Pilia ang Kinabuhi Diha Nianang Bag-ong Kalibotan
DAYAG, ang Diyos may katuyoan sa paglalang niining talagsaon gamayng mutya nga planeta. Ug iyang gimbut-an nga ang katawhan magadula ug usa ka pangunang papel diha niana. (Isaias 45:18) Ang makalilisang nga kahimtang nga gidangatan sa atong yuta wala makahatag ug pasidungog sa Diyos. Apan nagatuo ka ba gayod nga tugotan niya kining situwasyona nga magpadayon? Dili gayod!
Ang pagpangandoy sa tawo ug usa ka bag-ong kalibotan sa pagkatinuod maoy pagsanong alang sa kahidlaw sa usa ka butang nga kas-a nabatonan sa tawo. Kadto maoy usa ka tinuod, aktuwal, yutan-on nga paraiso. Ang unang tawhanong magtiayon gibutang diha sa maong pinuy-anan, ug kadto maoy orihinal nga katuyoan sa Maglalalang nga matagamtam sa katawhan kana nga Paraiso sa walay kataposan.—Genesis 1:28.
Si Jehova nga Diyos karon nagatanyag kanimo ug usa ka higayon alang sa kinabuhi diha sa iyang bag-ong kalibotan, diin iyang panalanginan ang matinumanong mga tawo sa mga tinguha sa ilang mga kasingkasing. (Salmo 10:17; 27:4) Pilion ba nimo ang pagpuyo didto?
Ikaw Dunay Kapilian
Ang mga Israelinhon nga nakadungog sa panamilit nga pakigpulong ni Moises mihimo ug sama nga desisyon. Sila kinahanglang mopili sa pagmando sa Diyos o sa pagmando sa mga nasod niadtong panahona. Ania ang tambag ni Moises: “Gibutang ko sa imong atubangan ang kinabuhi ug ang kamatayon . . . Pilia ang kinabuhi aron mabuhi ikaw, ikaw ug ang imong kaliwatan, pinaagi sa paghigugma kang Jehova nga imong Diyos, pinaagi sa pagpamati sa iyang tingog ug pinaagi sa pagtapot kaniya.” (Deuteronomio 30:19, 20) Oo, nalangkit usab sa imong pagpili ang kinabuhi-ug-kamatayon.
Maoy hinungdan nga kining mga artikuloha bahin sa bag-ong kalibotan sa Diyos gipatik—sa pagtandog sa imong kasingkasing aron nga imong pilion kini inay ibutang ang imong paglaom diha sa kawang nga mga saad sa mga tawo sa pagtukod ug usa ka bag-ong kalibotan. Adunay daghang kahibulongang mga butang nga kinahanglan mong makat-onan mahitungod sa bag-ong kalibotan sa Diyos.
Pananglitan, unsay pamatuod nga kining bag-ong kalibotan haduol na? Sa unsang paagi mopuli kini sa tanang mga kagamhanan sa yuta? Unsang mga panghitabo ang motultol ngadto niana? Sa unsang paagi kita makatino nga ang mga saad sa Bibliya matuman?
Ang mga tubag niining mga pangutanaha ug ang daghan pang uban mabatonan. Ang mga Saksi ni Jehova malipay sa pagpakita kanimo sa mga bersikulo diha sa imong kopya sa Bibliya nga wala lamang maghubit sa mga panalangin sa bag-ong kalibotan sa Diyos kondili usab magpakita kon kanus-a ug sa unsang paagi ang kagamhanan sa Diyos magsugod sa iyang pagmando ug sa kataposan ipakaylap kana nga pagmando sa tibuok kalibotan.
Ikaw giagda sa pagsanong sama sa mga taga-Berea sa unang siglo kinsa mipatalinghog kang apostol Pablo. Sila migugol ug panahon nga “mainampingong nagsusi sa Kasulatan adlaw-adlaw kon tinuod ba kining mga butanga.” (Buhat 17:11) Sa pagkamaalamon, angay usab nimo kanang buhaton. Makasalig ka nga ang imong mga panaghisgot sa Bibliya uban sa mga Saksi ni Jehova mohatag kanimo ug dakong espirituwal nga katagbawan samtang imong makat-onan ang makapalipay nga umaabot nga gisaad sa Diyos kanato.
Ikaw kinahanglang magpili—kon kaha sa pag-alagad sa Diyos ug sa mga intereses sa iyang kagamhanang Gingharian o sa pagbutang sa imong pagsalig ug paglaom sa tawhanong mga paningkamot sa pagmando sa ilang kaugalingon. Among gidasig ka sa pagtuon kutob sa imong maarangan mahitungod sa mga saad sa Diyos aron ang imong desisyon maoy usa ka desisyon sa kahibalo. Ang pagbaton sa kahibalo sa Bibliya dili lamang magpabuhi sa imong paglaom alang sa umaabot kondili motabang usab kanimo nga huptang buhi ang imong espirituwalidad hangtod sa kataposang mga adlaw sa pagmando sa tawo.—2 Timoteo 1:13.
Ang daghang katuigan sa pagpangandoy sa tawo ug usa ka bag-ong kalibotan hapit nang matapos. Maoy tinguha sa mga Saksi ni Jehova nga ikaw makasulod ngadto nianang bag-ong kalibotan ug tagamtamon ang kinabuhing walay kataposan. Mao usab kanay tinguha sa Diyos. Tim-os nga gilaoman nga imong pilion ang bag-ong kalibotan sa Diyos. Kon buhaton mo kana, nan imong makita nga ang pangandoy sa katawhan ug usa ka bag-ong kalibotan dili gayod kawang.