naghubit sa mga kalipikasyon sa mga lalaki nga gitudlo ug sa buluhaton nga ilang gihimo.

Unsa na man ang titulong “kardinal”? Kana ba makita diha sa Bibliya? Dili. Kana wala sa bisan haing bersiyon. Sa pagkatinuod, ang Romano Katoliko nga Simbahan miadmitar nga kining tituloha dili Biblikanhon. Ang New Catholic Encyclopedia nagsaysay: “Ang pulong gikuha gikan sa Latin nga pulong cardo nga nagkahulogan ‘bisagra,’ ug sa mga pulong ni Papa Eugene IV, ‘maingon nga ang pultahan sa usa ka balay maliso diha sa iyang mga bisagra, mao usab nga diha sa pundok sa mga kardinal ang Apostolikong Sede, ang pultahan sa tibuok Simbahan, nahasandig ug nasangga.’” Kining libroha sa reperensiya nagpahibalo usab kanato nga “ang mga kardinal nagpahimulos sa pribilehiyo nga direktang tawgon ug ‘Kamahalan.’” Ang ilang kahimtang motugot usab kanila sa pagsul-ob ug pula nga sotana ug pula nga kalo. Ang mga apostoles ba nakabaton sa maong mga pribilehiyo? Ang tubag sa Bibliya wala.

“Ginoo,” “Monsinyor,” ug “Amahan”

Ang mga sakop ba sa klerigo pagatawgon nga mga ginoo? Ang Anglikanong mga obispo gitawag ug “ginoo.” Ang mga preladong Katoliko sa subsob gitawag “monsinyor,” nga nagkahulogan “akong Ginoo.” Sa pila ka mga nasod, ang mga ministro sa Dutch Reformed Church gitawag ug dominee, usa ka titulo gikan sa Latin nga pulong dominus, nga nagkahulogan “ginoo.” Apan si Jesus nagsugo sa iyang mga sumusunod: “Kamo nasayod nga sa kalibotan, ang mga punoan nagpakahari ibabaw sa ilang mga sakop, . . . apan dili kana mahitabo kaninyo.” (Mateo 20:25, 26, The New English Bible) Usab, si apostol Pedro nagsulat: “Ayaw kamo paghinarihari sa pagdumala kanila nga gipiyal kaninyo, kondili mahimong mga panig-ingnan alang sa panon.” (1 Pedro 5:3, NJB) Sa okasyon dihang si Jesus sa kamapaubsanon naghugas sa mga tiil sa iyang mga tinun-an, siya nag-ingon kanila: “Kamo nagtawag kanako Agalon ug Ginoo, ug sa husto; kay ako ingon man.” (Juan 13:13, NJB) Husto ba alang sa mga tawo sa paggamit sa relihiyosong titulo nga gipanag-iya sa Diyos ug sa iyang Anak?

Ang relihiyosong titulo ba nga “amahan” husto? Kana masabog nga gigamit sa mga Romano Katoliko ug sa mga Anglikano. Ang “Padre,” ipasabot “amahan,” masabog usab nga gigamit. Apan si Jesus nagtudlo sa iyang mga tinun-an: “Ayaw ninyo tawga si bisan kinsang tawo dinhi sa yuta nga inyong amahan, sanglit kamo adunay usa lamang ka Amahan, ug siya anaa sa langit.” (Mateo 23:9, NJB) Ang The New English Bible susamang mabasa: Ayaw ninyo pagtawga si bisan kinsa nga tawo sa yuta nga ‘amahan.’” Nganong wala man sugta sa mga klerigo ug sa ilang mga sumusunod kining sugoa gikan sa Ginoong Jesu-Kristo?

Ang papa sa Roma sa kasagaran gitawag ingong “Santo Papa.” Apan ang iyang Italyanhong mga kawani sa subsob nagtawag kaniya ingong Santissimo Padre, nga nagkahulogan “Labing Balaang Amahan.” Ang “Balaang Amahan” usa ka titulo nga makita lamang ug makausa diha sa Bibliya. (Juan 17:11) Kana maoy eksklusibong titulo sa Supremong Usa. Husto ba alang sa mga linalang, nga yutan-on ug dili hingpit, nga pagatawgon nianang tituloha?

Relihiyosong Paglapas

Palihog basaha ug matikdi ang konteksto sa Mateo 23:1-12. Si Jesus nagsugod pagsulti mahitungod sa mga Pariseo, nga usa ka iladong sekta sa Judaismo. Sila mga palasubay sa balaod, mga kutihan sa pagbantay sa matag detalye sa Moisesnong Balaod. Gusto nilang mosapot ug molihok diha sa paagi nga makatawag pagtagad ngadto sa ilang kaugalingon. Ang ilang relihiyon maoy usa nga pagpagawal—ilang estilo sa pamiste, ilang pangunang mga dapit sa pagpangaon, ilang mga lingkoranan sa atubangan sa sinagoga, ug ilang mga titulo sa pasidungog. Ngani sila nangayog labaw nga pagtahod kaysa nianang ikahatag sa mga ginikanan. Gusto nilang tawgon nga amahan. Ugaling, gipakita ni Jesus nga ang tanan niyang mga sumusunod walay labaw ingong mga anak sa Diyos. Ang bisan unsang titulo nga nagasugyot sa kaatbang maoy mapangandakong pag-ilog sa usa ka butang nga gipanag-iyahan sa Diyos. Mao nga, si Jesus nagdumili sa paggamit sa pulong “amahan” ingong usa ka titulo sa pasidungog diha sa relihiyosong diwa. Si Jesus miinsister nga ang iyang mga sumusunod may usa lamang ka Amahan sa pagtuo, si Jehova.

Dili ba tin-aw nga daghan sa mga klerigo nanagbarog ibabaw sa ‘balaang dapit’ nga natagana alang sa Diyos ug sa iyang Anak, ug ang hilabihang pagtahod napatipas gikan kanila ngadto sa dili hingpit nga mga tawo? Ang tinuod nga mga Kristohanon karong adlawa naglikay sa paggamit sa magarbohong relihiyosong mga titulo, ug sila naglikay sa batasan sa pagpasidungog sa mga klerigo. Taliwala sa mga Saksi ni Jehova ang matang lamang sa pagtawag alang sa mga ministro maoy “igsoon.” (2 Pedro 3:15) Kana maoy uyon sa gisulti ni Jesus: “Kamong tanan mga managsoon.”—Mateo 23:8, NJB.