Usa ka Bag-ong Kalibotan nga Magtagbaw sa Tanan
BISAG malisod kining tuohan, ang usa ka bag-ong kalibotan sa pagkatinuod haduol na. Kini moabot sa tukmang panahon sa pagluwas sa atong kalibotan sa dili pa ang katakos niini sa pagsustento sa kinabuhi sa bug-os malaglag. Ug kining bag-ong kalibotan magwagtang sa tanang mga kapeligrohan nga nagahulga sa paglungtad sa tawo. Sa unsang paagi kini pagabuhaton?
Human sa paghisgot sa kalisod sa kahimtang sa kalibotan, ang manalaysay nga si Arnold J. Toynbee sa katuigang milabay misukna: “Unsay atong buhaton aron kita maluwas?” Agig tubag sa iyang kaugalingong pangutana, siya miingon: “Diha sa politika, sa pagtukod ug usa ka konstitusyonal nga kooperatiba nga sistema sa kagamhanan sa kalibotan.”
Apan, bisag usa ka “kooperatiba nga sistema,” ang umaabot nga bag-ong kalibotan dili makita “diha sa politika.” Kini dili mosagop sa demokrasiya o sa bisan unsang hinimog-tawo politikanhong ideolohiya. Kining bag-ong kalibotan makakab-ot sa mga tumong niini tungod kay usa lamang ka kagamhanan ang magmando ibabaw niini. Diha sa katingalahang mga serye sa mga lihok, wagtangon niining tibuok-kalibotang kagamhanan dihadiha ang tanang mga problema nga ginaatubang sa katawhan karong adlawa. Sa unsang paagi? Pinaagi sa pagwagtang sa mga hinungdan niining mga problemaha ug sa mga babag nga sa subsob nagapakyas sa mga paningkamot sa pagtul-id niini.
Sa pagkatinuod, sa unsang paagi kana molampos? Dili ba ang dihingpit nga mga tawo mao gihapon ang magmando, mga tawo nga napamatud-ang limbongan ug walay-katakos sa pagsulbad sa mga problema sa katawhan? Buweno, palandonga lamang kon adunay hingpit nga mga magmamando niini nga kagamhanan sa kalibotan, nga ang ilang gihunahuna mao lamang ang di-mahakogong mga kaayohan sa ilang mga sakop. Unya palandonga kon sa unsang paagi masulbad ang mga problema.
Dungan nga mga Kasulbaran
Uban ang usa ka tibuok-kalibotang kagamhanan sa hingpit nga mga magmamando, wala na unyay usa ka nasod ug iyang partikular nga porma sa kagamhanan ang maglungtad. Ang mga estadista, mga embahador, ug ubang mga politiko wala na unyay gahom ibabaw sa daghang nasyonalidad, mga tribo, ug mga rasa sa katawhan. Daghang lokal ug mga kaulohan sa nasod, uban sa mga tinukod niini ug sa opisyal nga mga puy-anan, dili na kinahanglan. Kini magtapos sa gastoso nga pag-atiman sa maong mga tinukod, ingon man sa mga gasto sa pagbiyahe sa mga opisyal sa pagtambong sa mga sesyon, mga miting sa komite, ug nasodnon ug mga komperensiya sa kadagkoan sa nasod. Mawala na, usab, ang tanang usikang mga burokrasya sa kagamhanan, uban sa ilang daghang mga asistant, mga sekretaryo, ug mga klerk, uban sa kuskus-balungos nga makababag sa kauswagan.
Ang kalinaw mahimong usa ka kamatuoran tungod kay ang makapabahin nga nasyonalismo mahanaw na, nga pagapulihan sa nahiusang awtoridad sa tibuok-kalibotan. Ang kasundalohan sa yuta, sa dagat, ug sa kahanginan, uban sa tanan nilang mga hinagiban, mga sakop sa taas-ug-ranggo nga mga komander, ug luyoluyong mga opisyal, dili na unya kinahanglan sa pagpanalipod sa soberanya sa matag nasod. Ni may maglungtad pa unya nga mga sistema sa pagpangespiya. Ubos sa usa ka tibuok-kalibotang kagamhanan nga may hingpit nga mga magmamando, wala na unyay bukas o tinagong mga baligyaanan diin ang mga hinagiban mahimong paliton o ibaligya; ni aduna pay bisan unsang mga teritoryo nga pagailogan. Ang tanang mga tawo sa yuta mahimong usa ka dili-mabahing panag-igsoonay. Busa, ang nasyonalismo mahanaw.
Palandonga pa ang dugang mga kaayohan nga pahimuslan sa mga tawo ubos sa usa ka dili-mabahing kagamhanan nga may hingpit nga mga magmamando. Ang gamhanang mga negosyante, sama sa mga tighimog mga armas, dili na makaimpluwensiya sa mga politiko aron sila makapadayon sa paggama ug pagbaligya sa ilang makalaglag nga mga produkto. Wala na unyay abtik nga mga tig-impluwensiya nga nagamaniobra sa mga opisyal alang sa pipila ka balaod o balaodnon nga nagaapektar sa kaugalingong kaayohan lamang; wala nay gubot linain nga mga departamento sa kagamhanan nga nagalihok sa magkaatbang nga katuyoan, nagagasto ug dakong kantidad sa salapi diha sa walay-hinungdang mga proyekto nga makabenepisyo lamang sa pipila; wala nay mobabag sa mga balaod sa pagwagtang sa mga problema sa polusyon alang sa hinakog komersiyal nga mga katarongan (aron modako ang ganansiya); wala nay mosanta sa mga balaod nga mopanalipod sa nameligrong mga espisye tungod sa gamhanan linain nga mga interes.
Ubang mga Problema Masulbad
Ang maong hingpit nga kagamhanan sa kalibotan dili motugot sa inhustisya. Sa dihang momando na, tinoon niini nga ang kriminal nga mga buhat atubangon sa husto, matarong nga paagi. Busa, ang mga lungsoranon mahigawas gikan sa kahadlok nga tingalig magpadayon ang dugang peligrosong mga mamumuno sa pagpamatay.
Ug unsay ikasulti bahin sa tibuok-kalibotang sistema sa organisadong mga sindikato sa krimen ug sa gamhanang ilegal nga mga organisasyon sa droga? Ang hingpit nga kagamhanan sa kalibotan bug-os nga motapos niini. Ang mga balaod sa nasod nga nagdili sa pagtugyan sa kriminal diha sa langyawng hukmanan dili na mahimong luwas nga dangpanan alang nianang internasyonal nga mga kriminal. Ang inabtik nga paggamit ug mga lutsanan sa lokal nga mga balaod ug ang impluwensiyadong mga koneksiyon sa politika niining mga malapason sa balaod mahimong butang na unya sa nangagi. Ang usa ka buhat sa pagpapha sa krimen magpapha usab sa yuta sa daghang ubang sakit sa katilingban, sama sa sugal, mga panag-away sa gang, pornograpiya, prostitusyon, ug kontrabando. Pagkaepisyente ug madaginotong kasulbaran!
Oo, ang tanang komplikado, makalibog, ug tunokong mga suliran nga nakapakutaw sa hunahuna sa labing lantip nga mga kaisipan sa katawhan karong adlawa bug-os nga masulbad diha nianang bag-ong kalibotan. Ug ang matag usa matul-id sa dayon—sa kataposan. Ang mosunod nga mga kaliwatan dili na gayod mag-antos pa niana pag-usab.
Dili kay Usa Lamang ka Pangandoy
‘Apan,’ ikaw tingali mangutana, ‘asa gikan ang hingpit nga mga magmamando sa pagmando ibabaw nianang usa ka bag-ong kalibotan?’ Ang Maglalalang sa tawo ang motagana kanila! Kini ba daw dili katuohan? Buweno, palandonga lamang: Kon ikaw dunay gahom sa pagbuhat niana, dili mo ba taposon ang tanang mga kahimtang sa yuta nga nagapahinabog hilabihang kalisod? Siyempre buhaton nimo kana! Nan, angay ba natong hunahunaon nga ang atong Maglalalang dili mobuhat niana?
Ang tinuod mao, maoy katuyoan sa atong mahigugmaong Maglalalang ang paglalang ug usa ka bag-ong kalibotan, ug ang paagi sa pagpalampos niana mao ang usa ka matarong nga kagamhanan sa kalibotan. Kini mao ang gitudlo sa iyang Anak, si Jesu-Kristo ngadto sa mga tawo nga maoy iampo uban niining mga pulonga: “Paanhia ang imong gingharian. Pagabuhaton unta ang imong kabubut-on, sa langit, maingon man usab sa yuta.”—Mateo 6:10.
Kana nga Gingharian maoy usa ka tinuod nga kagamhanan, usa ka kagamhanan sa kalibotan. Ang Hari niini, si Jesu-Kristo, “adunay mga sakop gikan sa dagat ngadto sa laing dagat ug gikan sa Suba ngadto sa mga kinatumyan sa yuta.” (Salmo 72:8) Ug pulihan niini sa dili madugay ang tanang tawhanong mga kagamhanan, ingon sa gisaad sa Pulong sa Diyos sa dihang kini miingon: “Sa mga adlaw nianang mga haria ang Diyos sa langit magatukod ug usa ka gingharian [ang kagamhanan nga pagamandoan pinaagi sa Hari sa Diyos, si Jesu-Kristo] nga dili gayod malumpag. Ug ang gingharian mismo dili mahibilin sa lain nga katawhan. Kini magadugmok ug magaut-ot niining tanang mga gingharian [karon], ug kini molungtad sa walay kataposan.”—Daniel 2:44.
Sanglit kini nga kagamhanan sa kalibotan nga gitukod sa Diyos sa langit pagamandoan sa labaw-tawhanong mga magmamando, kini magatuman sa tanang maayong mga butang nga wala mahimo sa tawhanong mga magmamando. Ang Bibliya naghubit sa kagamhanan sa Diyos ingong usa ka kagamhanan sa langit nga pagalangkoban ug Hari, si Jesu-Kristo, nga abagan sa mga membro nga 144,000 espiritung mga persona. Kining tanang mga magmamando maoy kasaligang mga tawo nga nagpakitag hingpit nga pagkamaunongon sa panahon sa ilang pagkinabuhi sa yuta sa wala pa sila banhawa ngadto sa kinabuhi sa langit. Silang tanan anaa sa labing maayong kahimtang sa pagbuhat alang sa kaayohan sa katawhan tungod kay ilang nasinati ang mga panginahanglan sa mga tawo samtang sila nagkinabuhi sa yuta.—Pinadayag 14:1-3.
Hunahunaa ang mga problema nga wad-on niini. Tungod kay dili-mamatay, kining espiritu nga mga magmamando dili gayod kapuyan o mamatay. (1 Corinto 15:50, 53) Ug sila dili-kahiphipan pinaagi sa mga tentasyon sa pagtuis sa hustisya o magpakitag paboritismo baylo sa mga gasa. Kon hunahunaon, unsay ikahatag sa usa ka tawo sa tago ingong hiphip ngadto sa usa ka dili-mamatay espiritu nga persona? Salapi, usa ka kahon sa mahalong bino, usa ka biyahe ngadto sa usa ka langyawng isla, o mga tiket sa usa ka pasundayag o konsiyerto? Kining materyal nga mga butang makahaylo sa unod ug dugo apan dili niining espiritu nga mga linalang. Busa ang mga tawo nga mandoan niini nga mga magmamando dili mag-antos sa korapsiyon sa mga kagamhanan nga komun kaayo karong adlawa.
Ang Bag-ong Kalibotan Motagbaw Kanimo
Ikaw ba tigulang na nga tawo? Hunahunaa ang tanang kahibalo, katakos, ug kasinatian nga imong nabatonan sa daghang katuigan. Apan nakamatikod ka ba nga samtang ang imong hunahuna o mental nga katakos tingali maayo pa, adunay inanay apan padayong pagpangaluya sa imong pisikal nga katakos? Ang imong lawas dili na mosanong sa mga mando sa imong hunahuna sama sa mahimo niini kaniadto. Oo, ang imong mga kaigmat nagakahanaw, ang imong kusog nagakahinay, ug ang imong paglahutay nagakawala. Ang imong panan-aw ug pandungog nagakadaot ug ang imong kaunoran nagakaluya samtang ang bationg mga kasakit nagakasubsob.
Apan sulayi paghanduraw ang kaalam nga nabatonan mo sa molabay ang daghang mga tuig sa kinabuhi sulod sa usa ka batan-ong lawas nga mas maayo pa kay sa nabatonan mo sa dihang ikaw nagpanuigong 20—oo, ang imong pisikal nga mga katakos mahimong sama ka maayo sa imong hunahuna. Handurawa ang daghang mga butang nga imong mahimo uban sa imong mahimsog nga lawas! Aw, uban nianang mahimsog nga panglawas nga mosanong sa imong hamtong nga kaisipan, imong makaplagan nga ang bisan unsang trabaho nga imong pagabuhaton makalingaw kaayo. Ang imong kasinatian makaarang kanimo sa pagbuhat ug mga butang nga mas episyente, nga makadugang gayod sa imong katagbawan. Ug kon ikaw usa ka batan-on, handurawa ang kalipay nga mahuptan mo ang imong pagkabatan-on ug kalig-on samtang nagabaton ug kaalam, kahibalo, ug kasinatian sa walay kataposan.
Karon, lakang pa ug diyutay, ug hunahunaa ang imong mga katalirongan ug mga higala, kaubanan ug mga paryente, ang tanan anaa sa sama nga kahimtang. Handurawa kon unsay mahimo ninyong tanan diha sa paagi sa konstruksiyon, pagtukod, o sa mga buhat sa kamot. Oh, pagkakahibulongang mga palaaboton unya kini alang sa abilidaran nga mga tawo, sama sa mga tawo sa arte, musikero, tigdesinyo, tigpatahom sa palibot, hardinero, ug mga botanista! Ang ilang mga obra katingalahan unya. Ang matahom nga mga dibuho, balay, hardin, parke—oo, ang paggamag maayong mga instrumento sa musika ug ang arte sa pagpahanas niini maoy pipila lamang.
Usa sa mga tumong niining bag-ong kagamhanan mao ang pagpabalik sa tawhanong rasa ngadto sa kahingpitan sa panglawas. Ang imong panan-aw, pandungog, ug ubang mga sentido magaobra sa labing maayo niini. Hangtod kanus-a? Buweno, kon tanyagan ka sa tawhanong kagamhanan ug tambal nga nagagarantiya ug 50-porsiento nga pagbag-o sa tanang obra sa imong lawas alang sa usa ka tuig sa gamayng kantidad lamang, dili ka ba mouna sa linya aron makadawat nianang maong pagtambal? Kining bag-ong kagamhanan nagagarantiya ug bug-os, 100-porsiento nga pagkauli sa maayong panglawas nga libre—dili lamang sa usa ka tuig, 5 ka tuig, o 50 ka tuig, kondili sa walay kataposan.
Ayaw isalikway ingong dili-katuohan kining kahibulongang palaaboton nga tinong matagamtaman sa mga tawo niining yutaa mismo. Palandonga, diha sa mga panid 7 ngadto sa 10, ang pipila ka panalangin nga matagamtaman sa mga mahigugmaon sa Diyos.
[Kahon/Mga hulagway sa panid 7-10]
Kon Unsay Ipatungha sa Bag-ong Kalibotan
Wala nay Krimen ug Kabangisan
“Mahitungod sa mga daotan, sila pagaputlon gikan sa yuta.”—Proverbio 2:22.
Wala nay Gubat
“Ang ilang mga espada ilang himoon nga mga punta sa daro ug ang ilang mga bangkaw himoon nga mga galab. Usa ka nasod dili mobakyaw sa espada batok sa usa ka nasod, ni makakat-on pa sila sa gubat.”—Isaias 2:4.
Daghang Lamiang Pagkaon sa Tanan
“Aduna unyay daghang trigo sa yuta; sa tumoy sa kabukiran adunay pag-awas.”—Salmo 72:16.
Maayong mga Balay ug Makapahimuot nga Buluhaton sa Tanan
“Sila magatukod ug mga balay ug magapuyo niana . . . Sila dili magatukod ug lain ang magapuyo; sila dili magatanom ug lain ang magakaon.”—Isaias 65:21, 22.
Pakigdait sa Katawhan ug Kahayopan
“Ang lobo mopuyo sa makadiyut uban sa laki nga karnero, ug uban sa nating kanding mohigda ang leopardo, . . . ug ang bata nga gamay maoy magamando kanila.”—Isaias 11:6.
Wala nay Sakit, Pagkatigulang, o Kamatayon
“Ug iyang pagapahiran ang tanang luha gikan sa ilang mga mata, ug ang kamatayon mawala na, ni may pagbalata ni paghilak ni kasakit pa. Ang unang mga butang miagi na.”—Pinadayag 21:4.
Banhawon ang mga Minahal nga Nangamatay
“Ang takna nagsingabot na nga ang tanang anaa sa handumanang lubnganan makabati sa iyang tingog [Jesus] ug manggula.”—Juan 5:28, 29.