Mga Batan-on Nangutana . . .
Ginatubag ba sa Diyos ang Akong mga Pag-ampo?
“GUSTO kong masayod kon tubagon ba ni Jehova ang akong mga pag-ampo,” miingon ang 11-anyos nga si Sandra, “tungod kay ako wala makaseguro kon siya motubag ba. Daghang ubang mga batan-on ang akong nailhan nga may samang suliran.” Ang kinse-anyos nga si Alyssa may samag suliran niadto bahin sa pag-ampo. “Gibati ko kanunay nga nakigsulti lang ako sa akong kaugalingon,” siya miadmiter.
Sumala sa 1988 nga surbi sa Gallup, 87 porsiento sa mga tin-edyer sa Tinipong Bansa nakaampo sa usa ka panahon o sa lain, apan wala moabot ug katunga ang regular nga naghimo niini. Dayag nga gibati sa uban nga ang ilang mga pag-ampo wala tubaga. Usahay, tingali mobati ka usab ug ingon niana nga walay namati sa imong mga pag-ampo. Ang Bibliya nagpasalig kanato, hinunoa, nga sa dihang motanyag ang usa ug tim-os nga pag-ampo diha sa pagtuo, ang “Tigpatalinghog sa pag-ampo” namati! (Salmo 65:2) Apan unsaon nimo sa pagkasayod nga siya dili usa ka walay-lihok nga tigpatalinghog lamang—matinahurong namati apan gamay o walay gihimo sa pagtubag?
Human gitawag ang Diyos nga Tigpatalinghog sa pag-ampo, ang salmista miingon: “Uban sa mga butang nga makalilisang ikaw magatubag kanamo sa pagkamatarong, Oh Diyos sa among kaluwasan.” (Salmo 65:5; itandi ang Salmo 66:19, 20) Nan, nganong mibati ang uban nga ang ilang mga pag-ampo wala tubaga?
Mga Babag sa Pag-ampo
Ang katarongan tingali mao ang kakulang sa tinuod nga relasyon uban sa Diyos. Ang ubang mga batan-on nagduhaduha sa iyang paglungtad mismo. Ang uban nagtuo apan nag-isip kaniya ingong halayo, dili-matukib nga persona. Ang pag-ampo nahisama sa pagpislit sa buton sa elebitor nga gamiton lamang sa emerhensiya—usa ka kataposang dalangpan sa panahon sa mga emerhensiya. “Nagtuo ako ug Diyos,” miangkon ang usa ka Katolikong bayong. “Kon ako may problema, kon magkinahanglan ako ug tabang, mangayo gayod kanunay ako sa Iyang tabang.” Laing dalagita prangkang miingon: “Usahay moampo lang ko kon ako may pangayoon.”
Ugaling, ang pag-ampo angay maoy usa ka kapadayagan sa pagtuo, pagtahod, pagmahal, ug pagsalig—dili tungod lamang sa dako nga panginahanglan o sa hakog nga tinguha. Ug dili igo ang pag-ampo tungod kay nagtuo ka nga basig naglungtad ang Diyos. “Siya nga magaduol sa Diyos,” nagkanayon ang Bibliya, “kinahanglang motuo sa iyang pagkaanaa ug nga siya magabalos sa mga magapangita kaniya.” (Hebreohanon 11:6) Dili tubagon ang mga pag-ampo sa mga maduhaduhaon. (Santiago 1:6-8) Si Jehova mamati niadtong nakadangat sa pagkaila ug paghigugma kaniya; sila dili moampo sa panahon lang sa mga emerhensiya. Sumala sa giawhag sa 1 Tesalonica 5:17, sila “nagaampo kanunay,” o sama sa pagkapahayag niana sa An American Translation, sila “dili gayod mohunong sa pag-ampo.”
Ikasubong isulti, ang ubang batan-ong mga Kristohanon nakadangat sa pagkaila kang Jehova apan wala gayod makaugmad ug panaghigalaay uban kaniya. (Salmo 25:14) Ang ilang mga pag-ampo daw diyutay ug dugay nga masundan, mekanikal, ug sa kataposan dili-tubagon. Tinuod kaha kini sa imong mga pag-ampo? Kon mao, “dumuol sa Diyos” pinaagi sa pagkaila kaniya. (Santiago 4:8) Ang dalagitang si Alyssa, nga gihisgotan sa sinugdan, nagduhaduha bahin kang Jehova. Apan ang personal nga pagtuon sa Bibliya anam-anam nagpapas sa iyang mga pagduhaduha ug nagtabang kaniya nga maugmad ang relasyon uban sa Diyos.
Ang tinamdan ug paggawi sa usa mahimong dakong mga babag usab sa pag-ampo. Ang salmista miingon: “Kon sa akong kasingkasing nagapalandong ako sa kadaotan, si Jehova dili mopatalinghog kanako.” (Salmo 66:18; Proverbio 15:29) Makataronganon bang molaom nga tubagon sa Diyos ang imong mga pag-ampo kon ikaw nagabuhat ug mga butang nga nagpasuko kaniya—kon ikaw nagagamit ug mga droga, nanabako, mamati sa malaw-ay nga musika, o nakigbahin sa seksuwal nga imoralidad? Dili gayod. Sa ingon dili dawaton ni Jehova ang mga pag-ampo sa mga tawong may doble ug kinabuhi, sinalingkapaw nga ‘nagatago sa ilang tinuod nga pagkatawo.’ (Salmo 26:4) Siya mamati lamang sa usa nga “nagalakaw nga matul-id ug nagabuhat sa pagkamatarong ug nagasulti sa kamatuoran diha sa iyang kasingkasing.” (Salmo 15:1, 2) Busa kon bation mo nga nagsulti ka lang sa imong kaugalingon dihang mag-ampo ka, susiha ang imong kinabuhi. Tingali nagkinahanglan ka ug mga kausaban.
Mga Pag-abuso sa Pag-ampo
Unsang matanga sa mga butang nga makapangayo ka sa Diyos? Si Jesus nagpasalig kanato: “Kon ikaw mangayo sa Amahan ug bisan unsa kini iyang ihatag kaninyo pinaagi sa akong ngalan.” (Juan 16:23) Pagkamadanihon nga pulong—bisan unsa! Ang Diyos ba andam moalagad sama sa usa ka matang sa higante? Tumanan ka ba niya sa tanan mong hangyo, bisag walay hinungdan? Gipahayag ni Jesus ang iyang mga pulong sa pipila ka oras na lang sa wala pa ang iyang masakit nga kamatayon. Tino nga wala sa iyang hunahuna ang binuang nga mga kabalaka! Busa ang Santiago 4:3 nagpasidaan kanato batok sa pag-abuso sa pag-ampo. Kini nag-ingon: “Kamo nangayo, apan dili makadawat niini, tungod kay kamo nangayo alang sa sayop nga katuyoan, aron inyong gamiton kini sa pagtagbaw sa inyong mga pangibog.”
Daghan karon nagaabuso sa pribilehiyo sa pag-ampo. Ang usa ka tem sa basketbol sa eskuylahan miluhod sa tunga sa dulaanan ug miampo sa matag dula. Apan nagtuo ka ba gayod nga tigmahal ang Diyos ug basketbol o nga ipaubos niya ang iyang kaugalingon aron mag-apil-apil sa maindigong dula? (Itandi ang Galacia 5:26.) O unsay ikasulti bahin sa usa ka babaye nga gitaho nga nag-ampo ug mga sapatos? “May mga panahong ang tindahan ug sapatos may usa o duha ka parisan nga nabilin nga eksakto nako,” siya miingon, “ug kon wala akoy kuwarta nianang higayona, mohangyo ako sa Diyos aron maseguro nga anaa na kini inigbalik nako niini.” Karon, usa ka butang ang pag-ampo sa atong panginahanglan—ug lain nga butang ang paglaom nga ang Diyos maoy mamalit alang kanimo.
Sa susama niini, dili-husto—ug walay-kapuslanan—ang pag-ampo sa Diyos nga ilikay ka sa silot o disiplina nga angay nimo. (Hebreohanon 12:7, 8, 11) Dili usab ka molampos sa pagpangayo sa Diyos nga hatagan ka ug taas nga grado sa eksamin nga niini ikaw wala kaayoy gihimo o walay gihimo agig pagpangandam.—Itandi ang Galacia 6:7.
Mga Pag-ampo “Sumala sa Iyang Kabubut-on”
Si apostol Juan mipatin-aw ug usa ka importanteng punto bahin sa pag-ampo: “Kini mao ang atong nabatonang pagsalig kaniya, nga, kon mangayo kita bisan unsa sumala sa iyang kabubut-on, siya magapatalinghog kanato.” (1 Juan 5:14) Ang sulondang pag-ampo ni Jesus (Pag-ampo sa Ginoo) nag-ilustrar ug pila ka mga butang nga mahimong maapil diha sa usa ka pag-ampo. Siya miampo alang sa (1) pagbalaan sa ngalan sa Diyos, (2) pag-abot sa Gingharian sa Diyos, (3) pagtuman sa kabubut-on sa Diyos, (4) sa pagtagana sa pisikal ug espirituwal nga mga panginahanglan, ug (5) tabang aron malikayan ang mga lit-ag ni Satanas.—Mateo 6:9-13.
Sulod niining basehanan adunay daghang hustong mga ulohan nga iampo. Gani, ang 1 Pedro 5:7 nag-awhag sa mga Kristohanon sa ‘pagtugyan sa tanan nilang kabalaka diha sa Diyos, tungod kay siya may kahingawa man kanila.’ Kana nagkahulogan nga tukmang iampo ang halos tanang bahin sa atong mga kinabuhi. May desisyon ka bang himoon, sama sa pagpili ug imong kurso sa tunghaan? Pag-ampo alang sa balaan nga kaalam. (Santiago 1:5) May nahimo ka bang binuang nga kasaypanan? Nan pangayog pasaylo sa Diyos.—Isaias 55:7; 1 Juan 1:9.
Apan kinahanglang molihok ka uyon sa imong pag-ampo. Palandonga ang bayong nga si Clint. Siya nahimong bug-os panahong ebanghelisador human nga migraduwar sa hayskol (sekondarya). Sulod sa daghang bulan siya walay nakita nga interesado sa pagtuon sa Bibliya. Busa iyang giampo kini. Hinunoa, wala siya maghulat nga dunay mahulog gikan sa langit nga usa ka estudyante sa Bibliya. Siya kuging nagpadayon sa pagpanuktok sa mga pultahan, ug sa ulahi siya nakakitag pipila ka tawo nga malipay sa pagtuon sa Bibliya.
Kon sa Unsang Paagi ang Diyos Motubag
May mga panahong ang buhat sa pag-ampo mismo makatabang. Ang dalagitang si Sandy nakigbisog sa suliran sa masturbasyon. Siya miingon: “Ang pag-ampo ug pagsangpit kang Jehova nakatabang nako tungod kay ako nahibalo nga human ako mohangyo kaniya nga tabangan ako nga dili nako duladulaan ang akong kaugalingong kinatawo, labing maayong dili ko na kana himoon.”
Usahay, hinoon, daw maniobrahon sa Diyos ang mga hitabo sa pagtubag ug mga pag-ampo. Ang bayong nga si Ken kas-a kinahanglang makaabot sa Kingdom Hall sa mga Saksi ni Jehova sa paghatag ug mubong pakigpulong sa Bibliya nga siya gitudlo. Makasubo, walay usa ang anaa sa kahimtang sa pagpasakay kaniya. Iyang giampo kini sa kinasingkasing. Sa pipila ka minutos sa ulahi ang iyang igsoong babaye, nga panagsa rang moduaw, miabot. Bisag dili interesado sa iyang relihiyon, iyang gihatod siya. Usa ka direktang tubag sa iyang pag-ampo? Tingali. Bisan hain niini, maayo gayod nga pasalamatan ang Diyos kon maayo ang lakat sa mga butang alang kanato. Si Pablo mitambag: “Magmapasalamaton kamo sa tanang higayon.”—1 Tesalonica 5:18.
Hinunoa, ayaw pagdahom nga tubagon sa Diyos ang imong mga pag-ampo sa madulaong paagi. Ni inyong hatagag kahulogan ang tanang gagmayng mga butang nga mahitabo kanimo ingong pagpakita sa kabubut-on sa Diyos. Ang atong mga pag-ampo kasagaran ginatubag sa dili-direktang paagi: Ikaw makabasag usa ka butang diha sa Bibliya o literatura sa Bibliya; usa ka ginikanan o kaubang Kristohanon mohatag kanimo ug maayong tambag. Sa pagkamatuod, nagkinahanglag pagsabot ang pagtino kon unsa ang kabubut-on sa Diyos alang kanimo. Ang mga butang masulbad ra sa ulahi.
Oo, panahon! Ayaw paglaom nga tubagon ka sa Diyos kon bation mo nga siya angay motubag. “Maayo alang sa tawo ang magapaabot, sa kahilom, sa kaluwasan ni Jehova,” misulat si Jeremias. (Lamentaciones 3:26) Dugang pa, ikaw wala pasaligi nga makadawat ug tubag nga imong gusto. Mihangyo si apostol Pablo sa Diyos tulo ka higayon sa pagkuha sa suliran nga iyang gitawag “usa ka tunok sa unod.” Ang tubag sa Diyos maoy dili. (2 Corinto 12:7-9) Si Pablo wala, hinunoa, mawad-i sa iyang apresasyon alang sa gasa sa pag-ampo apan nagpadayon sa pag-alagad kang Jehova. Siya ang misulat: “Lumahutay kamo sa pag-ampo.” (Colosas 4:2) Busa “padayon sa pagpangayo, . . . padayon sa pagpangita, ug . . . padayon sa pagpanuktok.” (Mateo 7:7) Ikaw masuod sa Diyos pinaagi sa pagbuhat niini, ug ikaw hayan makadawat sa mga tubag sa imong mga pag-ampo.
[Mga hulagway sa panid 15]
Dili angay nga iapil sa pag-ampo ang walay hinungdang mga hangyo sa materyal nga mga panginahanglan