Ang Hunahuna sa Bibliya

Ang Tanang Relihiyosong Piyesta Makapahimuot ba sa Diyos?

Ang mga matinuohon, 20,000 ang gidaghanon, nagselebrar ug espesyal nga Misa sa plasa sa siyudad. Pagkahuman sa serbisyo, nagsugod ang prosisyon. Ang panon sa mga magsisimba miusbaw karon sa 60,000 ka tawo, nga mingsubay sa kadalanan, ang tanan nagsunod sa imahen sa Nossa Senhora Aparecida, ang patron nga “santa” sa Brazil. Pagkaudto, ang makabungog nga lagapak nadungog duol sa sangtuwaryo samtang gisugdan sa peregrino ang pasundayag sa nangidlap nga kuwitis.

ANG ingong relihiyosong mga piyesta uban sa ilang mga prosisyon maoy kasagaran sa daghang mga nasod. Apan unsay modasig sa panonpanon sa mga tawo sa pagkuyog sa mga prosisyon? Ang tradisyon ug debosyon maoy duha sa pangunang mga panukmod alang sa mga Katoliko, mga Buddhista, ug kadtong sakop sa ubang relihiyosong mga tinuohan. Dugang pa, sama sa nangagi, ang kalingawan tingali usa ka hinungdanong elemento. Ang The World Book Encyclopedia nag-ingon nga sa edad media “daghang relihiyosong mga piyesta nagpasiugda sa lulinghayaw. Kana sila nagpahinabo sa mga tawo sa pagkalimot sa kalisdanan sa matag-adlaw nila nga kinabuhi.” Sagad nga kana tinuod usab karong adlawa. Pananglitan, ang Salvador, Brazil, maoy ilado sa iyang relihiyoso ug popular nga mga piyesta, kay nagsambog sa mistisismo ug kasadyaan diha sa lainlaing mga selebrasyon ug mga hudyaka nga mosangko sa karnabal. Apan, bisan pag masadyaon tingali ang pila ka relihiyosong prosisyon, ang uban maoy solemne.

“Nga kuyog sa imahen ug sa mga pari, ang pipila nag-awit ug usa ka himno samtang ang uban sa kawalay timik nagsunod,” matud sa usa ka bisita ngadto sa kasagarang prosisyon sa Brazil. “Apan ang mipatigbabaw sa talan-awon mao ang kaseryoso, o kamasub-anon hinuon, nga daw ang panon mitambong sa usa ka paglubong.” Ug si Lúcio, nga gikan sa amihanang bahin sa Brazil, miingon: “Sama sa akong gihimo kas-a, ang mga tawo nangita intawon ug tambal o solusyon sa pamilyahanon o pinansiyal nga mga suliran. Kasagaran ang debosyon ngadto sa patron nga ‘santos’ nagalakip sa paghalok sa imahen, pagsaka sa hagdan nga nagluhod, o pagbaklay ug lagyong mga distansiya nga naglukdog bato.”

Ang ingong gipaagom-sa-kaugalingon nga mga pagsakripisyo tingali daw katingad-anan sa mga dili-magtutuo. Apan, gibati sa mga sumasalmot nga sila nagapahimuot sa Diyos. Apan tinuod ba? Buligan kita sa Bibliya sa pagsabot kon kaha ang ingong relihiyosong mga piyesta ug mga prosisyon makapahimuot sa Diyos o dili.

Modala ba Kana sa Pag-uyon sa Diyos?

Ang kasaysayan nagtug-an kanato nga ang karaang Israel nagsaulog sa tinuig ug panapanahong mga piyesta uban ang kasadya. Kadtong mga piyestaha nagpasidungog kang Jehova nga Diyos. (Deuteronomio 16:14, 15) Mahitungod sa Biblikanhong mga piyesta, ang The Illustrated Bible Dictionary nag-ingon: “Kinasingkasing ang kalipay nga gipahayag. Ang relihiyosong panaad nahiangay sa pagkalipay sa mga butang sa kalibotan nga giisip nga mga regalo sa Diyos.” Bisan pa sa relihiyosong mga saulog, ang mga saserdote ug ang katawhan sa Israel nagpabaya sa ilang espirituwalidad. (Isaias 1:15-17; Mateo 23:23) Ugaling lang, ang pangutana karon mao, Ang relihiyosong mga prosisyon ba bahin sa Kristiyanidad sa unang-siglo?

Bisan tuod si Jesu-Kristo misaulog ug pila ka Hudiyohanong mga piyesta, si Jesus o iyang mga apostoles wala magpasiugda ug relihiyosong mga prosisyon. Ang The Encyclopædia Britannica nag-ingon: “Ang mga prosisyon morag nauso na lamang tapos gayod nga giila ni Constantino ang Kristiyanidad ingon nga relihiyon sa imperyo sa ika-4 nga siglo.” Ug ang The World Book Encyclopedia nag-ingon: “Ang mga piyesta sa simbahan [uban sa ilang mga prosisyon] maoy mipuli sa daghang paganong mga kustombre, nga naghatag kanilag bag-ong mga kahulogan.”

Ang mga Kristohanon dili obligado sa pagduyog sa maong relihiyosong mga piyesta ug mga prosisyon. Sa pagtumong sa mga piyesta nga gibaod sa Kasugoan sa Diyos ngadto sa karaang Israel, si apostol Pablo misulat: “Ayaw itugot nga may tawo nga magahukom kaninyo sa pagkaon ug pag-inom o mahitungod sa usa ka piyesta o pagbantay sa bag-ong bulan o sa igpapahulay; kay kanang mga butanga maoy landong sa mga butang umaabot, apan ang katumanan iya ni Kristo.” (Colosas 2:16, 17) Ang mga Kristohanon sa Colosas dili magtugot nga may magahukom sa ilang pagbarog atubangan sa Diyos pinasukad sa pagsaulog sa mga piyesta sa Moisesnong Kasugoan.

Butang Mas Maayo Kay sa mga Prosisyon

Ang pagpaila sa mga taga-Colosas sa ilang Kristohanong pagtuo pinaagi sa rituwal maoy pagsibog sa ilang pagtuo. Ang pangatarongan ni Pablo mao, Nganong sundon lamang ang landong sa kamatuoran? Ang tinuod nga kamatuoran maoy diha kang Kristo. Busa, ang paghawid sa matagnaong landong mao ang pagsalimbong sa espirituwal nga kamatuoran nga gipunting nianang mga butanga. Ngano? Kay, sumala pa ni Pablo, “ang kamatuoran iya ni Kristo.” Busa, kanang relihiyosong mga pagsaulog karong adlawa dili bahin sa tinuod Kristohanong pagsimba.

Busa, wala ibaod sa mga Kristohanon ang pagsaulog niining mga kustombreha nga may balaang kagikan, ug walay duhaduha nga kinahanglan nilang likayan ang mga piyesta nga paganog sinugdanan, nga mahimong maglangkit sa paggamit sa mga imahen ug mga paghudyaka. (Salmo 115:4-8) Si apostol Pablo nagpasidaan: “Ayaw kamo pagpayugo nga dili magkaangay uban sa mga dili-magtutuo. Kay unsang panag-uban ang nabatonan sa pagkamatarong ug sa pagkamalapason? O unsang panag-ambit ang nabatonan sa kahayag uban sa kangitngitan? Dugang pa, unsang panag-uyon ang anaa tali kang Kristo ug kang Belial?” (2 Corinto 6:14, 15) Sa laing mga pulong, kon buot natong pahimut-an ang Diyos, kita dili makasagol sa matuod nga pagsimba uban sa bakak. Sa unsang paagi nga dili kita manumbaling sa kabubut-on sa Diyos ug sa gihapon makapahimuot kaniya?​—Mateo 7:21.

Dili, ang Diyos dili mouyon sa paganong relihiyosong mga piyesta uban sa ilang mga prosisyon. Ngani, sila mangahanaw uban sa tanang kustombre nga nagapasipala kang Jehova, sumala sa gitagna diha sa Pulong sa Diyos. Sa Pinadayag 18:21, 22, ang bakak nga relihiyon ug iyang mga tulomanon gilambiggit sa paganong siyudad sa Babilonya. Mabasa kini: “Usa ka kusgang manulonda mialsa ug usa ka bato nga sama sa usa ka dakong galingan ug gitambog kadto sa dagat, nga nag-ingon: ‘Busa pinaagi sa ingon nga katulin ang Babilonya nga bantogang siyudad igatambog, ug siya dili na gayod hikaplagan pag-usab. Ug ang tingog sa mga mag-aawit nga nagduyog sa ilang kaugalingon sa alpa ug sa mga maghohoni ug sa mga magpaplawta ug sa mga tigtrompeta dili na gayod igdungog pag-usab.’” Kay nahibalo nga ang Babilonyanhong relihiyosong mga piyesta dili makapahimuot sa Diyos, unsay imong buhaton?

Handurawa nga ikaw nagabiyahe paingon sa usa ka importanteng destinasyon ug nahisalaag ka. Kon adunay usa nga sa kamaluluton motudlo kanimo kon unsaon pag-abot nga luwas sa imong destinasyon, dili ka ba magpasalamat tungod kay nakakaplag sa hustong dalan? Sa susamang paagi, kay nahibalo na kon unsay pag-isip sa Diyos sa relihiyosong mga prosisyon, nganong dili susihon sa dugang ang iyang Pulong aron sa pagtino kon unsay makapahimuot kaniya? Ang paglihok pinasukad sa imong nakat-onan gikan sa Bibliya moabag ngadto sa usa ka maayong relasyon uban sa Diyos​—nga labi pang maayo kay sa pagsaulog sa relihiyosong mga piyesta ug mga prosisyon.​—Juan 17:3.

[Picture Credit Line sa panid 20]

Olandes nga prosisyon sa Kuwaresma, Harper’s, ika-19ng siglo